پلانێکی شەرع دژی هەسەدە شکستی هێنا

هاوڵاتی توركیا رۆژ نییە چەندین شاروچكەو گوندە سنورییەكان تۆپباران نەكات. لەماوەی هەفتەی رابردوودا، تۆپخانەكانی سوپای توركیا لەبارەگاكانی سەر سنورەوە، بەدەیان جار گوندەكانی، تەل تەمر، گرێ سپی، كۆبانێ، عەین عیسا، كانتۆنی شەهباو شاروچكەی منبجیان تۆپباران كردووە. قوربانی سەرەكی هێرشەكانی توركیا هاووڵاتیانی مەدەنین كەبەشێكیان لەكەمپەكانی رۆژئاوای كوردستاندا دەژین و مەترسی جارێكی دیكە ئاوارەبوونیان لەسەرە.   لەمانگێكدا ١٦ هاووڵاتی بەهۆی تۆپباران و بۆردومانی توركیاوە كوژراون هێرشەكانی چەندڕۆژی رابردووی توركیا، چەندین زیانی گیانی و ماددی لێكەوتووەتەوە. رۆژی ١٧ی كانونی یەكەم، گوندی رەقاسی كۆبانێ بەچڕی تۆپباران كرا. ناوەندی راگەیاندنی هێزەكانی سوریای دیموكرات (هەسەدە)، لەبارەی تۆپبارانەكان راگەیەندراوێكی بڵاوكردەوەو ئاشكرایكرد، لەهێرشەكەدا سێ هاووڵاتی كوژراون كەیەكێكیان منداڵێكی ١٢ ساڵە. راشیگەیاند: لەماوەی مانگێكدا كەهێرشەكانی دەوڵەتی توركیا بەچڕی لەبەرامبەر رۆژئاوای كوردستان دەستیپێكردووە، ١٦ هاووڵاتی مەدەنی كوژراون. دوای زیاتر لەمانگێك لەتۆپباران و بۆردومانی توركیا بۆ سەر رۆژئاوای كوردستان كە رووبەڕووی ناڕەزایەتی زلهێزە ناوچەیی و جیهانییەكان بووەوە، توركیا تاكتیكی خۆی بۆ دژایەتیكردنی كوردانی رۆژئاوای كوردستان گۆڕیوە. بەرپرسانی حكومەتی توركیا بەبەردەوامی رایدەگەیەنن كەدەیانەوێت لەگەڵ بەشار ئەسەد سەرۆكی سوریا گفتوگۆ بكەن و كێشەكانی نێوانیان چارەسەر بكەن. مەولود چاوشئۆغلۆ وەزیری دەرەوەی توركیا لەمبارەیەوە رایگەیاند، لەسەر ئاستی هەواڵگری، چەندین كۆبوونەوە لەنێوان ئەنقەرەو دیمەشق ئەنجامدراون و وتی: «ئەگەر حكومەتی دیمەشق لەپرسی «تیرۆر» هاوكاریمان بكات، ئامادەن دەست بەدانوستانی راستەوخۆ بۆ گەڕاندنەوەی پەنابەران بكەن، بەپێچەوانەوە، توركیا دانوستانەكان رەتدەكاتەوە». دواتر، رەجەب تەیب ئەردۆغان سەرۆك كۆماری توركیا لەكۆنفڕانسێكی رۆژنامەوانیدا كە لەتوركمانستان دەگەڕایەوە، ئەوەی خستەڕوو كە ڤلادیمیر پوتین سەرۆكی روسیا پێشنیازیكردووە كە كۆبوونەویەكی سێقۆڵی لەنێوان ئەردۆغان و بەشار ئەسەد سەرۆكی سوریا، بەئامادەبوونی ڤلادیمیر پوتین ئەنجامبدرێت. ئەردۆغان دیسانەوە نیازی ئاساییكردنەوەی پەیوەندیەكانی لەگەڵ حكومەتی دیمەشق ئاشكراكردو وتی، «دەیەوێت لەگەڵ پوتین و ئەسەد بۆ بەرەنگاربوونەوەی «تیرۆر» پەیوەندیەكانیان باش بكەنەوە».   حكومەتی دیمەشق گەمارۆ دەخاتە سەر رۆژئاوا هاوكات لەگەڵ هەوڵەكانی توركیا بۆ دروستكردنی بەرەیەكی هاوبەش لەگەڵ حكومەتی دیمەشق لەدژی رۆژئاوای كوردستان، حكومەتی دیمەشق، دەستی بەگەمارۆخستنە سەر هەندێك ناوچەو شاری ژێر دەسەڵاتی خۆبەڕێوەبەری باكورو رۆژهەڵاتی سوریا کرد. لەئێستادا، حكومەت رێگەنادات، نەوت، غاز، دەرمان و خۆراك لەپارێزگاكانی وەك حەلەب و دیمەشقەوە بگاتە دەستی هاووڵاتیانی كانتۆنی شەهبای نێوان عەفرین و كۆبانێ كەكەمپێكی گەورەی خەڵكی عەفرینیش لەو ناوچەیە هەیە. بەهۆی گەمارۆكەوە، شارەوانییەكان كارەكانیان راگرتووەو خوێندنگاو قوتابخانەكان داخراون. بەگوێرەی لێدوانی بەرپرسانی بواری پەروەردەی كانتۆنی شەهبا، لەئێستادا نزیكەی ١٥ هەزار منداڵ و گەنج لەخوێندن بێبەشبوون. كوردانی حەلەبیش رووبەڕووی گەمارۆیەكی زۆری حكومەتی دیمەشق بوونەتەوە. هەردوو گەڕەكی شێخ مەقسود و ئەشرەفیەی شاری حەلەب كە بەگەڕەكی كوردانی حەلەب ناسراون، گەمارۆدراون و رێگەنادرێت هیچ خزمەتگوزاری و پێداویستیەكیان پێبگات. بەم شێوەیە لەئێستادا رۆژئاوای كوردستان كەوتووەتە نێوان بەرداشی هێرشەكانی دەوڵەتی توركیاو گەمارۆكانی حكومەتی دیمەشق.  

هاوڵاتی پۆلیسی ئەو وڵاتە ڕایگەیاند هەشت کچی هەرزەکار بە تۆمەتی کوشتنی پیاوێکی تەمەن ٥٩ ساڵ دەستگیرکراون وتەمەنی کچەکان لە نێوان ١٣ بۆ ١٦ ساڵدایە وپێدەچێت لە ڕێگەی تۆڕەکۆمەڵایەتییەکانەوە یەکییان ناسیبێت و شەوی ڕوداوەکە کە شەوی شەممە دەکات بۆ یەکەم جار کۆبونەتەوەو لە نزیک شوێنی ڕوداوەکە ڕاستەوخۆ دەستگیر کراون. سێرجێنت تێری براون، لێکۆڵەری پۆلیسی تۆرۆنتۆ بە میدیاکانی گوتتوە: قوربانییەکە دەسترێژی کراوەتە سەرو دواتر بە چەقۆ کوژراوە،هەروەها باوەڕمان وایە هۆکارەکەی بۆ ئەوە گەڕاوەتەوە کە ئەو پیاوە خواردنەوەی ئەلکحولی پێبووە. وتیشی: ژمارەیەک کەس کە بە شوێنی ڕوداوەکەدا ڕۆشتون پیاوەکەیان دۆزیوەتەوە و دوای بردنی بۆ نەخۆشخانە گیانی لەدەست داوە، هەروەها ژمارەیەک چەکیان دۆزیوەتەوە باڵام ئاماژەی بە جۆرەکەی نەدا. ئاماژەی بەوەشدا بۆ ماوەی سێ دەقە بە بەردەوامی هێرشکراوەتە سەر قوربانییەکە،هەروەها نامۆی ئەم ڕوداوە لەوەدایە کە کچەکان پێش ڕوداوەکە هەرگیز ڕوبەڕوو یەکییان نەبینیوە و لە بەشی جیاجیای ئەو شارەوە هاتون ولە ئێستادا لێکۆڵینەوە لە ڕوداوەکە بەردەوامە و تاوانبارەکان دەستگیر کراون. هاوکات ئەم ڕوداوە  تەنها چەند کاتژمێرێک پێش تەقەکردنێکی بەکۆمەڵ لە ڤاون، ئۆنتاریۆ، شارێکی بچووک لە دەرەوەی تۆرۆنتۆ ڕویداوە.

تۆڕی مافەکانی مرۆڤی کوردستان بڵاوی کردوەتەوە؛ سامان سەیدی ناسراو بە یاسین، هونەرمەند و راپەری کورد کە سزای سێدارەی بەسەردا سەپێنراوە بە خواردنی حەب هەوڵی خۆکوشتنی داوە وەک ناڕەزایەتییەک بەرامبەر ئامادەکاریی بۆ جێبەجێکردنی سزاکای. ئەو رێکخراوەیە لە زاری کەسوکاری یاسین ئاماژەی بەوە کردوە ئەو هونەرمەندە لە ئێستادا هۆشیاریی خۆی لەدەستداوە و لەژێر چاودێریی پزیشکیدایە. یاسین لە ناڕەزایەتییەکانی شاری تاران دەستگیر کرا و بە تۆمەتی تێکدانی ئاسایشی نیشتیمانی و دژایەتیی کۆماری ئیسلامی ئێران بە پێی یاساکانی ئەو وڵاتە بە ناوی دژایەتی خودا(محاربە) سزای سێدارەی بەسەردا سەپێنرا. لە چەند رۆژی رابردودا بە مەبەستی جێبەجێکردنی سزای سێدارە، ئەو هونەرمەندە کوردەی خەڵکی کرماشان لە رۆژهەڵاتی کوردستان لە زیندانی ئێڤین لە تارانەوە بۆ زیندانی رەجایشار لە کەرەج گوازرابوەوە. بە پێی ئامارەکان زیاتر لە 15 گەنجی دەستگیرکراوی کورد لە رۆژهەڵاتی کوردستان سزای سێدارەیان بەسەردا سەپێنراوە و جگە لە یاسین پێنج گەنجی دیکەش گوازراونەتەوە بۆ ژوری تاکەکەسی زیندانەکان بە مەبەستی لەسێدراەدانیان.  

هاوڵاتی ژمارەی دانیشتوانی قەزای سیده‌كان لەئیستادا 20 هەزار کەسە و 148 گوندی ئاوەدانی لەسەرە، هەروەها 118 گوندی سنورەکەش بەهۆی بۆردومانەکانەوە چۆڵکراون. ئێوارەی ئەمڕۆ فڕۆکە جەنگییەکانی تورکیا  کوێستانەکانی بەربزین و گەروی سنگایان لە سنوری برادۆست بۆردومان کرد، تائێستاش ئاماری زیانەکان نازانرێت بەڵام بۆردومانەکە دڵەڕاوکێی لای هاوڵاتیان دروستکردوە،و بەھۆی بۆردومانە بەردەوامەکانیش ١١٨ گوندی سۆران چۆڵکراون. ئەوەش لەکاتێکدایە پێشتر ئەنجومەنی ئاسایشی نیشتیمانی عێراق رایگەیاندبوو، هەولێر و بەغدا لەسەر دۆسیەی ئەمنی هاوبەش بۆ پاراستنی ناوچە سنورییەکان گەیشتون بە رێککەوتن، هەروەها هەردولا جەخت لەسەر پاراستنی سەروەری خاکی عێراق و رەتکردنەوەی پێشێلکردنی سنورەکان دەکەنەوە.

هاوڵاتی لە ڕۆژئاوای ئەفریقا، دوو ڤاکسینی نوێ  بۆ ڤایرۆسی جۆری زایر ئیبۆلا لە توێژینەوەیەکدا تاقیکرایەوە  کە توانی لەدوای ١٤ ڕۆژ لە کوتانی یەکەم و دووەم دژە تەن دژی ڤایرۆسەکە پەیدا بکەن، بەشێوازی جیاواز لە منداڵان و گەنجاندا.  ڤاکسینەکە لەلایەن  کۆمپانیای جۆنسن و مێرک پەرەی پێدراوە، لەو تویژینەوەیەدا کە ماوەی ساڵێکی خایاندووە لە باشوری ئەفریقا کە تێیدا ١٤٠٠ کەسی سەروو تەمەن ١٨ ساڵ و ١٤٠١ منداڵ کە تەمەنیان لەنێوان یەک ساڵ بۆ ١٧ ساڵدا بوو بەشداربوون، لە ئەنجامدا دەرکەوت کە بەڕێژەیەکی باش دژی ڤایرۆسی ئیبۆلا لە جۆری زایر کاریگەری هەبووە ودژە تەن بەرهەمهاتووە لە لەشی بەشداربووەکاندا. لە تویژینەوەکەدا ژەمە ڤاکسینێکیان  دۆزی ڤاکسینی جۆنسۆنی تاقیکردەوە، دواتر ڤاکسینێکی کۆمپانیای دەرمانسازی دانیمارکی باڤاریان نۆردیکی تاقیکردەوە، لە کاتێکدا گرووپەکەی تر  دوو ژەمی ڤاکسینی مێرکی تاقیکردەوە کە هەشت هەفتە لە نێوانیاندا بوو، وە گرووپی  بژاردەی سێیەم دوای یەکەم ژەمی مێرک بەکارهات لەگەڵ پلاسیبۆ. دکتۆر ئێچ کلیفۆرد لەین، کە یەکێکە لە تویژەرەکان و هەروەها بەڕێوبەری کلینیکی لە پەیمانگای نێشتیمانی ئەمریکا بۆ هەستیاری ونەخۆشیە گوازراوەکان وتی، پێموایە هەریەک لە ڤاکسینەکان بەباشی کار دەکەن دژی ڤایرۆسەکە. توێژەرانی ئەم تاقیکردنەوە زانستیە ئاماژەیان بەوەکرد، کە بەهۆی ئەوەی هیچ یەک لە بەشداربوووەکان تووشبووی ئیبۆلا نەبوون بۆیە  نەیانتوانیووە ئاستی کاریگەری ڤاکسیینەکە لەسەر لەناوچوونی ڤایرۆسەکە دیاری بکەن، هەروەها بەشداربووەکان پێویستە بۆ ماوەیەکی درێژ چاودێری بکرەێن تاوەکوو بزانرێ کەی ژەمە ڤاکسینی زیادەیان پێویست دەبێت. ڤایرۆسی جۆری زایر ئیبۆلا، لەناو پێنج جۆری ڤایرۆسی ئیبۆلادا کوشندەترینە، لە ساڵی ٢٠١٤ -٢٠١٦ بووە هۆی مردنی ١١ هەزار کەس لە ڕۆژئاوای ئەفریقا، ئاستی کوشندەیی ڤایرۆسەکە %٩٠.    

هاوڵاتی دەقی راگەیەنراوی دەزگای ئاسایشی سلێمانی:  ئاسایشی سلێمانی ئەمارەتێكی تیرۆریستانی داعش لە سلێمانی ئاشكرادەكات و ئەمیر و تەواوی رێكخەرەكان و ئەندامەكانی دەستگیردەكرێن و چەند حەشارگەیەكیش دەدۆزنەوە كە بۆ كارە تیرۆریستیەكانیان ئامادەیان كردبو ئەم گروپە پەیوەندییان بە كردەوە تیرۆریستیەكەی قەرەداغەوە هەیە  كە تیرۆریستێك رووبەڕووی هێزەكانی ئاسایش و پۆلیس بووەو كوژرا. هەر لەو چوارچێوەیەدا پیلانێكی دیكە پوچەڵكرایەوە كە چەند تیرۆریستێكی هەرە تاوانبار مەرامیان بوو لەهەرێمی كوردستانەوە هەڵبێن ، پەیوەست بە رووداوەكەی ئاشداخ لە سەنگاو كوژرانی دوو تیرۆریست ئاسایشی رۆژئاوای سلێمانی پیلانێكی تر لە چەمچەماڵ شكستپێهێنا كە بۆ ئەنجامدانی چەندین كردەوەی تیرۆریستی خۆیان ئامادەكردبوو. كە ٥٤ تیرۆریست دەستگیركران و ٣ تیرۆریست -یش كوژران. بەڕێوەبەرایەتی ئاسایشی سلێمانی ، سەربەدەزگای ئاسایشی هەرێم لەسەر بنەمای زانیاری هەواڵگری بەڵگەی دروستی دەستكەوت لەسەر پێنج  پیلانی تیرۆریستانی داعش كە یەكەم مەرامیان بوو ،  چەند حەشارگەو سەربازگەیەك لە سنوری سلێمانی  دروست بكەن و كردەوەی تیرۆریستی لەشارەكانی هەرێم ئەنجام بدەن ، دووهەم دروستكردنی ئەمارەتی داعش لە گرتووخانەی چاكسازی گەورانی سلێمانی ، سێ هەم هەڵهاتنی ژمارەیەك چەكداری داعش لەڕێگای هەرێمی كوردستانەوە ، چوارهەم رۆشتنی چەند تیرۆریستێك لەناو شارەكانی هەرێمەوە بۆ حەمرین و پەیوەندكردنیان بە چەكدارانی داعشەوە ، پێنجەم دروستكردنی حەشارگە لەناوچەی سەنگاو ئەنجام دانی چەند كردەوەیەكی تیرۆریستی . پاشان بەبڕیاری سەرۆكی دەزگای ئاسایشی هەرێم ، ژورێكی لێكۆڵینەوە لە بەڕێوەبەرایەتی ئاسایشی سلێمانی پێكهێنراو ئۆپراسیۆنی ئاسایشی سلێمانی بەوردی بەرنامەڕێژی بۆ ئاشكراكردنی پیلانەكانی تیرۆریستانی داعش داناو بەدواداچوونە هەواڵگرییەكانی دەستپێكرد و لەئەنجامدا زانیاری پێویست بەدەست هات دوای رەزامەندی بەڕێز دادوەری لێكۆڵینەوەی ئاسایش ، رێوشوێنی توندوتۆڵی ئەمنی لەچەند ناوچەیەكی سلێمانی گیرایەبەر و چەند گومانلێكراوێك خرایە ژێر چاودێری وردەوە . سەرئەنجام لە شەوی ٤ / ٥ ی ٩ ی ٢٠٢٢ تیرۆریستی تاوانبار ( بەشدار ) لەكاتی گەڕانەوەی لەناوچە شاخاوییەكانی دووز بۆ سلێمانی لە قەرەداغ لەبازگەی ئاسایش ،  لەكاتی سۆراغ كردنی ناسنامەی و هەوڵدان بۆ دەستگیركردنی هەڵدێت و روبەڕووی هێزەكان دەبێتەوەو دوای برینداركردنی ژمارەیەك لە كارمەندانی پۆلیس وئاسایش و هەڵدانی چوار نارنجۆك و خۆبەدەستەوەنەدانی كوژرا . هەر لەو چوارچێوەیەدا رۆژی ٢١ / ٩ / ٢٠٢٢  تیرۆریست سەعد ئیبراھیم ناسراو بە ( ئەبو  سەجاد ) بەهاوكاری هێزە عیراقییەكان لە سەلاحەددین كە پەیوەندی هەبوو لەگەڵ تیرۆریستی كوژراو بەشدار دەستگیركرا . رۆژانی ٥ و  ٢١ ی ١٢ ی  ٢٠٢٢ لە دوو ھەڵمەتدا ھەردوو تیرۆریست  ( رەوەز ئاوات ) لە شارەزوور و ( رێبەر فەرھاد ) لە ناوباڕازی سلێمانی كە بەهەمان شێوە پەیوەندیان بە تیرۆریستی كوژراو ( بەشدار ) ەوە هەبووە و  دەستیان لەئەنجامدانی چەند كردەوەیەک ھەبووە ، بە هاوكاری بەڕێوەبەرایەتی ئاسایشی شارەزوور دەستگیركران . هەر پەیوەست بەم كەیسە ٩ تۆمەتباری تر دەستگیركراون و رووبەڕووی یاسا كراونەتەوە  - تیرۆریست (بەرهەم محەمەد )ناسراو بە ( بەشدار )  دانیشتووی ناوچەیەكی قەزای سەیدسادقە . بەیعەتی داوە بە تیرۆریستانی داعش و پەیوەندی بەستبوو لەگەڵ هەر دوو ویلایەتی ( دیالە - كەركوك ) ، ( شیمالی بەغدا ) دوای چەندین جار سەردانیكردنی ناوچە شاخاوییەكانی نزیك دوز و زینانە و پەڵكانە بەپیلانی تیرۆریستانی داعش لە ناوچە شاخاوییەكانی بەرزنجە ، دوكان ، شارباژێر چەندین ئەشكەوت و نەفەق و تونێل و سەربازگەیەك بۆ مەشق و راهێنانیان دروست دەكات و ئامادەیان دەكات تا لەنزیكترین كاتدا چەكدارەكانی داعش بگوازرێنەوە بۆ ئەو سنورانە و دەست بە ئەنجامدانی كردەوە تیرۆریستییەكانیان بكەن لەناو شارەكاندا ، كە دواجار هەموو ئەو حەشارگەو چەك و تەقەمەنییانە دەستی بەسەرداگیرا و روونیش بووە تیرۆریستی كوژراو پەیوەندی راستەوخۆی لەگەڵ ئەمارەتی داعش لەگرتووخانەی چاكسازی گەورانی سلێمانی هەبووە . پێشتریش ناوبراو تۆمەتبار بووە بە تەقەكردن لە هێزە ئەمنییەكانی شارەزوور و بەرزنجە و نانەوەی كێشە لەنێوان عەشیرەتەكانی بێسەری و مۆریاسی و هەستاوە بە سوتاندنی باخ و ماڵ و كوشتنی ئاژەڵەكانیان و دروستكردنی دوبەرەكی لەو ناوچانەدا . دانپێدانانی  1- تیرۆریست  ( رەوەز ئاوات  ) ------------- بەدواداچوون و لێكۆڵینەوەكان چڕتركرانەوە و پیلانەكانی ئەمارەتی گرتووخانەی چاكسازی گەورانی سلێمانی ئاشكراكران ،  كە سەرپەرشتی و داڕێژەری چەندین پیلانی تیرۆریستی بوون لە هەرێم و شارەكانی عێراق كەلەرێگای سۆشیال میدیا و مۆبایلی زیرەك و سیمكارتەوە كە بەدەستیان هێنابوو لەناو گرتووخانەوە ! كاروبارەكانیان رایدەكرد و ١٥ تیرۆریستی سزادراو بەهاوكاری ئیدارەی گرتووخانەی چاكسازی گەوران خرانە ژێر چاودێری و لە سەعاتی سفردا بە بەڵگەوە دەستگیكرانەوە و شكست بەبەرنامەکانیان هێنرا كە لەخۆڕێكخستنەوەو بەرفراوانكردنی چالاكییەكانیاندا بوون و سەرپەرشتی ناردنی گەنجانیان دەكرد بۆ ناو تیرۆریستانی داعش .  كە تەواوی تیرۆریستەكان لەسەرەتای دورست بوونی قاعیدە  و داعش بەیعەتیان داوە و چەكداری فعلی بوون و بەشداربوون لە ئەنجامدانی چەندین كردەوەی تیرۆریستی لە هەرێم و عێراق و ماوەی سزای یاساییان لە تەواوبووندا بوو كە راستەوخۆ لەلایەن تیرۆریستی هەرە تاوانبار ( ئەبو مەصعەب ) والی تیرۆریستانی داعش لە عیراق , سەرپەرشتی و ئاڕاستەكراون . — پێكهاتەی ئەمارەتی تیرۆریستانی داعش لە گرتووخانەی چاكسازی گەورانی سلێمانی  تیرۆریست محەمەد عەبدولعزیز الدهلكی ناسراو  ( ئەبو قتیبە ، ئەبو فاتیمە ) ئەمیری ئەمارەت  تیرۆریست وسام سلطان ناسراو بە ( دكتۆر هانی ) جێگری ئەمیری ئەمارەت  تیرۆریست ئاراس حەكیم لێپرسراوی هۆڵی ٦ بلۆكی ١  تیرۆریست هیوا عەزیز لێپرسراوی هۆڵی ٣ بلۆكی ١  تیرۆریست ئەحمەد خضیر لێپرسراوی هۆڵی ٧ بلۆكی ١ تیرۆریست دیار مەحمود لێپرسراوی هۆڵی ٤ بلۆكی ١ تیرۆریست موهەنەد سەباح لێپرسراوی هۆڵی ٦ بلۆكی ١ راڕەوی ٣ ناسراو بە ( ئەبو ھەیمەن )  تیرۆریست عەمار محەمەد لێپرسراوی هۆڵی ٤ بلۆكی ٢ ناسراوە بە ( ئەبو ملاک )  تیرۆریست تەها عەتیە ناسراوە بە ( ئەبو یاسین ) لێپرسراوی هۆڵی ١١ بلۆكی ١  تیرۆریستان ( رزگار یاوەر ، عەمار غائب ، قادر نامق ، مەنسور  محەمەد ، ئازاد مەجید ، مەحمود عەواد  ) وەك جێگرانی لێپرسراوی هۆڵەكان دەستنیشانكراون . دانپێدانانی تیرۆریستان  2 - تیرۆریست محەمەد عەبدولعزیز الدهلكی ناسراو  ( ئەبو قتیبە ، ئەبو فاتیمە ) والی ئەمارەت  3 - تیرۆریست وسام سلطان ناسراو بە ( دكتۆر هانی ) جێگری والی ئەمارەت  ------------- لەلایەكی ترەوە پیلانێكی تری تیرۆریستانی داعش ئاشكراكرا كە مەرامیان بوو ژمارەیەك چەكداری هەڵهاتوویان كە لە دادگاكانی عێراق داواكراوبوون لەرێگای هەرێمەوە رەوانەی دەرەوە بكرێن . دوای زانیاری و لێكۆڵینەوەی ورد ئەم پیلانەش پوچەڵكرایەوە و هەریەك لە چەكدارانی تیرۆریستانی داعش ( مەسار عەبد ، موحسین  عەبد ، بەكر عەبد ، زەید عەبد ) كە هەرچواریان برابوون لەسەر سنووری هەرێمی كوردستان لەكاتی راكردنیاندا لە رۆژی ٣١ / ١٠ / ٢٠٢٢ دەستگیراكران و هەر چوار تیرۆریستە هەرە تاوانبارەكە  بەرپرسیارو سەرپەرشتیاری چەندین كردەوە تیرۆریستی بوون  .  دانپێدانانی تیرۆریست  4 - مەسار عەبد حەمەد ئەلفەهداوی  ------------- هەر پەیوەست بە هەوڵەكان بۆ سەقامگیری ئاسایش و ریشەكێشكردنی تیرۆر،  پشت بەستوو بە بەدواداچوون و لێكۆڵینەوە پیلانێكی تری تیرۆریستانی داعش ئاشكراكران كە ژمارەیەك تیرۆریست پیلانیان وابوو  هەڵبێن بۆ ناو داعش دوای دەست نیشانكردنی ئامانجەكان لەچەند هەڵمەتێكی جیاجیادا لە رۆژانی ١٠  و ٢٧ / ١١ و ٥/ ١٢ / ٢٠٢٢ لەگەرمیان و سلێمانی بە هاوكاری بەڕێوەبەرایەتی ئاسایشی گەرمیان هەریەك لە تیرۆریستان ( مستەفا كەمال ، هەستیار محەمەد ئەمین ، ئیسماعیل سەفەر ، كاویان حەمدان ، عومەر عەبدولكەریم ، حسێن یونس ) دەستگیركران.  دانپێدانان   5 - تیرۆریست  مستەفا كەمال  ------------- هاوكات پەیوەست بە رووداوی كوشتنی هەر دوو تیرۆریست  ( كاوە سەعید ، محەمەد عەلی ) و دەستگیركردنی تیرۆریست  ( شەیما نەوزاد )  بەبرینداری لە شاخی ئاشداخ لە نزیك  گوندی كچان لە سەنگاو لە شەوی ٦ / ٧ ی ١١ ی ٢٠٢٢ كە پیلانیان دانابوو حەشارگەیەك دروست بكەن و چەند كردەوەیەكی تیرۆریستی ئەنجام بدەن و هێرش بكەنە سەر چەند دامەزراوەیەكی گشتی و پەروەردەیی و ئاینی . بەڕێوەبەرایەتی ئاسایشی رۆژئاوای سلێمانی لێكۆڵینەوەكانی چڕتركردەوەو زانیاری نوێ دەستكەوت لەسەر بوونی چەندین تیرۆریستی تر كەپەیوەستن بەم رووداوەو پیلانیان هەبووە دوای ئەنجامدانی كردەوە تیرۆریستییەكان هیجرەت بكەن و پەیوەندی بە تیرۆریستە كوژاوەكان بكەن لە ناوچەی سەنگاو ، دواتر بەهاوكاری ئۆپراسیۆنی ئاسایشی سلێمانی ١٦ ئامانج بە وردی دەست نیشانكران و خرانە ژێرچاودێری و شەوی ٩ /١٠ ی ١١ ی ٢٠٢٢  ، لە چەند هەڵمەتێكی جیاجیادا لە چەمچەماڵ و ناحیەی شۆڕش هەر ١٦  تیرۆریستەكە ( شاخەوان یوسف ، محەمەد لەتیف ، هەمزە ئیسماعیل ، عەبدولباست جەبار ، هێمن باھیر  ، نەوزاد عومەر ، بێرون وریا ، ئەنەس دارا ، دارا جەبار ، محەمەد عومەر ، محەمەد سالار ، محەمەد حەسەن ، میر غەفور ، ئەیوب نەجمەدین ، ئەحمەد محەمەد ، زاگرۆس عوسمان  ) دەستگیركران و رووبەڕووی دادگاكرانەوە . دانپێدانان .... 6- تیرۆریست  شەیما نەوزاد  دانپێدانانی .. .. 7- تیرۆریست بێرون وریا ------------- لێكۆڵینەوە لەسەر ئەم پێنج كەیسە ئەمنیە بەردەوامە و بەچڕی بەدواداچوون دەكرێت بۆ زانیاری و بەڵگە بەدەستهاتووەكان ، لەبەر سەلامەتی هەستیاری رێڕەوی ئاسایشی دۆسێ كان ، بەشێك لە زانیارییەكان بە شاراوەیی هێڵڕاونەتەوە . ئاشكراكردنی ئەم پێنج پیلانە و شكستپێهێنانی بەرنامەکانیان  بۆ تێكدانی ئارامی هەرێم بەرئەنجامی  هیمەت و ماندوبوون و كاركردنی بەردەوامی پێنج ( ٥ ) مانگ شەونخونی هێزەكانمانە كە هەموو خەمێكیان بەرقەراكردنی سەقامگیری و ئارامییە بۆ كۆمەڵانی خەڵكی كوردستان دڵنییان دەكەینەوە وەك هەمیشە سەروماڵ و ژیان و ئارامیان دەپارێزین 

هاوڵاتی ئەنجوومەنی وەزیرانی هەرێمی کوردستان لە ڕاگەیەندراوێکدا لەسەر کۆبونەوەی ئەمڕۆی ،جارێکی دیکە خواستی هەرێمی کوردستان بۆ چارەسەرکردنی کێشەکانی لەگەڵ بەغدا دووپات کردەوەو و" داواش دەکات کە تاوەکو پەسندکردنی بوجەی گشتیی 2023، حکومەتی عێراق بەشە بودجەی هەرێمی کوردستان بنێرێت". ئەمڕۆ چوارشەممە، 21-12-2022، ئەنجوومەنی وەزیرانی هەرێمی کوردستان کۆبووەوە و لە بەشێکی کۆبوونەوەکەدا ، ئەنجومەنی وەزیران، پێشوازیی لە بڕیاری هەفتەی رابردووی ئەنجوومەنی وەزیرانی عێراق کرد بۆ ناردنی 400 ملیار دینارەکە بۆ هەرێمی کوردستان. هەروەها حکومەتی هەرێمی کوردستان وەزارەتی دارایی وئابووری ڕاسپارد لە پەیوەندی بەردەوام بێت لەگەڵ وەزارەتی دارایی فیدڕاڵ تا بە زووترین کات ڕێکارەکانی ناردنی پارەکە تەواو بکرێت . هاوکات ئەنجومەنی وەزیران شاندی دانوستانکاریشی ڕاسپارد کە لە دوای پشووەکانی سەری ساڵ،" کۆبوونەوەکانیيان لەگەڵ حکومەتی فیدڕاڵ چڕبکەنەوە بە ئاراستەی بەردەوامبوونی جێبەجێکردنی یاسای بودجەی ساڵی 2021 و ناردنی بەشە بودجەی هەرێمی کوردستان هەتا پڕۆژە یاسای بودجەی فیدراڵ بۆ ساڵی 2023 لە لایەن ئەنجومەنی نوێنەرانی عێراقەوە پەسەند دەکرێت هەروەک لە کارنامەی وەزاریدا هاتووە".        

هاوڵاتی ڤلادیمێر زێلێنسکی دوای ٣٠٠ ڕۆژ لە دەستپێکردنی لەشکرکێشی ڕووسیا بۆ سەر ئۆکرانیا سەردانی ئەمریکا دەکات، بڕیاریشە لە کۆنگرێس وتارێک پێشکەش بکات. ڤلادیمێر زێلنسکی لە تویتەری خۆی ڕایگەیاندووە کە لەڕێگادایە بەرە واشنتن، ئامانجی سەرەکی گەشتەکەی بۆ بەدەستهێنانی هاوکاری سەربازی وپشتگیری زیاتری واشتنە بۆ سیستەمی بەرگری ئۆکرانیا. سەرۆکی ئۆکرانیا لەماوەی گەشتەکەی دا لەگەڵ ڕاوێژکارانی باڵای ئاسایشدا لە کۆشکی سپی کۆدەبێتەوە و لەبەرنامەی گەشتەکەیدا لە کاپیتەڵ هیڵ لە کۆبونەوەیەک کە تێیدا هەریەک لە ئەنجومەنی نوێنەرانی ئەمریکا وکۆنگرێسی ئەمریکا بەشدارن وتارێک پێشکەش دەکات، لەگەڵ ئەوەشدا لە کۆنگرەیەکی ڕۆژانامەوانیدا بەشداردەبێت بە ئامادەبوونی جۆو بایدن. وتەبێژی کۆشکی سپی، جین پێیرئاماژەی بەوەکرد، مەبەستی سەرەکی سەردانەکە بۆ جەختکردنەوەیە لەهاورکاریەکانی ئەمریکا بۆ ئۆکرانیا، هەروەها وتیشی هاوکاریەکان لە ڕووی مرۆیی وسەربازی وئابوریەوە بۆ ئۆکرانیا بەردەوام دەبن. هاوکات هەر لەبارەی سەردانەکەی سەرۆکی ئۆکرانیاوە، بەرپرسێکی باڵای ئەمریکا وتی، بەپێی سەردانەکەی سەرۆکی ئۆکرانیا وهاوکاریەکانی ئەمریکا بێت  پێدەچێت سەرۆکی ئەمریکا بڕیاری خەرجکردنی ٢ ملیار دۆلاری دیکە بدات بۆ هاوکاری ئۆکرانیا. لەسەرەتای جەنگی ڕووسیا دژ بە ئۆکرانیا ئەمریکا یەکێکە لەو وڵاتانەی کە هاوکاریەکی بەرچاوی ئۆکرانیای کردووە بە بری ٢٠ ملیار دۆلار ئەوەش بە پێدانی تۆپهاوێژەکان وسیستەمی موشەکی لەوانەش سیستەمی موشەکی ناسامس؛ بڕیاریشە لە لە هاوکاریەکانی داهاتوویدا سیستەمی پاتریۆتیشی تێدابێت بۆ بەرگری ئۆکرانیا دژ بە موشەکەکانی ڕووسیا.

شەنای فاتح بەڕێوەبەرایەتی ئاوی سلێمانیش رایدەگەیەنێت زیاتر لە 87٪ی هاووڵاتیان پێوەری ئاویان بەستووە، ئەندامێكی ئەنجومەنی پارێزگای سلێمانیش دەڵێت پێش پێوەری ئاو داهاتی ئاو زیاتربووە، سەرچاوەیەكیش لەكۆمپانیای بەستنی پێوەرەكە هۆكاری بەرزبوونەوەی نرخەكەی ئاشكرادەكات. وەزارەتی شارەوانی و گەشتوگوزاری حكومەتی هەرێمی كوردستان 20ی كانوونی یەكەمی 2022ی دیاریكردبو بۆ بەستنی پێوەری زیرەكی ئاو لەلایەن هاووڵاتیانەوە، بەپێی بڕیارەكەی وەزارەتی شارەوانی، پاش ئەو وادەیە مانگانە بڕی 80 هەزار دینار بۆ ماڵان و بڕی 200 هەزار دیناریش بۆ شوێنی بازرگانی لەبری نەبەستنی پێوەری ئاو وەك سزا دێتەوە.  پێشتر وەزیری شارەوانی و گەشتوگوزار  رایگەیاندبوو: ئەو هاوبەشانەی لەدەرەوەی شارەكانن و پێوەری زیرەكی ئاویان نەبەستووە، بەڕێژەی 90٪ داشكاندنیان بۆ دەكرێت لەنرخی كرێی ئاو كە لە 80 هەزارەوە بۆ 10 هەزار دینار دەبێت، ئەوانەی ناو شارەكانیش لە 80 هەزارەوە بۆ 20 هەزار دینار كەمدەكرێتەوە، شوێنە بازرگانییەكان و كاسبكاران و پیشەوەرانیش، كەمكردنەوەی كرێی ئاو لە 200 هەزار دینارەوە دەیانگرێتەوە و بەڕێژەی 40٪ داشكاندنیان بۆ دەكرێت. ئامانج جەلال، بەڕێوبەری راگەیاندنی بەڕێوبەرایەتی ئاوی سلێمانی لەلێدوانێكدا بەهاوڵاتی وت: ئەم پێوەرە زیرەكە بەفیڕۆدانی ئاو كەمدەكاتەوەو دادپەروەرییەكیش لەپێدانی پارەی ئاودا دەكات بۆ هاووڵاتیان، واتە ئەو بەفیڕۆدانەی ئاو كەئێستا هەیە لەنەبوونی تەوافەو شۆرینی بەردەرگاو ئەو كێشانەی كەهەیەو هاووڵاتی بۆ ئەوەی كەپارەی زۆری بۆ نەیەتەوە ئاو بەفیڕۆ نادات. ئامانج جەلال وتیشی: هاووڵاتی چەند ئاو بەكاربێنێت ئەوەندە پارەی بۆ دێتەوەو وەك پێشترنییە كەمانگانە بڕێك بێتەوەو بەپێی بەكارهێنان و سەرفكردنی ئاو لەلایەن هاووڵاتییەوە پارە دێتەوەو تائێستا دیار نییە كەحكومەتی هەرێم بڕیاری بەستنی پێوەری ئاو درێژ دەكاتەوە یان نا، بەڵام پێمان راگەیەندراوە كە دوا بەروار بۆ بەستنی پێوەری ئاو 20-12-2022 ە. بەوتەی بەڕێوەبەری راگەیاندنی بەڕێوەبەرایەتی ئاوی سلێمانی، بەپێی ئەو ئامارەی لەبەردەستیاندایە تائێستا زیاتر لە 87٪ی هاووڵاتیان پێوەری ئاویان بەستووەو بەشێكی هاووڵاتیانیش لەئێستادا لە 18 بنكەی بەڕێوەبەرایەتی ئاوی سلێمانی پێوەری ئاو وەردەگرن و قەرەباڵغیەكی زۆر دروستبووە، چونكە هاووڵاتیان نایانەوێت بكەونە دوای ئەو بەروارەی دیاریكراوە. پێوەری زیرەكی ئاو لەهەرێمی كوردستاندا نزیكەی دوو هەفتەیە نرخەكەی بەرزبووەتەوە، پێشتر نرخی 35 هەزار دینار بوو و لەئێستادا بەرزبووەتەوە بۆ 50 تا 60 هەزار دینار. كاسترۆ مەعروف، ئەندامی ئەنجومەنی پارێزگای سلێمانی لەلێدوانێكدا بەهاوڵاتی وت: تائێستا 20٪ی هاووڵاتیان پێوەری ئاویان نەبەستووەو پابەندنەبوون بەبڕیارەكەی وەزارەتی شارەوانی، لەبەرئەوەی ئەم بابەتە دراوەتە كەرتی تایبەت و بەداخەوە بابەتی بەستنی پێوەری ئاو زیانی هەبووە لەڕووی داهاتەوە كە دەتوانین بڵێین داهات نیوە كەمی كردووەو پێشتر كەپێوەری ئاو نەبوو رێژەی داهات زیاتر بوو لەسنووری پارێزگای سلێمانی و ئیدارەكانی گەرمیان و راپەڕین. ئەو ئەندامەی ئەنجومەنی پارێزگای سلێمانی وتیشی: لەوكاتەوەی دەست بەپێوەری ئاو كراوە داهات كەمی كردووە، هاووڵاتیانیش پابەندنین پێوەی چونكە پێیان وایە لەكاتێكدا پێوەر پێویستە كە 24 كاتژمێر ئاو بدرێتە هاووڵاتیان، بەڵام ئێمە لەبەشێك لەناوچەكاندا ئاومان نییەو هاووڵاتیان رۆژ ناڕۆژێك كاتژمێرێك ئاویان پێدەدرێت. « بەپێی بەداداچوونی ئێمە لەئێستادا بەشێكی زۆری هاووڵاتیان لەسەرەی دانانی پێوەری ئاودان و چەند رۆژێك دەوەستن تاپێوەرێكی ئاویان بەردەكەوێت و دەیبەستێت، بۆیە داوامان كردووە ئەم پڕۆسەیە درێژبكرێتەوە بۆ ئەوەی هاووڵاتیان بتوانن زیاتر سودمەند بن لێی و هاووڵاتیان لەم بابەتەدا زەرەرمەندی یەكەمن و پێویستە وەزارەت رێگری بكات لەو كۆمپانیایانەی كە قۆرغكاری دەكەن».كاسترۆ مەعروف وای وت. هاوڵاتی بەدواداچوونی بۆ گرانبوونی پێوەرەكانی ئاو كرد، سەرچاوەیەك لەكۆمپانیای گوودوەی كەكۆمپانیایەكی هاوردەكردنی پێوەری زیرەكی ئاوە بەهاوڵاتی وت: ئەم پێوەرە كە لەلایەن حكومەتی هەرێمی كوردستانەوە رەزامەندی لەسەر دراوە، سێ پێوەر بوو  ئەڵمانی و ئیتاڵی و توركی، لەكاتی دەرچوونی ئەو پڕۆژەیەدا  ئیتاڵییەكە لەسنووری پارێزگای سلێمانی و توركی و ئەڵمانییەكەش لەسنووری هەولێردا بوو، بەڵام هەماهەنگیمان لەنێواندا هەبوو. سەرچاوەكە وتیشی: لەئێستادا ئەڵمانییەكەش هەیە بەڵام ئەوەی زیاتر لەناو بەڕێوبەرایەتی ئاو بەربڵاوە  ئیتاڵیەكەیە و كوالێتی پێوەرەكە باشەو پێش ئەوەی پڕۆژەكە بدرێتەوە دەست حكومەت ئێمە گرەنتی دوو ساڵی پێوەرەكەمان بۆ هاووڵاتیان دەكردو لەماوەی ئەو دوو ساڵەدا هەر كێشەیەك روویبدایە لەسەر تێچووی خۆمان بۆمان چارەسەر دەكردن. سەبارەت بەنرخەكان ئەو سەرچاوەیە وتیشی: نرخ هەمیشە لەگۆڕاندایە و لەسێ چوار مانگی رابردوودا بەشێكمان هێناوە نرخێك بووەو ئێستاش بەشێكی دیكەمان بۆ هاتووە نرخێكی دیكەیە، نرخیش بەدەست ئێمە نییە،  بەهۆی جەنگی ئۆكرانیا و بەرزبوونەوەی نرخی یۆرۆوە مەواد گران بووەو كاریگەری لەسەر ئێمەش دروستكردووە و بەگران بەئێمەی دەفرۆشنەوە. بەپێی داتایەكی فەرمانگەی میدیاو زانیاری حكومەتی هەرێمی كوردستان، لەهەرێم زیاتر لە 81 پرۆژەی ئاو هەن، جگە لەوەی زیاتر لەپێنج هەزار بیری ئاو هەن، رۆژانە زیاتر لەدوو ملیۆن و 684 هەزار مەتر سێجا بۆ هاوبەشانی ئاو دابیندەكەن، تێچوی بەرهەمهێنانی هەر مەتر سێجایەك ئاو لەسەر حكومەت ٣٣٥ دینار دەكەوێت.

هاوڵاتی كۆشكی سه‌رۆكایه‌تی روسیا (کرێملین) ئه‌مڕۆ چوارشەممە رایگه‌یاند، کە ناردنی چەکی نوێی ئەمریکا بۆ ئۆکرانیا تەنها ململانێکان لەگەڵ روسیا "گەورەتر دەکات". دیمیتری پێسکۆڤ، وتەبێژی سەرۆکایەتی كۆشكی ڕوسیا بە ئاماژەدان بە ناردنی چەکی نوێ بۆ کیێڤ له‌لایه‌ن ئه‌مریكاوه‌، رایگه‌یاند، "هەمو ئەمانە بە دڵنیاییەوە ململانێکان گەورەتر دەکەن و ئاماژەیەکی باش نییە بۆ ئۆکرانیا". ئه‌و هه‌ڵوێسته‌ی روسیا له‌كاتێكدایه‌ كه‌ ڤۆلۆدمیر زلێنسكی، سه‌رۆكی ئۆكرانیا له‌ دوای نزیكه‌ی 10 مانگ له‌ ده‌ستپێكردنی هێرشی روسیا بۆسه‌ر وڵاته‌كه‌ی، ئه‌مڕۆ چوارشه‌ممه‌ سه‌ردانی ویلایه‌ته‌ یه‌كگرتوه‌كانی ئه‌مریكا ده‌كات، له‌گه‌ڵ سه‌رۆك و به‌رپرسانی باڵای ئه‌و وڵاته‌ كۆده‌بێته‌وه‌. هاوکات لە تویتەر زیلینسکی سەرۆکی ئۆکرانیا ڕایگەیاند کە  بەرەو ئەمریکا دەڕوات بۆ "بەهێزکردنی خۆڕاگری و توانای بەرگری" ی وڵاتەکەی.      

لە چوارچێوەی دۆسیەی لێپرسینەوە لە ئەندامانی کۆنگرەی کۆمەڵگەی دیموکراتی (کەجەدە)، داواکاری کۆماری پارێزگای ئامەدی باکوری کوردستان، داوای کرد سزای ١٥ ساڵ زیندانی بەسەر نەوروز ئویسال پارێزەری عەبدوڵلا ئۆجالان رێبەری پەکەکەدا بسەپێندرێت. ئەمڕۆ، پرۆسەی دادگاییکردنی نەورۆز ئویسال پارێزەری ئۆجالان لە دەیەمین دادگای سزا قورسەکانی ئامەد بەڕێوەچوو. ئویساڵ بەشداری لە دانیشتنەکەدا نەکرد و پارێزەرانی ئامادە بوون. بەگوێرەی زانیاریەکانی ئاژانسی میزۆپۆتامیا، داواکاری کۆماری ئامەد لە دانیشتنی دادگادا بانگەشەی ئەوەی کردووە کە لە کاتی قۆناغی قەدەغەی هاتوچۆ، لە ناوچەی جزیری سەر بە پارێزگای شڕنەخ، کە ئەو کاتە شەڕی ناوخۆ هەبوو، نەورۆز ئویسال گروپی واتسئاپی داناوە و لەگەڵ ئەندامانی کەجەدە کاری بۆ ئەو کەسانە کردووە کە لەدژی دەوڵەت شەڕیان دەکرد. داواکاری کۆماری وتیشی، نەوروز ئویسال بەشداری لە چالاکیەکانی کەجەدەدا کردووە (تورکیا کەجەدە وەک رێکخراوێکی سەر بە پەکەکە دەبینێت) و پێویستە بە تاوانی 'ئەندامێتی پەکەکە' لە حەوت ساڵ و شەش مانگەوە تاوەکو ١٥ ساڵ، سزای زیندانی بەسەردا بسەپێندرێت. دواتر پارێزەرانی نەوروز ئۆیسال داوایان کرد، کاتیان پێبدرێت تاوەکو وڵام بدەنەوە، بەڵام داواکەیان رەتکرایەوە و دانیشتنی دادگا بۆ ١٥ی ئازاری ساڵی داهاتوو دواخرا.

ئەکرەم ئیمامئۆغلۆ سەرۆکی گەورەشارەوانی ئەستەنبوڵ لەبارەی کاندیدی پارتی گەلی کۆماری (جەهەپە) بۆ هەڵبژاردنی سەرۆکایەتی تورکیا رایگەیاند، کاندیدەکەیان کەمال کلچدارئۆغلۆ سەرۆکی گشتی پارتەکەیە. ئەکرەم ئیمامئۆغلۆ کە ١٤ی ئەم مانگە، دادگای ئەستەنبوڵ، بە تۆمەتی سووکایەتیکردن بە بەرپرسانی کۆمسیۆنی باڵای هەڵبژاردنەکانی تورکیا، سزای دوو ساڵ و حەوت مانگ و ١٥ رۆژ زیندای بەسەردا سەپاند، کۆنفڕانسێکی رۆژنامەوانی ئەنجامدا. ئیمامئۆغڵو باسی لە کاندیدبوونی کەمال کلچدارئۆغڵو سەرۆکی پارتەکەی کرد و وتی، " من ئەندامی جەهەپەم. بەڕێز کەمال کلچدارئۆغڵو، سەرۆکی هەموو ئەندامانی جەهەپەیە و کاندیدی هەموو خانەوادەیەکی جەهەپەیە." 'پشتگیری لە قسەکانی دەمیرتاش دەکەم' لەبارەی تویتێکی سەلاحەدین دەمیرتاش هاوسەرۆکی زیندانیکراوی پێشووی هەدەپە کە وتبووی، 'پێویستە ئۆپۆزسیۆن دەست لە مشتومڕەکانی بۆ کاندیدکردنی کەسێک بهێنێت، لەبەرئەوەی لە ئامانجەکە کە بردنەوەیە لە هەڵبژاردن، دووریان دەخاتەوە'، ئەکرەم ئیمامئۆغلۆ وتی، قسەکانی دەمیرتاش راستن و پشتگیری لە قسەکانی دەکەم. دەشڵێت، هیوادارم دەمیرتاش بە زووترین کات ئازاد بکرێت و بگەڕێتەوە نێو خانەوادەکەی. ئەم هەڵبژاردنە، هەڵبژاردنێک نییە کە بە تەنیا لەپێناویدا تێبکۆشین. ئەم هەڵبژاردنە بۆ هەموو گەلەکەمان و بۆ ٨٥ ملیۆن هاوڵاتی دەبێت. چەند رۆژ لەمەوبەر، میدیاکانی سەر بە دەسەڵاتی تورکیا، باسی ئەوەیان کرد کە لەسەر پرسی کاندیدی هاوبەشی سەرۆککۆماری کێشە لەنێوان پارتە سیاسیەکانی ئۆپۆزسیۆندا هەیە و لەنێو جەهەپەشدا، کێشە کەوتووەتە نێوان ئیمامئۆغلۆ و کلچدارئۆغلۆ، بەڵام بەرپرسان و ئەندامانی جەهەپە ئەو هەواڵانە بە ناڕاست و بانگەشە لەقەڵەمدەدەن.

هاوڵاتی: بریکاری ماددە هۆشبەرەکانی ئەمریکا: دەستمان بەسەر ٣٧٩ ملیۆن ژەمە دەرمانی فێنتانیڵ گرتووە، ئەو بڕەش بەسە بۆ لەناوبردنی هەموو ئەمریکا بریکاری ماددە هۆشبەرە فیدراڵیەکانی ئەمریکا ڕایگەیاند، دەستیان بەسەر ٣٧٩ ملیۆن ژەمە دەرمانی فێنتانیڵ دا گرتووە، ئەو بڕە دەرمانەشی دەستی بەسەردا گیراوە بەسە بۆ لەناوبردنی ٣٣٠ ملیۆن تاکی ئەمریکی. ئیدارەی جێبەجێکردنی ماددە هۆشبەرەکان دەڵێت، بڕی ٤،٥٠٠ کیلۆگرام فێنتانیڵ لەگەڵ زیاتر لە  پەنجا ملیۆن و٦٠٠ هەزار حەبی فینتانیل دەستی بەسەردا گیراوە، هەروەها وتیشی ئەو دەرمانە پەنجا جار لە ماددەی هۆشبەری هێرۆین بەهێزترە. هاوکات ئاژانسەکە ئاماژە بەوەش دەکات ئەو بڕە دەرمانەی دەستی بەسەردا گیراوە، دوو هێندەی ئەو بڕەیە کە ساڵی ٢٠٢١ گیراوە، هەروەها وتیشی  ئەو دەرمانانە بەشێکی زۆریان  لە وڵاتی مەکسیکەوە بە قاچاخ دەهێنرێنە ناوخۆی ئەمریکا ولە کارگە نهێنیەکانی مەکسیک بەتایبەتی لەکارگەکانی سینالۆا و جالیسکۆ بەرهەمدەهێنرێن کە سەرچاوەی دەرمانەکانیان لە چینەوەیە.   ئان میلگرام، بەڕێوبەری ئیدارەی جێبەجێکردنی ماددە هۆشبەرەکان وتی، کاری سەرەکی ئۆپەراسیۆنەکانمان شکستپێهێنانی هەردوو کارگەی سینالۆا وجالیسکۆیە، کە بە پلەی یەکەم بەرپرسیارن لە بەرهەمهێنانی ئەو بڕە فێنتانیڵەی کەدەستی بەسەرداگیراوە لە ئەمریکا. جگە لەو بڕە لە فێناتنیل کەدەستی بەسەرداگیراوە، هاوکات  دەست  بەسەر ١٣١ هەزار پاوەند میتامفیتامین و زیاتر لە  ٤٣٠٠پاوەند هێرۆین و زیاتر لە ٤٤٤ هەزار پاوەند کۆکاین دا گیراوە. ساڵی ڕابردوو زیاتر لە ١٠٠ هەزار هاوڵاتی ئەمریکی بەهۆی بەکارهێنانی ماددە هۆشبەرەکانەوە گیانیان لەدەستداوە، کە زیاتر لە دوو لەسەر سێان بەهۆی بەکارهێنانی دەرمانی فێنتانیڵ بووە.

هاوڵاتی زیاتر لە 10 ساڵ لەمەوبەر، دۆسیەی داگیركردنی زەوییەك لەكەلار بووە جێگەی مشتومڕ، ئەوكات گۆڤارێك كە رۆژنامەنووسی تیرۆركراو كاوە گەرمیانی سەرنووسەری بوو دۆسیەكەی جوڵاند، بەرپرسەكە سكاڵای تۆماركردو دۆسیەكەی بردەوەو گۆڤارەكە سزادرا، بەڵام 18ی ئەم مانگە جارێكی دیكە دادگای كەتنی كەلار دۆسیەكەی جوڵاندو لەبەرژەوەندی گۆڤارەكەو نووسەری راپۆرتەكە شكایەوە. ساڵی 2012 گۆڤاری رایەڵ كە رۆژنامەنووسی تیرۆركراو كاوە گەرمیانی سەرنووسەری بوو، لەڕاپۆرتێكدا باسی لەداگیركردنی موڵكێك لەسەر شەقامی لیواكەی كەلار لەلایەن ئەندامێكی سەركردایەتی یەكێتی نیشتمانی كوردستان كردبوو، دواتر ئەندامەكەی سەركردایەتی یەكێتی سكاڵای یاسایی دژی ئامادەكاری راپۆرتەكەی رۆژنامەنوس (دڵشاد ئەنوەر) تۆماركرد. دوای تیرۆركرانی كاوە گەرمیانی، دادگای كەتنی كەلار دۆسیەكەی ئەو ئەندام سەركردایەتییەی یەكلاكردەوە، گۆڤارەكە سێ ملیۆن دینار غەرامە كرا، چونكە خاوەن موڵكەكان ئامادەنەبوون بێنە دادگاو شاهیدی بدەن داوای گەڕانەوەی موڵكی داگیركراویان بكەن، سكاڵاكەر بەوەشەوە نەوەستا، بەتۆمەتی ناوزڕاندن سكاڵایەكی تری تۆمار كرد، داوای قەرەبووی دارایی كرد. بەڵام رۆژی 18ی كانونی یەكەم، سەرلەنوێ دادگای كەتنی كەلار دانیشتنێكی لەسەر كەیسەكە ئەنجامدا، ئەمجارەیان خاوەن موڵكە داگیركراوەكان ئامادەبوون.  دڵشاد ئەنوەر ئەو رۆژنامەنووسەی راپۆرتەكەی نووسیوە لەلێدوانێكدا بە رۆژنامەی هاوڵاتی وت:»لەساڵی 2012 بابەتێكمان بڵاوكردەوە لەسەرئەوەی كە عەدنانی حەمەی مینا موڵكێكی داگیركردبوو كەموڵكی هاووڵاتییەك بوو، ئەوكات سكاڵای لەسەر تۆماركردین، بەڵام ئەوكات خاوەن موڵكەكە نەهاتە بەردەم دادگا شایەتی بدات و حاكمیش ورد نەبوو لەدۆسیەكەو خاوەن موڵكەكەی ناچار نەكرد بێتە دادگا، بۆیە ئەوكات دۆسیەكە لەبەرژەوەندی ئێمە یەكلایی نەبووەوەو سێ ملیۆن دینار غەرامەكراین». ئەو رۆژنامەنووسە وتیشی:»سكاڵاكار كە عەدنانی حەمەی مینا بوو، داوای قەرەبووی كردو دادگای مەدەنی خاوەن موڵكەكەی ناچاركرد بێتە دادگا، جاری یەكەم رەتیانكردەوە سوێند بخۆن، بەڵام دادوەر پێی راگەیاندن ئەگەر شایەتی نەدەن دۆسیەی لێكۆڵینەوەیان بۆ دەكرێتەوە، بەڵام دواینجار لەڕۆژی 18-12-2022 ئامادەبوون لەدادگاو دادوەر سوێندی پێخواردن، ئەوانیش وتیان تازە سوێند دراون و ناتوانن لێی لابدەن، بۆیە دانیان بەوەدانا كەموڵكەكەیان لەلایەن عەدنانی حەمەی مینا داگیركراوەو برایەكیشی هاوبەش بووە لەداگیركردنی زەویەكەدا». « شایەتەكان وتیان راپۆرتەكە راستەو ئەوكاتەی راپۆرتەكە بڵاوكراوەتەوە موڵكەكەمان داگیركراوە لەكاتێكدا خۆی بەهاكەی زیاتر لە 40 دەفتەر دۆلارە، بەڵام دوای بڵاوبوونەوەی راپۆرتەكە پێنج دەفتەری پێداوین، ئێستاش دۆسیەكە دواخراوە تا بڕیاری كۆتایی وەردەگرێت»، دڵشاد ئەنوەر وای وت. رۆژنامەنووس دڵشاد ئەنوەر لەلایەن سەنتەری میترۆ بۆ داكۆكی لەمافی رۆژنامەنووسان پێشوازیكراو پشتیوانی دۆسیەكەی دەكرێت تا بەتەواوی یەكلایی دەبێتەوە. رەحمان غەریب رێكخەری سەنتەری میترۆ بەهاوڵاتی وت:»سەنتەری میترۆ پشتیوانی خۆی بۆ رۆژنامەنووس  دڵشاد ئەنوەر دەردەبڕێت، پێشوازی لەپرۆسەی سەلماندنی راستی لەناو راپۆرتەكەی گۆڤاری رایەڵ دەكات».  وتیشی «ئەم زانیارییە نوێیەی دۆسییەكە سەلمێنەری ئەو راستییەن گەر لەدانیشتنەكانی پێشوودا وردتر تەماشای دۆسیەكەیان بكردایە حەقیقەت زووتر بۆ رایگشتی ئاشكرا دەبوو». هاوكات پارێزەر كاوە لەتیف، كەتەنها لەدانیشتنەكەدا ئامادەبووە بەڵام پارێزەری هیچ لایەنێكیان نەبووە بەهاوڵاتی وت:»لەبەشێكی دادبینیەكە لەهۆڵی دادگا بووم، راستی راپۆرتەكە سەلمێندرا، بۆیە پێویستە دڵشاد ئەنوەر داوای دووبارە دادگایی كردنەوەی ئەو كەسانە بكات كە لەدۆسیەكەدان، چونكە بەڵگەی نوێی دەستكەوتووە». هاوڵاتی بۆ وەرگرتنی رای عەدنانی حەمەی مینا، ئەندامی سەركردایەتی یەكێتی  كە لەدۆسیەكەدا یەكەمجار سكاڵاكارو ئێستاش شایەتی لەسەر دراوە كە زەوی داگیركردووە، چەندین جار پەیوەندی پێوەكرد، بەڵام پەیوەندییەكانی بەردەست نەبوون.

سوپای ئۆکراینا خستنەخوارەوەى ژمارەیەک  فڕۆکەى بێفڕۆکەوانى راگەیاند کە لە لایەن روسیاو-ە بەکارهێنراوە. یوری ئیھانت، وتەبێژی ھێزی ئاسمانی سوپای ئۆکراینا بڵاوی کردەوە؛ لە سەرەتای ئەم مانگەوە تا ئێستا، ٦٧ فڕۆکەی بێفڕۆکەوانی خۆکوژی ئێرانیان خستوەتە خوارەوە. ئاشکراکردوە کە ئەو فڕۆکە بێفرۆکەوانانەی کە خراونەتەخوارەوە، لە ماوەی رابردودا لەلایەن ئێرانەوە رادەستی روسیا کراون. بەپێى وتەى وتەبێژی ھێزی ئاسمانی سوپای ئۆکراینا، پێشتر فڕۆکە بێفڕۆکەوانەکان لە ناوچەکانی کریمیا و خێرسۆن ئاڕاستەی ئۆکراینا کراون بەڵام ئێستا لە ھەرێمی کراسنۆدار رۆژھەڵاتی دەریای ئازۆڤەوە ئاراستە دەکرێن. بەپێى ئامارێکى وەزارەتى بەرگرى ئۆکرانیا تائێستا 127 فڕۆکەى بێفڕۆکەوان و 300 موشەکى کروز ئاراستەى وڵاتەکە کراون و بەشێکیان خراونەتەخوارەوە.