هێرشەکانی سوپای تورکیا بۆ سەر ناوچەکانی باکور و رۆژهەڵاتی سوریا چڕتر بونەتەوە و شەوی رابردو چەند گوندێکی گرێسپی و شێراوا و سنوری کۆبانێ بەچڕی تۆپباران کران. سەرچاوەکانی هەواڵ بڵاویان کردوەتەوە تورکیا دەستی لە هێزەکانی رژێمی سوریا نەپاراستوە و چەند بنکەیەکی سەربازانی ئەو وڵاتەی بۆردومان کردوە. میدیاکانی رۆژئاوای کوردستان بڵاویان کردەوە، شەوی رابردو سوپای تورکیا بەچڕی هەریەک لە گوندەکانی ئەبو سەرۆ، رێگای ئیم فۆڕ و عەین عیسای تۆپباران کردوە. ئاماژەی بەوەشکردوە هەریەک لە ناوچەکانی شێراوا، گوندی زەرێ، تەپەخانێ، خانێ و قەران لە ناوچەی عەین عیسا و تل تەمر و تل لەبەن بەچەکی قورس کراونەتە ئامانج. میدیاکانی رۆژئاوای کوردستان، ئەوەشیان خستوەتە رو کە لە هەمانکاتدا خاڵە سەربازییەکانی سەر بە حکومەتی دیمەشق لە گوندی کۆر عەلی کۆبانێ لەلایەن سوپای تورکیاوە تۆپباران کراوە بەڵام لە بارەی زیانەکانەوە هیچ زانیارییەک ئاشکرا نەکراوە.
هاوڵاتی لە سۆماڵ بەهۆی کێشەی خۆراکەوە کە بەردەوامە نزیکەی هەشت ملیۆن کەس تووشی بەدخۆراکی بوون. لەو راپۆرتەی کە لەلایەن نەتەوەیەکگرتووەکانەوە بڵاوکراوەتەوە، ئاماژە بەوە کراوە کە بەهۆی کەمیی باران بارینەوە لە ساڵی ٢٠٢٠وە کێشەی خۆراکی پەیوەست بە وشکەساڵییەوە بەردەوامە. لە راپۆرتەکەدا باس لەوە کراوە کە نزیکەی هەشت ملیۆن کەس تووشی بەدخۆراکی بوونەتەوە و ئەوە خراوەتەڕوو کە وشکەساڵی بەردەوام دەبێت و ئەو دۆخەی ئێستا هەیە خراپتر دەبێت. پێشبینی ئەوە دەکرێت کە کاریگەریی کێشەی خۆراکی پەیوەست بە وشکەساڵی لە باشووری خۆرئاوای وڵاتەکە و مۆگادیشۆ-ی پایتەخت و چەندین ناوچەی دیکەی وڵاتەکە بەردەوام بێت. خەڵکی سۆماڵ کە بەشێوەیەکی گشتی ژیانیان بە ئاژەڵدارییەوە بەڕێدەبەن، زۆرینەیان بەهۆی وشکەساڵی و پێکدادانەکانەوە ناچار کراون ماڵەکانیان جێبهێڵن.
پاتریک ڕیدەر وتەبێژی وەزارەتی بەرگری ئەمریکا (پنتاگۆن) رایگەیاند، دەورییە هاوبەشەکانی نێوان هاوپەیمانان و هەسەدە "بەتەواوی" دەستیپێکردووەتەوە کە بەهۆی هێرشە ئاسمانییەکانی تورکیاوە راگیرابوون. ڕیدەر لە کۆنفڕانسێکی رۆژنامەوانیدا ئاماژەی بە دۆخی هێزەکانی هاوپەیمانان لە سوریا و پەیوەندیەکانیان لەگەڵ هەسەدە کرد و وتی، " بەناوی هێزەکانی ئەمریکاوە دەتوانم بڵێم، ئۆپەراسیۆنە هاوبەشەکانمان لەگەڵ هەسەدە، دژی داعش دەستی پێکردووتەوە." وتەبێژی پنتاگۆن باسی ئەوەشی کرد کە هێزەکانی ئەمریکا بەهۆی هێرشەکانی تورکیاوە، راستەوخۆ رووبەرووی مەترسی ببوونەوە، بەڵام دۆخەکە ئاساییە و لە ئێستادا هیچ مەترسیەکی دیکە لەسەر هێزەکانیان دروست نەبووە. لە وڵامی پرسیارێکدا لەبارەی ئەوەی، ئایا تورکیا سوورە لەسەر هێرشی زەمینی بۆسەر باکوری سوریا یان نا؟ پاتریک ڕیدەر وتی، نامەوێت لەبری تورکیا قسە بکەم، بەڵام بەناوی ئەمریکاوە دەڵێم کە لەگەڵ هەسەدە چالاکیەکانمان بە تەواوی دەست پێکردووەتەوە و دەوریەکانمان پێکەوە لە نۆی مانگەوە ئۆپراسیۆن ئەنجام دەدەن. بەهۆی هێرشی دەوڵەتی تورکیاوە کە شەوی ١٩ی تشرینی دووەم دەستی پێکرد، هێزەکانی سوریای دیموکراتی لە ٢٣ی ئەو مانگەدا رایگەیاند، بەهۆی هێرشەکانەوە، هەموو چالاکی و ئۆپراسیۆنێکیان لەگەڵ هێزەکانی ئەمریکا و هاوپەیمانان راگرتووە و خۆیان بۆ وڵامدانەوەی هێرشەکانی تورکیا ئامادە دەکەن.
هاوڵاتی دەستەی دەسپاکی فیدراڵی ئەمڕۆ چوارشەممە، دەركردنی بڕیاری راگرتنی كاتی بۆ موڵك و ماڵی تۆمەتباری هەڵاتوو بریكاری پێشووی وەزیری كارەباو ڕێگریكرن لە گەشتكردنی راگەیاند. دەستەكە لە بەیاننامەیەكدا دەڵێت: دادگای لێكۆڵینەوەی دووی كەرخ بڕیاریدا بە دەستبەسەرداگرتنی كاتیی موڵك و ماڵی تۆمەتباری هەڵاتوو جێگری پێشووی وەزارەتی كارەبا، سەبارەت بەو سكاڵایەی كە لەلایەن یەكێك لە خاوەنی كۆمپانیاكانەوە لەسەری تۆمار كراوە، بەهۆی ئەوەی تۆمەتبار داوای (بەرتیل)ی كردووە لەبەرامبەر بەخشینی یەكێك لەو تەندەرانەی كە وەزارەتی كارەبا بەكۆمپانیاكەی ڕاگەیاندووە، ئاماژە بەوەشدەكات: كە بڕیارەكە بەپێی بڕگەكانی مادەی (121) بنەڕەتی دەركراوە. ئاشكراشیكرد: دادگاكە پێشتر لە بیست و پێنجی مانگی ئابی ڕابردوو فەرمانی دەستگیركردن و پشكنینی دژی تۆمەتبار دەركردووە، بەپێی بڕگەكانی ماددەی (دووەم/1) لە بڕیاری ژمارە (160ی ساڵی 1983)، ئاماژەی بۆ ئەوەشكرد: كتابی ئاراستەی سەرۆكایەتی دادگای تێهەڵچوونەوەی كەرخی بەغدا كرد، بەمەبەستی ئاراستەكردنی بۆ دادگای تێهەڵچونەوەی سلێمانی، بەمەبەستی جێبەجێكردنی فەرمانی دەستگیركردن دژی تۆمەتبار.
هاوڵاتی وادەردەكەوێت سەرەتای ناكۆكییەكان لەنێوان لایەنە پێكهێنەرەكانی حكومەتی نوێی عێراق بەسەرۆكایەتی (محەممەد شیاع سوودانی) سەریهەڵدابێت و ئەو هێزانەی لەژێر چەتری (هاوپەیمانی بەڕێوەبردنی دەوڵەت) بەگشتی و هاوپەیمانی چوارچێوەی هەماهەنگی بەتایبەت كۆكبوون لەدروستكردنی حكومەت و دابەشكردنی پۆستەكان لەئێستادا لەناوخۆیاندا جۆرێك لەناكۆكییان بۆ درووستبووبێت. هەرچەندە لەماوەكانی پێشووتردا هاوپەیمانێتی بەڕێوەبردنی دەوڵەت (كە لەهێزە شیعەكان و پارتی و سوننەكان) پێكدێت و درووستكەری حكومەتی عێراقن كۆبوونەوەو لەسەر چەند خاڵێك رێكەوتن كەخۆی لەهەمواركردنی یاسای هەڵبژاردنەكان و ئەنجامدانی هەڵبژاردنی پارێزگاكان لەماوەی یەك ساڵدا دەبینێتەوە، بەبێ ئەوەی ئاماژە بۆ دووبارە ئەنجامدانەوەی هەڵبژاردنی پەرلەمان بكەن كە پێشووتر بانگەشەیان بۆ دەكرد. لەئێستاشدا بەپێی ئەوەی هاوپەیمانیی بەڕێوەبردنی دەوڵەت بەهۆی هاوپەیمانێتی چوارچێوەی هەماهەنگییەوە رۆڵەكەی لاوازكراوە بۆیە وادەردەكەوێت حوكمڕانی وڵات لەلایەن چوارچێوەی هەماهەنگییەوە (مالیكی_خەزعەلی_عامری)یەوە بكرێت و ئەوان بڕیاربەدەستی یەكەمی عێراق بن. لەنوێترین كۆبوونەوەی چوارچێوەی هەماهەنگی و سوودانی سەرۆكوەزیراندا، وادەردەكەوێت ناكۆكییەكان دەركەوتبن و سەرەتای لێكترازانی ئەو چوارچێوە شیعەیە بێت و چوارچێوەی هەماهەنگی سەرنج و تێبینیان لەسەر گۆڕانكارییەكانی محەممەد شیاع سودانی سەرۆكوەزیرانی عێراق هەیە. بەپێی ئەو زانیارییانەی كە دزەی پێكراوە بۆ میدیاكان ناكۆكییەكان لەوەوە سەریانهەڵداوە، سوودانی سەرۆكوەزیران دەیەوێت گۆڕانكاری لەهەندێك لەپارێزگارەكانی پارێزگاكانی عێراقدا بكات، بەتایبەت ئەوانەی دەنگۆی گەندەڵی و خراپ ئیدارەدانیان بەشوێنەوەیە. لەكۆتاییەكانی مانگی تشرینی دووەمی ئەمساڵ، سەرۆكوەزیران بڕیاریدا لیژنەیەك بۆ هەڵسەنگاندنی پارێزگارەكان درووستبكات و جەختی لەوەكردەوە هەرچی پارێزگارێك گرفتێكی ئیداری یان گەندەڵی هەبێت لادەبرێت، هەربۆیە ژمارەیەك لەو پارێزگارانە خۆیان گەیاندە بەغداو بەتایبەتیش چوونە لای نوری مالیكی. هەرچەندە سەرۆكوەزیران بەڵێنیداوە هەر پارێزگارێك لاببات لەهەمان حزب پارێزگارە نوێیەكە دابنێت، بەڵام وادیارە گرفتەكە لەوەوە سەرچاوە بگرێت كە (نوری مالیكی) سەرۆكی هاوپەیمانی دەوڵەتی یاسا بڕوای وایە پێویستە دابەشكارییە نوێییەكان بەپێی قەبارەی سیاسی ئێستای گرووپەكان بێت، بەڵام سوودانی سەرۆكوەزیران بڕوای وایە دەبێت بەپێی دوایین ئەنجامی هەڵبژاردنی ئەنجومەنی پارێزگاكان بێت كە لەساڵی 2013 ئەنجامدراوە، ئەمەش وەك ئاماژەیەك بۆ ئەوەیە رەوتی سەدر بێبەشنەكرێت كاتێك دەیەوێت پارێزگارەكانی سەر بەڕەوتی سەدر بگۆڕێت. وەنەبێت هەر بەتەنیا ناكۆكییەكان لەو چوارچێوەیەدا بمێننەوە، بەڵكو مەترسی ئەوەش لەئارادایە بەهۆی ئەو گۆڕانكارییانەی كە سوودانی ئەنجامی داوە كە خۆی لەگۆڕینی 1000بەرپرسی ئەمنی و سیاسی و هەواڵگری و سەربازی بینیوەتەوە هەموویان لایەنگری حكومەتەكەی مستەفا كازمی و نزیكبوون لەڕەوتی سەدر، پێكدادانی لایەنگرانی سەدرو حكومەتەكەی سوودانی لێبكەوێتەوە. هەر لەو چوارچێوەیەدا باسم خەشان پەرلەمانتاری سەربەخۆ رایگەیاندووە محەممەد شیاع سوودانی سەرۆكوەزیران سوپایەك لەڕاوێژكارانی دامەزراندووە كە بەشی داگیركردنی وڵاتی چین دەكات، ئاماژەش بۆ ئەوەدەكات سەرۆكی حكومەت داوایەك بۆ جێبەجێكردنی یاسای رێكخستنی راوێژكاران كە لەساڵی 2017 دەرچووە پشتگوێخستووە. نوری مالیكی و قەیس خەزعەلی ئەمینداری گشتی عەسائیبی ئەهلی حەقیش ناكۆكییان لەنێواندایەو مەترسی هەڵوەشاندنەوەی چوارچێوەی هەماهەنگی لەئارادایە، هەرچەندە زۆرێك دەڵێن ناكۆكییەكان بەو جۆرە نین، بەڵام لەهەموو ساتێكدا ئەگەری تەقینەوەی ناكۆكییەكان لەئارادایە، بەتایبەت لەكاتێكدا مالیكی ئارەزووی ئەوەی هەیە پۆستی جێگری سەرۆككۆماری بەدەستبهێنێتەوەو خەزعەلیش دەیەوێت دەستبگرێت بەسەر دەزگای ئاسایشی نیشتیمانیدا، هەروەها خەزعەلی ئەو ئەندامە جیابووانەی حزبی دەعوە دەگرێتەخۆ كە جیادەبنەوە ئەمەش مالیكی نیگەران كردووە. پێشووتریش خەزعەلی رایگەیاندبوو كە سوودانی مافی تاك بڕیاری نییەو دەبێت بۆ هەر بڕیارێك بگەڕێتەوە بۆ چوارچێوەی هەماهەنگی. وەنەبێت ناكۆكییەكان هەر بەتەنیا پەیوەست بێت بەسەرۆك وەزیرانەوە، بەڵكو ژمارەیەك لایەنی سوننەش بیر لەگۆڕینی محەممەد حەلبوسی سەرۆكی پەرلەمانی عێراق دەكەنەوەو بیر لەوەدەكەنەوە رێگەنەدەن حەلبوسی هەژموون خۆی بەسەر هەڵبژاردنی ئەنجومەنی پارێزگاكاندا بسەپێنێت كە وابڕیارە ئۆكتۆبەری ساڵی داهاتوو بەڕێوەبچێت، چونكە سەركەوتنی لەو هەڵبژاردنەدا بەواتای كۆنترۆڵكردنی تەواوەتی بڕیاری سوننە دێت لەهەڵبژاردنەكانی داهاتووی پەرلەمانی عێراق. بەپێی هەواڵێكی رۆژنامەی (شەرقولئەوسەت) بەدوور نازانرێت محەمەد حەلبوسی لەچەند مانگی داهاتوودا لەسەر كورسی سەرۆكی پەرلەمان لابدرێت، بەتایبەتیش لەكاتێكدا هەندێك لایەنی شیعەی دەسەڵاتدار رەزامەندن بەلادانی بەهەماهەنگیی لەگەڵ لایەنە سوننەكاندا. دكتۆر یەحیا كوبەیسی كەشارەزای كاروباری عێراقە دەڵێ» لادانی حەلبوسی بەتەنیا پشت بەبڕیاری (چوارچێوەی هەماهەنگیی)ی شیعەكان دەبەستێت و بڕیاری سوننە نییە، تائێستا لەناو چوارچێوەدا كۆدەنگی لەسەر لادانی نییەو هەندێك لەوڵاتانی ناوچەكە پاڵپشتی لێدەكەن.. لەناو چوارچێوەشدا مالیكی لەگەڵ دوورخستنەوەی حەلبوسیدایە، بەڵام هەندێكی تریان دژی ئەمەنو پێیانوایە حەلبوسی كەسایەتییەكە كە دەتوانرێت كۆنترۆڵ بكرێت». لەنوێترین راگەیەندراوی خۆیدا باڵیۆزخانەی ئەمەریكاش لەبەغدا لەراگەیەندراوێكدا ئاشكرایدەكات، پشتیوانییەكی تەواوی حكومەتی محەممەد شیاع سوودانی دەكەن لەبەرەنگاربوونەوەی گەندەڵی و گۆڕینی دۆخی ئێستای وڵاتدا. سەبارەت بەدۆخی پەیوەندییەكانی بەغداو هەرێمی كوردستانیش وادەردەكەوێت حكومەتەكەی سوودانی بەئاراستەی سفكردنەوەو چارەسەركردنی كێشەكانی لەگەڵ هەرێمدا هەنگاوبنێت، هەر لەو چوارچێوەیەشدا جگە لەچالاككردنەوەی مادەی 140ی دەستور، لەئێستاشدا گفتوگۆگانی هەرێم و بەغدا دەستیپێكردووەتەوە. رۆژی دووشەممە ١٢ی كانوونی یەكەمی ٢٠٢٢، شاندی حكومەتی هەرێمی كوردستان و ئەنجومەنی وەزاریی ئابووری حكومەتی فیدراڵی كۆبووەوە. لەكۆبوونەوەكەدا شاندی هەرێمی كوردستان دیدو بۆچوونی حكومەتی هەرێمیان لەبارەی پرەنسیپە گشتییەكانی پرۆژە یاسای بودجەی ساڵی ٢٠٢٣، خستەڕوو و بەپێویستیان زانی دەستوورو كارنامەی حكومەتی نوێی عێراق، ببێتە بنەمایەك بۆ رێكەوتن لەسەر ئەو بابەتە، ئەنجومەنی وەزاریی ئابووری عێراقیش ئاماژەیان بەبنەماكانی سیستەمی فیدڕاڵیان كردەوە بۆ بەهێزكردنی پەیوەندییەكان لەگەڵ وەزارەتە هاوتاكانی حكومەتی هەرێمی كوردستان. بەبڕوای چاودێرانیش لەئێستادا كابینەكەی محەممەد شیاع سوودانی لەبەردەم تاقیكردنەوەیەكی سەختدایە، كە لەلایەك دژایەتیكردنی گەندەڵی و پاراستنی سەربەخۆیی وڵات و بڕیاری سیاسییە، لەلایەكی تریشەوە فشاری ئەو هێزانەیە كە ئەم حكومەتەیان پێكهێناوەو دەیانەوێت پشكەكانیان زیاتر بكەن. هەر بەبڕوای ئەو چاودێرانە هاوپەیمانێتی بەڕێوەبردنی دەوڵەت تەنیا بۆ ئەوە درووستكرا كەحكومەتەكە درووستبكرێت و پۆستە باڵاكان دابەشبكات، ئەگینا لەواقیعی سیاسیدا هیچ بڕیارێكی سیاسی گەورەی بەدەست نییەو ئەوەی هەیە لەلای هاوپەیمانێتی چوارچێوەی هەماهەنگی شیعەكانە كەبڕیاربەدەستی یەكەمی وڵاتن و هێڵە سیاسییە گشتییەكانی كابینەكەی سوودانی دیاری دەكەن و بەهەر لێكترازان و ناكۆكییەكیش لەنێو هێزەكانی ئەو چوارچێوەیەدا تەمەنی كابینەكەی سوودانیش یان كۆتایی دێت یاخود كورت دەبێت.
ناوەندی هەرانا رایگەیاند، ژمارەی کوژراوەکانی خۆپیشاندانە سەرتاسەریەکەی ئێران بۆ نزیکەی ٥٠٠ کەس بەرزبوەوەتەوە. ناوەندی مافی مرۆڤی ئێران (هەرانا)، ئامارێکی نوێی لەبارەی کوژراوەکانی خۆپیشاندانە سەرتاسەریەکەی ئێران بڵاوکردەوە کە لە 16ی ئەیلولەوە، دوای کوشتنی ژینا ئەمینی کچە کوردی رۆژهەڵاتی کوردستان، لە تاران لەلایەن پۆلیسی ئەخلاقەوە، دەستی پێکرد. بەگوێرەی ئاماری هەرانا، تاوەکو ئێستا ٤٩٣ کەس کوژراون و خۆپیشاندانەکانیش لە ١٦١ پارێزگا و شاروچکە بەردەوامن. هەرانا دەڵێت: لەنێو کوژراوەکاندا، ٦٨ منداڵ و نەوجەوان و ٦٢ کەس لە هێزە ئەمنیەکان هەن. هەروەها تاوەکو ئێستا ١٨ هەزار و ٤٢٤ کەس دەستگیرکراون کە ٦٣٢ کەسیان خوێندکارن. خۆپیشاندانەکانی سەرتاسەری ئێران ٨٨ رۆژە بەردەوامە و رۆژهەڵاتی کوردستان پێشەنگایەتی خۆپیشاندان و نارەزایەتییەکان دەکات. بەگوێرەی ئاماری رێکخراوی مافی مرۆڤی هەنگاو، تەنیا لە رۆژهەڵاتی کوردستان نزیکەی ١٢٥ هاوڵاتی کورد کوژراون.
سێ رۆژە بەهای دۆلار لە ئێران بەرزبونەوەی بەردەوام بەخۆیە نرخی هەر دۆلارێک لە وڵاتە گەیشتە نزیکەی 39 هەزار تمەن ئەمڕۆ چوارشەممە بەهای هەر دۆلارێک لە بازاڕەکانی ئێران گەیشتە 38 هەزار و 700 تمەن و هاوکات بەهای زێڕیش بەرز بوەوە. میدیاکانی ئێران بڵاویان کردوەتەوە هۆکاری سەرەکیی دابەزینی بەهای تمەن لە بەرامبەر دۆلاردا سەپاندنی سزای نوێ دژی دەسەڵاتی تاران و کەمبونەوەی فرۆشتنی نەوتی ئێرانە لە بازاڕەکاندا. بە پێی راپۆرتە ئابورییەکان دراوی تمەن لە مێژوی دروستبونیەوە تا ئێستا زیاتر لە 95٪ی بەهاکەی بەرامبەر بە دۆلار لەدەست داوە . لە سەرەتای ناڕەزایەتییەکان و خۆپشاندانەکانی دوای مەرگی ژینا ئەمینی نرخی هەر دۆلارێک لە ئێران نزیکەی 30 هەزار تمەن و بە گشتی لە سێ مانگدا بەهای هەر دۆلارێک لە وڵاتەکە نزیکەی نۆ هەزارتمەن بەرز بوەتەوە. پێشبینیی دەکرێت بە کاردانەوەی توندی دەسەڵاتی ئێران دژی خۆپیشاندەران و سەپاندنی سزای سێدارە، کاردانەوە و سزای نێودەوڵەتیی زیاتر دەسەڵاتی ئەو وڵاتە بگرێتەوە و بەهای تمەن بەشێویەکی بەرچاو بەردەوام بێت لە دابەزینی زیاتر.
هاوڵاتی رۆژنامەی هاوڵاتی بەدواداچوون دەكات بۆ ئەو دۆسیانەی لەسنووری بەڕێوەبەرایەتی تۆماركردنی خانووبەرەی چەمچەماڵ بردراون، وەزارەتی داد رایگەیاند: هێزێك سەرجەم دۆسییەكانی موڵكەكانی (قادر كەرەم)یان بەدۆڵابەكەوە بردووە، بەڵام سەرچاوەیەكی بەرپرس لەسنووری قەزای چەمچەماڵ دەڵێت: ئەو دۆسیەیانە نەبراون و نەڕفێنراون، گرنگ ئەوەیە لەشوێنێكی سەلامەتدان و وتیشی: لایەنێك بەنیازبوو ئەو دۆسیانە بەلایەكدا ببات و بەكاریانبهێنێت، ئاماژە بۆ ئەوەشدەكات: ئەو دۆسیانەی لەسنووری بەڕێوەبەرایەتی تۆماركردنی خانووبەرەی چەمچەماڵ بردراون، بەفەرمانی جێگری سەرۆكی حكومەتی هەرێم بووە. رۆژی هەشتی كانوونی یەكەمی ٢٠٢٢ وەزارەتی دادی حكومەتی هەرێم بڵاویكردەوە: «رۆژی سێشەممە ٦ی كانوونی یەكەمی ٢٠٢٢، هێزێك كە نزیكەی (٥٠) كەس بوون هەڵیانكوتایەسەر بەڕێوەبەرایەتی تۆماركردنی خانووبەرەی چەمچەماڵ و داوایان لەبەڕێوەبەری فەرمانگەكە كرد كەهەموو دۆسیەكانی ناوچەی (قادر كەرەم) كەنزیكەی (٣٥٠ تا ٤٠٠) دۆسیەیە رادەستیان بكات بەبێ ئەوەی هیچ نووسراوێكی فەرمیان لەلایەن دادگا یان لایەنێكی فەرمی رێپیدراو پێبێت». وەزارەتی داد ئەوەشی خستەڕوو:» دوای ئەوەی بەڕێوەبەری فەرمانگەی ناوبراو گوێڕایەڵی داواكاریەكەیان نەبوو، هەستان بەشكاندنی قوفڵی ژووری دۆسییەكان و سەرجەم دۆسییەكانی موڵكەكانی (قادر كەرەم)یان بەدۆڵابەكەوە بردووە، هەروەها دیسكی كامێرای بەڕێوەبەرایەتی ئاماژەپێكراویان بردووە، ئێمە ئەم كردەوەیە بەشكاندنی سەروەری یاساو زێدەڕەوی لەسەر هەیبەتی دامودەزگاكانی حكومەتی هەرێم دەزانین و پێشێلكردنێكی زەقە لەسەر بەڵگەنامەو دۆكیومێنتی خاوەندارێتی هاووڵاتیانی ناوچەكە». رۆژنامەی هاوڵاتی بۆ بەدواداچوونی ئەو پرسە پەیوەندی بە نەریمان تاڵب وتەبێژی وەزارەتی دادی حكومەتی هەرێمی كوردستانەوە كرد، بەڵام ناوبراو رایگەیاند جگە لەو بەیاننامەیە هیچ قسەیەكی دیكەیان نییە. هاوكات رۆژنامەی هاوڵاتی پەیوەندیكرد بە هێمن میرانی بەڕێوەبەری گشتی دیوانی وەزارەتی ناوخۆی حكومەتی هەرێم، ئەو بەرپرسەی وەزارەتی ناوخۆ رایگەیاند:»وەزارەتی داد لەگەڵ لایەنی پەیوەندیداری سنوورەكە سەرقاڵی بەدواداچوونە بۆ دۆسیەی بەڕێوەبەرایەتی تۆماركردنی خانووبەرەی چەمچەماڵ كەدەوترێت هێزێك هەڵیكوتاوەتەسەرو ژمارەیەك دۆسیەی بردووە». لەمیانی بەدواداچوونی زیاتر بۆ ئەو دۆسیەیە، رۆژنامەی هاوڵاتی قسەی لەگەڵ بەرپرسێكی پەیوەست بەدۆسیەكە كرد كەبەرپرسیارێتی هەیە لەسنووری قەزای چەمچەماڵ، ناوبراو رایگەیاند:»ئێمە لەهەوڵداین بۆ پاراستنی دۆسیەكان، گرنگ ئەوەیە لەشوێنێكی سەلامەتدان، دۆسیەكان نە براون نە رفێندراون، ترسێك هەبووە لەو دۆسیانە لەو شوێنەدا بەفەرمانی سەروو خۆمان (جێگری سەرۆكی حكومەتی هەرێم) لەو شوێنە براون و هەموو دۆسیەكان وەكو خۆیانن». ئەو بەرپرسە وتیشی:» لایەنێك بەنیازبوو ئەو دۆسیانە بەلایەكدا ببات و بەكاریانبهێنێت، ئەو دۆسیانەش پەیوەندیدارنین بەتاپۆی چەمچەماڵەوە، بەڵكو پەیوەستن بەو ناوچانەی غازیان تێدایە، تەنها شێوازی جێبەجێكردنەكەی بەدڵی من نەبووە ئەگەرنا رێكارێكی ئاسایی بووە، رەتیشیكردەوە بردنی دۆسیەكان پەیوەندی بەهیچ كەسێكەوە هەبێت». هاوڵاتی چەندینجار پەیوەندی بەبەڕێوەبەری بەڕێوەبەرایەتی تۆماركردنی خانووبەرەی چەمچەماڵەوە كرد، بەڵام ژمارەكەی داخرابوو، وەڵامی پەیامە دەنگیەكانیشی لەڕێگەی واتسئەپ و تیلیگرام نەدایەوە.
هەوڵێکی ئێران بۆ تیرۆری راوێژکاری ئاسایشی نیشتیمانیی ئەمریکا ئاشکرا دەبێت و ئێف بی ئای کارمەندێکی خۆی دەستگیر دەکات. گروپێکی هاککەر زانیارییەکانی تایبەت بە هەوڵی کوشتنی جۆن بۆڵتن، راوێژکاری ئاسایشی نیشتیمانیی پێشوی ئەمریکا لە لایەن سوپای پاسدارانی ئێرانەوە بڵاو دەکەنەوە. گروپی بلەک دور، ئاشکرای کردوە کە ساڵی رابردو ئەندامێکی سوپای پاسدارانی ئێران کە پێشتر لە سوریا بوە داوای لە سیخوڕێکی دەزگای پۆلیسی فیدڕاڵی ئەمریکا (ئێف بی ئای کردوە) وێنەی جۆن بۆڵتن تۆمار بکات و هاوکات لە بەرامبەر 300 هەزار دۆلاریشدا ئەو بەرپرسەی ئەمریکا تیرۆر بکات. ئەندامەکەی سوپای پاسداران ناوی شەهەرام پورسەفەری بوە و لە ئێستا ناوی خۆی لە ئێران بۆ مەهدی رەزایی گۆڕیوە. بە پێی زانیارییەکان هەر وێنەیەکی جۆن بۆڵتن بە سێ بۆ پێنج هەزار دۆلار تۆمار کراوە و دواتر ئێف بی ئای بە هەوڵی تیرۆری ئەو بەرپرسەی زانیوە و کارمەندە سیخوڕەکەی دەزگاکەی دەستگیر کردوە. ئێران دوای کوژرانی قاسم سولەیمانی، فەرماندەی پێشوی فەیلەقی قودس لە ساڵی 2020 لە فڕۆکەخانەی بەغدا لە لایەن ئەمریکاوە، ئێران رایگەیاندتۆڵەی سولەیمانی بە کوشتنی ئەو سەرکردە و بەرپرسانەی ئەمریکا دەکاتەوە کە دەستیان لە کوشتنیدا هەبوە. پێشتر ئەمریکا ئاشکرای کردبو بەهۆی ئەو هەڕەشەکانی ئێرانەوە لەسەر دۆناڵد ترەمپ-ی سەرۆکی پێشو و مایک پۆمپیۆ، وەزیری دەرەوەی پێشو ساڵانە یەک ملیۆن دۆلار بۆ دابینکردنی ئاسایشی ژیانی ئەو دو بەرپرسە تەرخان دەکرێت.
هاوڵاتی چیتر ئیلۆن مەسک دەوڵەمەندترین پیاوی جیهان نیە بەپێی هەردوو ماڵپەڕی فۆربێس وبلومبێرگ بەهای سامانەکەی ئیلۆن مەسک دابەزیوە کە بڕەکەی ١٧٨ملیار دۆلارە بەمەش چییتر لە لیستی یەکەمین دەوڵەمەندی جیهاندا نیە، لەبەرامبەردا ئێستا بیرنارد ئارنۆڵت " بەڕێوبەری جێبەجێکاری کاڵای لوکس " ئێڵ ڤی ئێم ئێچ" یەکەم پیاوی دەوڵەمەندی جیهانە کە سامانەکەی بە ١٨٨ ملیار دۆلار مەزندە دەکرێت. پسپۆڕان ئەم دابەزینەی سامانەکەی ئیلۆن مەسک بۆ کڕینی تۆڕی کۆمەڵایەتی تویتەر دەگەڕێننەوە کە بەبەهاکەی ٤٤ ملیار دۆلار بوو؛ لەگەڵ ئەوەشدا کێشەکانی پەیوەست بە ڕێکارە یاساییەکانی کڕینەوەی تویتەر ئەوەش دوای ئەوەی کە بەهۆی بوونی ژمارەیەکی زۆر لە هەژماری ساختە ئیلۆن مەسک پاشگەزبۆوە لەگرێبەستی کڕینی تویتەر وبەهۆیەوە کارێگەڕەکانی تویتەر سکاڵای یاساییان دژی ئیلۆن مەسک گرتبەر. ئیلۆن مەسک پشکەکانی تێسلای بەبەهای ملیارەها دۆلار فرۆشت بۆ کڕینی تویتەر، ئەمەش وایکرد کە بەهای پشکەکان بێتە خوارەوە. وەبەرهێنەرانیش ئاماژە بەوەدەکەن خواست لەسەر ئۆتۆمبێلە کارەباییەکانی تێسلا کەمبێتەوە وبەمەش کۆمپانیاکانی دیکەش زیاتر پێشدەکەون لە ئۆتۆمبێلە کارەباییەکاندا، چونکە قەرزی زۆر کۆمپانیاکە لاوازدەکات و خواستی کڕیاران کەمدەکاتەوە وبێهیوایان دەکات. ئیلۆن مەسک بەڕێبوبەری جێبەجێکاری جێبەجێکار گەورەترین خاوەنی پشکی کۆمپانیای تێسلایە، کە دەکاتە %١٤ لەسەدی پشکەکانی تێسلا.
هاوڵاتی تیمی وەزاریی یەکێتیی نیشتمانیی کوردستان راگەیێندراوێکی بڵاوکردەوە و دەڵێت: ناردنی 400 ملیارەکە لەسەر بنچینەی رێککەوتنی لایەنە سیاسییەکانی نێو هاوپەیمانیی بەڕێوەبردنی دەوڵەتە. دەقی راگەیەنراوەکەی تیمی وەزاری یەکێتی: ئەمڕۆ ئەنجومەنی وەزیرانی عێراق بەزۆرینەی دەنگ بریاریدا لەسەر خەرجکردنی ٤٠٠ ملیار دینار بۆ هەرێمی کوردستان لەسەر بنەمای برگەی ٢٣/ج لە رێککەوتنی سیاسیی لایەنەکانی پێکهێنەری حکومەتی عێراق کە زۆربەی لایەنە سیاسیەکان ئیمزایان لەسەر کرد و بە ڕاگەیاندنی هاوپەیمانییەتییەک بەناوی ئیدارەی دەوڵەت و رێککەوتنەکە بووە کارنامەی کابینەی بەڕێز محەممەد شیاع سودانی و متمانەی پەرلەمانی عێراقی بەدەستهێنا و لە ئێستادا بڕگەکانی ئەو رێککەوتنە کەوتوونەتە بواری جێبەجێ کردنەوە و لەناویاندا پرسی بەشە بوودجەی هەرێمی کوردستان بۆ ساڵی ٢٠٢٢. هەر دەستکەوتێک بۆ گەلەکەمان بێت، جێی شانازیی و پێزانینی زۆرە لەلای یەکێتیی نیشتمانیی کوردستان ئیدی هەرکەس ولایەنێک بەئەنجامی گەیاندبێت، و تیمە وەزارییەکەی یەکێتی لە کابینەی نۆیەمی حکومەتی هەرێم، هەمیشە داکۆکیکردن لە مافی هاوڵاتیان بە ئەرکی لەپێشینەی خۆی زانیوە، بۆیە بە گەرمی پێشوازی لە بڕیاری ناردنی ٤٠٠ ملیار بۆ هەرێمی کوردستان دەکەین. هەر بۆیە تیمی یەکێتی لەکابینەی نۆیەمی حکومەتی هەرێم بە پێویستی زانی هەندێک زانیاری دروست بڵاو بکاتەوە: یەکەم: شاندی دانووستانی حکومەتی هەرێم کە ئێستا لەبەغدادە، بە بریاری ئەنجومەنی وەزیرانی هەرێم پێکهاتووە، وگەڕی یەکەمی دانووستانەکان بۆ ماوەی یەک هەفتە بە سەرۆکایەتی دکتۆر دارا رەشید وەزیری پلاندانان وئەندامیەتی دکتۆر ئامانج رەحیمی سکرتێری ئەنجومەنی وەزیرانە کە هەردووکیان لە تیمی یەکێتییە لەگەڵ بەڕێزەکانی تری وەفدەکە. دووەم: ئەم ٤٠٠ ملیارە لەسەر بنەمای رێککەوتنی لایەنە سیاسییەکانی هاوپەیمانی ئیدارەی دەوڵەتە کە حکومەتی عێراقییان پێک هێنا بەسەرۆکایەتی بەڕێز محەممەد شیاع سودانی، بۆ وەبیرهێنانەوەش هاوپەیمانی ئیدارەی دەوڵەت لە چەند ڕۆژی رابردوو لەماڵی سەرۆک مام جەلال لە بەغداد کۆبوونەوە. سێیەم: دیاری کردنی بڕی ٤٠٠ ملیارەکەش بۆ مانگی ١١ و ١٢ی ٢٠٢٢، لەسەر بنەمای یاسای بودجەی ٢٠٢١ بووە کە ئەوکات شاندی حکومەتی هەرێم بەسەرۆکایەتی قوباد تاڵەبانی جێگری سەرۆک وەزیران لەگەڵ حکومەت و پەرلەمانی عێراق رێککەوتن و لە یاسای بودجەی ئەو ساڵە جێگیر کرا و ئێستاش لەسەر ئەو بنەمایە ئەو پارەیە دیاری کرا لە رێککەوتنی لایەنەکانی ئیدارەی دەوڵەت و دواتر حکومەتی عێراقی خستییە بواری جێبەجێ کردنەوە وەک هەموو بڕگەکانیتری رێککەوتنەکە. لە کۆتاییدا دووپاتی دەکەینەوە کە؛ مایەی دڵخۆشی ئێمە و دەستخۆشییەکی زۆرە بۆ حکومەتی فیدراڵ و هەموو ئەو کەسانەی بەشدار بوون لە دەرچواندنی ئەم بڕیارە راست و درووستە، بەڵام کارێکی ناڕەوایە بکرێتە دەستکەوتی تاکە کەس و لەم بابەتانەش وەک هەمیشە تاکڕەوەی بچەسپێندرێت بە پەراوێزخستنی راستییەکان. ئێمە بەتوندی راگەیەندراوەکە کە بە ناو حکومەتی هەرێمی کوردستانەوە بڵاو کراوەتەوە دەربارەی ٤٠٠ ملیار دینارەکە رەت دەکەینەوە، چونکە ئەوەی باس کراوە لەو راگەیەندراوە بێڕێزیە بەرامبەر تیمەکەمان. ئێمە وەک بەشێکی سەرەکی ئەم حکومەتە رایدەگەیێنین کە؛ بە هیچ شێوەیەک ئەوە راگەیەندراوی حکومەتی هەرێمی کوردستان نیە، بەڵکو دووبارە تەعبیرکردنە لە ڕای یەک حزبی ناو حکومەت. هەر ئەو جۆرە تاکڕەویەشە کە ئێمەی نیگەران کردووە و وای لێ کردووین هەڵوێستمان هەبێت. تیمی وەزاری یەکێتیی نیشتمانیی کوردستان
ئەمڕۆ 88 رۆژ بەسەر ناڕەزایەتییەکانی رۆژهەڵاتی کوردستان و ئێراندا تێدەپەڕێت و لە شاری مەشهەد رێگریی کرا لە بەڕێوچونی رێوڕەسمی جەماوەریی و پرسەی مەجیدڕەزا رەهنەوەرد کە رۆژی رابردو لەسێدارە درابو، هاوکات کەشی ئەمنیی و سەربازیی بەسەر شاری جوانڕۆدا سەپێنرا بەهۆی ناڕەزایەتیی خەڵکی ئەو شارە دژی دەستگیرکردنی مامۆستایەکی ئاینیی و سێ گەنجی کورد مەترسیی لەسێدارەدانیان لەسەرە. مەلا سەیفوڵڵا حسێنی بە تۆمەتی پشتیوانیی لە ناڕەزایەتییەکانی رۆژهەڵاتی کوردستان و شاری جوانڕۆ لە لایەن هێزە ئەمنییەکانی ئێرانەوە شەوی دوشەممە دەستگیر کراوە و ئەوەش توڕەیی خەڵکی شارەکەی لێکەوتەوە جەماوەرێکی زۆر تا بەرەبەیانی رۆژی سێشەممە لەبەردەم قائیمقامیەتی جوانڕۆ کۆبونەوە و داوای ئازاکردنی ئەو مامۆستا ئاینییەیان کرد. دادگایەکی ئێران لە شاری ورمێ سزای سێدارەی بەسەر چوار گەنجی دیکەی شاری شنۆ لە رۆژهەڵاتی کوردستان سەپاندوە و بەوەش تا ئێستا شەش گەنجی ئەو شارە کە دوانیان بران بە تۆمەتی بەشداریی لە ناڕەزایەتییەکان سزای سێدارەیان بەسەردا سەپێنراوە. سەرچاوەیەک لە کەسوکاری فەرهاد و فەرزاد تەهازادە کە بران و سزای سێدارەیان بۆ بڕاوەتەوە رایگەیاندوە؛ بڕیارە رۆژی چوارشەممە سزای سێدارەدانی ئەو دوو برایە جێبەجێ بکرێت. تا ئێستا زیاتر 15 گەنجی کورد لە شارەکانی رۆژهەڵاتی کوردستان و تاران و کەرەج سزای سێدارەیان بەسەردا سەپێنراوە. رێکخراوی لێبوردنی نێودەوڵەتی ئەمڕۆ لە بەیاننامەیەکدا داوای راگرتنی سزای سێدارەی سامان سەیدی ناسراو بە یاسین، هونەرمەند و راپەری شاری کرماشان لە رۆژهەڵاتی کوردستانی کرد کە بە تۆمەتی بەشداریی لە ناڕەزایەتییەکانی شاری تاران سزای سێدارەی بەسەردا سەپێنراوە و بە پێی بەیاننامەکەی ئەو رێکخراوەیە؛ سامان یاسین بە مەبەستی لەسێدارەدانی لە زیندانی ئێڤین لە تاران بۆ زیندانی رەجایی شار لە کەرەج گوازراوەتەوە و مەترسیی راستەقینە لەسەر ژیانی هەیە. ئەمڕۆ دوای رۆژێک لە سێدارەدانی مەجیدڕەزا رەهنەوەرد هێزە ئەمنییەکان رێگەیان نەدا رێوڕەسمی جەماوەریی و پرسە بۆ ئەو گەنجە لە شاری مەشهەد بەڕێوبچێت. رۆژی سێشەممە وەزارەتی دەرەوەی فەڕەنسا ئەرکداری باڵیۆزخانەی کۆماری ئیسلامی ئێرانی لە پاریس بانگهێشت کرد و ناڕەزایەتیی وڵاتەکەی لەسەر سەرکوتی خۆپیشاندەران و فڕۆشتنی فڕۆکەی بێفڕۆکەوان بە روسیا ئاڕاستەی تاران کرد. فەڕەنسا داوای لە ئێران کردوە سزای سێدارە راگرێت و رەچاوی مافە رەواکانی خۆپیشاندەران و خەڵکی وڵاتەکەی بکات. تەنها لە تاران سزای زیندانیی دورودریژ بۆ 400 خۆپیشاندەری دەستگیرکراو بڕایەوە و سەرۆکی داواکاری گشتیی شاری تاران ئەمڕۆ ئاشکرای کرد لەو ژمارەیە 160 کەس پێنج ساڵ بۆ 10 ساڵ زیندانیان بەسەردا سەپێنراوە و 80 کەسیشیان دو بۆ پێنج ساڵ زیندانیان بۆ بڕاوەتەوە و 160 دەستگیرکاویشیان سزای دو ساڵ زیندانی و 70 دەستگیرکراوی دیکەیسزای مادییان بەسەردا سەپێنراوە. دژی لەسێدارەدانی دەستگیرکراوان ئەمڕۆ لە زانکۆی پزیشکی شاری تەبرێز رێپێوان بەڕێوەچو و خوێندکارانی ئەو زانکۆیە داوای راگرتنی سزای سێدارەیان کرد و لە تاران و شیراز و مەشهەد و کامیارانیش ناڕەزایەتیی دژی سزای سێدارە بەڕێوچو. ئەمڕۆ لە شاری فرانکفۆرت لە ئەڵمانیا مانگرتن و ناڕەزایەتیی دژی دەسەڵاتی ئێران و سزای سێدارە بەڕێوچو و لە شاری لەندەن و مانچستر لە وڵاتی بەریتانیا لەبەردەم نوسینگەی رێکخراوی لێبوردنی نێودەوڵەتیی گردبونەوە دژی دەسەڵاتی ئێران و سزای سێدارە بەڕێوەچو. هاوکات لە شاری میلان و تورین لە وڵاتی یتاڵیا و ئۆکلاند لە نیوزلەندا و ئیستانبوڵ لە تورکیا و سیدنی لە ئۆسترالیا و گۆتێنێرگ لە سوید ناڕەزایەتیی و گردبونەوەی چالاکوانان دژی دەسەڵاتی ئێران و سزای سێدارە بۆ خۆپیشاندەران بەڕێوەچو. وەزارەتی دەرەوەی بەریتانیا رۆژی سێشەممە لە بەیاننامەیەکدا رایگەیاند 12 بازرگانی روسیا و ژمارەیەک بازگانی ئێرانی سزا داوە و هاوکات لەو بەیاننامەیەدا جەختی لەوە کردوەتەوە کە ئێران بە رەفتار و هەڵسوکەوتەکانی سەرەڕای سەرکوت و ناڕەزایەتییەکانی ناوخۆی وڵاتەکە بوەتە هۆی ناسەقامگیریی و دروستکردنی مەترسیی بۆسەر رۆژهەڵاتی ناوەڕاست. لە لایەکی دیکەوە جەیک سولیڤان، راوێژکاری ئاسایشی نیشتیمانیی ئەمریکا رایگەیاند بەهۆی ئەو سەرکوت و سێدارانەی دەسەڵاتی ئێران دەیسەپێنێت، واشنتۆن هەوڵ دەدات زۆربەی ئەو بەرپرسانەی تاران سزا بدات کە دەستیان لە پێشلکردنی مافەکانی مرۆڤدا هەیە. ئەو وتیشی کۆشکی سپی بۆ سزادانی زیاتری کۆماری ئیسلامی ئێران لەگەل وڵاتانی هاوپەیمانی بە هەماهەنگی کار دەکات بۆ ئەوەی روی راستەقینەی روداوەکان بۆ جیهان ئاشکرا بن و دەسەڵاتی تاران بخڕێتە بەر بەرپرسیارێتیی ئەو تاوان و پێشێلکارییانەی ئەنجام دەدات. بە پێی ئەو بەڵگانەی بڵاو کراونەتەوە سبەینی چوارشەممە کار دەکرێت بۆ ئەوەی مافی ئەندامێتیی ئێران لە کۆمیسیۆنی ژنانی سەر بە نەتەوەیەکگرتوەکان بسەندرێتەوە و ئەمریکا پێشەنگایەتیی ئەو هەنگاوە دەکات.
هاوڵاتی دوای ئەوەی ڕۆژی پێنج شەممە پەرلەمانی نیوزلەندا پڕۆژەیاسای قەدەغەکردنی جگەرەی بۆ نەوەکانی داهاتوو ئاشکراکرد، ئەمڕۆ پڕۆژە یاساکە لە پەرلەمانی نیوزلەندا پەسەندکرا، بەپێی پڕۆژە یاساکە ئەو کەسانەی لە دوای ساڵی ٢٠٠٨ وە لەدایک بوون هەرگیز ناتوانن جگەربکێشن. ئایشە قیراڵ " وەزیری تەندرووستی نیوزلەندا" کە پڕۆژە یاساکەی پێشکەش کردووە ئاماژەی بەوەدا پڕۆژە یاساکە لەپێناو گەشتنە بەرەو" داهاتویەک بەبێ جگەرە"؛ هەروەها دەشڵێت بەمجۆرە خەرجیەکانی چارەسەری ئەو نەخۆشیانەی بەهۆی جگەرەوە درووست دەبن بەڕێژەیەکی بەرچاو دائەبەزێت بەجۆرێک نزیکەی (٣.٢ ملیار دۆلاری ئەمریکی دەگەڕێتەوە بۆ داهاتی نیوزلەندا. ئایشە قیراڵ، لەبارەی گرنگی پڕۆژە یاساکەوە دەڵێت ڕێژەی فرۆشیارەکانی توتن و جگەرە لە سەرانسەری وڵاتدا بۆ نزیکەی کەمتر لە ٦٠٠ فرۆشگا کەم سنورداردەکرێت لەکاتێکدا ئێستا نزیکەی ٨ هەزار فرۆشگایە، لەگەڵ ئەوەشدا تەمەنی گشتی هاوڵاتیانی نیوزلەندی زیاتر دەبێت بەم جۆرەش لەڕووی تەندرووستیەوە کەمترین کەس پێویستیان بەچارەسەری ئەونەخۆشیانە دەبێت کە بەهۆی جگەرەکێشانەوە درووست دەبن. وەزارەتی تەندرووستی نیوزلەندا دەڵێت لە هەر ٤ نەخۆشیەکی شێرپەنجە یەکێکیان بەهۆی جگەرەکێشانە وتائیستاش هۆکاری سەرەکی مردنە و تائێستاش بەرپرسیاری مردنی ٥ ملیۆن هاوڵاتی ئەو وڵاتەیە، دەشڵێت زیاتر لە ١٠ ساڵە ئەم پڕۆژەیە بوەتە بابەتی گرنگی یاسا دانەران. هاوکات پڕۆژە یاساکە کاردنەوەی لێکەوتەوە بەشێک لەڕەخنەگرانی یاساکە کە لە نێویاندا پارتی " ئەی سی تی" هەیە کە خاوەنی ١٠ کورسی پەرلەمانە دەڵین، یاساکە دەبێتە هۆی فراوانبوونی بازاڕی ڕەش و زیان گەیاندن بە فرۆشگا بچوکەکان، لەبەرامبەریشدا حوکمەت ناچاردەبێت بۆ ڕێوشوینی توند وکۆنتڕۆڵی گومرگەکان بودجەیەکی زیاتر دابین بکات. سەنی کاوشال، سەرۆکی گروپی خاوەن شیرەمەنی وخاوەن کارەکان کە گروپێکی لۆبیە بۆ فرۆشگا ئاسانکاریە ناوخۆییەکان، یەکێکی ترە لە ڕەخنەگرانی پڕۆژەیاساکە ودەڵێت ئەم پڕۆژە یاسایە بۆشاییەک درووستەکات کە باند وتاوانباران پڕی دەکەنەوە وتاوانیش زۆردەبێت؛ بەم جۆرە پڕۆژە یاساکە %١٠٠ تیۆریە ولەڕووی مادیەوە سودەکەی %٠. بەپێی ئامارەکانی حەوکمەتی نیوزلەندا کە بڵاوی کردوونەتەوە تەنها %٨ لەسەدی گەنجان جگەرە دەکێشن بەوپێەی لە ساڵی ڕابردوودا %٩.٤ بووە ئەمەش بەپێی ئامارەکانی حوکمەتی نیوزلەندا کە لەمانگی ڕێبەندان بڵاوی کردوونەتەوە، هەر بەپێی ئەو ئامارە زۆرترین ڕێژەی جگەر کێشان لەناو نەتەوەی ڕەسەنی ماوریدا بووە لە نیوزلەندا، ئایشە قیراڵ هیواخوازە ڕێژەکە تاساڵی ٢٠٢٥ کەمببێتەوە بۆ %٥. هاوکات لەگەڵ پەسەندکردنی ئەم پڕۆژە یاسایە کێشانی ڤەیپ لەناو گەنجاندا ڕووی لەزیادبوون کردووە، سەرباری ئەوەش وەزارەتی تەندرووستی بایەخی ئەوتۆی نەداوە بەم پرسە لەگەڵ ئەوەی توێژەران هۆشداری دەدەن لە ماددە کیماییەکانی ناو ڤەیپ.
هاوڵاتی ئەمڕۆ سێ شەممە، دانیشتنی هەشتەمی ئاسایی ئەنجوومەنی وەزیرانی عێراقی ئەنجام دراو حکومەتی عێراق ڕایگەیاند، 400 ملیار دینار بۆ هەرێمی کوردستان دەنێرن. دوای کۆبوونەوەکە نووسینگەی محەممەد شیاع سوودانی، سەرۆکوەزیرانی عێراق راگەیێندراوێکی بڵاوکردەوە و تێیدا هاتووە: "بهپشت بهستن بهئهوهی لهناو وهرهقهی بهرنامهی ویزاری داهاتووه و فراكسیۆنه سیاسییهكانیش رێكهوتنی لهسهر كردووه و ئهنجوومهنی نوێنهرانیش بهبڕیاری ژماره ( 18 ی ساڵی 2022)، پهسهندی كردووه، گۆژمهكه بهنووسراوی ژماره (1/9/د.خ/س.1/18) لهرێكهوتی 27 تهشرینی یهكهمی 2022 ئاماژه پێكراوه، ئهنجوومهنی وهزیران بڕیاریدا: ـ وهزارهتی دارایی گۆژمی 400 ملیار دینار خهرج دهكات لهپێناوی دابینكردنی شایستهكانی ههرێمی كوردستان". هەروەها لە راگەیێندراوەکەدا هاتووە: ئهم گۆژمه لهدوایی تهواوبوونی وردبینی دیوانی چاودێری دارایی فیدراڵی بۆ داتا و ژمارهكانی پهیوهست بهداهاتهكانی نهوتی و نا نهوتی تهسویه دهكرێت، بهههماههنگی لهنێوان خۆی ودیوانی چاودێری دارایی ههرێم ووهزارهتی نهوتی فیدراڵیش داهاتهكانی نهوتی بهههماههنگی لهگهڵ وهزارهتی سامانه سروشتییهكانی حكومهتی ههرێمی كوردستانی عێراق تهواو و ههژمار دهكات". هاوکات،شاندی حکومەتی هەرێمی کوردستان ماوەی سێ رۆژە لە بەغدایە و لەگەڵ وەزارەتی نەوت و دارایی عێراق كۆبوونهوهی ئهنجامداوه بە مەبەستی چارەسەرکردنی پرسی بودجە و نەوت.
هێزەکانی سوریای دیموکراتی (هەسەدە) رایگەیاند، لە چەند شەڕ و پێکدادانێکدا، ١٨ چەکداری سەر بە دەوڵەتی تورکیا کوژراون. ناوەندی راگەیاندن و چاپەمەنی هەسەدە لەبارەی چالاکی شەڕڤانان، بەرامبەر گروپە چەکدارەکانی سەر بە دەوڵەتی تورکیا راگەیەندراوێکی بڵاوکردەوە. هەسەدە دەڵێت، لە ٤، ٦، ٧ و ٨ی کانونی یەکەمدا، گروپە چەکدارەکان، هەوڵیانداوە لە تەل تەمر، سەریکانی و زرگانەوە، لە رووی زەمینیەوە پیشڕەوی بکەن، بەڵام شەڕڤانان چالاکیان ئەنجامداوە و گروپە چەکدارەکان پاشەکشێیان کردووە. هەسەدە ئاماژەی بەوەکرد کە لە چالاکیەکاندا بە گشتی ١٨ چەکداری سەر بە دەوڵەتی تورکیا کوژراون و دەست بەسەر ژمارەیەک چەکیشدا گیراوە. لە راگەیەندراوەکەدا باسی ئەوە دەکرێت کە هێرشەکانی دەوڵەتی تورکیا کە لە ١٩ی تشرینی دووەمەوە دەستیان پێکردووە، بە شێوەیەکی فراوان بەردەوامن و زیاتر هاوڵاتیانی مەدەنی و دەزگا ئابوری و خزمەتگوزاریەکان دەکرێنە ئامانج.
