.jpeg)
هاوڵاتی ئەندامی مەکتەبی سیاسی پارتی ڕایگەیاند:" سکاڵا لەسەر ئیسماعیل قائانی فەرماندەی فەیلەقی قودس تۆماردەکەم". ئەمڕۆ دووشەممە 28ی شوباتی 2022 هۆشیار زێباری لە چاوپێکەوتنێکدا لەگەڵ کەناڵی دیجلە ڕایگەیاند، سکاڵا لەسەر قائانی تۆماردەکات بەهۆی ئەوەی هەندێک دیبلۆماتکاری ئێرانیی لەپشت کاندیدکردنیەوە بوون بۆ پۆستی سەرۆک کۆمار. ئەندامەکەی مەکتەبی سیاسی پارتی ڕاشیگەیاند:" بڕیارەکەی ئەمدواییە کە دژی ئەو بووە، بۆ هەڵوەشاندنەوەی ئەنجامەکانی هەڵبژاردن و دووبارە ئەنجامدانەوەی هەڵبژاردنی پەرلەمانی عێراق بووە". بە بڕیاری دادگای فیدراڵی عێراق هۆشیار زێباری کاندیدی پارتی بۆ پۆستی سەرۆک کۆمار لە کێبڕکێی بەدەستهێنانی پۆستەکە دورخرایەوە، ئەویش بەهۆی ئەو دۆسیە یاساییانەی دژی ناوبراو جوڵێندران.
هاوڵاتی بافڵ جەلال تاڵەبانی رایگەیاند:" حکومەتی خزمەتگوزار و تەوافق لەسەر بنەمای شەراکەت و ھاوبەشێتی راستەقینە دروست دەکرێت، نەک ئەوەی سیاسەتی پەراوێزخستن و سەپاندنی زۆرینە بکرێتە بنەما، کە لەم ھەلومەرجەدا ئەم جۆرە بیرکردنەوە و ھەنگاوانە دۆخی عێراق و ھەرێم بەرەو ئاڵۆزی دەبات". ئەمڕۆ یەکشەممە نوسینگەی راگەیاندنی بافڵ جەلال تاڵەبانی بڵاویکردەوە، بافڵ جەلال تاڵەبانی لە دەباشان پێشوازیکرد لە ماتی لاسیلا، باڵیۆزی فینلاند لە عێراق، لە دیدارێکدا تاوتوێی دواین پەرەسەندنە سیاسی، ئابوری و ئەمنییەکان لەسەر ئاستی عێراق و ھەرێم کرا. بافڵ جەلال تاڵەبانی لەگەڵ باڵیۆزی فینلاند لە عێراق کۆبوەوە و رایگەیاند، حکومەتی خزمەتگوزار و تەوافق لەسەر بنەمای شەراکەت و ھاوبەشێتی راستەقینە دروست دەکرێت، نەک ئەوەی سیاسەتی پەراوێزخستن و سەپاندنی زۆرینە بکرێتە بنەما، کە لەم ھەلومەرجەدا ئەم جۆرە بیرکردنەوە و ھەنگاوانە دۆخی عێراق و ھەرێم بەرەو ئاڵۆزی دەبات. ئەوەش هاتوە، بافڵ جەلال تاڵەبانی وێڕای ئاماژەدان بە پێشھاتە سیاسییەکان و ھەنگاوەکان بۆ پێکھێنانی حکومەتی نوێی عێراق، ھەڵوەستەیکرد لەسەر سیاسەتی یەکێتی و رونیکردەوە کاتێک "دەڵێین حکومەتی خزمەتگوزار و تەوافق لەسەر بنەمای شەراکەت و ھاوبەشێتی راستەقینە، لەپێناو سەقامگیری سیاسی، ئابوری، ئەمنی و خوشگوزەرانی زیاترە لە وڵات، نەک ئەوەی سیاسەتی پەراوێزخستن و سەپاندنی زۆرینە بکرێتە بنەما، کە لەم ھەلومەرجەدا ئەم جۆرە بیرکردنەوە و ھەنگاوانە دۆخی عێراق و ھەرێم بەرەو ئاڵۆزی دەبات و بەربەست و رێگرییەکانیش زۆرتر دەبن لە بەردەم چاکسازی و خزمەتکردندا." ئاماژەی بەوەشکردوە، "وەک کوردیش بۆ کۆی پرسەکان لەگەڵ یەکڕیزی کوردستانین و نامانەوێت لە دەرەوەی بەرەی نیشتمانیی ھیچ ھەنگاوێک بنێین، بەڵام کاتێک لە دەرەوەی ئیرادەی نەتەوەیی و بەرژەوەندی گشتی رێککەوتن بکرێت، یەکێتیش خاوەنی ستراتیژی خۆی دەبێت و پەنا بۆ رێگا چارەی تر دەبات کە بەدڵنییایەوە ھەر ھەنگاوێکیش بنێین بەرژەوەندی گشتی تێدا دەپارێزرێت و پاراستنی مافی میللەتەکەمان لەسەرو ھەمو پۆست و ئیمتیازاتێکەوە دەبینین." نوسینگەی راگەیاندنی بافڵ جەلال دەڵێت، ھەر لە دیدارەکەدا بە گرنگییەوە باس لە رۆڵی ھێزەکانی ھاوپەیمانان لە جەنگی روبەڕوبونەوەی تیرۆر کرا و ھاریکار و ھاوکاری نێوان ھێزەکانی پێشمەرگە و ھێزە عێراقییەکان بە فاکتەری ئارامی و ئاسایشی زیاتر لە قەڵەم درا.
هاوڵاتی كۆمپانیای گازپرۆم-ی روسی رایگەیاند، بەردەوام دەبن لە گواستنەوەی غاز بۆ ئەوروپا لە رێگای ئۆكرانیاوە و ھێرشی سەربازیی روسیا بۆسەر ئۆكرانیا، كاریگەریی نەكردووەتە لەسەر ھەناردەكردنی غاز لە رووسیاوە بۆ ئەورووپا. ئاژانسی ھەواڵیی "TASS"ی روسیی بڵاوی كردەوە، سێرگی كۆبریانۆڤ، وتەبێژی كۆمپانیای گازپرۆم، رایگەیاندووە "لە ٢٧ی ئەم مانگەوە، قەبارەی غازی گواستراو بۆ ئەورووپا، دەگەیەنین بە ١٠٧ ملیۆن و ٥٠٠ ھەزار مەتر سێجا لە رۆژێكدا". سێرگی كۆبریانۆڤ ئاماژەی بەوەشداوە، ھێرشی سەربازیی روسیا بۆسەرئۆكرانیا، كاریگەریی نەكردووەتە سەر ھەناردەكردنی غاز لە روسیاوە بۆ ئەوروپا و وتی: "ھەناردەكردنی غاز لە روسیاوە بۆ ئەوروپا، وەك ئەوەی ئێستا ھەیە، بەردەوام دەبێت". كۆمیسیۆنی یەكێتی ئەورووپا، ئەمریكا، بەریتانیا و كەنەدا بەھۆی ھێرشی روسیا بۆسەر ئۆكرانیا رێككەوتن لەسەر دەركردنی بانكەكانی رووسیا لە كۆمەڵەی پەیوەندیی دارایی جیهانیی نێوان بانكەكان "SWIFT" كە لەسەر ئاستی نێودەوڵەتییدا دەستەبەری گواستنەوەی پارە دەكات.
هاوڵاتی دوای ئەوەی پۆتن هێزە ئەتۆمیەكەی وڵاتەكەی خستە حاڵەتی ئامادەباشییەوە، سکرتێری گشتی ناتۆ رایگەیاند:" هۆشدارییەكە "نابەرپرسیارانە" و " مەترسیدار" ە. یانس ستۆڵتنبێرگ، سکرتێری گشتی ناتۆ دەڵێت، شێوازی قسەکردنی پوتن لەوبارەیەوە "مەترسیدارە. ئەم رەفتارەی نابەرپرسانەیە". سکرتێری گشتیی ناتۆ ئاماژە بەوە دەکات، "بە دڵنیاییەوە، ئەگەر ئەم قسانە و ئەوەی لە ئۆکرانیا دەیکەن لە بەرپاکردنی جەنگ دژی دەوڵەتێکی سەروەر و سەربەخۆ و ئەنجامدانی داگیرکارییەکی تەواو لە ئۆکرانیا، پێکەوە گرێبدەیت؛ ئەوە دەردەکەوێت کە دۆخەکە چەند مەترسیدارە". سکرتێری گشتیی ناتۆ داوا لە ئەمریکا و ئەوروپا دەکات کە "بەڕاستی یەکبگرن" دژی دەستدرێژیی سەربازیی رووسیا بۆسەر ئۆکراینا و "هەڕەشە زارەکییەکان"ی پووتین. ستۆڵتنبێرگ ئاماژە بەوە دەکات "ناتۆ جەنگی لەگەڵ روسیا ناوێت و رووبەڕووبوونەوە و پێکدادانمان ناوێت.. ئێمە هاوپەیمانێتییەکی بەرگریکارین، بەڵام دەبێت دڵنیابینەوە لەوەی کە لێکتێگەیشتنی هەڵە و هەڵە تێگەیشتن لە تواناکانمان بۆ بەرگری و پاراستنی هاوپەیمانەکانمان رێگەپێدراو نییە".
هاوڵاتی وەزارەتی دادی حکومەتی هەرێمی کوردستان رایگەیاند:" خەرجیەکانیان بە رێژەی 10٪ زیادیکردووە، لە بەرامبەردا داهاتی وەزارەتەکە بە رێژەی 54٪ زیادیکردووە". ئەمڕۆ یەکشەممە 27ی شووباتی 2022، وەزارەتی دادی حکومەتی هەرێمی کوردستان ئاماری کار و چالاکییەکانی ساڵی رابردووی بڵاوکردەوە، بەپێی ئامارەکە خەرجی وەزارەتەکە ساڵی رابردوو 60 ملیار و 543 ملیۆن و 205 هەزار و 997 دینار بووە، بەراورد بە ساڵی 2020، بە رێژەی 10٪ زیادی کردووە. هەروەها داهاتی وەزارەتەکە لە ساڵی 2021دا 154 ملیار و 485 ملیۆن و 557 هەزار و 576 دینار بووە، بەراورد بە ساڵی پێشتر 54٪ زیادی کردووە، داهاتی وەزارەتەکە لە ساڵی 2016دا، 62 ملیار و 864 ملیۆن و 504 هەزار و 913 دینارە، بەمەش داهاتی وەزارەتەکە لە ساڵی 2021 بەراورد بە ساڵی 2016 بە رێژەی 150٪ زیادی کردووە. بەگوێرەی راگەیێندراوەکەی وەزارەتی داد ساڵی رابردوو 72 هەزار و 863، مامەڵەی کرین و فرۆشتن (خانوو، زەوی) لەسەر ئاستی هەرێمی کوردستان کراوە، کە بەراورد بە ساڵی 2020 بە رێژەی 28٪ زیادی کردووە. هەروەها زیاتر لە 20 هەزار کارتی زەوی کراوە بە سەندی تاپۆ (وێنەی تۆماری هەمیشەیی). مامەڵە رەفتارییەکان (التصرف علی الملک) لە ساڵی 2021دا 123 هەزار و 196 مامەڵە کراوە، کە بە رێژەی 44٪ زیادی کردووە، ئەمەش بووەتە هۆی زیادبوونی داهاتی فەرمانگەکانی تۆمارکردنی خانووبەرە لە هەرێمی کوردستان، هەر بۆیە لەم ساڵەدا داهاتیان زیاترە لە 146 ملیار دینار.
هاوڵاتی سەرۆکی روسیا فەرمانی بە سوپای وڵاتەکەی کرد کەهێزی بەرپەرچدانەوەی ئەتۆمی بخرێتە ئەوپەڕی ئامادەباشییەوە. ڤلادیمیر پوتن، سەرۆکی روسیا فەرمانی بە فەرماندە سەربازییەکانی وڵاتەکەی کرد، "هێزی بەرپەرچدانەوەی ئەتۆمی" بخەنە ئەوپەڕی ئامادەباشییەوە. سەرۆکی روسیا رایگەیاند، فەرمانی بە وەزیری بەرگریی وڵاتەکەی و سەرۆکی دەستەی گشتیی هێزە چەکدارەکانی روسیا کردووە "هێزی بەرپەرچدانەوەی ئەتۆمیی" سوپای روسیا بخەنە ئامادەباشییەوە. ئەمرۆ چوارەم رۆژی ئۆپەراسینەكەی روسیایە بۆ سەر خاكی ئۆكرانیا بەپێی دواین زانیاریەكان هەردوو سەرۆك ئامادەییان دەربریوە بۆ كفتوگۆ و دانوستان بەڵام سەرۆكی ئۆكرانیا رایگەیاند:" ناچینە شوینێك بۆ گفتوگۆ كە لێیەوە موشەك باران بكرێین"
هاوڵاتی ئەمڕۆ کاتژمێر 11پێش نیوەرۆ فرۆکەکانی تورکیا گوندی سەرگەلێ سەر بە قەزای ئامێدی بۆردوومان کرد. هزرڤان ساڵح، دانیشتووی گۆندی سەرگەلێ یە بە هاوڵاتی ی وت:"ئەمڕۆ27ی شوبات دەوروبەری 11و نیوی پێش نیوەرۆ فرۆکەکانی تورکیا دەوروبەری گوندەکەمان بەسەختی بوردوومان کرد". هزرڤان ساڵح، گیرایەوە و ئاماژەی بۆ ئەوەشكرد:" لەکاتی بوردوومانەکە دەنگێکی زۆر گەورە مان بیست، بوردوومانەکە 500مەترێک دور بوو لەگوندەکە" گوندی سەرگەلێ 10کێلومەتر دوورە لەسەنتەری قەزای ئامێدی، بەوتەی هزرڤان حەفتانە دوو جار دەوروبەری گوندەکە و سنوری قەزایەکە لەلایەن فرۆکەکانی تورکیا بوردۆمان دەکرێت". هزرڤان سالح ووتیشی"تا ئێستا زیانەکان دیار نیە، بەڵام ترس و دڵەراوکێیەکی زۆر لەناو خەڵکدا دروست بووە"
هاوڵاتی قوباد تاڵەبانی، بۆ پیرۆزبایی سەردانی سەرۆکی نوێی شارەوانی سلێمانی کرد دوای لێكرد "خزمە‌تی باشتری سلێمانی بكە‌ن". ئەمرۆ یەکشەممە، 27ی شوباتی 2022، بەپێی راگەیەدراوێکی نوسینگەکەی، قوباد تاڵەبانی، جێگری سەرۆكی ئەنجومەنی وەزیران، سەردانی سە‌رۆكایە‌تی شارەوانی سلێمانی كرد، بە‌بۆنە‌ی دە‌ستبە‌كاربوونی لە‌یلا عومەر وەك سەرۆكی نوێی شارەوانی سلێمانی. ئەوەشخراوەتەڕوو، جێگری سەرۆكی ئەنجومەنی وەزیران پاڵپشتی خۆی بۆ لە‌یلا عومەر دووپاتكردە‌وە و ھیوای سە‌ركە‌وتنی بۆ خواست لەو پۆستە نوێیە و دوای لێكرد "خزمە‌تی باشتری سلێمانی بكە‌ن". لە لێدوانێكی رۆژنامە‌وانیشدا، وتی؛ "ھاتووم سوپاسی لە‌یلا خان بكە‌م كە ڕە‌زامە‌ند بووە ئەو پۆستە وە‌ربگرێت و كە‌سێكە جێی متمانە‌ی ئێمە‌یە و ئە‌زموونی پێشووی ئاماژە‌یە بۆ سە‌ركە‌وتنی لەم ئە‌ركە نوێیە‌ی دا". لەبارەی زیادە‌ڕە‌وییە‌كان لەسەر موڵك و ماڵی گشتی، قوباد تاڵەبانی ئاماژەی بە‌وە‌دا كە؛ "ھە‌وڵی جددی ھەیە بۆ چارە‌سە‌ر كردن و بنبڕكردنی زیادە‌ڕە‌وی لەسەر موڵكی گشتی. ئە‌ركی حكومە‌تیشە ھۆكارە‌كان دیاری بكات و چارە‌سە‌ریان بكات". جە‌ختیشی كردەوە، "كە ئیشی حكومە‌تە خزمە‌تی ھاوڵاتیان بكات و ئاساییش و ئارامی بپارێزێت". دواتر لە‌یلا عومەر بە‌كە‌ناڵە‌كانی راگەیاندنی وت، "بە‌ڵێنمان داوە كە خزمە‌تی ھاوڵاتیان بكە‌ین بێ جیاوازی و دە‌رگای شارە‌وانیش واڵایە بۆ ھە‌مووان".
هاوڵاتی سەرۆکی حکومەتی هەرێمی کوردستان بە نووسراوێک سەرۆکایەتیی دیوانی ئەنجوومەنی وەزیران، وەزارەت و لایەنە پەیوەندیدارەکانی راسپارد هاوئاهەنگیی لەگەڵ کۆمیسیۆنی باڵای سەربەخۆی هەڵبژاردن و راپرسی بکەن بۆ ئەوەی هەڵبژاردن لەوادەی خۆیدا بکرێت. ئەمڕۆ یەکشەممە، 27ی شوباتی 2022، نووسینگەی مەسروور بارزانی، سەرۆکی حکومەتی هەرێمی کوردستان راگەیێندراوێکی لەبارەی هەڵبژاردنی پەرلەمانی کوردستان بڵاوکردەوە و تێیدا هاتووە: " پاڵپشت بە فەرمانی هەرێمی ژمارە 33 لە ڕۆژی 24ی شوباتی 2022 دەربارەی دەستنیشانکردنی ڕۆژی 1ی ئۆکتۆبەری 2022 وەك ڕۆژی ئەنجامدانی هەڵبژاردنی خولی شەشەمی پەرلەمانی كوردستان، سەرۆکی حکومەتی هەرێمی کوردستان، بە فەرمانێک بڕیاریدا بە ڕاسپاردانی سەرۆکایەتی دیوانی ئەنجومەنی وەزیران و سەرجەم وەزارەت و لایەنە پەیوەندیدارەکان، بۆ هەماهەنگیکردن لە گەڵ کۆمسیۆنی باڵای سەربەخۆی هەڵبژاردن و ڕاپرسی، بە مەبەستی دابینکردنی بودجە و سەرجەم پێداویستییەکانی پڕۆسەی هەڵبژاردن، بۆ ئەوەی هەڵبژاردن لە کاتی دیاریکراودا ئەنجام بدرێت". ئەمەش لەكاتێكدایە نیچیرڤان بارزانی، سەرۆكی هەرێمی كوردستان، 1/10/2022 بە رۆژی ئەنجامدانی هەلبژاردنی پەرلەمانی كوردستان بۆ خولی شەشەم دیاریكرد.
هاوڵاتی هاوسه‌رۆكی یه‌كێتی رایگه‌یاند:"یەکێتی بۆ ھەر پرسێک بەرژەوەندی گشتی لەبەرچاو گرتووە و دەمانەوێت بە سیاسیەتێکی نیشتمانیی کوردستانیی لەبەرامبەر ناوەنددا بوەستینەوە و زۆر ھەوڵیشماندا یەکڕیزی بپارێزین بەڵام بەداخەوە ئەوە نەکرا کە بۆ ئەوەش بێ ئومێد نەبووین". ئه‌مڕۆ شه‌ممه 26ی شوباتی 2022 بافڵ تاڵه‌بانی سەردانی مەکتەبی رێکخستنی حزبه‌كه‌ی كردوه‌و له كۆبونه‌وه‌یه‌كدا رایگه‌یاند:" یەکێتی سەرباری راپەڕاندنی ئەرکە نیشتمانیی و نەتەوەییەکانی لە ناوخۆی حزبیش دەستمان بە خۆڕێکخستنەوە و چاکسازیکردن کردوە و بە بەرنامەیەکی گشتگیری ھەمەلایەنە تەواوی دامەزراوەکانی حزب نوێدەکەینەوە و بە دونیا بینییەکی فراوانترەوە ئەرکەکان رادەپەڕێنین." " یەکێتی بۆ ھەر پرسێک بەرژەوەندی گشتی لەبەرچاو گرتووە و دەمانەوێت بە سیاسیەتێکی نیشتمانیی کوردستانیی لەبەرامبەر ناوەنددا بوەستینەوە و زۆر ھەوڵیشماندا یەکڕیزی بپارێزین بەڵام بەداخەوە ئەوە نەکرا کە بۆ ئەوەش بێ ئومێد نەبووین." بافڵ تاڵه‌بانی وای وتوه. بافڵ تاڵەبانی بەرچاوڕوونیی ئه‌وه‌ی داوه كه "سیاسەتی نوێی یەکێتی گەڕانەوەیە بۆ ستراتیژی سەرۆک مام جەلال، ئەندامانی یەکێتیش ھێزی لەبن نەھاتوون و وەک ھەمیشە خزمەتکاربن و بە گڕوتینێکی نوێوە خزمەت بکەن و دامەزراوەکانی یەکێتی بکەنە ماڵی راستەقینەی کۆمەڵانی خەڵک و پردی پەیوەندی بن بۆ گەیاندنی دەنگیان و خزمەتکردنیان، چونکە خزمەتکردن و بەدەنگەوەھاتنی خەڵک ئەرکە نەک منەت." وتیشی:" پێویستە مەڵبەند و ئۆرگانەکانمان لە جاران زیاتر لە ئەرکدا بن و بە شێوازێکی سەردەمیانەتر درێژە بەکاروبارەکانیان بدەن و لە خزمەت خەڵکدا بن، ئەگەر لە چەند ساڵی رابردوو دابڕانێک ھەبووبێت لەنێوان مەڵبەند و کۆمیتە و ھاوڵاتیدا نابێت بمێنێت و ھەڤاڵی یەکێتی پێویستە لەناو چین و توێژەکان بن و بەشێک بن لە خەڵک، لەو رووەشەوە ھانیدان بۆ گۆڕانکاری و بەردەوامییان لە راپەڕاندنی ئەرکی راستەقینەی خۆیان کە خزمەتکردنی خەڵکە"، هاوسه‌رۆكی یه‌كێتی ئه‌مه‌شی وتوه. بۆ دیداری یەکێتی، بافڵ تاڵەبانی رایگەیاند :"یەکێتی یەکێتیی ھەموولایەکە، دەمانەوێت لە رێگای ئەم دیدارەوە خۆمان رێکبخەینەوە و ھەنگاوبنێین بەرەوپێشبردنی یەکێتییەکەی مام کە ئەمە بەرپرسیارێتی ھەموو یەکێتییەکانە پێکەوە، ئەم ئەرکە گرنگ و چارەنووسسازەش رادەپەڕێنین و رۆحی شەھیدانیش ئاسوودە دەکەین."
هاوڵاتی فەرمانگەی پەیوەندییەکانی دەرەوەی حکومەتی هەرێمی کوردستان رایگەیاند:" بەهۆی ئەوەی حکومەتی هەرێم نوسینگەی نوێنەرایەتی نیە لە ئۆکرانیا، بۆیە سەرجەم کوردستانیانی نیشتەجێی ئۆکرانیا ئاگادار دەکاتەوە کە لە کاتی پێویستی و بۆ هەر ئەگەرێک، پەیوەندییان پێوەبکەن". ئەمڕۆ شەممە 26-2-2022، فەرمانگەی پەیوەندییەکانی دەرەوە لە راگەیەنراوێکدا باسی لەوەشکردوە، فەرمانگەی پەیوەندییەکانی دەرەوەی حکومەتی هەرێمی کوردستان هیوای سەلامەتی بۆ رەوەندی کوردستانی لە وڵاتی ئۆکرانیا دەخوازێت. ئەوەش هاتووە، "ئاگاداری کوردستانیانی نیشتەجێی وڵاتی ئۆکرانیا دەکەینەوە کە لەبەر ئەوەی حکومەتی هەرێم نووسینگەی نوێنەرایەتی لەو وڵاتەدا نییە، لە کاتی پێویستی و بۆ هەر ئەگەرێک، پەیوەندی بە باڵیۆزخانەی عیراقی فیدڕال لە ئۆکرانیا بکەن". کوردستانیانی ئۆکرانیا دەتوانن پەیوەندی بەم ژمارە تەلەفۆنانەی خوارەوە بکە: باڵیۆزخانەی عیراق لە ئۆکرانیا +38974007307 +380952041153 +9647518503123 هێڵی گەرم +380979244948 هەروەها ئەو هاوڵاتیانەی کە روویان لە وڵاتی هەنگاریا و رۆمانیا و پۆڵەندا کردووە، بۆ هەمان مەبەست دەتوانن پەیوەندی بەم ژمارە تەلەفۆنانەوە بکەن: باڵیۆزخانەی عیراق لە بودابست +3614411960 باڵیۆزخانەی عیراق لە بوخارست +9647708885444 نوێنەرایەتی حکومەتی هەرێم لە پۆڵەندا +48606716040 باڵیۆزخانەی عیراق لە وارشۆ +48792650803 +48730851480
هاوڵاتی روسیا لەبارەی كاری تەلەفزیۆنە ناوخۆییەكانی وڵاتەوە بریاریدا و بەكارهێنانی چەندین وشەی لێ قەدەغەكردن. لیژنەی رێکخستنی پەیوەندییە تەلەڤزیۆنییەکانی روسیا ئەمڕۆ شەممە 26-02-2022 ئاگادارینامەیەکی بڵاوکردەوە و رایگەیاند، دەبێت تەلەڤزیۆنەکانی وڵات ئەو دەستەواژانە لاببەن کە باس لە، "داگیرکردن، هێرشبردن، راگەیاندنی شەڕ و کوشتنی هاووڵاتییانی ئۆکراینی دەکات." هەروەها لیژنەی پەیوەندییە تەلەڤزیۆنییەکانی رووسیا ئاماژەی بەوەشکردووە، "دووپاتی دەکەینەوە کە دەبێت بە تەنیا پشت بە سەرچاوە فەرمییەکانی رووسیا ببەسترێت و زانیارییە راستەقینە و باوەڕپێکراوەکانی ئەوان بڵاوبکەنەوە." بەپێی راگەیێندراوی لیژنەکە، مۆسکۆ بە فەرمیی دەستوەردانەکەی لە ئۆکرانیا بە "ئۆپەراسیۆنێکی سەربازیی تایبەت" ناو بردووە کە ئامانج لێی "ئاشتی پارێزییە" و دەبێت لە میدیاکانیش هەر بەو ناونیشانەوە هەواڵەکان بڵاوبکرێنەوە. ئەو ئاگادارینامەیە بۆ ژمارەیەک لە میدیای وەکو "نۆفایا، گاریتا، سایتی میدیازۆنا و کەناڵی دۆجد" نێردراوە کە پێشتر ئەو دەستەواژانەیان بەکارهێناوە. هەروەها لیژنەکە کە کاری رێکخستن و پێدانی رێنوێنییە بە دەزگا میدیاییەکانی رووسیا، هۆشداریشیان داوەتە ئەو دەزگایانە و دەڵێن، "لە ئەگەری بەردەوامبوون لەسەر بڵاوکردنەوەی ئەو دەستەواژانە، رووبەڕووی سزای قورس دەبنەوە."
هاوڵاتی وتەبێژی وەزارەتی دەرەوەی عێراق رایگەیاند:" بەشێوەیەکی ورد چاودێری تەواوی زانیارییەکان دەکەین لەبارەی هاوڵاتییانی عێراقی لە ولاتی ئۆکرانیا. ئەمڕۆ شەممە 26ی شوباتی 2022، ئەحمەد سەحاف وتەبێژی وەزارەتی دەرەوەی عێراق لە ڕاگەیاندراوێکدا رایگەیاند، "تا ئێستا هیچ زانیارییەکی فەرمیمان بەدەست نەگەشتووە لەبارەی کوژرانی هاوڵاتی عێراقییەوە لە وڵاتی ئۆکرانیا، هاوکات لە ئێستادا بەشێوەیەکی ورد چاودێری تەواوی زانیارییەکان دەکەین لەبارەی هاوڵاتییەکانمانەوە.'' ئاماژەی بۆ ئەوەشکردووە، "ئێمە بە بایەخێکی زۆرەوە بەدواداچوون دەکەین بۆ پشتراستکردنەوەی هەر زانیارییەک کە باس دەکرێت و لە رێگەی هەماهەنگی ئاستی باڵامان لەگەڵ بەرپرسانی فەرمی لە حکومەتی ئۆکرانیا.'' ئەوەشی وتووە، ''باڵیۆێزخانەی عێراق لە هەریەک لە روسیا و هەنگاریا و رۆمانیا و پۆڵەندا لەسەرهێڵن بۆ وەرگرتنی پەیوەندی هەر هاوڵاتییەکی عێراقی روو بکاتە یەکێک لەو وڵاتانە لە ئۆکرانیاوە.''
هاوڵاتی سەرۆکی ئۆکرانیا لەنوێترین ڤیدیۆیدا ڕایگەیاند:" هێزە سەربازییەکانی وڵاتەکەم پلانی ڕوسیایان وەستاندوە بۆ دەستگیرکردنی و دانانی سەرکردەیەکی سەر بەئیماندار". ڤلادیمیر زیلینسکی سەرۆکی ئۆکرانیا لەنوێترین ڤیدیۆیدا ڕایگەیاند کەهێزە سەربازییەکانی وڵاتەکەی پلانی ڕوسیایان وەستاندوە بۆ دەستگیرکردنی و دانانی سەرکردەیەکی سەر بەئیماندار. داواشی لەخەڵکی ڕوسیا کرد فشار بخەنە سەر ڤلادیمیر پوتین بۆ وەستاندنی ئەو داگیرکارییە. زیلینسکی وتی: "ئێمە لە پلانەکەیان بۆ جێگرتنەوەی سەرۆکی وڵات شکستمان پێهێنان" . دەشڵێت "هێزەکانی ئۆکرانیا کۆنتڕۆڵی کیڤ و شارە گەورەکانی دەوروبەریان هەیە". بە وتەی سەرۆکی ئۆکرانیا، وڵاتەکەی مافی چوونە ناو یەکێتی ئەوروپای بەدەستهێناوە ئۆکرانیا لە ئێستادا ئەندامی یەکێتی ئەوروپا نییە، بەڵام لە دەستووردا هیوای ئەوەی دەربڕیوە کە بچێتە ناو یەکێتیەکەوە.
هاوڵاتی بەڕیتانیا چەک و پێداویستی سەربازیی وڵاتەکەی بۆ ئۆكرانیا دەنێرێت و کە یارمەتی پزیشکی و چەکی "کوشندە"ی تێدایە هاوكات هەر ئەمڕۆ فەرەنسا و ئەمریكاش پێداویستی سەربازیان گەیاندە ئۆكرانیا وەك دەربرینی پشگیریەك بۆ ولاتەكە. کەمێک لەمەوبەر ئاژانسی BBC لە هەواڵێکدا ڕایگەیاند، بەڕیتانیا چەک و پێداویستی سەربازیی وڵاتەکەی بۆ ئۆكرانیا دەنێرێت و کە یارمەتی پزیشکی و چەکی "کوشندە"ی تێدایە، هەروەها بەڕیتانیا دەیەوێت ڕووسیا لە سیستەمی سویفت بباتە دەرەوە. ئاژانسەکە لەسەر زاری جەیمس هێپی فەرماندەی گشتیی هێزەکانی بەڕیتانیاوە ڕایگەیاند، بەڕیتانیا و 25 وڵاتی دیکە ڕێککەوتن کە چەک و یارمەتیی مرۆڤانە بۆ ئۆکرانیا بنێرن دژ بە داگیرکاریی ڕووسیا. هەروەها ئەوەشی خستەڕوو، کە دێپلۆماتکارەکانی بەڕیتانیا، لە ئێستادا هەوڵی گفتوگۆ دەدەن لەگەڵ وڵاتانی ئەوروپا و جیهاندا، تا ڕووسیا لە سیستەمی سویفت ببرێتە دەرەوە و سزای بەسەردا بسەپێندرێت. سیستەمی سویفت، سیستەمێکی بانکییە و بانکەکانی جیهان بۆ ئاڵوگۆڕی پارە لەو سیستەمەدا پێوەندییان پێکەوە دەبەسترێت، گەر ڕووسیا لەو سیستەمە دەربهێنرێت، چیدی ناتوانێت ئاڵوگۆڕی بازرگانیی لە ئابووریی جیهانیدا بکات.
