.jpeg)
هاوڵاتی ئەمڕۆ چوارشەممە ١٢ی تشرینی یەکەمی ٢٠٢٢، ساڵی نوێی خوێندن (٢٠٢٢-٢٠٢٣) لە عێراق دەستی پێ کرد و و زیاتر لە ١٢ میلۆن قوتابی قۆناغەکانی ناوەندی و ئامادەیی، ھەروەھا زیاتر لە یەک ملیۆن و ٢٠٠ ھەزار قوتابی قۆناغی سەرەتایی روویان لە ناوەندەکانی خوێندن کرد. وەزارەتی پەروەردەی عێراق لە راگەیەندراوێکدا ئاماژەی بەوەداوە کە لەگەڵ دەستپێکردنی ساڵی نوێی خوێندن (٢٠٢٢-٢٠٢٣)، زیاتر لە ١٢ میلۆن قوتابی قۆناغەکانی ناوەندی و ئامادەیی، ھەروەھا زیاتر لە یەک ملیۆن و ٢٠٠ ھەزار قوتابی قۆناغی سەرەتایی روویان لە ناوەندەکانی خوێندن کردووە. وەزارەتی پەروەردە داوایشی لە کۆمەڵگای عێراق و سەرجەم دامەزراوەکان، ھەروەھا دایک و باوکانی قوتابییان کرد کە رۆڵی نیشتمانیی خۆیان بگێڕن و ھاوکاربن لەگەڵ وەزارەتی پەروەدە لە رەخساندنی ژینگەیەکی گونجاو بۆ دەستەبەرکردنی سەقامگیریی و رێکخستنی دەوامی قوتابییان لە قوتابخانە و پاراستنی پێگەی مامۆستایان. پێشتر وەزیری پەروەدەی عێراق، عەلی دلێمی رایگەیاندبوو کە رۆژی چوارشەممە ١٢ی تشرینی یەکەمی ٢٠٢٢، ساڵی نوێی خوێندن دەست پێ دەکات. عەلی دلێمی ھەروەھا داوای لە بەڕێوەبەرانی قوتابخانەکان و سەرجەم دەستەکانی پەروەردە و فێرکردن کردبوو، کەرنەڤاڵێکی پەروەردەیی ساز بکەن کە تیایدا پێشوازی لە قوتابییان بکەن.
هاوڵاتی ئێران رایگەیاند؛ بەهۆی ئەو سزایانەی لەندەن بەسەر بەرپرسانی وڵاتەکەدا سەپاندوەیەتی، باڵیۆزی بەریتانیا-ی لە تاران بانگهێشت کردوە و سزاکانی لەندەنیش بە بێ بەها ناودەبات. وەزارەتی دەرەوەی ئێران بڵاوی کردوتەوە؛ سایمۆن شێرکلیف، باڵیۆزی بەریتانیا لە تاران بانگهێشت کراوە و ئاگادار کراوەتەوە کە وڵاتەکەی لەسەر بنەمایەکی هەڵە بەرپرسانی کۆماری ئیسلامی ئێرانی سزا داوە بۆیە ئەو سزایانە بە بێ بەها لەقەڵەم دەدرێن. وەزارەتی دەرەوەی ئێران ئاماژەی بەوە کردوە؛ لە ماوەی سێ هەفتەدا ئەوە سێیەمجارە کە بە بیانوی دەستوەردانەکانی لەندەن لە کاروباری ناوخۆیی ئێران، باڵیۆزی بەریتانیا لە تاران بانگهێشت کراوە. لە کاتی دەستپێکردنی خۆپیشاندان و ناڕەزایەتییەکان ، تاران میدکانی بەریتانیا و میدیا فارسییەکانی ئەو وڵاتەی تۆمەتبارکردوە بۆ هاندانی خۆپیشاندەران و دواتر بەهۆی هێرشکردنە سەر باڵیۆزخانەی کۆماری ئیسلامی ئێران لە بەریتانیا، ئەو وڵاتە لە رێگەی شێرکلیف ناڕەزایەتیی خۆی گەیاندوەتە لەندەن. ئێران لە دەستپێکی خۆپیشاندانەکانی ئەم دواییەوە ئەوە سێیەمجارە سایمۆن شێرکلیف، باڵیۆزی بەریتانیا لە تاران بانگهێشت کردوە . رۆژی دوشەممە وەزارەتی دەرەوەی بەریتانیا لە بەیاننامەیەکدا ژمارەیەک بەرپرسی باڵای کۆماری ئیسلامی ئێرانی بەهۆی سەرکوتی خۆپیشاندەرانی وڵاتەکەیان سزا دا و ئاشکراشی کرد دەست بەسەر داراییەکانیاندا دەگیرێت.
هاوڵاتی هاوپەیمانیى نەسر کە بەشێک بوو لە چوارچێوەى هاوئاهەنگى، نەچووەتە نێو هاوپەیمانیى بەڕێوەبردنى دەوڵەت. حەیدەر عەبادى سەرۆکی هاوپەیمانی نەسر بەشداری کۆبونەوەکانی هاوپەیمانی بەڕێوەبردنى دەوڵەت ناکات وڕایدەگەیەنێت "بەڵگەنامەى هاوپەیمانیى بەڕێوەبردنی دەوڵەتم واژۆ نەکردووە، پێى رازى نەبووم." ئەمەش لەکاتێکدایە رۆژی 24ى ئەیلوولى 2022، هاوپەیمانیى بەڕێوەبردنى دەوڵەت لەنێوان زۆرینەی لایەنەکانی هاوپەیمانیى چوارچێوەى هاوئاهەنگى، پارتى، یەکێتى، هاوپەیمانیی سەروەرى، عەزم و بابلیون واژۆکرا. هەر لەم بارەیەوە هاوپەیمانی نەسر کە خاوەنى دوو کورسی پەرلەمانى عێراقە،و یەکێکە لە پێکهاتە شیعەکانى نێو چوارچێوەى هاوئاهەنگى ڕایگەیاندووە کە ئێستا شتێک نەماوە بەناوى چوارچێوەى هاوئاهەنگىو بەشداری لە هاوپەیمانی بەڕێوبردنی دەوڵەت ناکات.
هاوڵاتی وەزارەتی ناوخۆی ئێران کۆمەڵە و دیموکرات و پەژاک بە هاندانی خۆپیشاندان لە رۆژهەڵاتی کوردستان تۆمەتبار دەکات و دەڵێت لە ژێر کاریگەریی ئیسرائیل و ئەمریکا دەیانەوەێت گورز لە کۆماری ئیسلامی ئێران بوەشێنن. ئەحمەد وەحیدی، وەزیری ناوخۆی ئێران لە لێدوانێکدا بۆ ئاژانسی هەواڵی (تەسنیم) رایگەیاندوە؛ پارتەکانی رۆژهەڵاتی کوردستان لە ماوەی رابردودا ویستویانە خۆپیشاندان و ناڕەزایەتییەکان ئاڕاستە بکەن و هەر بەو هۆیەشەوە ئاسایشی شاری سنە تێکچوە. وەحیدی ناوی کۆمەڵە و دیموکرات و پەژاکی هێناوە و وتویەتی: ئەوان و ئەمریکا و ئیسرائیل دڵخۆشن بە دروستبونی گرژیی لە ئێران و ناوچە کوردییەکان و ئامانجیان پارچەکردنی وڵاتەکەیە. هەر وەها ئەو پارتانەی تۆمەتبار کردوە بەوەی کە دەیانەوێت زیان بە سەرمایەگوزاریی و خزمەتگوزارییەکان بگەیەنن و بەڵێنیشی داوە بودجە و پڕۆژەی خزمەتگوزاریی زیاتر بۆ پارێزگای سنە تەرخان بکرێت. لێدوانەکانی ئەو بەرپرسەی کۆماری ئیسلامی ئێران لە کاتێکدایە جگە لە شارەکانی رۆژهەڵاتی کوردستان خۆپیشاندان لە کۆی 31 پارێزگا زیاتر لە 29 پارێزگای وڵاتەکە خۆپیشاندان و ناڕەزایەتیی بەڕێوەچو و لە تارانی پایتەختیش بە شێوەیەکی بەرفراوان خۆپیشاندانەکان بەردەوامە.
هاوڵاتی ئەنجومەنی نوێنەرانی عێراق وەزیری دارای بە وەکالەت لە ئەرکەکەی دوردەخەنەوە وئەنجامدانی ئه‌ركه‌كانی وه‌زیری دارایی له‌لایه‌ن وه‌زیری نه‌وتی عێراقه‌وه به نایاسایی وه‌سفدەکەن. ئه‌مڕۆ سێشه‌ممه ، محه‌ممه‌د حه‌لبووسی، سه‌رۆكی ئه‌نجوومه‌نی نوێنه‌رانی عێراق، به بریاری ژماره ١٦ی ساڵی ٢٠٢٢، فه‌رمانی لادانی ئیحسان عه‌بدولجه‌بار، وه‌زیری نه‌وتی عێراقی له پۆستی وه‌زیری دارایی عێراق به وه‌كاله‌ت واژووكرد. هەروەها ئەنجومەنی وەزیران داوایان لە سەرۆک وەزیرانی عێراق کردووە کەسێکی تر پۆستی وەزیری دارای پێبسپێردرێت. جێیباسە لە ناوەڕۆکی بڕیاره‌كه‌دا هاتووه، به‌پرسیاریه‌تی وه‌زیری دارایی بریتییه له چاودێریكردنی سه‌رجه‌م مامه‌ڵه دارایی و ژمێریارییه‌كانی وه‌زاره‌ته‌كانی ده‌وڵه‌ت، له كاتێكدا، وه‌زیری نه‌وت خۆی به‌رپرسه له گرنگترین داهاتی وڵات كه نه‌وته، بۆیه ئه‌وه پێچه‌وانه‌ی بنه‌مای شه‌فافیه‌ت و بێلایه‌نه‌ییه له راپه‌ڕاندنی ئه‌ركه داراییه‌كاندا.
لیژنەی ئاسایش و بەرگری پەرلەمان ئاشکرایکرد کە شەش پرۆژەیاسا لە رۆژانی داهاتوودا لە کارنامەی کۆبوونەوەکان دەخرێتە روو و گفتوگۆیان لەسەر دەکرێت . "خالد عوبێدی" سەرۆكی لیژنەكە بە ئاژانسی فەرمی هەواڵی عێراقی راگەیاندووە، "لیژنەكە چەند پرۆژە یاسایەكی هەیە، لەنێویاندا یاسای خزمەتی ناچاری، كە لە لیژنەكەدا خوێندنەوەی بۆ كراوە و پێشكەشی دەستەی سەرۆكایەتی كراوە،بۆ خستنە بەرنامەی کارەوە . عوبێدی راشیگەیاند " یاسای ئاسایش و زانیاری یەكێكە لە یاسا گرنگەكان،كە سەرەتادا لەناو لیژنەكەدا دەخوێندرێتەوە بۆ ئەوەی پێشكەشی سەرۆكایەتی بكرێت ، ھەروەھا ئێمە یاسای هەواڵگریمان هەیە و یاسای ئاسایشی نیشتمانی و هەمواركردنەوەی خزمەتگوزاری سەربازی و یاسای خانەنشینی لەگەڵی. وتیشی"لیژنەی ئاسایش و بەرگری لە چەند رۆژی داهاتوودا میوانداری لیژنەی باڵای كۆنتڕۆڵكردنی ماددە هۆشبەرەكان دەكات بۆ تاوتوێكردنی یاسای بەرەنگاربوونەوەی ماددە هۆشبەرەكان و زانینی رێكارەكانیان و پێداویستییەكانیان. پێشتر فەرماندەیی هێزە زەمینییەکان ڕایگەیاندبوو کە 80%ی ناوچەکانی بەغدا لەژێر کۆنترۆڵی هێزەکانی پۆلیسدان، و لەکاتێکدا ئاماژەی بەوەدابوو کە هەفتەی داهاتوو وەجبەیەکی نوێی چەک دەگاتە دەستمان، بەڵام ڕایگەیاندبوو کە یاسای زۆرەملێی سەربازی دەبێتە گۆڕانکاری لە ئامادەکاری و تواناکانی سوپای عێراق.
.jpg)
بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغدا پێشوازیکرد لە جێنین پلاسخارت، نوێنەری تایبەتی سکرتێری گشتیی نەتەوە یەکگرتووەکان لە عیراق. لە دیدارەکەدا کە دەرباز کۆسرەت رەسوڵ، کارگێڕی مەکتەبی سیاسی ئامادەبوو، گفتوگۆ لەبارەی دوایین هەوڵەکان بۆ تەواوکردنی رێکارە دەستوورییەکان کرا و جەخت لە پێکهێنانی حکومەتێک کرایەوە کە ببێتە مایەی رەزامەندی هەموولایەک و وەڵامدەرەوەی خواستی هەموو نەتەوە و پێکهاتەکان بێت. لە درێژەی دیدارەکەدا بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان سووربوونی یەکێتی بۆ چارەسەری سیاسییانەی کێشەکان لەسەر بنەمای دەستوور و هاوبەشیی راستەقینە لەپێناو دەستەبەرکردنی مافی هەمووان دووپاتکردەوە و رایگەیاند، دەبێت بەرژوەندییە باڵا و نیشتمانییەکان بنەمای کارکردنی داهاتوومان بێت و باوەڕی تەواومان بەم پرەنسیپە هەیە. لەبارەی پرسی سەرۆککۆمار و دیاریکردنی کاندیدێکی کورد بۆ ئەو پۆستە، بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان بەرچاوڕوونی دایە نوێنەری تایبەتی سکرتێری گشتیی نەتەوە یەکگرتووەکان و وتی، ئێمە لەسەرەتاوە نەک بەتەنیا بۆ پۆستی سەرۆککۆمار، بەڵکو بۆ هەموو پرسە نەتەوەیی و نیشتمانییەکان بڕوامان بە یەکهەڵوێستی و یەکگرتوویی کورد هەبووە لە بەغدا. پۆستی سەرۆککۆماریش بۆ ئێمە هەر لە چوارچێوەی هەوڵدانە بۆ پاراستن و بەدەستهێنانی مافەکانی گەلی کورد.
هاوڵاتی فەرماندەی سوپای پاسداران ئەمریکا و ئەوروپا و سعودیە تۆمەتبار دەکات بە نانەوەی ئاژاوە لە وڵاتەکەی و رایدەگەیەنێت؛ ئەو وڵاتانە دەیانەوێت خوێنی شەهیدانی کۆماری ئیسلامی بەفیڕۆ بدەن. حسێن سەلامی، فەرماندەی گشتی سوپای پاسدارانی ئێران رۆژی دوشەممە لە لێدوانێکدا رایگەیاند؛ پلانی ئاژاوەنانەوە و تێکدانی دۆخی ناوخۆیی وڵاتەکە لە ژوری ئۆپەراسیۆنە تایبەتییەکانی واشنتۆن و نیۆیۆرک و ریاز و هەندێک وڵاتی ئەوروپا پلانی بۆ دادەڕێژرێت. ئەو فەرماندەیە وتویەتی: ئەمریکا و ئەوروپا چاویان بە پێشکەوتن و دەستکەوتەکانی کۆماری ئیسلامی ئێران هەڵنایەت و دەیانەوێت بە هەرجۆرێک بێت ئەو دەستکەوتانە لەناوببەن. سەلامی ئاماژەی بەوە کردوە کە خۆپیشاندەران هێما و سەرکردەکانی کۆماری ئیسلامی ئێران دەکەنە ئامانج و بێڕێزیی بە پیرۆزییەکانی ئەو دەسەڵاتە دەکەن ئەوەش خواست و ئامانجی ئەمریکا و نەیارانە.
.jpg)
هاوڵاتی ئێران : هێرشەکانی سوپای پاسدارن بۆ سەر هەرێم لە چوارچێوەی یاسا و رێساکانی نەتەوەیەکگرتوەکاندا بووە . وەزارەتی دەرەوەی ئێران رایگەیاند؛ هێرشەکانی ئێران بۆ سەر پارتە نەیارەکانی هەرێمی کوردستان بە پێی یاسا و رێساکانی نەتەوەیەکگرتوەکاندا بوە و عێراقیش بەڵێنی داوە رێگریی لە هەڕەشە چەکداراییەکانی دژی ئێران بکات. ناسر کەنعانی وتەبێژی وەزارەتی دەرەوەی ئێران؛ لە کۆنگرەیەکی رۆژنامەوانیدا رایگەیاند پێشتر حکومەتی هەرێم و بەرپرسانی عێراق لە هێرشەکانی سەر پارتە نەیارەکانی کۆماری ئیسلامی ئێران لە (28/9/2022) ئاگادار کراونەتەوە و ئەوەی لە ماوەی رابردودا کراوە هاوشێوەیەی ئەو هێرشانەبوە کە پێشتریش کراون. ئەو وتیشی تاران چاوەڕوانیی ئەوەی لە عێراق هەیە کە رێگە نەدات چەکدارە نەیارەکان مەترسیی بۆ ئێران دروست بکەن و لە کۆبونەوەیەکی هەفتەی رابردوشدا ئێران وەڵامی ئەرێنیی بۆ داواکارییەکانی عێراق هەبوە. کەنعانی وتیشی: عێراق کۆمەڵێک بەڵێنی داوە و دەبێت پابەند بێت بە پاراستنی سنورەکانی نێوان وڵاتەکەی لەگەڵ ئێران. وتەبێژی وەزارەتی دەرەوەی ئێران جەختی لەوە کردەوە کە نابێت خاکی عێراق ببێتە هەڕەشەی چەکدارایی بۆسەر کۆماری ئیسلامی و دەسەڵاتی وڵاتەکەی.
ناوەندێکی تورکیا بڵاوی کردەوە کە ئاستی بێکاریی لەو وڵاتەدا دابەزیوە و گەیشتوەتە نزمترین ئاست لەدوای ساڵی 2014ەوە و شارەزایەنی ئابوریش رەتی دەکەنەوە چونکە هەڵاوسان لە وڵاتەکەدا زۆر بەرز بوەتەوە. دەزگای ئاماری تورکیا لە راگەیەنراوێکدا ئاستی رێژەی بێکاریی لەو وڵاتەدا لە مانگی ئابی رابردودا ئاشکرا کرد و ئاماژەی بەوە کردوە کە لەو مانگەدا بێکاری بۆ 9.6٪ دابەزیوە. هەر بەپێی ئاماری دەزگاکە لە مانگی تەموزی رابردودا رێژەی بێکاری 10٪ بوە و بەو پێیەش بێکاریی لەو وڵاتە لە مانگی ئابدا کەمی کردوە. ئەمە لە کاتێکدایە بەپێی زانیارییەکانی دەزگای ئاماری تورکیا لە دوای ساڵی 2014ەوە رێژەی بێکاریی لەو وڵاتە گەیشتوەتە نزمترین ئاستی خۆی. شارەزایانی ئابوری لەو وڵاتە، زانیارییەکانی دەزگای ئاماری تورکیا کە سەر بە حکومەتن رەتدەکەنەوە و دەڵێن: لە کاتێکدا هەڵاوسان لەو وڵاتە بەردەوام بەرز دەبێتەوە، دابەزینی رێژەی بێکاریی ئاسایی نییە چونکە هەڵاوسانی ئابوریی تورکیا بۆ نزیکەی 85٪ بەرز بوەتەوە.
هاوڵاتی سەرۆکى پارتێکى ئۆپۆزسیۆن لە تورکیا رایدەگەیەنێت؛ ئەگەر هەیە دەسەڵات بڕیارى ئەنجامدانى هەڵبژاردنى پێشوەختە بدات و لە ئێستاشەوە دەیەوێت بە ناوی زیادکردنی موچەوە دەنگ بۆ خۆی کۆبکاتەوە. عەلى باباجان، سەرۆکى پارتى دیموکراسى و پێشکەوتن(دەڤا) لە گۆنگرەیەکى رۆژنامەوانییدا رایگەیاند؛ ئەگەری هەیە دەسەڵاتى ئاکپارتى لە تورکیا لەگەڵ نزیکبونەوەى سەرى ساڵى نوێ و زیادکردنى موچەى فەرمانبەران و خانەنشینان بڕیارى هەڵبژاردنى پێشوەختە بدات. باباجان وتیشی ،پارتی داد و گەشەپێدان(ئاکەپە) دەیەوێت زیادکردنى موچە وەک دەستکەوت بۆخۆى بەکاربهێنێت و بڕیارى ئەنجامدانى هەڵبژاردن بدات. ئەوە لەکاتێکدایە بڕیارە ئەمساڵ موچەى فەرمانبەران و خانەنشینان لە تورکیا بەپێى ئاستى هەڵاوسان لە وڵاتەکەدا زیاد بکرێت.
هاوڵاتی لە ساڵیادی هەڵبژاردنی ئەنجوومەنی نوێنەرانی عیراقدا مستەفا كازمی پەیامێکی نوێی بڵاوکردەوەو داوای لە سەرجەم لایەنەسیاسییەکانی عێراق کرد ڕووبكەنەوە لۆژیكی دانووستان و گفتوگۆی هێمنانەو بونیاتنەر، بۆ چارەسەركردنی ئەو قەیرانەی لەئارادایە. مستەفا کازمی سەرۆک وەزیرانی عێراق لە ساڵیادی هەڵبژاردنی ئەنجوومەنی نوێنەرانی عیراقدا کە لە ١٠ ی تشرینی یەکەمی ٢٠٢١ دا ئەنجام درا ڕاگەیەندراوێکی بڵاوکردەوەو،تیایدا ڕایگەیاند " ئەزموونی ساڵێک دوای هەڵبژاردن ئەوەی سەلماندووە، كە ڕووكردنە سندوقەكانی دەنگدان پێویستە وابەستەبێت كە بڕوا بوونی تەواوەتی سەرجەم هێزە سیاسییەكان بەشداربووی تیایدا بە بنەماكانی دیموكراسی و پەیڕەوكردنی كاری سیاسی بەو بەهاو رۆشنبیریەی پێویستییەتی." هەروەها ڕاشیگەیاندووە " " لەماوەی دوو ساڵی ڕابردوودا بەشێوەیەكی لۆژێك و هێمنانە لەگەڵ ڕووداوەكاندا ڕەفتارمان كردووە، سەرباری ئەو هێرشە ناڕەوایانەی ڕووبەڕوومان بوونەتەوە."
هاوڵاتی لە ساڵیادی هەڵبژاردنەکانی عێراق 10ی تشرینی یەکەمی 2021 ساڵێك لەمەوبەر، یونامی ڕاگەیەندراوێکی بڵاوکردەوە تیایدا ڕایگەیاند "لەدوای یەک ساڵ لە ئەنجامدانی هەڵبژاردنێكی سەخت، ئێستا ئیدی کاتی ئەوەیە دەستوبرد بکرێت". و داوای لە بەرپرسانی عێراق کرد بەرپرسیارێتی لە ئەستۆ بگرن و قسە و کرداریان یەکبخەن. لە ڕاگەیەندراوەکەدا هاتووە: "بەر لە یەک ساڵ، عێراقییەکان چوونە سەر سندووقەکانی دەنگدان بە هیوای دروستکردنی داهاتوویەکی نوێ بۆ وڵاتەکەیان. لە ژێر گوشاری خەڵک و خۆپێشاندانی سەرانسەری وڵات کە تێیدا سەتان لاوی عێراقی گیانیان لەدەستدا و هەزارانیش بریندار بوون، هەڵبژاردنێكی سەخت ئەنجامدرا، بەڵام بە داخەوە ئەو پرۆسە دیموکراسییە سیاسەتی دابەشکاری بەدوادا هات کە دواجار بە بێهیواییەکی گشتی تاڵ گەیشت". یونامی دەشڵێت: "ئەمڕۆ عێراق هێندە کاتی لە بەردەستدا نییە؛ قەیرانە دوورودرێژەکە ئاماژەیەکی مەترسیدارە بۆ ناسەقامگیریی زیاتر و رووداوەکانی ئەم دواییەش بەڵگەن لەسەر ئەم قسەیە. سەرەڕای ئەوە، درێژەدان بەم قەیرانە سیاسییە هەڕەشە لە ژیانی خەڵک دەکات. هەربۆیەش پەسندکردنی بودجەی 2023 بەر لە کۆتایی ئەمساڵ گرنگ و پێویستە". هەروەها باسی لەوەشکردووە: "لە چەند هەفتە و مانگی رابردوودا هەوڵی چڕ بۆ هەموو لایەنە پەیوەندیدارەکان درا تاوەکو بە سەقامگیریی سیاسی بگەن، بەڵام هیچ ئەنجامێكی نەبوو. ئێستا کاتی هاتووە چینی سیاسی بەرپرسیارێتی لەئەستۆ بگرێت".
هاوڵاتی بەرپرسێکی باڵای وەزارەتی ناوخۆی ئێران رایگەیاند لە یەکشەممەوە هەر کەسێک لە خۆپیشانداندا دەستگیر بکرێت تا رۆژی دادگایکردن و سەپاندنی سزا بەسەریدا ئازاد ناکرێت و لە کەمترین ماوەشدا کۆتایی بەو خۆپیشاندانە دەهێنرێت. مەجید میرئەحمەدی، راوێژکاری ئاسایشی و سەربازیی وەزارەتی ناوخۆی ئێران بە میدیاکانی وڵاتەکەی راگەیاند؛ چیتر لێبوردن هیچ کەسێک ناگرێتەوە و هەر کەسێک لە خۆپیشاندان و ناڕەزایەتییەکاندا دەستگیر بکرێت، دەبێت بە دەستبەسەری بمێنێتەوە تا ئەو رۆژەی دادگایی دەکرێت. ئەو بەپرسە وتویەتی ئەوە داویین هۆشدارییە کە دەدرێت بەوانەی نیازی بەشدارییان لە خۆپیشاندان و ناڕەزایەتییەکاندا هەیە، چونکە توندترین سزایان بەسەردا دەسەپێت. راوێژکارەکەی وەزارەتی ناوخۆ، ئاماژەی بەوە کردوە هەوڵ دەدەن لە چەند رۆژی داهاتودا کۆتایی بەو خۆپیشاندان و ناڕەزایەتییانە بهێنن کە بە وتەی ئەو پیلانی دوژمنانە و دەستی نەیارانی کۆماری ئیسلامی ئێرانی لە پشتە. لێدوانی ئەو بەرپرسە لە کاتێکدایە زیاتر لە 24 رۆژە خۆپیشاندان و ناڕەزایەتیی زۆربەی رۆژهەڵاتی کوردستان و شارەکانی ئێرانی گرتوەتەوە و بە پێی دوایین ئاماریش کە رێکخراوی مافەکانی مرۆڤ لەو وڵاتە بڵاوی کردوەتەوە 187 کەس لەو ماوەیەدا کوژراون.
هاوڵاتی ئه‌ندامێکی لیژنه‌ی دارایی په‌رله‌مانی عێراق ناوه‌ڕۆکی کۆبوونه‌وه‌ی لیژنه‌که‌یان لەگەڵ هەریەک لە (پارێزگاری بانکی ناوەندی عێراق، وەزیری پلاندانان، بریکاری وەزیری دارایی، سەرۆکی دیوانی چاودێری) ده‌خاته ڕوو. د.نەرمین مەعروف غەفور، ئەندامی لیژنەی دارایی ئەنجومەنی نوێنەرانی عێراق رایگەیاندووه: ئەمڕۆ یەکشەممە (٩ی ئۆکتۆبەری ٢٠٢٢)، وەک لیژنەی دارایی و لەسەر بانگهێشتی پێشوەختەمان، لەگەڵ هەریەک لە (پارێزگاری بانکی ناوەندی عێراق، وەزیری پلاندانان، بریکاری وەزیری دارایی، سەرۆکی دیوانی چاودێری) کۆبووینەوە. وتیشی “بانگهێشتی ئەو بەرپرسە باڵایانەی عێراق بۆ گفتوگۆکردن بوو لەبارەی پرسەکانی تایبەت بە بەهای دۆلار بەرامبەر بە دینار و رێکخستنەوەی کاری بانکە بازرگانییەکان لە عێراق، هەروەها گفتوگۆ لەبارەی چاپکردنی (٢٠ هەزار دینار)ی کرا کە پێشنیارکراوە و بانکی ناوەندی ئامانجییەتی جێبەجێی بکات”. د.نەرمین مەعروف، ئاماژەی بەوەشدا “هەر لە کۆبوونەوەکەدا گفتوگۆمان لەبارەی هەندێ پرسی تایبەت بە وەزارەتەکانی پلاندانان و بازرگانی کرد، کە تایبەتە بەجێبەجێکردنی یاسای ئاسایش و خۆراک و بەدواداچوونەکانی لیژنەی دارایی بۆ جێبەجێکردنی بڕگە و مادەکانی تایبەت بە یاساکە”. ئەو ئەندامەی لیژنەی دارایی پەرلەمانی عێراق، ئەوەشی خستەڕوو “لە کۆبوونەوەکەدا چەندین پرسیارمان ئاڕاستەی پارێزگاری بانکی ناوەندی کرد و بڕیارە لەماوەی دوو هەفتەی ئایندە وەڵاممان بداتەوە”. د. نەرمین مەعروف، باسی لەوەشکرد “من بە نووسراوی فەرمی پرسیارم ئاڕاستەی بانکی ناوەندی کردووە، لەبارەی کاری بانکەکان لە هەرێمی کوردستان و چارەنووسی لقی سلێمانی بانکی ناوەندی، کە چەند ساڵێکە بەنیازن ئەو لقە بکەنەوە، ئێمە چاوەڕێی وەڵامەکانی بانکی ناوەندی دەکەین و بەدواداچوون دەکەین بۆ جێبەجێکردنی بابەتەکان”.
