عێراق: هەرێم چەندین ترلیۆن دینار زیانی لە خەزێنەی دەوڵەت داوە

  بەهۆی گۆڕانكارییەكانی كەشوهەوا كەمبونەوەی ئاستی ئاوی روبارەکانی دیجلە و فورات، لە ماوەی (80) ساڵی رابردودا یەدەگی ئاو لە نزمترین ئاستیدایە و وتەبێژەكەی وەزارەتی سەرچاوەكانی ئاو رایدەگەیەنێت: بۆ دابینكردنی ئاوی خواردنەوە ناچاربون روبەری کشتوکاڵ کەمبکەنەوە. ئەمڕۆ یەکشەممە، خالید شەماڵ، وتەبیژی وەزارەتی سەرچاوە ئاوییەکانی عێراق بەئاژانسی فرانس پرێسی راگەیاند: بەهۆی كەمی باران لە وەرزی دابارینی ئەمساڵ و گۆڕانكارییەكانی كەشوهەوا لەگەڵ دابەزینی ئاستی ئاوی هەردو روباری دیجلە و فورات، یەدەگی ئاو لە ئاوی عێراق لە نزمترین ئاستیدایە كە لە ماوەی (80) ساڵی رابردودا نەگەیشتوە بەئەو ئاستە، ئەوەش دەسەڵاتداران ناچار دەکات روبەری ئەو زەوییە کشتوکاڵییانەی لەم هاوینەدا چێنراون، کەم بکەنەوە. لە پەراوێزی پێنجەمین کۆنفرانسی نێودەوڵەتی ئاو لە بەغداد  وتیشی: یەدەكی ستراتیژی ئاو لە عێراق ساڵی ڕابردو باشتر بوە، ئێستا لە (40%)ـی كەمیر لە شایستەی خۆی لە روبارەكانی دیجلە و فورات وەردەگرێت. رونیكردوەتەوە، بڕیار وابو لە سەرەتای وەرزی هاویندا زیاتر لە (18) ملیار مەتر سێجا ئاو لە پشكی هەردو روبارەكە بۆ عێراق رەوانە بكرێت، بەڵام ئێستا نزیکەی (10) ملیار مەتر سێجا ئاو دەگات بە وڵاتەكەی. وتەبێژەكەی وەزارەتی سەرچاوەكانی ئاو ئاماژەی بۆ ئەوەشكرد، لە (80) ساڵی رابردودا عێراق روبەڕوی بێ ئاوی بەو جۆرە نەبوەتەوە، هەروەها بەمەبەستی دڵنیابونەوە بۆ دابینكردنی ئاوی خواردنەوە بۆ (46)  ملیۆن هاوڵاتی عێراقی، ناچاربون روبەری کشتوکاڵی کەمبکەنەوە. راشیگەیاندوە: لە چەند ساڵی رابردودا حکومەت هانی جوتیارانی داوە کە تەکنیکی ئاودێری هاوچەرخ بۆ کەمکردنەوەی بەکارهێنانی ئاو بەکاربهێنن، هەروەك دەسپێشخەریشیان كردوە بۆ بەدەمەوەهاتن و کۆکردنەوەی پشتیوانی نێودەوڵەتی بەمەبەستی زیادکردنی فشارە دیپلۆماسییەکانە بۆ سەر وڵاتانی دراوسێ بۆ زامنکردنی مافەکانی عێراق لە ئاوی روبارەكانی دیجلە و فورات. لەگەڵ بەرزبونەوەی پلەکانی گەرما و ئەو وشکەساڵییەی کە زیاتر لە پێنج ساڵە بەردەوامە، بەردەوام بەغداد رەخنە لە دروستكردنی ئەو بەنداوانە دەگرێت كە لەلایەن ئێران و توركیاوە دروستکراون، ئەوەش وایكردوە ئاستی ئاوی هەردو روبارەی دیجلە و فورات كەمبوەتەوە كە سەرچاوەی سەرەکی ئاوی عێراقن.

  وه‌زاره‌تی ده‌ره‌وه‌ی ئێران ئاماژه‌ به‌وه‌ ده‌كات، تاوه‌كوو ئێستا واده‌ و شوێنی به‌ڕێوه‌چوونی گه‌ڕێكی دیكه‌ی دانوستانه‌كان له‌گه‌ڵ ئه‌مه‌ریكا دیاریی نه‌كراوه‌. یه‌كشه‌ممه‌، 25ـی ئایاری 2025، ئیسماعیل به‌قائی، گوته‌بێژی وه‌زاره‌تی ده‌ره‌وه‌ی ئێران ڕایگه‌یاند، ئه‌و هه‌واڵانه‌ی له‌ باره‌ی واده‌ و شوێنی به‌ڕێوه‌چوونی گه‌ڕێكی دیكه‌ی دانوستانه‌كان له‌گه‌ڵ ئه‌مه‌ریكا بڵاو كراونه‌ته‌وه‌، ته‌نیا ده‌نگۆن و تاوه‌كوو ئێستا بڕیاری فه‌رمی له‌م باره‌وه‌ نه‌دراوه‌. جه‌ختیشی كرده‌وه‌، ئه‌و هه‌واڵه‌ی دراوه‌ته‌ پاڵ وه‌زاره‌تی ده‌ره‌وه‌ی عوممان بۆ واده‌ و شوێنی به‌ڕێوه‌چوونی گه‌ڕی شه‌شه‌می دانوستانه‌كانی نێوان ئێران و ئه‌مه‌ریكا، دووره‌ له‌ ڕاستی و هه‌ڵبه‌ستراوه‌. چه‌ند پلاتفۆرمێك به‌ زمانی فارسی بڵاویان كردووه‌ته‌وه‌، چوارشه‌ممه‌ی داهاتوو گه‌ڕی شه‌شه‌می دانوستانه‌كانی نێوان تاران و واشنتن به‌ڕێوه‌ ده‌چێت. هەینی، 23ـی ئایاری 2025، ئاژانسی هەواڵی ڕۆیتەرز لە زاری سەرچاوەیەکی ئێرانی بڵاوی کردەوە، گەڕی پێنجەمی دانوستانەکانی ئەمەریکا و ئێران لە ڕۆما، لە بارەی بەرنامەی ئەتۆمی تاران کۆتایی هات. هەروەها ڕاشیگەیاندبوو، چاوەڕوان دەکرێت دانوستانە ئەتۆمییەکانی نێوان ئێران و ئەمەریکا بەردەوام بێت و عوممانیش ڕۆژ و شوێنی گەڕی داهاتوو دیاری دەکات. عەباس عراقچی، وەزیری دەرەوەی ئێران دوای کۆبوونەوەکە ئاماژەی دا،  گفتوگۆی ئەتۆمی لەگەڵ ئەمەریکا ئاڵۆزە و کاتی زیاتری پێویستە. وەزیری دەرەوەی ئێران باسی لەوەش کردبوو، بەهۆی پێشکەشکردنی پێشنیازەکانی عوممان، پێشکەوتنی باش لە دانوستانەکان هەبوو. گوتیشی: عومان بیرۆکەی جیاوازی هەیە بۆ زاڵبوون بەسەر خاڵە ناکۆکەکان نێوانی ئێران و ئەمەریکا. ئیسماعیل بەقایی، گوتەبێژی وەزارەتی دەرەوەی ئێران ڕایگەیاند، ستیڤ ویتکۆف، نێردەی تایبەتی ترەمپ بۆ کاروباری ڕۆژهەڵاتی ناوەڕاست و سەرۆکی شاندی ئەمەریکا، بەر لە کۆتاییهاتن دانوستانەکەی جێ هێشت. لای خۆیەوە بەدر ئەلبوسەعیدی، وەزیری دەرەوەی عوممان ئاماژەی دا، لە دانوستانەکانی گەڕی پێنجەمی نێوان ئەمەریکا و ئێران کەمێک پێشکەوتن هەبووە، بەڵام یەکلاکەرەوە نەبوو.

  بارزانی ڕایدەگەیەنێت ناكرێ قووتی هاووڵاتیان بە سیاسی بكرێت و وەك چەكێك لەدژی خەڵكی كوردستان بەكار بهێنرێت. جەختیشی لەوە كردەوە كە حوكمڕانیی لە عێراق كاتێك سەركەوتوو دەبێت كە دەستوور جێبەجێ بكرێت. بارەگای بارزانی بڵاوی کردەوە، ڕۆژی یەكشەممە 25ـی ئایاری 2025 مەسعود بارزانی لە سەلاحەددین پێشوازیی لە ژمارەیەك ئەمیر و سەرۆك هۆز و كەسایەتیی هۆزەكانی پارێزگاكانی باشوور و ناوەڕاستی عێراق كرد. هەر لەو كۆبوونەوەدا بارزانی، لە وتەیەكدا بۆ ئامادەبووان ئاماژەی بە مێژووی دامەزراندنی دەوڵەتی عێراق و ئەو نەهامەتی و زوڵمە كرد كە حكوومەتەكانی عێراق بەسەر گەلی كوردستانیان هێناوە. ئەوەشی خستوەتەڕوو كە بوونی ناكۆكیی گەلی كوردستان لەگەڵ حكوومەت و ڕژێمەكان بە مانای ناكۆكی لەگەڵ گەل و پێكهاتەكانی عێراق نایەت و سیاسەتی هەڵەی حكوومەتەكان هەرگیز ناتوانێ پەیوەندیی نێوان گەلان تێك بدات.  بارزانی ڕاشیگەیاند كە حەز دەكەن هەموو عێراق ئاوەدان بێت و ببوژێتەوە و كەرامەتی هاووڵاتیان لە هەموو بەشەكانی عێراق پارێزراو بێت.  جەختیشی لەوە كردەوە كە حوكمڕانیی لە عێراق كاتێك سەركەوتوو دەبێت كە دەستوور جێبەجێ بكرێت و هەموولایەك پابەندی هەر سێ پرەنسیپی هاوسەنگی و سازان و هاوبەشی بن. لەو دیدارەدا، سوپاسی گەلی كوردستانیان كرد كە لە ڕۆژانی تەنگانە و شەڕی تیرۆردا باوەشیان بۆ ژمارەیەكی زۆری ئاوارە لە بەشەكانی تری عێراق كردەوە، شاندی میوان ستاییشی سەقامگیری و پێشكەوتنەكانی هەرێمی كوردستانیان كرد كە سەرباری بوونی ئاستەنگ بەڵام هەرێم توانیویەتی لەسەر ڕێگەی بووژانەوە هەنگاو بنێت.  هەروەها ڕاشیانگەیاند كە ئەوان لە داخوازییە ڕەواكانی گەلی كوردستان دەگەن و پەیامی پاڵپشتی و موحەبەت و پێزانینیان بۆ گەلی كوردستان هەیە.

  رۆژنامەی تورکیە لە زاری چەند سەرچاوەیەک لە دەزگای ئاسایشی تورکیاوە بڵاویکردەوە، هێزەکانی وڵاتەکە پلان بۆ دامەزراندنی بنکەی ئاسمانی و دەریایی لە سوریا دادەنێن. بەگوێرەی ئەو راپۆرتانەی میدیای تورکی بڵاویکردووەتەوە، ئەنقەرە پلانی ئەوەی هەیە لەگەڵ ئەم هەنگاوە، لە بواری رێکخستنی سوپا و هێزەکانی ئاسایش هاوکاری پێشکەش بە سوریاش بکات. ئامانج لە دانانی ئەم بنکە سەربازیەی تورکیا رووبەڕووبوونەوەی رێکخراوی چەکداریی داعشە لە سوریا، رۆژنامەی تورکیە دەڵێ، کۆبوونەوە لەنێوان پێنج دەوڵەت لەنێویاندا تورکیا دەکرێت، لە چوارچێوەی میکانیزمی هاوبەش بۆ رووبەڕووبوونەوەی داعش لە سوریا. رۆژی 2ـی  مانگی رابردووش ماڵپەڕی میدڵ ئیست ئای ئاشکرایکرد، حکومەتی تورکیا بەنیازە بنکەیەکی سەربازی لە ناوەڕاستی سوریا بکاتەوە و سیستمی بەرگریی ئاسمانی تێدا جێگیربکات، ئەم هەنگاوە ئیسرائیلی نیگەرانکرد و رۆژێک دواتر هێرشێکی قورسی کردەسەر ئەو ناوچەیەی پلانبوو بنکەکەی تێدا بکرێتەوە.

  ئاسیاسێڵ لە کۆبونەوەی ساڵانەی دەستەی گشتیدا دابەشکردنی قازانجی نەختینەیی بە رێژەی 150٪  پەسەندکرد، هاوکات کۆمپانیاکە رایگەیاندووە: بەردەوام دەبین لە داهێنان و باڵادەستی لە پێشکەشکردنی خزمەتگوزارییەکان. کۆمپانیای ئاسیاسێڵ راگەیەنراوێکی بڵاوکردوە و ئاشکرایکردووە، دەستەی گشتی کۆمپانیای ئاسیاسێڵ، پێشەنگ لە بواری پەیوەندییەکان لە عیراقدا، لە سلێمانی کۆبونەوەی خۆی بە سەرۆکایەتی فاروق مستەفا رەسوڵ، سەرۆکی ئەنجومەنی بەڕێوەبردن ئەنجامدا، خاوەن پشکەکان بە کۆی دەنگ رەزامەندی خۆیان لەسەر سەرجەم بەندەکانی کارنامەی کۆبوونەوەکە راگەیاند. ئاماژەی بەوەشکردووە، ئەو بڕیارە سەرەکییانەی کە لە میانی کۆبونەوەکەدا دران، بریتی بوون لە پەسەندکردنی راپۆرتی ئەنجومەنی بەڕێوەبردن و راپۆرتی وردبینی دارایی و تۆمارە داراییەکانی کۆمپانیا بۆ ساڵی دارایی 2024، هەروەها راسپاردنی وردبینێکی دەرەکی دارایی بۆ پێداچوونەوە و وردبینیکردنی ژمێرەکانی کۆمپانیا بۆ ساڵی 2025. ئاسیاسێڵ راشیگەیاند، دەستەی گشتی دابەشکردنی قازانجی نەختینەیی بە رێژەی 150٪ ـی لە سەرمایەکە پەسەندکرد، بە بڕی 1.5 دینار بۆ هەر پشکێك کە دەدرێت بە سەرجەم خاوەن پشکەکانی کۆمپانیا کە لە لیستی خاوەن پشکەکاندا تۆمارکراون لە رۆژی بەستنی کۆبونەوەی دەستەی گشتیدا، بە پێی ماددەی "4"ـی بڕیاری ژمارە "25" ـی ساڵی 2024 کە لە لایەن دەستەی کاغەزە داراییەکانی عێراق "هیئە اڵاوراق المالیە العراقیە"ــەوە دەرچووە. ئەوەشی خستەڕوو، ئەم دابەشکردنەی ئەمساڵ بێ وێنەیە بەراورد بە ساڵانی پێشوو، ئەمەش رەنگدانەوەی ئەدای دارایی کۆمپانیایە لە ساڵی 2024 ـدا، سەرباری باڵانسی نەختینەیی بەردەست و سەرمایەی زیادەی کەڵەکەبووی کۆمپانیا، کە بووەتە هۆی ئەوەی دابەشکردنی قازانجی ئەمساڵ بێ وێنە بێت. فاروق مستەفا رەسوڵ سوپاسی خاوەن پشکەکانی کرد بۆ پشتگیریکردنی هەمیشەیی و پابەندبوونیان بە گەشتی گەشەکردنی کۆمپانیا و رایگەیاند: ئاسیاسێڵ بەردەوامە لە چەسپاندنی شوێن دەستی روونی خۆی لە کەرتی پەیوەندییەکانی عیراقدا، هەروەها پابەندبوونی بەهێزی خۆی نیشانداوە بۆ ڕابەرایەتیکردنی وەرچەرخانی دیجیتاڵی و داهێنانی چارەسەری پێشکەوتوو لە بواری پەیوەندییەکاندا. لە کۆتایی راگەیەنراوەکەدا ئاماژە بەوەکراوە، ئاسیاسێڵ هەوڵدەدات بەردەوام بێت لە سەرکەوتنەکانی، لە هەمان کاتدا پارێزگاری بکات لە پابەندبوونی بە گەشەپێدان و داهێنان و باڵادەستی لە پێشکەشکردنی خزمەتگوزارییەکانی، سەرباری رۆڵی کاریگەری لە برەودان بە ئابووری عیراق و بەردەوامی لە پابەندبوون بە رێساکانی حوکمڕانی باش و بەرپرسیارێتییەکەی بەرانبەر بە ژینگە و کۆمەڵگای عیراقی.

  ڕۆژى هەینى ڕابردوو گەڕێکی دیکەی دانوستانە ئەتۆمییەکە جارێکی دیکە بێئەنجام کۆتاییهات، وەزیری دەرەوەی عومان بە پێشکەتوو ناویبرد، بەڵام گوتی، یەکلاکەرەوەش نەبووە. ئیسرائیل گومانی لە سەرکەوتنی دانوستانەکانی نێوان ئێران و ئەمریکا هەیە، ئامادەکاریی هێرش بۆسەر دامەزراوە ئەتۆمییەکانی تاران دەکات و ئەوە دوایین راپۆرتی پێگەی هەواڵی ئاکسیۆسی ئەمریکییە. بەگوێرەی چەند سەرچاوەیەکی دیپلۆماتیش بۆ رۆیتەرز، تاوەکو هاوینی ئەمساڵ رێککەوتن لەنێوان تاران و واشنتن لە رووی تەکنیکییەوە مومکین نابێت، بەڵام بەرپرسێکی باڵای ئێرانی بە ئاژانسەکەی گوتووە، ئەگەر ئەمریکییەکان واز لە داواکاریی سفرکردنەوەی پرۆسەی پیتاندنی یۆرانیۆم بهێنن، ئەوا بە ئەگەرێکی زۆرەوە دەگەنە رێککەوتن. حسێن شەریعەتمەداری، نوێنەری خامنەیی لە رۆژنامەی کەیهان، ئامانجی ئەمریکای لە دانوستانەکان بۆ دروستکردنی فیتنەوە و ئاژاوە لە وڵاتەکەی گەڕاندووەتەوە. بەگوێرەی وەزیری دەرەوەی ئێران، لە یەک دوو کۆبوونەوەى داهاتوودا ئەگەر بەمشێوەیە گفتوگۆکان باشبن، ئەوا بەرەوپێشچوونێک دەبێت لە گفتوگۆکان. بەگوێرەی میدیای ئێرانی لە گفتوگۆکانی خولی پێنجەم، پرسی پیتاندی یۆرانیۆم و هەڵگرتنی سزاکانی سەر تاران تەوەرەی سەرەکی بوون. لەگەڵ ئەوەی ئەمریکا داوای سفر لە سەدی پیتاندنی یۆرانیۆم لە تاران دەکات، لە تازەترین هەنگاویدا دۆناڵد ترەمپ، سەرۆکی ئەمریکا چوار فەرمانی جێبەجێکاریی وڵاتەکەی واژۆکرد، بە ئامانجى نوێکردنەوەی وزەی ئەتۆمی لەبواری سڤیل لە وڵاتەکەی و چوارهێندەکردنی بەرهەمهێنانی ئەو وزەیە لە 25 ساڵی داهاتوودا. سەرۆکی ئەمریکا بەڵێنیداوە دروستکردنی وێستگەی ئەتۆمیی نوێ لە وڵاتەکەی خێراتر بکات و گوتی، دەبێت ماوەی دروستکردنی هەر وێستگەیەکی ئەتۆمی زیاتر لە 18 مانگ نەخایەنێت. هەرچەندە تاوەکو ئێستا وادەی بەڕێوەچوونی خولی شەشەم دانوستانەکان تاوەکو ئێستا دیار نییە، بەڵام سێ خولی پێشتری دانوستانەکان لە مەسقەتى پایتەختى عومان بووە و دوو خولیش لە رۆما بەڕێوەچوون، سەرجەم خولەکانى دانوستانیش بەنێوەندگیریی عومان بوون.

  هێزەکانی هەسەدە ڕایدەگەیەنێت پیلانی هێرشێکی چەتەکانی داعشیان لە ڕۆژهەڵاتی دێرەزور پوچەڵکردووەتەوە و چەتەیەکیان کوشتووە و یەکێکیش هەڵاتووە. ناوەندی ڕاگەیاندنی هێزەکانی سووریای دیموکراتیک -قەسەدە سەبارەت بە هێرشێكی چەتەکانی داعش لە ڕۆژهەڵاتی دێرەزور ڕاگەیاندراوێکی نووسراوی بڵاوکردەوە. قەسەدە ئاماژەی بەوەکرد، ڕۆژی سێ شەممە لەسەر هەواڵدەری گەلی هەرێمەکە هێزەکانی ئاسایش گەیشتنە  سنوورەکە و جموجوڵی گوماناوی هەبوو، یەکینەکان لە ماوەیەکی کورتدا بازنەیەکی ئەمنییان درووستکرد و دوای ئەوەی شانەی چەتەکانی داعش کەوتنە کەمینەکەوە شەڕ ڕوویدا، لە ئەنجامدا چەتەیەک کوژرا، چەتەیەکی دیکەش لە شوێنی ڕووداوەکە هەڵات. ئاماژەى بەوەشکردووە، چەتەکان پلانیانیان دانابوو مین و بۆمبی چێندراو لەو هەرێمانەدا بچێنن کە هێزەکانی قەسەدە تێیدا جێگیر بوون، هەروەها دوای شەڕەکە لێگەڕینێکی بەرفراوان لە هەرێمەکە دەستیپێکرد. قەسەدە باسی لەوەشکردووە، لە سایەیی هەستیاری و هاوکاری گەلی هەرێمەکەوە ڕووداوەکە ڕێگری لێکراوە، دەشڵێت: ئۆپراسیۆنەکان لە بەرامبەر شانە نووستووەکانی داعش بەردەوامە.

وەزارەتى دارایی و ئابوورى حکومەتى هەرێم ڕایگەیاند لیستی مووچەی مانگی ئایاری فەرمانبەران ڕادەستی فەرمانگەی ژمێریاری وەزارەتی دارایی حکومەتی فیدراڵ کراوە.      بەپێى ڕاگەیەندراوەکە سەرلەبەیانی ئەمڕۆ یەک شەممە لیستی مووچەی مانگی ئایاری فەرمانبەران و مووچەخۆرانی هەرێمی کوردستان لەلایەن تیمی تەکنیکی وەزارەتی دارایی و ئابووری هەرێمی کوردستانەوە ڕادەستی فەرمانگەی ژمێریاری وەزارەتی دارایی حکومەتی فیدراڵ کرا.      هاوکات وەفدێكی هەرێمی كوردستانیش لە بەغدادە بۆ وەڵامدانەوەی تێبینیەكان لەسەر لیستەكە. بەوتەی سەرچاوەیەك لە وەزارەتی دارایی و ئابوری هەرێم، بە شێوازی پەیرۆڵ ئەمڕۆ وەزارەتی دارایی لیستی مووچەی رەوانەی بەغداد كردووە، هەموو داواكاریەكانی بەغداشی جێبەجێكردووە، هەم تەرازووی پێداچوونەوە و داهاتی ناوخۆ و لیستی مووچەشی رادەستی بەغداد كردووە. بەوتەی ئەو سەرچاوەیە "ئێستا لیستی مووچەی هەرێمی كوردستان هیچ گرفتێكی نییە و هەر پاساوێك بهێنرێتەوە بۆ دواخستنی ناردنی مووچەیە". 2025-05-13، وەزارەتی دارایی و ئابووریی ھەرێمی کوردستان رایگەیاند، بڕی 959 ملیار و 514 ملیۆن دینار وەکو شایستەی مووچەی فەرمانبەران و مووچەخۆرانی ھەرێمی کوردستان خرایە سەر ھەژماری بانکیی وەزارەتی دارایی و ئابووریی ھەرێمی کوردستان لە لقی ھەولێری بانکی ناوەندیی عێراق. ھەر ئەو رۆژە لیستی مووچە بڵاوکرایەوە. وتەی ئەو سەرچاوەیە لەكاتێكدایە، بەوتەی بەشێك لە میدیا عێراقیەكان، محەمەد شیاع سودانی سەرۆك وەزیرانی عێراق بەڵێنی داوە پێش جەژن مووچەی مانگی ئایاری فەرمانبەران و مووچەخۆران دابەش بكرێت، بە مووچەی مووچەخۆران و فەرمانبەرانی هەرێمی كوردستانیشەوە. هاوکات جەمال کۆچەر، ئەندامی لیژنەی دارایی پەرلەمانی عێراق ڕاگەیاند، لە بەغدا دەست بە دابەشکردنی مووچە کراوە و تاوەکو رۆژی دووشەممەش بەردەوام دەبێت، دوای ئەوە دەست بە وردبینی لیستی مووچەی مووچەخۆرانی ھەرێمی کوردستان دەکرێ و ئەگەر ھیچ بیانوویەکیان نەبێت، لە سێ بۆ چوار رۆژدا وردبینی تەواو دەبێت.   بە گوتەی ئەو ئەندامەی لیژنەی دارایی پەرلەمانی عێراق، "بە ئەگەرێکی زۆر، پێش جەژن مووچە دابەش دەکرێت، ئەگەر بەغدا بیانوو نەهێنێتەوە". 

  رۆژنامەی ئیسرائیل هیوم لە زاری بەرپرسێکی کۆشکی سپییەوە دەڵێت، ئیدارەی ترەمپ بیر لە کەمکردنەوەی سزاکانی سەر ئێران دەکاتەوە، ئەوەش وەک ئامادەکارییەک بۆ رێککەوتنی ئەتۆمی لەگەڵ ئەو وڵاتە. بەرپرسەکەی کۆشکی سپی بە رۆژنامە ئیسرائیلیەکەی گوتووە، واشنتن هەڵوێستی لەبارەی بەرنامە ئەتۆمییەکەی ئێرانەوە نەگۆڕاوە، نایەوێت تاران بەردەوامی بە پیتاندنی یۆرانیۆم بدات، کەمکردنەوەی سزاکانیش وەک رێککەوتنێکی کاتی دەبێت لەگەڵ ئێران، تاوەکو نیازپاکی خۆی بۆ رێککەوتن پیشانبدات. بەگوێرەی ئیسرائیل هیوم، ئیدارەی ترەمپ دەستبەرداری داواکارییەکەی نابێت بۆ دەستبەرداربوونی تەواوەتی ئێران لە پیتاندنی یۆرانیۆم. پێشتر بەرپرسانی ئێران رایانگەیاندووە، تاران دەستبەرداری بەرنامە ئەتۆمییەکەی نابێت، بەڵام ئەگەر ئەمریکا ئامانجی رێگرییە لە دروستکردنی چەکی ئەتۆم، ئامادەن رێککەوتنی لەگەڵ بکەن، ئەگەر ئامانجیشی کۆتاییهێنانە بە بەرنامە ئەتۆمییەکەی ئێران، ئەوا رێککەوتن مەحاڵ دەبێت. لەلایەکی دیکەوە، ئیبراهیم ڕەزایی، وتەبێژی لیژنەی ئاسایشی نیشتمانی و سیاسەتی دەرەوەی پەرلەمانی ئێران ڕایگەیاند، ئەگەر ئامانجی واشنتۆن ڕێگریکردن بێت لە بەدەستهێنانی چەکی ئەتۆمی لەلایەن ئێرانەوە، دەکرێت ڕێککەوتنێک بکرێت، ئاماژەی بەوەشکرد، ئەگەر ئامانجەکە ڕێگریکردن بێت لە پیتاندنی یۆرانیۆم بەتەواوی تاران، ناتوانرێت ڕێککەوتنێک بکرێت. لەلایەکى دیکەوە پێشتر عەباس عێراقچی، بە میدیای فەرمیی وڵاتەکەی گوت، "ئێمە لە سرووشتی ئاشتییانەی بەرنامەی ئەتۆمیمان پشتڕاستین، بۆیە هیچ کێشەیەکمان لەگەڵ پشکنینی زیاتر و شەفافیەتی زیاتردا نییە."   وەزیرەکە هەروەها رایگەیاند، "ئەگەر ئێران چەکی ئەتۆمیی ویستبا، ئەوا تائێستا بەدەستیهێنابوو." ڕۆژى هەینى ڕابردوو گەڕێ پێنجەمی دانوستانەکانی ئەمریکا و ئێران لەبارەی بەرنامە ئەتۆمییەکەی ئێران و هەڵگرتنی سزاکان لە رۆما بەڕێوەچوو. عەباس عێراقچی، وەزیری دەرەوەی ئێران رایگەیاندبوو، ئەم گەڕەی دانوستان لەوانی دیکە گرنگتر، پیشەییانەتر و روونتر بۆچوونی خۆمان خستەڕوو، لەهەمان کاتدا، نێوەندگیرەکەمان، چەند پێشنیازێکی بۆ چارەسەرکردنی کێشەکان باس کردووە، لەگەڵ لایەنی ئەمریکی تاوتوێی دەکەین، پێدەچێت ئەو پێشنیازانە رێگە چارەسەرێک بۆ کێشەکان بدۆزنەوە. هیواشی خواست لە کۆبوونەوەکانی داهاتوودا بگەنە رێگە چارەسەرێک بۆ بەرەوپێشبردنی دانوستانەکان. باسی لەوەشکرد، هەڵوێستەکانی تاران روونە، لە ئێستاشدا لایەنی ئەمریکی تێگەشتنێکی باشتری هەیە بۆمان. لای خۆشییەوە، بەدر بوسعیدی، وەزیری دەرەوەی عومان و نێوەندگیری دانوستانەکان گوتی، لەم گەڕەی دانوستاندا بەرەوپێشچوونمان بەدی کردووە، بەڵام یەکلاکەرەوە نەبوون، هواشی خواست، لە چەند رۆژی داهاتوودا بگەن بە لێکتێگەشتنێک بۆ بەرەوپێشبردنی دانوستانەکان. هاوکات ئاژانسی هەواڵی رۆیتەرز، لەزاری چەند سەرچاوەیەکەوە گوتوویەتی، لە چەند رۆژی داهاتوودا دانوستانەکانی ئەمریکا و ئێران بەردەوام دەبن و عومان شوێن و کاتی کۆبوونەوەی داهاتوو دیاری دەکات.

  سوپای ئیسرائیل لە پاڵ هێرشە ئاسمانییەکانی، ئۆپراسیۆنە زەمینییەکانیشی لەنێو خاکی غەزەدا فراوانتر دەکات. میدیاکانی ئیسرائیل بڵاویانکردوە، سوپای ئیسرائیل هێزەکانی کۆماندۆ، کەفیر و لیواکانی حەوت و 188 و 401 و ژمارەیەکی زۆری سەربازی یەدەگیان خستووەتە ئامادەباشی و رەوانەی کەرتی غەزەیان دەکەن. ئامانج لە ناردنی پاڵپشتی بۆ ئەو ئۆپراسیۆنەیە کە ماوەی چەند رۆژێکە ئیسرائیل لە غەزە دەستیپێکردووە. لە سەرەتای ئۆپراسیۆنەکە، سوپای ئیسرائیل بڵاویکردوە، پێنج فیرقەی سەربازیان ناردووە بۆ غەزە کە ژمارەیان دەیان هەزار سەربازە. بەرپرسانی ئیسرائیل بەردەوام هۆشداری دەدەن لە بەردەوامیی ئۆپراسیۆنەکانیان، تاوەکو گەڕاندنەوەی سەرجەم بارمتەکان و دوورخستنەوەی حەماس لە کەرتی غەززە. نزیکەی هەفتەیەکە سوپای ئیسرائیل ئۆپراسیۆنە زەمینییەکانی لە کەرتی غەززە فراوانکردووە و ئۆپراسیۆنی "گالیسکەکانی گیدۆن"یان لە ناوچەکانی باکوور و باشووری کەرتەکە راگەیاندووە، پێشتریش بنیامین نەتانیاهوو رایگەیاند، مەبەست لە ئۆپراسیۆنەکانیان کۆنترۆڵکردنی تەواوی کەرتی غەززە و لەناوبردنی بزووتنەوەی حەماسە. لەو چوارچێوەشدا سوپای ئیسرائیل بەئامانجگرتنی زیاتر لە 100 پێگەیان لە سەرانسەری کەرتی غەززە، لە ماوەی 24 کاتژمێری رابردوودا راگەیاند و گوتیان؛ دامەزراوە سەربازییەکان، تونێلەکان و ژێرخانی گرووپە چەکدارییەکانی فەڵەستینیان کردووەتە ئامانج. پێشتریش بنیامین نەتەنیاهوو، سەرۆکوەزیرانی ئیسرائیل باسی لە وردەکاریی پلانی سوپای ئیسرائیل لە کەرتی غەززە کرد و رایگەیاند، پلانەکەیان لە سێ قۆناخ پێکدێت و دەبێتە هۆی دابەشکردنی "خۆراکی سەرەکی بەسەر هاووڵاتییانی سڤیل و ناگاتە دەستی چەکدارانی حەماس."   سەرۆکوەزیرانی ئیسرائیل گوتی، "دوو قۆناخەکەی دیکە بریتی دەبن لە رێگەدان بە چوونی هاوکارییە سەرەتاییەکان بۆ نێو غەززە و کردنەوەی ناوەندەکانی دابەشکردنی خۆراک لەلایەن کۆمپانیا ئەمریکییەکانەوە کە لەلایەن سوپای ئیسرائیلەوە پارێزگارییان لێ دەکرێت."   نەتەنیاهوو رەخنەی لە وڵاتانی ئەورووپا گرت بەهۆی ئەوەی سزایان بەسەر ئیسرائیلدا سەپاندووە.    رۆژی سێشەممە، بەریتانیا گفتوگۆکانی لەگەڵ ئیسرائیل تایبەت بە دروستکردنی بازرگانیی ئازاد هەڵپەسارد؛ ئەمە بەهۆی چڕکردنەوەی ئۆپەراسیۆنە سەربازییەکانی ئیسرائیل لە غەززە، هاوکات بەریتانیا، کەنەدا و فەرەنسا بەڵێنی هەنگاوی "کردەیی"یان دا بۆ هاندانی ئیسرائیل، تاوەکو بەزووترین کات جەنگەکە رابگرێت. 

  سەرۆکایەتیی کۆماری سووریا رایگەیاند، ئەحمەد شەرع، سەرۆککۆمار و ئەسعەد شەیبانی وەزیری دەرەوەی ئەو وڵاتە رۆژی شەممە لە ئیستەنبووڵ لەگەڵ نێردەی تایبەتی ئەمریکا بۆ کاروباری سووریا کۆبوونەتەوە و هەردوو لا جەختیان لە "گرنگیی جێبەجێکردنی" رێککەوتنی نێوان دیمەشق و هێزەکانی سووریای دیموکرات (هەسەدە) کردووەتەوەوە.    راگەیێندراوەکە ئاماژە بەوە دەکات، شەرع و شەیبانی لەگەڵ تۆم باراک، نێردەی تایبەتی ئەمریکا بۆ کاروباری سووریا باسیان لە لابردنی سزاکانی سەر دیمەشق، وەبەرهێنان، بەرەنگاربوونەوەی تیرۆر، پەیوەندییەکانی سووریا و ئیسرائیل و لەنێوبردنی چەکی کیمایی سووریا کردووە.    سەرۆکایەتیی کۆماریی سووریا دەڵێت: "لە تەوەرێکی تایبەتدا، هەردوو لا جەختیان لە پێویستیی جێبەجێکردنی رێککەوتنی گشتگیر لەگەڵ هەسەدە کردەوە کە گەڕانەوەی سەروەریی حکومەتی سووریا بەسەر تەواوی خاکی سووریدا گەرەنتی دەکات، هەروەها باسیان لە میکانزمی تێکەڵکردنی ئەو هێزانە لەگەڵ دامەزراوەکانی دەوڵەت کرد، بە جۆرێک کە خزمەت بە یەکڕیزی و سەروەریی نیشتمانی بکات."    هەسەدە و دیمەشق لە 10ـی ئاداری ئەم ساڵ، رێککەوتنێکیان واژۆکرد بۆ ئەوەی لە بەرامبەر داننان بە مافەکانی کورد، دامەزراوەکانی سەر بە بەڕێوەبەرایەتیی خۆسەر بخرێنە سەر حکومەتی نوێی سووریا، کە لە دوای رووخاندنی حکومەتی بەشار ئەسەد لە کانوونی یەکەمی پار، لە لایەن گرووپە چەکدارە ئیسلامییەکانەوە، دیارترینیان دەستەی تەحریری شام بە سەرکردایەتیی شەرع، پێکهێنراوە.    قامشلۆ و دیمەشق تاوەکو ئێستا لەسەر چارەنووسی هەسەدە رێککنەکەوتوون کە رێکخراوترین هێزی سووریا و رۆژئاوای کوردستانە، خاوەنی زیاتر لە 100 هەزار شەڕڤانە و هاوبەشی سەرەکیی ئەمریکایە لە شەڕی دژی سەرهەڵدانەوەی داعش.   خاڵی ناکۆک ئەوەیە کە هەسەدە داوا دەکات وەک هێزێک بەم تایبەتمەندی و پێکهاتەیەی ئێستا هەیەتی، بکرێتە بەشێک لە وەزارەتی بەرگری، بەڵام دەسەڵاتدارانی سووریا داوا دەکەن هێزەکە هەڵبوەشێنرێتەوە و شەڕڤانان تاک بە تاک ببنە ئەندامی وەزارەتەکە.   تۆم باراک، راوێژکاری دێرینی ترەمپ، هاوکات باڵیۆزی ئەمریکایە لە ئەنقەرە، رۆژی هەینی وەک نێردەی تایبەتی ئەمریکا بۆ کاروباری سووریا دەستبەکار بوو.    نێوەڕاستی ئەم مانگە دۆناڵد ترەمپ لە ریازی سعودیە رایگەیاندبوو، واشنتن سزاکانی سەر سووریا لادەبات.   رۆژی هەینی، واشنتن بۆ ئەو مەبەستە، یەکەمین هەنگاوی نا و سزاکانی لەسەر سووریا کەمکردنەوە.    سەرۆکایەتیی کۆماری سووریا لە راگەیێندراوی رۆژی یەکشەممەیدا ئاماژە بەوە دەکات، شەرع بۆ باراکی پشتڕاست کردووەتەوە کە "سزاکان هێشتا بارێکی گرانن لەسەر گەلی سووریا و هەوڵەکانی بووژانەوەی ئابوورییان پەکخستووە."   لە راگەیێندراوەکەدا هاتووە: "نێرردەی ئەمریکا ئاماژەی بەوە کرد کە وڵاتەکەی دەستی بە رێکاری کەمکردنەوەی سزاکان کردووە، بۆ ئەوەی بڕیاری دۆناڵد ترەمپ، سەرۆکی ئەمریکا جێبەجێ بکات و تا هەڵگرتنەوەی تەواوی سزاکان، پڕۆسەکە بەردەوام دەبێت."   دۆناڵد ترەمپ لە 13ـی ئایار "راگرتنی" سزاکانی ئەمریکای راگەیاند کە ئامانجیان سەرکردەکانی پێشووی سووریا بوو و مێژووی دەستپێکیان دەگەڕێتەوە بۆ ساڵی 1979. بۆ هەڵگرتنی هەمیشەیی، بەرپرسانی ئیدارەی ترەمپ تاوتوێی ئەوە دەکەن کە ئایا دەبێت داوا لە حکومەتی نوێی سووریا بکەن مەرجە ئەمنییەکان جێبەجێ بکات یان نا.    سەرۆکەکانی ئەمریکا بەدرێژایی چەندین ساڵی رابردوو سزایان بەسەر بنەماڵەی ئەسەددا سەپاند. ئەو سزایانە دەکرێت خێرا لە رێگەی فەرمانی جێبەجێکارییەوە لاببردرێن، بەڵام کۆنگرێس هەندێک لە تووندترین رێوشوێنەکانی سەپاندووە و دەبێت خۆی بە شێوەیەکی هەمیشەیی لایانبدات.   رۆژی شەممە، دیپلۆماتە ئەمریکییەکە لە پۆستێکی تۆڕی کۆمەڵایەتیی ئێکسدا، کۆبوونەوەی خۆی لەگەڵ سەرۆککۆمار و وەزیری دەرەوەی سووریا بە "مێژوویی" ناوبرد و رایگەیاند: "جەختم کردەوە کە هەڵگرتنەوەی سزاکانی دژی سووریا سەلامەتیی ئامانجی سەرەکیمان دەپارێزێت، کە ئەویش بەزاندنی بەردەوامی داعشە، هەروەها دەرفەتی داهاتوویەکی باشتر بە خەڵکی سووریا دەدات."   باراک هەروەها نووسیویەتی: "ستایشی سەرۆک شەرعم کرد لە بەرامبەر هەنگاونانی واتادار بەرەو جێبەجیکردنی خاڵەکانی سەرۆک ترەمپ لە بارەی تیرۆرستانی بیانی، بەرەنگاربوونەوەی داعش، پەیوەندییەکان لەگەڵ ئیسرائیل و کەمپ و ناوەندەکانی دەستبەسەردا گرتن لە باکووری رۆژهەڵاتی سووریا،" کە ئەمانە ئەو مەرجانە بوون کە سەرۆکی ئەمریکا لە بەرامبەر لابردنی سزاکاندا داوایکردوون.    سەرۆکایەتیی کۆماری سووریا باس لەوە دەکات، شەرع و باراک باسیان لە "هاوئاهەنگیی ئەمنی بۆ بەرەنگاربوونەوەی ئاڵنگارییە هەرێمییەکان، لەنێویاندا بەرەنگاربوونەوەی تیرۆر، پاراستنی سنوور و بەهێزکردنی ئەمن و ئاسایشی ناوچەکە" کردووە.    هەروەها "هەردوو لا تاوتوێی بابەتی چەکی کیمیاییان کرد و هاوڕابوون کە دەبێت بە هاوکاریی کۆمەڵگەی نێودەوڵەتی، هەمووی لەنێوببردرێت."

  ماڵپەری"ئاکسیۆس" لە زاری بەرپرسێکی ئەمریکییەوە بڵاویكردەوە: هیچ پێشکەوتنێک لە دانوستانەکان بەدینەهاتووە بۆ ئازادکردنی ئەلیزابێس تسورکۆڤ، كچە لێکۆڵەری ئیسرائیلی لە زانکۆی پرینستۆن، کە لە عێراق دەستبەسەرە. بەوتەی ئەو بەرپرسە، ئەو راپۆرتانەی لە رۆژنامە عەرەبییەکاندا باس لە رێککەوتن دەکەن، بێ بنەمان. تسورکۆڤ، کە خۆی وەک "توێژەر" ناساندووە، خاوەنی رەگەزنامەی روسی و ئیسرائیلییە، لە مانگی ئازاری ٢٠٢٣ لە ناوچەی كەرادە لە ناوەڕاستی بەغداد لەلایەن گروپێکی چەکداروە رفێندرا،  ئیسرائیل گروپی كەتائیبی حزبوڵای عێراقی بە ئەنجامدانی كارەكە تۆمەتبار دەكات. پێشتریش بەرپرسانی باڵای عێراق بە ئاژانسی "فرانس پرێس" راگەیاند: بەغداد کاردەکات بۆ گەیشتن بە رێککەوتن بۆ ئازادکردنی تسورکۆڤ، لە بەرامبەر ئازادکردنی ئێرانییەک، کە بە تۆمەتی کوشتنی هاوڵاتییەکی ئەمریکی لە عێراق زیندانی کراوە.  بەرپرسێکی باڵای ئەمنی، بە ئاژانسەکەی راگەیاندووە: بابەتەکە پەیوەستە بە رەزامەندی ئەمریکییەکان بۆ ئازادکردنی ئەو تۆمەتبارە ئێرانییە بە کوشتنی هاوڵاتیەکی ئەمریکی، لە ساڵی 2023 لە بەغداد. هاوكات سێ‌ بەرپرسی عێراقی رایانگەیاندووە:  تا ئێستا واشنتۆن رازی نەبووه به یەکێک لەو مەرجانەی پێشنیاز کراون بۆ ئازادکردنی تسورکۆڤ،  ئەویش ئازادکردنی ئەو ئێرانییەیە کە بە تاوانی کوشتنی هاوڵاتییەکی ئەمریکی دەستگیرکراوە. ئێلیزابێس تسورکۆڤ، خوێندکاری دکتۆرایە لە پسپۆڕی سیاسەتەکانی رۆژهەڵاتی نێوەڕاست، لە ئاداری 2024 لە نێوەڕاستی بەغدا لە دۆخێکی گوماناویدا دیارنەما و دواتر پەنجەی تۆمەت بۆ گرووپە چەکدارەکان درێژکرا.   ئێلیزابێس بەکالۆریۆسی لە پەیوەندییە نێودەوڵەتییەکان هەیە لە زانکۆی عیبری، ماستەری لە مێژووی رۆژهەڵاتی نێوەڕاست لە زانکۆی تەلئەڤیڤ بەدەستهێناوە، قوتابیی دکتۆرایە لە کۆلێژی زانستە سیاسییەکانی زانکۆی برینستۆن و چەندین توێژینەوەی لەسەر گرووپە چەکدارەکان هەیە.   رۆژی 5ـی تەممووزی 2023، نووسینگەی بنیامین نەتەنیاهوو، سەرۆکوەزیرانی ئیسرائیل لە راگەیێندراوێکدا ئاشکرای کرد، چوار مانگە هاووڵاتییەکی ئیسرائیلی - رووسی بەناوی ئێلیزابێس تسورکۆڤ، لە عێراق بێسەروشوێنە، بەڵام ئێستا بۆیان ئاشکرا بووە کە ئەو ئافرەتە زیندووە و لەلای چەکدارانی کەتائیبی حیزبوڵڵای عێراقەوە دەستبەسەرە.

  وەزارەتی کشتوکاڵ و دارستانی تورکیا ڕایگەیاند: لە دوو پارێزگای وڵاتەکە، گۆشتی ئەسپ و گوێدرێژ، لەلایەن کۆمپانیاکانەوە لەبری گۆشتی مانگا بە خەڵک فرۆشراون. شەممە 24ـی ئایاری 2025، وەزارەتی کشتوکاڵ و دارستانی تورکیا، لە ڕاگەیەندراوێکدا ناوی ئەو کۆمپانیایانەی ئاشکرا کرد کە تێوەگلاون لە ساختەکاری خۆراکدا. هاوکات ڕایگەیاند، "لە دوو پارێزگای وڵاتەکە هاووڵاتییان لەلایەن ئەو کۆمپانیایانەوە هەڵخەڵەتێنراون و گۆشتی ئەسپ و گوێدرێژیان لەبری گۆشتی مانگاوە پێ فرۆشراوە." وەزارەتەکە باسی لەوە کرد، ئەو کارەی ئەو کۆمپانیایانە، تەندروستیی هاووڵاتییان دەخەنە ژێر مەترسییەوە و متمانەی هاووڵاتییانیش بە کڕینی گۆشتی مانگا ناهێڵن. هەروەها وەزارەتەکە دەڵێت: لە ناوچەی سێیهانی سەر بە پارێزگای ئەدەنە، کۆمپانیایەک بە ناوی (جان ئێت)، هەروەها لە قەزای شەهید کەمالی سەر پارێزگای غازی عەنتاب، کۆمپانیایەکی دیکە بە ناوی (ئایدن جێترین)،  گۆشتی ئەسپ و گوێدرێژیان لەبری گۆشتی مانگا بە خەڵک فرۆشتووە. وەزارەتی کشتوکاڵ و دارستانی تورکیا، ئەوەشی ئاشکرا کرد، ئەو دوو کۆمپانیایە، بۆ شاردنەوەی ساختەکارییەکانیان و لەپێناو ئەوەی خەڵک گومان نەکەن، هەندێک جار گۆشتی ئەسپ و گوێدرێژیان لەگەڵ گۆشتی مانگا  تێکەڵ بە یەکتری کردووە و هەر بە ناوی گۆشتی مانگا فرۆشتوویانە.

  سەرچاوەیەک لە وەزارەتی دارایی هەرێمی کوردستان ڕاگەیاند، شاندێکی تەکنیکی هەرێمی کوردستان ئەمڕۆ دەچێتە بەغداد بۆ رادەستکردنی لیستی مووچەی مانگی پێنج. ئەو سەرچاوەیە دەڵێت، سبەینێ یەکشەممە 25-05-2025 شاندەکە لیستی مووچە دەباتە نوێنەرایەتی حکومەتی هەرێمی کوردستان بۆ پشتڕاستکردنەوەی لیستەکە و دواتر شاندەکە لیستەکە دەباتە وەزارەتی دارایی عێراق بۆ وردبینی. دەشڵێت، وەزارەتی دارایی هەرێمی کوردستان دەیەوێت بە زووترین کات وردبینی لە لیستی مووچە تەواو ببێت بۆ ئەوەی پێش جەژنی قوربان کە دەکەوێتە 06-06-2025 مووچەی مانگی پێنج دابەش بکەن. دوێنێش هەمان سەرچاوە وتى، لەلایەن بەڕێوەبەری گشتیی ژمێریاری وەزارەتی دارایی عێراق بەڵێنیان پێدراوە رۆژی سێشەممە 27-05-2025 پارە بۆ مووجەی مانگی پێنجی مووچەخۆرانی هەرێمی کوردستان خەرج بکرێت. هاوکات جەمال کۆچەر، ئەندامی لیژنەی دارایی پەرلەمانی عێراق ڕاگەیاند، لە بەغدا دەست بە دابەشکردنی مووچە کراوە و تاوەکو رۆژی دووشەممەش بەردەوام دەبێت، دوای ئەوە دەست بە وردبینی لیستی مووچەی مووچەخۆرانی ھەرێمی کوردستان دەکرێ و ئەگەر ھیچ بیانوویەکیان نەبێت، لە سێ بۆ چوار رۆژدا وردبینی تەواو دەبێت.   بە گوتەی ئەو ئەندامەی لیژنەی دارایی پەرلەمانی عێراق، "بە ئەگەرێکی زۆر، پێش جەژن مووچە دابەش دەکرێت، ئەگەر بەغدا بیانوو نەهێنێتەوە".  2025-05-13، وەزارەتی دارایی و ئابووریی ھەرێمی کوردستان رایگەیاند، بڕی 959 ملیار و 514 ملیۆن دینار وەکو شایستەی مووچەی فەرمانبەران و مووچەخۆرانی ھەرێمی کوردستان خرایە سەر ھەژماری بانکیی وەزارەتی دارایی و ئابووریی ھەرێمی کوردستان لە لقی ھەولێری بانکی ناوەندیی عێراق. ھەر ئەو رۆژە لیستی مووچە بڵاوکرایەوە. لەلایەکى دیکەوە سەرچاوەیەک لە وەزارەتی دارایی هەرێم راگەیاند، ئەم مانگە داوا لە سەرجەم یەکە ژمێریاریەکان کراوە لە کاتی تۆمارکردنی ناوی مووچەخۆران ئاماژە بە ژمارەی وەزیفی فەرمانبەرانی هەمیشەیی و گرێبەست بدەن بۆ لێبڕینی لەسەدا یەک، لە مووچەی بنەڕەتی. ئەو دەڵێت، بۆ ئەم مانگە بەگوێرەی بڕیاری وەزارەتی پلاندانانی عێراق و بە راسپاردەی وەزیری دارایی هەرێمی کوردستان لێبڕینەکە دەکرێت. رۆژی 17-12-2024 ئەنجومەنی وەزیرانی عێراق بڕیاریدا کۆدی بایۆمەتری بکاتە ژمارەی وەزیفی فەرمانبەرانی هەرێمی کوردستان، ئەم کۆدە لە سیستمەکەدا تۆمار دەکرێت.

  عیناد خالد ناسراو بە (حسحس) کەسایەتیی دیاری عێراقیی نێو تۆڕی کۆمەڵایەتیی تیکتۆک ئەمڕۆ لەلایەن هێزەئەمنیەکانەوە دەستگیرکراوە، بە تۆمەتى لایڤەکانی  نەگونجاوەو بابەتى خراپ بڵاودەکاتەوەو لەگەڵ کۆمەڵگەدا ناگونجێت. سه‌رچاوه‌یه‌ك لەوه‌زاره‌تی ناوخۆی عێراق ڕایگەیاند: دوای گرتنه‌به‌ری ڕێوشوێنی یاسایی له‌لایه‌ن وه‌زاره‌تی ناوخۆی عێراقەوە، فەرمانی ده‌ستگیركردن بۆ (حسحس) دەرچووەو  ئەمرۆ شەممە هێزێکی ئەمنی سەر بە وەزارەتی ناوخۆ، ئەو کەسەیان دەستگیرکردووە، بە تۆمەتی بڵاوکردنەوە و بانگەشەکردنی ناوەڕۆکی ناشرین لە سۆشیال میدیا. سەرچاوەکە ئەوەشى خستوەتەڕوو ئۆپەراسیۆنەکە بەگوێرەی ڕێکارە یاساییەکان ئەنجامدراوە و بەشێکە لە زنجیرەیەک ڕێکار کە وەزارەت دەیگرێتەبەر بەرامبەر ئەوانەی سەلمێنراون کە بەشدارن لە بڵاوکردنەوەی ماددە کە پێچەوانەی ئادابى گشتی و بەها کۆمەڵایەتییەکانن. چەند مانگێکە فەرمانی دەستگیرکردنی (حسحس) دەرچووە، ئەمەش لەکاتێکدایە کە لیژنەیەکی تایبەتمەنی وەزارەتی ناوخۆی عێراق بەچاودێریکردنی تۆڕە کۆمەڵایەتییەکان و بڵاوکراوەی نەشیاو دەرحەق بەکۆمەڵگە دێت و ئەم تیکتۆکەرە دیارەی عێراقیش بووە نێچیری لیژنەکە، بڕیارەکە جێبەجێبکراو حسحس یش دەخرێتە کونجی زیندانەوە. لەسەرەتای ساڵی ڕابردووەوە، وەزارەتی ناوخۆو ئەنجومەنی باڵای دادوەری عێراق، هەڵمەتێکیان بۆ دەستگیرکردن و لێپرسینەوە لەو کەسایەتییانەی سۆشیال میدیا دەستپێکردووە کە بڵاوکراوەکانیان دوورە لەداب و نەریتی کۆمەڵگە.