هاوڵاتى به‌هاى دینارى عێراقى به‌رانبه‌ر دراوه بیانییه‌کان له بازاڕه‌کانى هه‌رێمى کوردستان نرخێکى نوێیان تۆمارکردو به‌راورد به دوێنێ هه‌ینى به‌رزبووه‌ته‌وه. ئه‌مڕۆ شه‌ممه 26ى کانونى یه‌که‌مى 2020، نرخى دینارى عێراقى له بازاڕه‌کانى هه‌رێمى کوردستان به‌رانبه‌ر به دراوه بیانییه‌کان به‌مجۆره‌یه: - 100 دۆلارى ئه‌مریکى به 143 هه‌زار و 250 دینار. - 100 یۆرۆ به 173 هه‌زار دینار. -100 پاوه‌ن به 191 هه‌زارو 750 دینار. - 100 لیره‌ى تورکى به 19 هه‌زار دینار. -100هه‌زار تمه‌نى ئێرانى به پێنج هه‌زار و 500 دینار.
هاوڵاتى به‌پێى تویژینه‌وه‌یه‌کى ئه‌مریکى ئه‌و که‌سانه‌ى تووشى ڤایرۆسى کۆرۆنا بون و په‌تاکه‌یان تێپه‌ڕاندوه جه‌سته‌یان به‌رگرییه‌کى به‌هێزى دروستکردوه جارێکى دیکه تووش نابنه‌وه. توێژینه‌وه‌که له‌لایه‌ن په‌یمانگاى نیشتیمانى ئه‌مریکى ئه‌نجامدراوه‌و نزیکه‌ى سێ ملیۆن که‌س به‌شداریان تێداکردوه که ته‌نها له‌سه‌دا 0.3% ئه‌وانه‌ى توشبووى کۆرۆنا بوون جارێکى دیکه تووش بونه‌ته‌وه و ئه‌وه‌ش وه‌ک ئاماژه‌یه‌کى ئه‌رێنی داده‌نرێت. له‌ئێستادا چه‌ندین ڤاکسینى کۆرۆنا به‌رهه‌مهێنراون و ڤاکسینى فایزه‌ریش له‌ئه‌مریکا و چه‌ندین وڵاتى دیکه بۆ هاوڵاتیان به‌رده‌ست بووه‌و به‌شێکى زۆر له وڵاتان ڤاکسینه‌که‌یان پێگه‌شتووه.
هاوڵاتى ڕێبه‌رى ڕه‌وتى سه‌در له‌په‌یامێکدا داوا له ئه‌مریکا و ئێران ده‌کات، چیتر عێراق نه‌که‌نه قوربانى ململانێکانیان و هۆشداریان پێ ده‌دات که هه‌موو ده‌ستێوه‌ردانێک به‌هه‌ر رێگایه‌ک بێت قبوڵ ناکه‌ن و ده‌شڵێت:" عێراق و عێراقیه‌کان به‌شێک نین له ململانێکانیان و ئێمه سه‌رقاڵى بنیادنانى عێراقى خۆشه‌ویستین". ئه‌مشه‌و هه‌ینى 25ى کانونى یه‌که‌مى 2020، موقته‌دا سه‌در له تویتێکدا له هه‌ژمارى تایبه‌تى خۆى بڵاویکرده‌وه، "عێراق بوه‌ته قوربانى ململانێ و ناکۆکى نێوان ئه‌مریکا و ئێران، به‌جۆرێکیش زیانى پێگه‌یشاندوه که ناکرێت چیتر بێده‌نگى به‌رامبه‌ر بکرێت، عێراق بوه‌ته گۆڕه‌پانى سه‌ربازى و سیاسیى و ڤایرۆسیی، ئه‌وانه‌ش هۆکارن بۆ لاوازکردنى حکومه‌ت و ماندوکردنى گه‌لى عێراق. هه‌روه‌ها موقته‌دا سه‌در داواى له‌کۆمارى ئیسلامى ئێران کردوه و به" دراوسێ ئازیز" وه‌سفیکردوه و رایگه‌یاندوه، عێراق دوربخاته‌وه له ململانێ و ناکۆکیه‌کانیان، شکۆ و سه‌ربه‌خۆیى حکومه‌ته‌که‌ى بپارێزێت. هاوکات سه‌در داواى له ویلایه‌ته یه‌کگرتوه‌کانى ئه‌مریکا کردووه "عێراق و عێراقیه‌کان به‌شێک نین له ململانێکانیان و ئێمه سه‌رقاڵى بنیادنانى عێراقى خۆشه‌ویستین". موقته‌دا سه‌در هۆشدارى ده‌داته ئێران و ئه‌مریکا له‌ئه‌گه‌رى وه‌ڵام نه‌دانه‌وه‌ى داواکاریه‌کانى ده‌دات و ده‌نوسێت:"ئه‌گه‌ر وه‌ڵاممان نه‌درێته‌وه، هه‌ڵوێستێکى سیاسى و جه‌ماوه‌رى نیشتمانیمان ده‌بێت بۆ پارێزگاریکردن له‌پیرۆزیه‌کانى خۆمان و هه‌مو ده‌ستوه‌ردانێک به‌هه‌ر رێگه‌یه‌ک بێت قبوڵ ناکه‌ین".
هاوڵاتى له ئێستادا شه‌ڕێکى قورس له چه‌ند گوندێکى نزیک شارى عه‌ین عیسا له رۆژئاڤاى کوردستان له‌نێوان میلیشیا ئیسلامییه‌کانى هاوپه‌یمانى تورکیاو و هێزه‌کانى سوریاى دیموکرات به‌رده‌وامه. ئه‌مشه‌و هه‌ینى میدیاى هاوار نیوز، نزیک له هه‌سه‌ده بڵاویکرده‌وه که سه‌رله‌نوێ سووپاى تورکیا و میلیشیا ئیسلامییه هاوپه‌یمانه‌کانى به چه‌کى قورس هه‌ردوو گوندى مشیرفه‌و جه‌بهه‌ل که سێ کیلۆمه‌تر له رۆژهه‌ڵاتى شارى عه‌ین عیساوه دووره، بۆردومان ده‌که‌ن و ده‌ستیان به‌هێرشکردووه بۆ سه‌ر ئه‌و ناوچه‌یه، ئه‌و هێرشانه له‌لایه‌ن هێزه‌کانى سوریاى دیموکرات(هه‌سه‌ده) به‌توندى وه‌ڵام ده‌درێنه‌وه. ماوه‌ى دوو هه‌فته‌یه تورکیا و میلیشیا ئیسلامییه هاوپه‌یمانه‌کانى ده‌ستیان به هێرشکردووه بۆ سه‌ر شارى عه‌ین عیسا به‌مه‌به‌ستى کۆترۆڵکردنى و دابڕینى شار و ناوچه‌کانى کوبانێ له ناوچه‌ى حه‌سه‌که‌و قامشلۆ و کۆنترۆڵکردنى رێگاى M4. ئه‌و ناوچانه که ناوچه‌ى سه‌ر به رووسیان چه‌ند جارێک داوایان له هه‌سه‌ده کردووه که عه‌ین عیسا راده‌ستى هێزه‌کانى حکومه‌تى سوریا بکات، به‌ڵام هه‌سه‌ده ره‌تیده‌کاته‌وه.
هاوڵاتى جێگرى دووه‌مى سه‌رۆکى په‌رله‌مانى عێراق له‌سه‌ر پشکى پارتى ڕایگه‌یاند" هه‌موو لایه‌نه‌کان ڕازى بن به‌و چاکسازى و پاکسازییه و هه‌رلایه‌نێکیش با که‌مێک قوربانى له‌وباره‌یه‌وه بدات و داهاتى هه‌رێم بگه‌ڕێنه‌وه خه‌زێنه‌ى حکومه‌ت"، ده‌شڵێت:"گۆشتى ڕانى خۆمان بخۆین له منه‌تى به‌غدا باشتره". ئه‌مڕۆ هه‌ینى 25ى کانونى یه‌که‌مى 2020، به‌شیر حه‌داد، جێگرى دووه‌مى سه‌رۆکى په‌رله‌مانى عێراق له میانى وتارى هه‌ینى له مزگه‌وتێکى هه‌ولێر رایگه‌یاند:" هه‌موو لایه‌نه‌کان ڕازى بن به‌و چاکسازى و پاکسازییه و هه‌رلایه‌نێکیش با که‌مێک قوربانى له‌وباره‌یه‌وه بدات و داهاتى هه‌رێم بگه‌ڕێنه‌وه خه‌زێنه‌ى حکومه‌ت و منه‌تمان به به‌غدا نه‌مێنێ و خۆمان خۆمان بژێنین، چونکه ئه‌مڕۆش نه‌بێت به‌غدا هه‌ر وامان لێده‌کات بۆیه پێویسته به‌رنامه‌یه‌کى ته‌واو بۆ خۆبژێوى دابنێین." له‌و وتاره‌یدا له‌و مزگه‌وته به‌شیر حه‌داد وتوویه‌تى "ئه‌گه‌ر چاکسازى ته‌واو و پاکسازى ته‌واو له هه‌رێمى کوردستان بکرێت پێویستمان به منه‌تى به‌غدا نابێت، پێویستمان به‌وه نابێت که له به‌غدا بپارێینه‌وه و ده‌ست پان بکه‌ینه‌وه که مافى خۆمانه‌و هه‌قى خۆشمانه‌و مه‌جبوره به‌غدا بیدات، مانگێک ده‌یدات دوو مانگ بیانوو ده‌دۆزێته‌وه، بۆیه گۆشتى ڕانى خۆمان بخۆین له منه‌تى به‌غدا باشتره". بڕیاره هه‌فته‌ى داهاتوو به فه‌رمى پڕۆژه بودجه‌ى 2021ى عێراق ده‌گاته په‌رله‌مان و راسته‌وخۆ لیژنه‌ى دارایى راپۆرتى خۆى له‌سه‌ر ئاماده ده‌کات و پشکى کوردیش یه‌کێک ده‌بێت له پرسه گه‌رم و جێ ناکۆکه‌کانى نێوان فراکسیۆنه جیاوازه‌کان.
هاوڵاتى وه‌زاره‌تى کشتوکاڵى عێراق ئه‌مڕۆ هه‌ینى ره‌زامه‌ندى له‌سه‌ر هه‌نارده‌کردنى بڕى دوو هه‌زار تۆن ته‌ماته بۆ وڵاتى سعودیه ده‌ربڕی. ئه‌مڕۆ هه‌ینى 25ى کانونى یه‌که‌مى 2020، وه‌زاره‌تى کشتوکاڵى عێراق له‌به‌یاننامه‌یه‌کدا بڵاویکرده‌وه، محه‌مه‌د که‌ریم خه‌فاجى وه‌زیرى کشتوکاڵ ره‌زامه‌ندى ده‌ربڕیوه به‌هه‌نارده‌کردنى دوو هه‌زار تۆن ته‌ماته بۆ وڵاتى سعودیه ده‌ربڕیوه. هه‌روه‌ها ئه‌وه روونکراوه‌ته‌وه که هه‌نارده‌کردنى ته‌ماته بۆ سعودیه له‌رێگه‌ى به‌نده‌رى سنورى عه‌رعه‌ره‌وه ده‌بێت که چه‌ند رۆژێکه دوباره کراوه‌ته‌وه. له مانگى 11ى ئه‌مساڵ حه‌مید نایف، وته‌بێژى وه‌زاره‌تى کشتوکاڵ ڕایگه‌یاند، وه‌زاره‌ته‌که‌یان ماوه‌ى دو ساڵه ته‌ماته‌ى له‌ده‌ره‌وه‌ى وڵاته‌وه هاورده نه‌کردوه، له‌ئێستاشدا به‌رهه‌مهێنانى ته‌ماته له پارێزگاکانى نه‌جه‌ف و که‌ربه‌لا به خێرایى زیادیکردوه و ئه‌گه‌ریشى هه‌یه هه‌نارده‌ى بکه‌ن.
.jpg)
هاوڵاتى باڵوێزخانه‌ى ئه‌مریکا ئه‌و ده‌نگۆیانه‌ى ره‌تکرده‌وه باس له چۆڵکردنى بیناکه‌ى و گواستنه‌وه‌ى بۆ شوێنێکى دیکه ده‌که‌ن و " باڵیۆزى وڵاته‌که له به‌غدا ماوه‌ته‌وه و باڵیۆزخانه‌که‌ش به‌رده‌وام ده‌بێت له کارکردن". له چه‌ند رۆژى رابردوودا، دوو هێرشى موشه‌کى له دوو کاتى جیاواز کرایه سه‌ر باڵیۆزخانه‌ى ئه‌مریکا له به‌غدا، به‌ڵام له‌لایه‌ن سیستمى به‌رگرى باڵیۆزخانه‌که‌وه وه‌ڵامدرایه‌وه و هیچ زیانێکى لێنه‌که‌وته‌وه. به‌هۆى نزیکبوونه‌وه‌ى ساڵیادى کوشتنى قاسم سوله‌یمانى و ئه‌بومه‌هدى موهه‌ندیسه‌وه هۆشدارى دراوه، که ئه‌گه‌رى هه‌یه گروپه‌کانى نزیک له ئێران هێرشى دیکه بکه‌نه سه‌ر به‌رژه‌وه‌ندییه‌کانى ئه‌مریکا له ناوچه‌که و به تایبه‌تى له عێراقدا. دۆناڵد تره‌مپى سه‌رۆکى ئه‌مریکا رایگه‌یاند، که هه‌ر ئه‌مریکیه‌ک له عێراقدا بکوژرێت، ئه‌وا ئێران به به‌رپرسیار ده‌زانێت. هاوکات، به‌رپرسانى باڵاى ئه‌مریکا باسیان له‌وه‌کردووه، له ئه‌گه‌رى ناچاربوونیاندا، باڵیۆزخانه‌که‌یان له به‌غداوه بۆ هه‌ولێر یاخود بۆ بنکه‌ى سه‌ربازى ئه‌سه‌د له رۆژئاواى عێراق ده‌گوازنه‌وه.
هاوڵاتى محه‌مه‌د حاجى مه‌حمود سه‌رۆکى حزبى سۆسیالست دیموکراتى کوردستان و عومه‌ر سه‌ید عه‌لى رێکخه‌رى گشتى بزوتنه‌وه‌ى گۆڕان له‌دیدارێکدا جه‌ختیان له‌سه‌ر پاراستنى قه‌واره‌ى سیاسى هه‌رێمى کوردستان کرده‌وه و داواى یه‌کڕیزیشیان له نێوان لایه‌نه سیاسییه‌کانى کوردستان کرد. ئه‌مڕۆ هه‌ینى 25ى 2020، راگه‌یه‌ندراوێکى نوسینگه‌ى راگه‌یاندنى حزبى سۆسیالست دیموکراتى کوردستان، ئه‌مڕۆ محه‌مه‌د حاجى مه‌حمود له دیدارێکى دۆستانه‌دا، پێشوازى له عومه‌ر سه‌ید عه‌لى کرد له گوندى گوڵه‌خانه، له دیدارێکدا ڕه‌وشى سیاسى کوردستان و عێراق و دواین پێشهاته سیاسیه‌کانى هه‌رێمى کوردستان و عێراق و ناوچه‌که تاوتوێکرا. هه‌روه‌ها محه‌مه‌د حاجى مه‌حمود باسى له بارودۆخى ئێستاى هه‌رێم و عێراق و ناوچه‌که و دۆخى ئابورى ئێستاى هه‌رێم و قه‌یرانى دارایى و بژێوى هاوڵاتیان کرد، هه‌روه‌ها کێشه‌کانى به‌غدا و مه‌سه‌له‌ى نه‌وت که مه‌سه‌له‌یه‌کى حه‌یاتیه بۆ کورد به‌شێکى دیکه‌ى کۆبونه‌وه‌که بوو. هاوکات به‌پێویستى داده‌نێن له‌م دۆخه هه‌ستیاره‌دا ته‌واوى لایه‌نه‌کان به‌رژه‌وه‌ندى باڵاى گه‌ل بخه‌نه سه‌روى به‌رژه‌وه‌ندى تایبه‌تى حزبى و یه‌کڕیزى نێو ماڵى کورد بپارێزن. پاشان محه‌مه‌د حاجى مه‌حمود رایگه‌یاند، ئه‌وان له‌گه‌ڵ یه‌کڕیزى و یه‌کگرتویى نێوان لایه‌نه‌کاندان بۆ چاره‌سه‌رى کێشه‌کان، پێویسته له‌م دۆخه هه‌ستیاره‌دا ته‌واوى لایه‌نه‌کان به‌رژه‌وه‌ندى باڵاى گه‌له‌که‌مان بخه‌نه سه‌روى به‌رژه‌وه‌ندى تایبه‌تى حزبى و یه‌کڕیزى نێو ماڵى کورد بپارێزن. له به‌رامبه‌ردا، عومه‌ر سه‌ید عه‌لى رایگه‌یاند، له‌گه‌ڵ یه‌کڕیزى و یه‌کگرتوى نێوان لایه‌نه‌کاندان بۆ چاره‌سه‌رکردنى کێشه‌کان. له‌راگه‌یه‌ندراوه‌که‌دا ئه‌وه‌شخراوه‌ته‌ڕو، هه‌ردولا هاوڕابون له‌سه‌ر پاراستنى قه‌واره‌ى سیاسى هه‌رێمى کوردستان، پاشان باسکردنى په‌یوه‌ندییه‌کانى هه‌ردولا ته‌وه‌رێکى دیکه‌ى باسه‌که بو.
هاوڵاتى وه‌زیرى ته‌ندروستى عێراق ڕایگه‌یاند:" 16 ملیۆن ڤاکسینى کۆرۆنامان کڕیوه و له ئێستادا تیمێک راهێنان ده‌که‌ن له‌سه‌ر چۆنیه‌تى مامه‌ڵه‌کردن له‌گه‌ڵ ڤاکسینه‌که و به‌بێ به‌رانبه‌ر بۆ هاوڵاتیان به‌کارده‌هێندرێت". ئه‌مڕۆ هه‌ینى 25ى کانونى یه‌که‌مى 2020، به‌پێى هه‌واڵێکى ئاژانسى هه‌واڵى عێراقی، حه‌سه‌ن ته‌میمى وه‌زیرى ته‌ندروستى عێراق رایگه‌یاند جۆره نوێیه‌که‌ى کۆرۆنا هه‌مان نیشانه‌کانى پێشووترى کۆرۆناى هه‌یه، به‌ڵام "له بڵاوبوونه‌وه‌دا خێراتره و کاریگه‌ریشى که‌متره". وه‌زیرى ته‌ندروستى عێراق راشیگه‌یاند:"به‌مزووانه دوو تاقیگه‌ى نوێ بۆ ئاشکراکردنى جۆره نوێیه‌که‌ى کۆرۆنا ده‌گه‌نه عێراق. هه‌روه‌ها وتى:" پێویستیان به سێ ملیار دۆلار هه‌یه بۆ دابینکردنى سه‌رجه‌م پێداویستییه پزیشکییه‌کان و 160 هه‌زار قه‌ره‌وێڵه‌ش بۆ نه‌خۆشخانه‌کان پێویستن". هاوکات ئه‌وه‌شى دووپاتکرده‌وه کۆرۆنا له عێراق له‌ژێر کۆنترۆڵدایه و ته‌نها 191 حاڵه‌ت که دۆخى ته‌ندروستییان خراپه له سه‌رانسه‌رى عێراق له‌نه‌خۆشخانه‌کاندا ماونه‌ته‌وه.
هاوڵاتى ته‌نها له‌ماوه‌ى چوارساڵى رابردودا، بیست هه‌زار به‌رپرس و په‌رله‌مانتار و ئه‌ندامى پارتى دیموکراتى گه‌لان(هه‌ده‌په) له لایه‌ن تورکیاوه ده‌ستگیرکراون و سزاى زیندانى به‌سه‌ر 10هه‌زار که‌سیاندا سه‌پێندراوه. ئه‌مڕۆ هه‌ینى 25ى کانونى یه‌که‌مى 2020، پارتى دیموکراتى گه‌لان (هه‌ده‌په) له راپۆرتێکدا ئامارى پێشێلکارییه‌کانى مافى مرۆڤى له ساڵى 2020دا بڵاوکرده‌وه و تیایدا باسى هه‌ڵمه‌ته‌کانى ده‌سه‌ڵاتدارانى تورکیاو پێشلکارییه‌کانى مافه‌کانى مرۆڤى کردوه که له ساڵى 2015وه تا ئه‌مڕۆ له دژى ئه‌ندامان و به‌رپرسان و په‌رله‌مانتارانى هه‌ده‌په ئه‌نجامدراون. به‌پێى ئاماره‌که‌ى هه‌ده‌په، له ساڵى 2015دا سێ هه‌زار ئه‌ندام و به‌رپرس و په‌رله‌مانتارى پارته‌که‌یان زیندانیکراون و له ساڵى 2020دا یه‌ک هه‌زار و 750 ئه‌ندام و به‌رپرسى هه‌ده‌په ده‌ستگیرکراون و سزاى زیندانیکردن به‌سه‌ر 172که‌سیاندا سه‌پێنراوه. له راپۆرته‌که‌یاندا هاتووه که په‌رله‌مانتارانى هه‌ده‌په: سه‌ڵاحه‌دین ده‌میرتاش، چوار ساڵ و هه‌شت مانگ، فیگه‌ن یوکسه‌ک داغ؛ ساڵێک و یه‌ک مانگ، ئیدریس بالوکه‌ن؛ 16 ساڵ و هه‌شت مانگ، چاغڵار ده‌میره‌ڵ؛ حه‌وت ساڵ و شه‌ش مانگ، عه‌بدوڵا زه‌یدان؛ هه‌شت ساڵ و مانگێک و 15 ڕۆژ، گولسه‌ر یڵدرم؛ حه‌وت ساڵ و شه‌ش مانگ، موسا فاریس ئۆگیولاری؛ نۆ ساڵ، سزاى زیندانیان به‌سه‌ردا سه‌پێندراوه. هه‌روه‌ها به پێى ڕاپۆرته‌که، له چوارچێوه‌ى لێکۆڵینه‌وه‌ى "روداوه‌کانى کۆبانێ له 6-8ى تشرینى دوه‌م"دا دواى شه‌ش ساڵ، له ئه‌مساڵدا بڕیارى ده‌ستگیرکردن بۆ ئه‌ندامانى پێشوى ده‌سته‌ى به‌ڕێوه‌به‌رى ناوه‌ندیى هه‌ده‌په ده‌رکرا، له‌و چوارچێوه‌یه‌دا له 25ى ئه‌یلولى 2020دا ئۆپراسیۆنیان ئه‌نجامدا و له بیست که‌سى ده‌ستگیرکراو له‌و ئۆپراسیۆنه‌دا سزاى زیندانیکردن به‌سه‌ر 17 که‌سیاندا سه‌پێنراو سزاى 22 ساڵ و سێ مانگ زیندانیکردنیش به‌سه‌ر له‌یلا گوڤه‌ن هاوسه‌رۆکى کۆنگره‌ى کۆمه‌ڵگه‌ى دیموکراتى (که‌جه‌ده)دا سه‌پێنرا. پارتى دیموکراتى گه‌لان ئاماژه‌ى به‌وه کردووه که ده‌ستبه‌سه‌رداگرتنى شاره‌وانییه‌کان له ڕێگه‌ى سه‌پاندنى "قه‌یوم"ه‌وه له 19ى ئابى 2019ه‌وه ده‌ستیپێکرد و له ساڵى 2020یشدا درێژه‌ى هه‌بووه، له‌و چوارچێوه‌یه‌شدا 37 هاوسه‌رۆک شاره‌وانیى هه‌ده‌په سزاى زیندانیکردنیان به‌سه‌ردا سه‌پێنراوه‌و 48 شاره‌وانیى هه‌ده‌په "قه‌یوم"یان به‌سه‌ردا سه‌پێنراوه، تا ئێستا 17 هاوسه‌رۆک شاره‌وانیى هه‌ده‌په له زینداندان. هه‌ده‌په ناوى ئه‌و هاوسه‌رۆک شاره‌وانیانه‌ى زیندانیکراون ئاشکرا ده‌کات که پێکهاتوون له: عه‌دنان سه‌لجوق مزراکلى – ئامه‌د، مه‌لیکه گۆکسو – ئه‌رزرۆم، جیهان کارامان – جۆله‌مێرگ، یڵدز چه‌تین – وان، عه‌زیم یاجان – وان، یه‌عقوب ئاماچ – وان، یڵماز شاهین – وان، گوڵستان ئۆنجو – مێردین، مولکییه ئه‌سمه‌ز – مێردین، نیلوفه‌ر ئه‌لیک یڵماز – مێردین، عه‌دنان تۆپچو – موش، یاشار ئاککوش – ئیدر، حه‌سه‌ن سه‌فا – ئیدر، محه‌مه‌د ده‌میر – ئێڵح، ئایهان بیلگه‌ن – قه‌رس، شه‌ڤین ئالاجا – قه‌ره‌س. سه‌لیم کاپڵان، جێگرى هاوسه‌رۆکى هه‌ده‌په، له‌باره‌ى هه‌ڵمه‌ته‌کانى دژ به پارته‌که‌یان رایگه‌یاند، ده‌سه‌ڵات "به شێوه‌یه‌کى فاشیستیانه" هه‌ڵسوکه‌وت له‌گه‌ڵ حیزبه‌که‌یاندا ده‌کات.
هاوڵاتى هه‌ردوو ده‌روازه‌ى باشماخ و حاجى ئۆمه‌ران رایانگه‌یاند، به‌پێى رێنماییه‌کانى وه‌زاره‌تى ناوخۆى هه‌رێم له‌ئه‌مشه‌وه‌وه به‌رووى گه‌شتیاران داده‌خرێن و چوون و هاتنى هاوڵاتیان له‌نێوان هه‌رێمى کوردستان و ئێراندا قه‌ده‌غه‌ده‌کرێت. ئه‌مڕۆ 25ى کانونى یه‌که‌مى 2020، هه‌ردوو ده‌روازه‌ى حاجى ئۆمه‌ران و باشماخ له‌دوو راگه‌یه‌نراوى جیاوازدا ئاماژه‌یان به‌وه‌کردووه که به پێى رێنماییه‌کانى به‌یانى ژماره ( 57 ) ى وه‌زاره‌تى ناوخۆى حکومه‌تى هه‌رێمى کوردستان له‌پێناو پاراستنى ئاسایشى ته‌ندروستى هه‌رێمى کوردستان و رێگریکردن له بڵاوبوونه‌وه‌ى ڤایرۆسى کۆرۆنا، ئاگادارى هه‌موو هاووڵاتیان و گه‌شتیاران ده‌که‌نه‌وه که له ئه‌مشه‌و کاتژمێر (12) رێکه‌وتى (25/12/2020 ) ده‌روازه‌کان به رووى گه‌شتیاران داده‌خرێن و چوونى هاووڵاتیانى هه‌رێمى کوردستان بۆ وڵاتى ئێران و هاتنى هاووڵاتیانى ئێرانى بۆ هه‌رێمى کوردستان قه‌ده‌غه ده‌بێت. هه‌روه‌ها ئه‌وه روونکرداوه‌ته‌وه که ئه‌و هاووڵاتیانه‌ى هه‌رێمى کوردستان که له ئێران ماونه‌ته‌وه و پاشان ده‌گه‌رێنه‌وه له کاتژمێر ( 8 ) به‌یانى تا ( 6 ) ى ئێواره ده‌توانن بگه‌رێنه‌وه و به پێى رێنماییه‌کانى وه‌زاره‌تى ته‌ندروستى بۆ ماوه‌ى ( 14 ) رۆژ له سه‌ر خه‌رجییه‌کانى خۆیان که‌ره‌نتین ده‌کرێن. وه‌زاره‌تى ناوخۆى حکومه‌تى هه‌رێمى کوردستان رایگه‌یاند، به‌بۆنه‌ى پشوه‌کانى سه‌رى ساڵ هیچ بۆنه و ئاهه‌نگێک له شوێنه گشتییه‌کان، هۆتێل و کافتریان رێکناخرێت و سه‌رپێچیکاران سزاى دارایى و روبه‌ڕوى داخستن ده‌بنه‌وه. هاوکات ئه‌وه‌ى دووپاتکردووه‌ته‌وه که رێکاره‌کانى پابه‌ندبون به رێنماییه ته‌ندروستییه‌کان و به‌ستنى ده‌مامک له‌شوێنه گشتییه‌کان چڕترده‌کرێته‌وه.
هاوڵاتى سندوقی دراوی نێوده‌وڵه‌تی هه‌ڵوێستى خۆى له‌سه‌ر دابه‌زاندنى به‌هاى دراوى عێراقى به‌رانبه‌ر به دۆلارو دراوه جیهانییه‌کان راگه‌یاند که پێشوازی له دابه‌زاندنی به‌های دینار ده‌که‌ن. سندوقی دراوی نێوده‌وڵه‌تی له به‌یاننامه‌یه‌کدا رایگه‌یاند:" ئه‌و چاکسازییانه به دابه‌زاندنى به‌هاى دینار گرنگییه‌کی زۆری هه‌یه بۆ گره‌نتی سه‌قامگیریى ئابووری عێراق". توکیر میرزوییف، سه‌رۆکی نێرده‌ی سندوقه‌که له عێراق رایگه‌یاند: "کاریگه‌رییه‌کانی په‌تای کۆرۆنا و دابه‌زینی به‌رچاوی داهاتی نه‌وت مه‌ترسیان دروستکردووه و هه‌ڕه‌شه‌ن بۆ سه‌ر سه‌قامگیریى ئابووری عێراق". هه‌روه‌ها راشیگه‌یاند:"به‌رده‌وامی چاکسازییه‌کان له قۆناغی داهاتوو، کاریگه‌ری زۆری ده‌بێت له‌سه‌ر به‌هێزکردنی ده‌ستکه‌وته‌کان له‌کورت مه‌ودادا". هاوکات، توکیر میرزوییف ئه‌وه‌شى خسته‌روو که سندوقی دراو له ئاماده‌باشیدایه بۆ پشتیوانی له هه‌وڵه‌کانی چاکسازیى که ده‌سه‌ڵاتدارانی عێراق گرتویانه‌ته به‌ر بۆ رووبه‌ڕووبونه‌وه‌ی ئاڵنگارییه‌کان. سندوقی دراو ئه‌وه‌شیان روونکردووه‌ته‌وه که پێشوازیان له په‌سه‌ندکردنی پڕۆژه یاساى بودجه‌ى 2021 کردووه له‌لایه‌ن حکومه‌تى عێراقه‌وه که له‌ناویاندا دابه‌زاندنی نرخی دیناربووه.
هاوڵاتى له شارۆچکه‌ى عه‌ین عیسا و سنوره‌کانی، پێکدادان له‌نێوان هێزه‌کانى سوریاى دیموکرات (هه‌سه‌ده) و میلیشیا چه‌کدارییه‌کانى سه‌ر به تورکیا نوێبوه‌ته‌وه و هه‌سه‌ده له هه‌وڵى گێڕانه‌وه‌ى ده‌سه‌ڵاتیایه‌تى له‌و ناوچه‌یه. ئه‌مڕۆ هه‌ینى 25ى کانونى یه‌که‌مى 2020، میدیاى سوریا بڵاویکرده‌وه که له نزیک له ناوچه‌که، به چه‌کى قورس له سنوره‌کانى عه‌ین عیسا – رۆژئاڤاى کوردستان پێکدادان رویداوه له‌نێوان شه‌ڕڤانانى هه‌سه‌ده و میلیشیاکانى (گروپى چه‌کدارى سوپاى نیشتیمانی) سه‌ر به تورکیا له‌و ناوچه‌یه. هه‌روه‌ها سه‌رچاوه‌یه‌کیش له هێزه‌کانى هه‌سه‌ده به ژماره‌یه‌ک میدیاى رایگه‌یاندووه، هێزه‌کانیان له ناوچه‌که به‌ره‌وپێشده‌چن و پشتیوانى مه‌زنیان له‌لایه‌ن پسپۆڕانى بوارى چه‌کى قورسه‌وه بۆ هاتوه له سنوره‌کانى ئه‌و ناوچه‌یه بۆ به‌رپه‌رچدانه‌وه‌ى هێرشه‌کان. هاوکات، رۆژنامه‌ى وه‌ته‌ن، زمانحاڵى سوپاى سوریا ئاشکراى کردووه که پشتیوانى له شه‌ڕڤانان ده‌که‌ن بۆ وه‌ڵامدانه‌وه‌ى داگیرکارییه‌کانى تورکیا و میلیشیا ئیسلامییه‌کان له ناوچه‌که.
هاوڵاتى ئه‌مڕۆ هه‌ینى به‌هاى دینارى عێراقى به‌رانبه‌ر به دۆلارى ئه‌مریکى جێگیر بووه. به‌های دۆلار و تمه‌ن و چه‌ند دراوێکی تری بیانى له بازاڕه‌کانی ئاڵوگۆڕی دراو به‌رانبه‌ر به دیناری عیراقی له هه‌رێمی کوردستان به‌م شێوه‌یه‌ن: - نرخى 100 دۆلار به 142 هه‌زارو 500 دینار. - نرخى 100 یۆرۆ به 172 هه‌زار دینار. - نرخى 100 پاوه‌ن به 189 هه‌زار دینار. - نرخى 100 لیره‌ى تورکى به 18 هه‌زار و 500 دینار. - نرخى 100 هه‌زار تمه‌نى ئێرانى به پێنج هه‌زار و 600 دینار.
ئارا ئیبراهیم ئه‌ندامێکى لیژنه‌ى دارایى له په‌رله‌مانى عێراق ئاماژه‌ى به‌وه‌کرد دواى په‌سه‌ندکردنى پرۆژه بودجه‌ى 2021 له‌لایه‌ن حکومه‌تى عێراقه‌وه هێشتا نه‌گه‌یشتووه‌ته لیژنه‌که‌یان. پرۆژه بودجه‌ى 2021ى عێراق له 150 تریلۆن و 150 ملیار دینار پێکهاتووه‌و 58 تریلۆن و 260 ملیار دینار کورتهێنانى هه‌یه، پشکى هه‌رێم له‌به‌رانبه‌ر 250 هه‌زار به‌رمیل نه‌وتى رۆژانه‌و ته‌سلیمکردنى داهاته نانه‌وتییه‌کان پشکى له‌سه‌دا 12.67 بۆ دیارى کراوه. شیروان میرزا، ئه‌ندامى لیژنه‌ى دارایى له په‌رله‌مانى عێراق له‌لێدوانێکدا به‌هاوڵاتى وت:" تا ئێستا به‌فه‌رمى پرۆژه بودجه‌ى 2021 نه‌گه‌یشتووه‌ته لیژنه‌که‌مان". هه‌روه‌ها ئاماژه‌ى به‌وه‌کرد تا نه‌یبینن و بڕگه‌و مادده‌کان که تێیدا هاتووه ناتوانن ورده‌کارى پشکى هه‌رێم له‌سه‌ر چ بنه‌مایه‌ک دیارى کراوه بیخه‌نه‌روو. هاوکات، ماجیده ته‌میمی، ئه‌ندام له لیژنه‌ى دارایى ئه‌نجومه‌نى نوێنه‌رانى عێراق ئه‌مڕۆ هه‌ینى رایگه‌یاند، لیژنه‌ى دارایى به شێوه‌یه‌کى فه‌رمى پرۆژه‌یاساى بودجه‌ى 2021ى به‌ده‌ستنه‌گه‌یشتوه هه‌تا ئێستا.
