هێزەکانی سووریای دیموکرات(هەسەدە)، لە بەیاننامەیەکدا ڕایگەیاند: ڕێگرییان لە ژمارەیەک چەکداری سەر بە حکوومەتی سووریا کردووە کە، هەوڵیانداوە دزە بکەنە نێو ناوچەکانی دەورووبەری"تل حافر" لە بەرەی باشوور لە ڕۆژهەڵات و نائارامیان دروستکردووە، دوای هێرشەکەشی بۆ سەر ئەو چەکدارانە، جارێکی دیکە ئارامیان بۆ ناوچەکە گەڕاندووەتەوە. هێزەكانی سوریای دیموكرات دەڵێت: هێزەکانمان لە ناوچەی دێرحافەر بەوپەڕی تواناوە بەرپەرچی هەوڵەكانی دزەکردن و دوژمنكاری تۆپبارانيان داوەتەوە، کە لەلایەن گروپە لە یاسا دەرچووەكانی سەر بە حکومەتی دیمەشقەوە ئەنجامدراوەو، تەواوی ئەو هەوڵانەیان پوچەڵ کردووەتەوە. ناوەندی راگەیاندنی هەسەدە، لە راگەیەندراوێكدا كە ئەمڕۆ بڵاویكردووەتەوە، رایدەگەیەنێت:هێزەکانمان دووپاتی دەکاتەوە بەرپرسیارێتی تەواوی ئەم هێرشانە لە ئەستۆی ئەو لایەنەیە دەستپێشخەری ئەو پێشێلکارییە دووبارەیەی كردووە، کە هەڕەشە لە سەقامگیری گشتی دەکات. لە هەمان كاتدا، هێزەکانمان دڵنیایی دەداتە سەرجەم دانیشتوان کە دۆخەکە لەژێر کۆنترۆڵی تەواودایەو لە ئامادەباشی بەردەوامدایە، بۆ روبەڕوبونەوەی هەر پێشێلکارییەکی نوێ. ئاماژە بەوەشدەكات: هێزەکانیان جەخت لەسەر پابەندبونی بە ئەرکی نیشتمانی خۆی دەکاتەوە بۆ بەرگریکردن لە خاک و پاراستنی گەل، هەر هەوڵێکی دیکەی دوژمنكاری وەڵامێکی یەکلاکەرەوەی دەدرێتەوە، بە جۆرێك ئاسایشی ناوچەکە و شكۆی خەڵكەكەی بپارێزێت. لەلایەکى دیکەوە فەرمانگەی ڕاگەیاندن و پەیوەندییەکانی وەزارەتی بەرگریی سووریا ڕایگەیاند: ئێوارەی دوێنێ 10ـی ئەیلوولی 2025، هێزەکانی سووریای دیموکرات( هەسەدە)، کتوپڕ هێرشێکی فراوانی کردووەتە سەر هێزەکانیان لە فڕۆکەخانەی سەربازیی(جەڕاح) و دەورووبەری شارۆچکەی مەسکەنە لە ڕۆژئاوای حەلەب، لە هێرشەکەشدا، ماڵ و خانووی هاووڵاتییانی گوندەکانی ئەو ناوچەی وێران کردووە کە، بەهۆیە دوو هاووڵاتی گیانیان لەدەستدا و سێ هاووڵاتیی دیکەش برینداربوون. وەزارەتی بەرگریی سووریا ئاشکرای کردووە، دوای هێرشەکەی هێزەکانی سووریای دیموکرات، سووپای سووریا دەستی بە هێرشکردنی پێچەوانەوە بۆ سەر سەرچاوەی هێرشەکە، کردووە.
24 ساڵ بەسەر روداوەکانی 11ـی سێپتەمبەر تێپەڕدەبێت، بەرەبەیانی 11ـی سێپتەمبەری 2001، 19 ئەندامی سەر بە تۆڕێكی قـ.ـاعیدە، چوار فڕۆكەی نەفەرهەڵگری ئەمریكایان رفاند و دواتر دوو لە فڕۆكەكان خۆیان كێشا بە هەردوو تاوەرەی ناوەندیی بازرگانیی جیهانی لە نیویۆرك، یەكێك لە فڕۆكەكانیش خۆی بە بینای (پێنتاگۆن)دا كێشا و فڕۆكەی چوارەمیش لەویلایەتی پێنسیلڤانیا لەلایەن هێزی ئاسمانی ئەمریكا خرایەخوارەوە، لە ئەنجامی ئەو هێرشانەش، نزیكەی سێ هەزار هاووڵاتی ئەمریکی گیانیان لەدەستدا و هەزاران هاووڵاتی دیەکش برینداربوون. 11ـی سێپتەمبەری 2001، ئەو رۆژەی بووە هۆی سەرهەڵدانی جەنگێکی درێژخایەنی 20 ساڵە و گیانلەدەستدان و برینداربوونی هەزاران کەس و ئاوارەبوونی ملیۆنان کەسی دیکە. لەسەر لە بەیانی رۆژی 11ی سێپتەمبەری 2001، چوار تیمی سەر بە گرووپی چەکداری قاعیدە کە لە 19 کەس پێکهاتبوون، هەستان بە رفاندن و دەستبەسەرداگرتنی چوار فڕۆکەی نەفەرهەڵگر و لەهێرشێکی خۆکوژیدا بەکاریانهێنا. دوو لە فڕۆکەکان هەردوو باڵەخانەی ناوەندی بازرگانیی جیهانییان لە شاری نیویۆرکی ئەمریکا کردەئامانج، فڕۆکەی سێیەمیش بینای پنتاگۆن(وەزارەتی بەرگری ئەمریکا)ی لە دەرەوەی واشنتۆن دی سییەوە کردە ئامانج، بەڵام فڕۆکەی چوارەم لەلایەن سەرنشینەکانییەوە هێرشی کرایەسەر لە ناوچەی شەنکسڤیڵێی پەنسڵڤانیا کەوتەخوارەوە و تەواوی سەرنشینەکانیشی گیانیان لەدەستدا.
مەکتەبی سیاسی پارتی دیموکراتی کوردستان بەبۆنەی 64ـەمین ساڵیادی شۆڕشی ئەیلوول رایگەیاند، "چاوەڕوانیمان لە جەماوەری پارتیمان و خەڵکی کوردستان ئەوەیە پشتیوانی لە بەرنامە هەنگاوەکانی پارتیمان بکات." دەقی راگەیێندراوی پارتی دیموکراتی کوردستان: لەو سەردەمە سەخت و دژوارەی ئەوسادا و وەک پێویستییەکی مێژوویی و بەرخودان، شۆڕشی مەزنی ئەیلوول چەشنی جووڵانەوەیەکی سیاسی هەڵگیرسا، بەرپابوونی شۆڕشی مەزنی ئەیلوول بە ڕابەرایەتی بارزانیی نەمر و پێشڕەوی پارتیمان لاپەڕەیەکی پڕشنگداری نوێی لە بزووتنەوەی ڕزگاریخوازیی کوردستان بە خوێن و گیانفیدایی تۆمار کرد. شۆڕش لەو قۆناخەدا بایەخ و کاریگەرییەکی زۆری هەبوو بەسەر بزاڤی ڕزگاریخوازی و نەتەوەیی و نیشتمانیمان، لەبەر ئەوەی هەڵگری پەیامێکی ڕاست و دروست و بابەتیانە و ئەقڵانی بوو، هەروەها شۆڕش سەلمێنەری ئەو ڕاستییە بوو، کە ڕەگوریشەی ئیرادە و ورەی پۆڵایینی ڕۆڵەکانی گەلەکەمان لە بن نایەن و تا بەدیهێنانی ئامانجەکانمان کۆڵ نادەن. ئەو بزووتنەوە سیاسییە بەپێی هەولومەرجی ئەو کاتە خاوەن خەسڵەت و تایبەتمەندی خۆی بوو لە ڕووی سیاسیی و کۆمەڵایەتی و سەربازییەوە، بۆیە شوناسێکی جیاوازیشی هەبوو، کە خەباتێکی نەپساوە بوو بۆ ئەوەی کۆتایی بە شەوەزەنگی زۆرداری و نەهامەتی بهێنێ. یەکێک لە بنەما گونجاو و ڕەسەنەکانی شۆڕش، ڕەنگدانەوەی کۆمەڵگای فرەڕەنگی کوردستانیی و کولتووری شۆڕشگێڕی کوردایەتیی و نیشتمانپەروەری بوو، لەسەرینی ئەمەوە شۆڕشێکی درێژخایەن و مەزن و سەرتاسەری بوو، لەو ڕێگایەشدا قوربانی بێشوماری پێشکەش بە خاک و نەتەوە و دۆزە ڕەواکەمان کرد. شۆڕشی ئەیلوول بە ئەجێندایەکی نوێ و ڕێکوپێکی بەرنامە بۆ داڕێژراوى سەربازى و سیاسى و دیبلۆماسى بۆ بەرژەوەندییە باڵاکانی گەل و نەتەوەکەمان و خەڵکی کوردستان بە گشتی خۆی دەبینییەوە و هەرگیزاو هەرگیز لەسەر ئەو ڕێچکە و ڕێبازەی لای نەدا و نەک لە پیلانگێڕی و ناپاکییەکان سازش و سڵی نەکردەوە، بەڵکو سوورتر بوو لەسەر جۆشدان و ڕابوونی سیاسیی و باشترکردنى بارى ئابووری و کولتووری هۆشیارى و گەیشتن بە ئامانجە ڕەواکانمان. لە لایەکی دیکەوە شۆڕشی مەزنی ئەیلوول سەرتاسەری کوردستانی کردە یەکدەست و ھەموو سنوورە ناوچەیی و ئایینی و مەزھەبیەکانی سڕیەوە و تەواوی گەلی کورد و کوردستانى لە چوارچێوەی ھێزی بەرھەڵستکاری دژ بە دیکتاتۆریی یەکخست و هێزى بەخشیە گەلى کوردستان بۆ بەرگرى لە مافەکانى. شۆڕشی مەزنی ئەیلوول بە پێی کارنامە و پلانى داڕێژراوەى خۆی بۆ جاڕدان و بەرپاکردنی شۆڕش و بەردەوام بوونی بۆ بەدیهێنانى مافە ڕەواکانی گەلەکەمان، وەک وەرچەرخانێکی گرینگ ڕۆڵ و سەنگی بزووتنەوەی ڕزگاریخوازیی کوردستانی بۆ قۆناغێکی سیاسیی پێشکەوتووتر گواستەوە بە جۆرێك لەسەر گۆڕەپانی سیاسی نێوخۆیی و جیهانیدا ئەو بزووتنەوە شۆڕشگێڕییە وەک هێزێکی کاریگەر تەنیا شۆڕشێکى چەکدارى نەبوو، بەڵکو شۆڕشێک بوو لە بوارى کۆمەڵایەتى بە تایبەتى لە ڕووى پێکهێنان و پاراستنى خێزان و، بوارى پەروەردە و پێگەیاندن و تەندروستى و ئیدارەدانى کۆمەڵگا و ڕێگاوبان و میدیا و پەیوەندییەکان و گۆڕانکارى زۆرى ئەنجامدا و ڕۆڵى نەتەوەیى و نیشتیمانى لە ئاستێکى باڵا گێڕا و، توانى چەندین دەستکەوتی گرنگى نەتەوەیى و نیشتیمانى و سیاسى و ئیدار و ڕۆشنبیرى و مێژووییش بۆ گەلەکەمان بەدیبێنێ لەوانەش: ڕێککەوتننامەى (١١ی ئاداری ١٩٧٠). ئەو بۆنەیە بە دەرفەت دەزانین وەک هەمیشە جەخت لە سەر ڕێبازی ڕەگداکوتاوی کوردایەتیی و نەتەوەیی و پارتایەتیمان بکەینەوە بۆ پتەوکردنی هەماهەنگی و هاوگوتاری سیاسی و هاوهەڵوێستی سەرجەم حزب و لایەنە سیاسییەکانی کوردستان بۆ چارەسەرکردنی گیروگرفتەکان و پاراستنی قەوارەی سیاسی هەرێم و دەسکەوتەکانمان. لەو یادە پیرۆزەدا و لە سەروبەندی هەڵبژاردنی خولی شەشەمی ئەنجوومەنی نوێنەرانی عێراق، جەخت لەسەر بەشداریکردن و پڕۆسەی هەڵبژاردنێکی پاک و بێگەرد و ئازادانە دەکەینەوە، کە بڕیارە لە ١١/١١/٢٠٢٥ بەڕێوەبچێ، بۆ ئەوەی قۆناغی داهاتوو پڕۆسەی سیاسی عێراقى فیدراڵ لەسەر بنەمایەکی ڕاست و دروست دابڕێژرێ و کێشە و قەیرانەکان چارەسەر و بنبڕ بکرێن، بۆ ئەمەش چاوەڕوانیمان لە جەماوەرى دڵسۆزى پارتیمان و خەڵکى بەئەمەکى کوردستان و سەرجەم عێراقە، پاڵپشتیی بەرنامە و هەنگاوەکانى پارتیمان بکەن کە جەختکردنەوەیە لەسەر جێبەجێکردنى دەستوور و چەسپاندنى پڕەنسیپەکانى بنیاتنانەوەى عێراقى نوێیە، وەکوو وڵاتى هەمووان. لەسەر ئاستی دەرەوە و ناوچەکەش، پارتیمان لەپێناو ئارامی و ئاساییشی خەڵکی کوردستان بەردەوام ھەوڵی داوە لەگەڵ وڵاتانی دراوسێ لە پەیوەندییەکی باش و ھاوسەنگدا بێت، کە بەرژەوەندیی ھەموو لایەکی تێدا پارێزراو بێت. لەم یادە مەزنە مێژووییەدا، ئێمە لە پارتی دیموکراتی کوردستان، وەک هەمیشە جەخت لەسەر بنەما سەرەکی و نەگۆڕەکان دەکەینەوە، بەجۆرێک بە هەموو لایەکمان لەسەر پرسە ستراتیژییەكانی كوردستان، لە داكۆكیكردن لە مافە ڕەوا و دەستوورییەكانمان و لە خاكەكەمان و لە دەستكەوت و قەوارە نیشتمانییەكەمان و، لە پاراستنى دامودەزگا شەرعیەکانى کوردستان (سەرۆکایەتیی هەرێم و حکوومەت و پەرلەمانى کوردستان) یەکڕیز و هاوئاراستە و هاوگوتار بین. لە بیرەوەری شۆڕشی مەزنی ئەیلوول هەمدیسان بەڵێن و ئەمەکداری بۆ گەلی کوردستان و سەرۆک (مەسعود بارزانی) و خوێن و گیانی شەهیدە نەمرەکانمان دووپات دەکەینەوە، کە لەسەر هەمان ڕێبازی کوردایەتی و نەتەوەیی و نیشتمانیمان نەسرەوین. لەو یادە مەزنەدا پیرۆزباییەکی گەرم لە جەماوەری دڵسۆزی کوردستان دەکەین، سەری ڕێز و نەوازش بۆ شەهیدانی ڕێگای ڕزگاریی و سەربەخۆیی کورد و کوردستان دادەنوێنین، سڵاو و ڕێز لە خانەوادە و کەسوکاری سەربەرزی شەهیدە نەمرەکانمان، سڵاو لە هێزی پێشمەرگەی کوردستان. سڵاو لە بیرەوەری (٦٤) ساڵەی شۆڕشی مەزنی ئەیلوول. سڵاو لە گیانی پاکی بارزانیی نەمر و کاکە ئیدریسی هەمیشە زیندوو. بەرز و شەکاوە بێت ئاڵای پیرۆزی کوردستان. هەمیشە گەلەکەمان سەربەرز و کوردستانیش هەر ئاوەدان. مەکتەبی سیاسیی پارتی دیموکراتی کوردستان ١٠ی ئەیلوولی ٢٠٢٥
ئەنجوومەنی وەزیرانی هەرێمی کوردستان داوا لە بەغدا دەکات پێشنیازەکەیان بکاتە "بنەما بۆ یەکلاییکردنەوەی بابەتی داهاتە نانەوتییەکان کە پشتبەستە بە یاسا فیدراڵییەکان و بڕیاری دادگای فیدراڵی." ئەمڕۆ چوارشەممە 10ـی ئەیلوولی 2025، ئەنجوومەنی وەزیرانی هەرێمی کوردستان کۆبووەوە و تاوتوێی چەند پرسێکی کرد لەنێویندا، هەردوو دۆسیەی داهاتە نانەوتییەکان و دەستپێکردنەوەی هەناردەی نەوتی هەرێم و تاوتوێکردنی بڕیارەکانی کۆبوونەوەی دوێنێی ئەنجومەنی وەزیرانی عێراق. حکومەتی هەرێمی کوردستان لە راگەیێندراوێکدا لەبارەی کۆبوونەوەکە دەڵێت، ئەنجوومەنی وەزیرانی هەرێمی کوردستان داوای لە حکومەتی فیدراڵی کرد، پێشنیازەکەیان بکاتە بنەما "بۆ یەکلاییکردنەوەی بابەتی داهاتە نانەوتییەکان کە پشتبەستە بە یاسا فیدراڵییەکان و بڕیاری دادگای فیدراڵی، تاوەکو چیدیکە نەبێتە ئاستەنگی بەردەم خەرجکردنی مووچە و شایستەی دارایی مووچەخۆرانی هەرێم." هەناردەکردنەوەی نەوتی هەرێمی کوردستان پرسێکی دیکەی کۆبوونەوەکە بوو، حکومەتی هەرێمی کوردستان دەڵێت، وەزارەتی سامانە سرووستییەکان راسپێردرا "بۆ چڕکردنەوەی هەوڵەکان لەگەڵ کۆمپانیا نەوتییەکان بۆ یەکلاییکردنەوەی بابەتە هەڵپەسێردراوەکان و لابردنی هەر بەربەست و ئاستەنگێک." ئەنجوومەنی وەزیران جەختیکردەوە، پشتیوانی لە هەر راسپاردە و بڕیارێک دەکات لە بەرژەوەنديی هێزەکانی پێشمەرگە بێت، بە ئاراستەی باشترکردنی مووچەی خانەنشینی و شایستەداراییەکانیان. بەگوێرەی راگەیێندراوەکە، ئەنجوومەنی وەزیران، "وەزارەتی دارایی و ئابووری راسپارد بۆ ئەوەی بە زووترین کات مووچەی خانەنشینی هێزەکانی پێشمەرگە خەرج بکات کە دواکەوتووە." لە کۆبوونەوەکەدا، بڕیاردرا لێخۆشبوونی پێشینەی هاوسەرگیری، قەرزەکانی (خانووبەرە، کشتوکاڵ، پیشەسازی و نیشتەجێکردن و گەشتیاری) تاوەکو 31-12-2025 بەردەوام بێت.
سەرۆکوەزیرانی قەتەر هاوکات وەزیری دەرەوەشە دەڵێ: نەتانیاهۆ هەڕەشە لە وڵاتانی دیکەی ناوچەکە دەکات، هەرچەندە ئەوان هیچ هەڕەشەیەک بۆ سەری دروست ناکەن. شێخ محەممەد بن عەبدولڕەحمان ئەلسانی سەرۆک وەزیران و وەزیری دەرەوەی قەتەر لەچاوپێکەوتنێکیدا لەگەڵ کەناڵى سی ئێن ئێن وتى: قەتەر مافی ئەوەی هەیە وەڵامی ئەم هێرشە ئاشکرایە بداتەوە، وەڵامدانەوه بۆ هێرشەکەی ئیسرائیل لەدۆحەوە دەبێت، وەڵامدانەوە له ئێستادا له گفتوگۆیه لەگەڵ هاوبەشەکانمان لەناوچەکە. دوای ڕۆژێک لە هێرشەکەی ئیسرائیل بۆ سەر قەتەر، ئێوارەی ڕۆژی چوارشەممە ئەل سانی، سەرۆکوەزیرانی قەتەر ئەو چاوپێکەوتنەى ئەنجامداوەو بە توندی هێرشی کردوەتە سەر نەتانیاهۆ و حکومەتەکەی. ئاماژەی بەوەشکرد، نەتانیاهۆ "رۆژهەڵاتی ناوەڕاست بەرەو ئاژاوە دەبات". هەروەها تۆمەتباری کردووە بە "کاتی قەتەر لە نێوەندگیریدا بەفیڕۆ داوە". وتیشى: ئێمە هەڕەشەکانی نەتانیاهۆ قبوڵ ناکەین بەو پێیەی یاسا نێودەوڵەتییەکان پێشێل دەکات و خەڵکی غەززە برسی دەکات. ناتانیاهۆ دەبێت دادگایی بکرێت و لەلایەن دادگای تاوانە نێودەوڵەتییەکانەوە داواکراوە، نەتانیاهۆ هەوڵی وتاری یاسایی دەدات، بەڵام یاسا نێودەوڵەتییەکان پێشێل دەکات.
لەسەر دەستپێكردنەوەی دانیشتنەكانی پەرلەمانی كوردستان و پێكهێنانی كابینەی نوێی حكومەت،؛ بەرپرسی دەستەی كارگێڕیی مەكتەبی سیاسی پارتی دەڵێت، تا زووترە پارتی و یەكێتی لەسەر پێكهێنانی حكومەت بگەنە ڕێككەوتن ئەوە لە بەرژەوەندیی هەرێمی كوردستانە، وتەبێژی ئەو حیزبەش ئاماژە بەوە دەكات پەیوەندیی نێوان پارتی و یەكێتی خراپ نییە و ئەندامێكی مەكتەبی سیاسیی یەكێتیش ئەوە دووپات دەكاتەوە. نزیکەی ساڵێک بەسەر دوایین هەڵبژاردنی پەرلەمانی کوردستان تێدەپەڕێت، بەڵام تا ئێستا حکومەتی نوێ پێکنەهێنراوە، پارتی و یەکێتی وەک براوەی یەکەم و دووەمی هەڵبژاردنەکە بەردەوامن لە کۆبوونەوە و گفتوگۆکانیان لەبارەی پێکهێنانی حکومەت و هەڵبژاردنی دەستەی سەرۆکایەتی پەرلەمانی کوردستان. فازڵ میرانی، بەرپرسی دەستەی كارگێڕیی مەكتەبی سیاسیی پارتی دیموكراتی كوردستان ڕایگەیاند، تا زووترە پارتی و یەكێتی لەسەر كاراكردنەوەی پەرلەمان و پێكهێنانی كابینەی نوێی حكومەت پێكبهێنن، چونكە ناحەزانی ئەو ئەزموونە، چاوەڕێی ئەوەن هەرێمی كوردستان بە لاوازی ببینن. لای خۆشیەوە، مەحمود محەممەد، وتەبێژی پارتی دیموكراتی كوردستان ڕایگەیاند، هەردوو شاندی دانوستانكاری پارتی و یەكێتی ئاگاداری وردەكاری دوایین هەنگاوەكانی پێكهێنانی حكومەتن، بەڵام قسەی فەرمی ئەوەیە كە ڕێككەوتوون لەم مانگەدا دەستەی سەرۆكایەتیی پەرلەمانی كوردستان هەڵبژێردرێت، ئیتر ئەوە ڕێككەوتنی لەسەر كراوە. ئاماژەی بەوەشكرد، ئێستا پەیوەندییەكانی نێوان پارتی و یەكێتی خراپ نییە وەك ئەوەی باسی لێوە دەكرێت. سەعدی ئەحمەد پیرە، ئەندامی مەکتەبی سیاسی یەكێتیی نیشتمانیی كوردستان لە پەیامێكدا بۆ دەزگاكانی ڕاگەیاندن وتی، پەیوەندیمان لەگەڵ پارتی بەرەو باشتر دەچێت، باسی لەوەشكرد شاندی باڵای دانوستانكاری پارتی و یەكێتی بڕیاری كاراكردنەوەی پەرلەمانیان داوە، چاوەڕێ دەكەین بزانین جێبەجێكردنی بڕیارەكە چۆن دەبێت.
سەرۆکی هەرێمی کوردستان لەگەڵ شاندێکی وڵاتی ئیمارات کۆبووەوە و دانانی نێرده‌يه‌كى تايبه‌تى ئيماراتى بۆ كاروبارى ئابوورى بۆ هه‌رێمى كوردستان، به "هه‌نگاوێكى گرنگ" له قه‌ڵه‌م دا كه بايه‌خ و گرنگيى په‌يوه‌ندييه‌كانى هه‌ردوولا نيشان ده‌دات. رۆژی چوارشەممە، 10ـی ئەیلوولی 2025 سەرۆکایەتیی هەرێمی کوردستان رایگەیاند: نێچیرڤان بارزانی، سەرۆکی هەرێمی کوردستان پێشوازییکرد لە سه‌عيد ئه‌لهاجرى، وه‌زيرى ده‌وڵه‌ت و نێرده‌ى تايبه‌تى ئيمارات بۆ كاروبارى ئابوورى بۆ هه‌رێمى كوردستان و شاندێكى ياوه‌رى. لە کۆبوونەوەکە بەگوێرەی سەرۆکایەتیی هەرێمی کوردستان: "هه‌ردوولا وێڕاى ستايشكردنى مێژووى دۆستايه‌تى و په‌يوه‌ندييه‌كان، خۆشحاڵييان به ئاستى په‌يوه‌ندييه‌كانى نێوان هه‌ردوولا ده‌ربڕى و جه‌ختيان له خواستى دوولايه‌نه بۆ بره‌وپێدانى زياتر و فراوانكردنى هاريكاريى هاوبه‌شى نێوانيان كرده‌وه، به‌تايبه‌تيش له‌و بوارانه‌دا كه بۆ هه‌ردوولا گرنگن." هه‌ر له‌وباره‌يه‌وه هه‌ردوولا بوونى ياسايه‌كى هانده‌ر و ژينگه‌يه‌كى يارمه‌تيده‌ريان بۆ وه‌به‌رهێنان له هه‌رێمى كوردستان، "به گرنگ هه‌ڵسه‌نگاند." نێچيرڤان بارزانى وێڕای سوپاسکردنی سه‌رکردایه‌تی و حکومه‌تی ئیمارات بۆ "يارمه‌تيدان و پشتگيرييان له عێراق و هه‌رێمى كوردستان"، ده‌ستنيشانكردنى نێرده‌يه‌كى تايبه‌تى ئيماراتى بۆ كاروبارى ئابوورى بۆ هه‌رێمى كوردستان، به "هه‌نگاوێكى گرنگ له قه‌ڵه‌م دا كه بايه‌خ و گرنگيى په‌يوه‌ندييه‌كانى هه‌ردوولا نيشان ده‌دات." سه‌رۆكى هه‌رێمى كوردستان هه‌روه‌ها سوپاس و پێزانينى بۆ شێخ محه‌ممه‌د بن زايد ئال نه‌هيان، سه‌رۆكى ئيمارات دووپات كرده‌وه كه نيسانى رابردوو له كۆبوونه‌وه‌يه‌كى دووقۆڵيياندا له ئه‌بوزه‌بى، جه‌ختى له ناردنى نێرده‌يه‌كى تايبه‌تى ئيمارات بۆ وه‌به‌رهێنان بۆ هه‌رێمى كوردستان كردبووه‌وه. لە راگەیێندراوەکەی سەرۆکایەتیی هەرێمی کوردستاندا هاتووە. له كۆبوونەوه‌كه‌دا نێچیرڤان بارزانی و سه‌عيد ئه‌لهاجرى باسیان له ده‌ر‌فه‌ته‌كانى سه‌رمايه‌گوزارى و وه‌به‌رهێنان و كار و چالاكيى كۆمپانياكان و كه‌رتى تايبه‌تى ئيماراتى له هه‌رێمى كوردستان كرد و لەبارەی ئاسۆى فراوانكردنيان له بواره جیاجياكاندا، بيروڕايان گۆڕييه‌وه. هاوکات سەرۆکی هەرێمی کوردستان ته‌واوى ئاماده‌يى بۆ پێشكێشكردنى "هه‌موو پشتيوانى و هاوكارييه‌كى پێويستى لايه‌نه په‌يوه‌نديداره‌كانى هه‌رێمى كوردستان، دووپات كرده‌وه." فره‌چه‌شنكردنى ئابوورى، بوونى روانگه‌يه‌كى روون بۆ وه‌به‌رهێنانى ئيماراتى له عێراق و هه‌رێمى كوردستان، ئابووريى به‌رده‌وام، په‌يوه‌ندييه‌كانى عێراق له‌گه‌ڵ ئيمارات و چه‌ند پرسێكى ديكه‌ى جێى بایه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه بوو.
تیمی پرۆژەی هەژماری من ئاگاداریی ئەو مووچەخۆر و فەرمانبەرانە دەکاتەوە کە بەشدارن لە هەژماری من و دەڵێت، "ئەگەر هەستتان بە هەر چالاکییەکی گوماناوی کرد لە هەژمارەکەتاندا دەستبەجێ پەیوەندیی بکەن بە سەنتەری خزمەتگواریی بانک. زیاتر لە 900 هەزار مووچەخۆر خۆیان لە پڕۆژەی "هەژماری من" تۆمار کردووە و 450 ئامێری ڕاکێشانی پارەش لە تەواوی کوردستان دانراون. ئەو کەسانەی خۆیان لە پرۆژەی هەژماری من تۆمار کردووە تائێستا دیار نییە بۆچی تیمی هەژماری من ئەو ئاگادارییە خێرایەی بۆ فەرمانبەرانی بەشدار لە پرۆژەی هەژماری من بڵاوکردووەتەوە، بەڵام لە ڕێککەوتی 23ـی 7ـی 2025 فەرمانگەی تەکنەلۆژیای زانیاریی حكومەتی هەرێمی كوردستان بڵاوی کردوویەوە کە چه‌ند ڕۆژێكه هەڵمەتێكی هێرشی ئەلیكترۆنی بۆ سەر فەرمانبەران و هاووڵاتیانی هەرێمی كوردستان لەلایەن کۆمەڵێک ڕێکخراو دەستیپێكردووە، بەجۆرێک هاككەران لەژێر ناوی فەرمیی حكومی و دەزگای متمانەپێكراو بەشێوەی هەڕەمەكی ئیمێڵ بۆ هاووڵاتیان دەنێرن. بەگوێرەی ئەو ڕاگەیێنراوەی کە ئەوکاتە فەرمانگەی تەکنەلۆژیای زانیاریی بڵاوی کردبوویەوە "لەڕێگەی ئیمەیڵەوە به‌سته‌ر و لینکی گوماناوی ڕەوانە دەكرێت، مەبەست لێی هاككردنی ئامێری كارمه‌ندان و فه‌رمانبه‌رانی حكومییە بۆ دەستگەیشتن بە داتاكانی نێو مۆبایل و ئامێرە ئەلیكترۆنییەكانی دیكە". سەرۆکوەزیران مەسرور بارزانی، پڕۆژەی "هەژماری من"ـی لە شوباتی ساڵی 2023 ڕاگەیاند، پڕۆژەکە بەشێکە لە ستراتیژیی کابینەی نۆیەم بۆ خزمەتگوزارییە بانکییەکان و کەم کردنەوەی پەیوەندی بە پارەی کاش. بەم شێوەیە بەسەر پارێزگاکانی هەرێمی کوردستان دابەش بوون: -پارێزگای هەولێر: 401 هەزار و 815 مووچەخۆر. -پارێزگای سلێمانی: 278 هەزار و 630 مووچەخۆر. -پارێزگای دهۆک: 220 هەزار و 600 مووچەخۆر.
پسپۆڕێکی سیاسی و ستراتیجی ڕایگەیاند، چوار خولەک پێش هێرشەکەی دەوحە، تورکیا سەرکردەکانی حەماسی ئاگادار کردبووەوە، شوێنی کۆبوونەوەکەیان بەجێ بهێڵن. دکتۆر محەممەد ئەلمسری، پسپۆڕی کاروباری سیاسی و ستراتیجی، لە لێدوانێکی ڕۆژنامەوانیدا ڕایگەیاند، تورکیا سەرکردەکانی حەماسی ئاگادار کردبووەوە شوێنی کۆبوونەوەکەیان لە دەوحە بەجێبهێڵن، دوای ئەوەی تێبینی فڕینی ژمارەیەک فڕۆکەی جەنگی ئیسرائیلییان بەرەو قەتەر کردبوو. بە گوتەی ئەلمسری، تەنیا چوار خولەک پێش هێرشەکەی ئیسرائیل، سەرکردەکانی حەماس باڵەخانەکەیان بەجێ هێشتبوو و لە کوشتن ڕزگاریان بووە. هەر لەم بارەیەوە، ڕۆژنامەی "وۆڵ ستریت جۆرناڵ"ـی ئەمەریکی لە ڕاپۆرتێکیدا ئاماژەی بەوە کردووە، چەند هەفتەیەک پێش هێرشەکەی دەوحە، تورکیا و میسر بە شێوەیەکی گشتی سەرکردەکانی حەماسیان ئاگادار کردبووەوە، ڕێوشوێنی خۆپارێزییان زیاتر بکەن، چونکە ئەگەری هێرشی ئیسرائیلییان لەسەرە، بەتایبەتی دوای شکستی گفتوگۆکانی ئاگربەست و ئاڵوگۆڕی بارمتەکان. بە گوێرەی ڕاپۆرتەکە، ئیسرائیل چەند مانگێک لەمەوبەر ئامادەکاری بۆ هێرشە مووشەکییەی سەر دەوحە کردبوو، بەڵام چاوەڕێی گەیشتنی گفتوگۆکان بە ئەنجامێک بوو، بۆ ڕزگارکردنی بارمتەکانی ژێر دەستی حەماس. کاتێک گەیشتووەتە ئەو بڕوایەی گفتوگۆکان بێسوودن، بڕیاری داوە هەموو سەرکردەکانی حەماس لە دەرەوەی کەرتی غەززە بکوژێت. نزیکەی کاتژمێر 03:30 خولەکی دوای نیوەڕۆ، ئیسرائیل لە ڕێگەی زیاتر لە 15 فڕۆکەی جەنگییەوە هێرشی مووشەکی کردە سەر کۆبوونەوەیەکی شاندی دانوستانکاری بزووتنەوەی حەماس لە شوێنی مانەوەیان لە دەوحە. لە کاتی هێرشەکەدا، شاندی دانوستانکار سەرقاڵی تاوتوێکردنی وەڵامدانەوەی دوایین پێشنیازی دۆناڵد ترەمپ، سەرۆکی ئەمەریکا بوون، بۆ وەستاندنی شەڕی غەززە و ئاڵوگۆڕکردنی بارمتە ئیسرائیلی و زیندانییە فەڵەستینییەکان. فڕۆکە جەنگییە ئیسرائیلییەکان، بە دەیان مووشەک زیاتر لە 10 باڵەخانەیان لە دەوحە بۆمباران کرد، کە هەموویان تایبەت بوون بە سەرکردە و ئەندامانی حەماس و خێزانەکانیان. کاتژمێرێک دوای هێرشەکە، میدیاکانی ئیسرائیل ڕایانگەیاند، هەموو سەرکردەکانی حەماس کە لە نێو کۆبوونەوەکەدا بوون، کوژراون، لە نێویاندا خەلیل حەیە، سەرۆکی حەماس لە کەرتی غەززە و سەرۆکی شاندی دانوستانکار؛ خالد مشعەل، بەرپرسی حەماس لە دەرەوە و زاهر جەبارین، بەرپرسی بزووتنەوەکە لە کەرتی ڕۆژئاوا. بەڵام نزیکەی کاتژمێر 08:00ـی ئێوارە، واتا چوار کاتژمێر دوای هێرشەکە، حەماس ڕزگاربوونی سەرکردەکانی بزووتنەوەکەی لەو هەوڵەی تیرۆرکردن ڕاگەیاند. هاوکات نەیشاردەوە، پێنج کەس لە هێرشە ئاسمانییەکاندا کوژراون، کە یەکێکیان کوڕی خەلیل حەیە بووە. هێرشەکە کاردانەوەی توندی لەسەر ئاستی ناوخۆیی و نێودەوڵەتی لێکەوتەوە. وڵاتان پشتیوانیی خۆیان بۆ قەتەر دووپات کردەوە و جەختیان کردەوە، ئیسرائیل بەم هەڵسوکەوتانەی، ناوچەکە بەرەو ئاڵۆزی زیاتر دەبات. قەتەریش بە توندی هێرشەکەی سەرکۆنە کرد و دووپاتی کردەوە، مافی وەڵامدانەوەیی هەیە. لەلایەکی دیکەوە، بنیامین ناتانیاهۆ، سەرۆک وەزیرانی ئیسرائیل، جەختی کردەوە، بەبێ ئەمەریکا و بە تاک لایەنە هێرشەکەیان کردووە و بەرپرسیارێتییەکەی هەڵدەگرن. هاوکات دووپاتی کردەوە، هەر شوێنێک سەرکردایەتیی حەماسی لێ بێت، هێرشی دەکەنە سەر و هیچ جێگەیەک سەلامەت نییە بۆیان. هەر لە هەمان ڕۆژی هێرشەکەدا، دۆناڵد ترەمپ، سەرۆکی ئەمەریکا، پەیوەندیی تەلەفۆنی لەگەڵ تەمیم بن حەمەد ئال سانی، میری قەتەر ئەنجام دا. ترەمپ دڵنیایی پێ دا کە واشنتن لە هێرشەکەدا بەشدار نەبووە و بەڵێنی دا هێرشی هاوشێوە بۆ سەر دەوحە دووبارە نابێتەوە. هاوکات پێی گوت "بە ستیڤ ویتکۆڤ، نێردەی تایبەتی خۆمم گوتبوو، ئاگادارتان بکاتەوە لە هێرشەکە، بەڵام دیارە درەنگ پێتانی ڕاگەیاندبوو."
ڕێكخراوی ستۆپ بۆ چاودێری و په‌ره‌پێدان هۆشداری دەدات و دەڵێت،" پێكنەهێنانی كابینەی نوێی حكومەتی هەرێم، لێكه‌وته‌ی زۆری له‌په‌كخستن و لاوازكردنی رۆڵی دامه‌زراوه‌كانی چاودێری و پرسی شه‌فافییه‌ت لێكەوتۆتەوە. ڕیكخراوەكە لەبەدواداچونێكی وردا دەڵێت، به‌پێی یه‌یڕه‌وی ناوخۆی په‌رله‌مانی كوردستان پێویست بوو له‌سه‌ره‌تای ئه‌مساڵ له‌په‌رله‌مانی كوردستان متمانه وه‌ربگرێت، به‌ڵام به‌هۆی پێكنه‌هاتنی لایه‌نه سه‌ره‌كیه‌كانی په‌رله‌مان، پرۆسه‌كه به‌ڕێككاره په‌یڕه‌ویه‌كانی خۆیدا تێنه‌په‌ڕێوه، له‌كاتێكدا 11 مانگ به‌سه‌ر هه‌ڵبژاردنی خولی شه‌شه‌می په‌رله‌مانی كوردستان تێپه‌ڕیوه. ئه‌م ڕاپۆرته ده‌ریخستوه كه‌خێراترین پێكهێنانی كابینه‌ی یه‌كه‌می حكومه‌تی هه‌رێم کابینەی یەکەم بوە كه له‌ماوه‌ی كه‌متر له سێ مانگ پێكهاتووه، له‌هه‌موشیان دواكه‌وتوتر پێكهێنانی كابینه‌ی ده‌یه‌مه كه تائێستا پێكنه‌هێنراوه، به‌جۆرێك دواكه‌وتنه‌كه تا ئێستا سێ به‌قه‌ده‌ر پێكهێنانی كابینه‌ی یه‌كه‌مه، ئه‌م دواكه‌وتنه لێكه‌وته‌ی زۆری له‌په‌كخستن و لاوازكردنی رۆڵی دامه‌زراوه‌كانی چاودێری و پرسی شه‌فافییه‌ت هه‌یه، كه له‌م ڕاپۆرته ڕون كراوه‌ته‌وه. بە گوێرەی ڕاپۆرتی ڕێکخراوەکە له‌هه‌موشیان دواكه‌وتو تر پێكهێنانی كابینه‌ی ده‌یه‌مه كه تا ئێستا پێكنه‌هێنراوه و ماوەی دواکەوتنەکەی زیاترە لە سێ هێندەی کابینەی یەکەم و لە چاو کابینەکانی دیکەشدا ڕیکۆردی شکاندوە. به ئامانجی ئه‌وه‌ی پێكهێنانی كابینه‌ی ده‌یه‌م زیاتر دوانه‌كه‌وێت، جارێكی رۆح به‌به‌ر دامه‌زراوه شه‌رعییه‌كان بكرێته‌وه، لە ڕاپۆرتەکەدا ڕێکخراوەکە کۆمەڵێک راسپاردەشی بۆ خێراكردنی هه‌نگاوه‌كان بۆ پێكهێنانی حكومه‌ت و جێبه‌جێكردنی بنه‌ما یاسایی و په‌یره‌ویه‌كان خستوەتەڕو.
پێگەی عالەم جەدید-ی عێراقی لە ڕاپۆرتێکیدا ئاشکرایکردووە، دوای بۆردومانکردنی دەوحەی پایتەختی قەتەر، بۆردوومانەکانی ئیسرائیل دەگەنە عێراق. ماڵپەرەکە دەلێت بە ئامانجگرتنی دۆحە لەئێوارەی سێشەممە، ئیسرائیل لاپەڕەیەکی نوێی لە پەرەسەندنی ناوچەیی کردەوە و پەیامێکی نارد کە لە سنوورەکانی فەلەستینەوە درێژدەبێتەوە بۆ ئەوەی هەموو ناوچەکە بگرێتەوە. چاودێران پێیان وایە ئەو هێرشەی قەتەر هۆشدارییەکی ڕوونە کە تەلئەبیب چیتر دان بە هیچ هێڵێکی سووردا نانێت، تەنانەت لەگەڵ وڵاتانی هاوپەیمانی واشنتۆنیش. ئەم پێشهاتە تەحەدای ئاڵۆزتر دەخاتە بەردەم عێراق، لە کاتێکدا بە ئامانجگرتنی ڕاستەوخۆ یان گۆڕینی خاکەکەی بۆ گۆڕەپانێک بۆ ململانێی بە وەکالەت لە ئارادایە. ئەوان جەخت لەوە دەکەنەوە کە ئێستا بەغدا پێویستە خۆی لە شوێنی خۆیدا بگۆڕێت بۆ پاراستنی سەروەری خۆی لە هەر دەستدرێژییەکی ئەگەری. حازم ئەیاد شرۆڤەکاری سیاسی ئوردنی بە ئەلعالەم ئەلجەدیدی ڕاگەیاندووە، “دەستدرێژی ئیسرائیل بۆ سەر قەتەر و هەوڵی تیرۆرکردنی سەرکردەکانی حەماس ڕەنگە سەرەتایەکی نوێ بێت بۆ ئەم ڕێبازە پەرەسەندووە نەیاران و دۆستان و تەنانەت ناوبژیوانان و وڵاتانێک کە بەدوای ئاشتیدا دەگەڕێن”. ئەو شرۆڤەکارە سیاسییە ئوردنییە پێیوایە "ئەم دەستدرێژییە پرسیار لەبارەی پەیوەندییەکانی عێراق لەگەڵ وڵاتانی ناوچەکەش دەوروژێنێت، بەو پێیەی واشنتۆن هەوڵدەدات بە زۆر ئیرادەی خۆی بسەپێنێت. ئەگەر نەتانیاهۆ سەرکەوتوو بێت لە ڕێگەدان بە تێپەڕاندنی ئەم دەستدرێژییە بەبێ کاردانەوەی نێودەوڵەتی، ئەوە ڕەنگە ببێتە هۆی فراوانبوونی زیاتری سەربازی ئیسرائیل". پێگە عێراقییەکە باسی لەوەشکردووە، دوای بۆردومانکردنی قەتەر دەرکەوت ئیسرائیل حساب بۆ هیچ هێڵێکی سور ناکات تەنانەت ئەگەر لەگەڵ وڵاتێکی هاوپەیمانی ئەمریکاشدا بێت، هاوکات باس لەوەشدەکات، عێراق ئێستا لەبازنەی هێرشی چاوەڕوانکراوی ئیسرائیلدایە. پێگە عێراقیەکە داوا لە بەرپرسانی باڵا دەکات لە هەنگاوی یەکەمدا بە پەیوەندییەکانیان لەگەڵ ئەمریکا بچنەوە و داوا بکەن، واشنتۆن عێراق لەو زریانەی بەڕێوەیە بپارێزێت. ئیسرائیل بڕیاریداوە هێرشبکاتە سەر هەر وڵاتێک تەنانەت ئەگەر بە لێدوانێکی توندیش دژی تەلئەبیب بوەستێتەوە، عێراقیش کە لەلایەن گروپە شیعەکانەوە پاڵپشتی حەماس دەکەن و زۆر جار لە عێراقەوە درۆن ئاڕاستەی شاری ئایلات کراوە، لە چاوەڕوانیی تۆڵەی ئیسرائیلدان. لە ڕاپۆرتەکەدا باس لەوەکراوە، هەر بە تەنها حەماس نا، بەڵکو حوسیەکانیش لە بازنەی بە ئامانجگرتندان، چونکە ئەوانیش لە عێراق بنکە و بارەگایان هەیە، هاوکات پێگەکە داوا دەکات، لەم قۆناغەدا گروپە چەکدارەکان کۆنترۆڵی خۆیان بکەن و پاساوی لێدانی عێراق نەدەنە ئیسرائیل.
میدیاکانی ئیسرائیل ڕایدەگەیەنن هێرشی دەوحە چەند هەفتەیەک لەمەوبەر پلانی بۆ دانرابوو، وەزیرى بەرگریی ئیسرائیلیش دەڵێتت دەستمان دەگاتە سەرکردەکانی حەماس لە هەموو شوێنێک، ئەوانیش ناتوانن خۆیان بشارنەوە. ئێوارەى دوینێ (سێشەممە) ئیسرائیل هێرشێکی فراوانی ئاسمانی بۆ سەر شاری دەوحەی پایتەختی قەتەر کرد، ئیسرائیلییەکان دەڵێن، هێرشەکە ئامانجەکەی کۆبوونەوەی سەرکردە باڵاکانی حەماس بووە کە لەکاتی هێرشەکەدا، شاندی حەماس تاوتوێی پێشنیازە نوێیەکەی ئەمریکایان دەکرد بۆ ئاگربەست لە کەرتی غەززە. هێرشەکەی ئیسرائیل بە ناوی "لووتکەی ئاگر" بوو. بە زیاتر لە 10 فڕۆکەی جەنگی و بەکارهێنانی مووشەکی وردبین و دوورمەودا، کرا. ئامانجەکەشیان باڵەخانەیەکی ناوچەی کەتارا بووە کە بەرپرسانی باڵای حەماسی تێدا نیشتەجێ بوون. دەزگاى پەخشی ئیسرائیل ڕۆژی چوارشەممە بە پشتبەستن بە سەرچاوەیەکی ئەمنی ڕایگەیاند کە پێدەچێت هێرشەکەی قەتەر ئەنجامە خوازراوەکەی نەتەنیاهۆ و حکومەتى ئیسرائیلى بەدەست نەهێنابێت. پێشتر ڕۆژنامەی ماریڤی ئیسرائیلی سەرلەبەیانی ئەمڕۆ چوارشەممە لە ڕاپۆرتێکدا ڕایگەیاندبوو کە ئۆپەراسیۆنی دۆحە چەند هەفتەیەکە پلانی بۆ دانراوە و ئاماژەی بەوەدا کە دەزگای ئاسایشی شاباک چاوەڕێی ئەنجامی کۆتایی هێرشەکەی قەتەر دەکات. ماریڤ لە زاری بەرپرسێکی هێزی ئاسمانی ئیسرائیلەوە ڕایگەیاندووە، "هیچ کەسێک لە بیناکەی دۆحە نەیدەتوانی ڕزگاری بێت" لای خۆیەوە، ئیسرائیل کاتز، وەزیری بەرگریی ئیسرائیل هۆشداریی دا، "دەستی ئێمە دەگاتە سەرکردەکانی حەماس لە هەموو شوێنێک، ئەوانیش ناتوانن خۆیان بشارنەوە"، سوێندیشی داوە سەرکردەکانی غەززە و حەماس لەناوببەن "ئەگەر مەرجەکانی ئێمە بۆ کۆتاییهێنان بە شەڕەکە قبوڵ نەکەن". وەزیری بەرگری ئیسرائیل زیادی کرد: هەرکەسێک بەشداری لە ٧ی ئۆکتۆبەردا کردبێت، تەواوی باجەکەی دەدات. ئەمەش لە کاتێکدایە کە کەناڵی ئیسرائیلی برۆدکاستینگ بڵاویکردەوە کە بنیامین ناتانیاهۆ سەرۆک وەزیرانی ئیسرائیل بڕیاریدا هێرشەکەی دۆحە ئەنجام بدات سەرەڕای ناڕەزایەتی سەرکردە ئەمنییەکان سەبارەت بە کاتی هێرشەکە. لەدوای هێرشەکە، ئیسرائیل رایگەیاند "گەشبینە" بە ئەنجامەکەی و سەرکەتوو بووە. بنیامین نەتەنیاهوو، سەرۆکوەزیرانی ئیسرائیل هێرشەکەی بە هەنگاوێک وەسف کرد کە ئەگەری هەیە کۆتایی بە جەنگی غەززە بهێنێت. لەلایەکی دیکەوە حەماس هێرشەکەی بە شکست زانی و جەختی کردەوە کە هیچ کام لە سەرکردە باڵاکانیان نەکوژراون. بەگوێرەی زانیاریی گرووپەکە، پێنج کەس لە هێرشەکەدا گیانیان لەدەستدا: هیمام حەیا، کوڕی خەلیل حەیا، ئەندامی مەکتەبی سیاسیی حەماس، جیهاد لەبەد ئەبو بیلالی، بەڕێوەبەری نووسینگەی خەلیل حەیا و سێ لە یاریدەدەرەکانیان. دواتر قەتەر رایگەیاند، یەکێک لە کارمەندانی ئاسایشی قەتەریش لەو هێرشەدا کوژراوە. میدیای ئیسرائیل بڵاویکردەوە، بەگوێرەی زانیارییە هەواڵگرییەکانی ئیسرائیل پێشبینیکراوە لە کۆبوونەوەکەدا چەندین بەرپرسی باڵای حەماسی تێدا ئامادەبن، لەوانەش: خەلیل حەیا، زاهیر جەبارین، محەممەد دەروێش، نزار عەوادەڵڵا و خالید مەشعەل. بێجگە لە خەلیل حەیا، تاوەکو ئێستا حەماس هیچ زانیارییەکی لەبارەی چارەنووسی سەرکردەکانی دیکەی رانگەیاندووە.
ئەمڕۆ چوارشەممە، لیژنەی دارایی پەرلەمانی عێراق میواندارییەکی گرنگی ئەنجامدا. لەم کۆبوونەوەیەدا، وەزیرانی دارایی و پلاندانان، لەگەڵ پارێزگاری بانکی ناوەندیی عێراق ئامادە بوون. ئامانج لەم کۆبوونەوەیە، خستنەڕووی دوایین زانیارییەکان بوو لەبارەی دانوستانەکانی نێوان بەغدا و هەولێر، هەروەها دۆزینەوەی هۆکارەکانی دواکەوتنی مووچەی خانەنشینان. موعین کازمی، ئەندامی لیژنەی دارایی، دووپاتیکردەوە« کە لە کۆبوونەوەکەدا بە وردی باس لە داهاتەکانی عێراق بۆ ساڵی 2025 کراوە. هەروەها، گرنگییەکی زۆر بە کێشەی دواکەوتنی مووچەی خانەنشینان دراوە، بەتایبەتی بۆ دۆزینەوەی چارەسەرێکی یەکجارەکی بۆ ئەم گرفتە، تاوەکو لە داهاتوودا دووبارە نەبێتەوە. یەکێکی دیکە لە تەوەرە سەرەکییەکانی ئەم کۆبوونەوەیە، خستنەڕووی دوایین ئەنجامەکانی دانوستانەکانی حکومەتی ناوەندی و هەرێمی کوردستان بوو. ئەمەش لەکاتێکدایە کە دوێنێ سێشەممە، ئەنجومەنی وەزیرانی عێراق بڕیاریدا پرسی داهاتی نانەوتی هەرێم ئاراستەی ئەنجومەنی دەوڵەت بکات بۆ بڕیاری کۆتایی. لە ماوەی ئەم مانگەدا، مووچەی خانەنشینانی عێراق چەند رۆژێک دواکەوت، ئەمەش ناڕەزایەتییەکی زۆری لێکەوتەوە و کاردانەوەی گەورەی بەدوادا هات. هەرچەندە وەزارەتی دارایی هۆکاری دواکەوتنەکەی بۆ "گرفتێکی هونەری" گەڕاندەوە، بەڵام ئەم پرسە بووە جێگەی بایەخێکی زۆر لەناوخۆی عێراقدا.
سەباح نوعمان، وتەبێژی فەرماندەی گشتی هێزە چەکدارەکان رایگەیاند: رزگارکردنی ئەلیزابێس تسورکۆڤ هاوڵاتی روسی-ئیسرائیلی دوای پرۆسەیەكی ئاڵۆز بووە، کە لەلایەن دەزگا تایبەتمەندەكانەوە بە هەماهەنگی لەگەڵ چەند لایەنێک ئەنجامدراوە. رۆژی سێشەممە، 9-9-2025 دۆناڵد ترەمپ، سەرۆکی ئەمریکا لە پۆستێكدا لە تۆڕی کۆمەڵایەتیی ترووس سۆشیاڵ گوتی: "خۆشحاڵم ئاماژە بەوە بکەم کە ئیلیزابێز تسووکۆڤ، قوتابی زانکۆی پرینستن، کە خۆشکەکەی هاووڵاتییەکی ئەمریکییە، کەمێک لەمەوبەر لە لایەن کەتائیبی حیزبوڵڵاوە ئازادکرا". ترەمپ رایگەیاند، ئەو هاووڵاتییە ئێستا لە باڵیۆزخانەی ئەمریکایە لە عێراق، "دوای ئەوەی بۆ ماوەی چەندین مانگ ئەشکەنجە درابوو". سەباح نوعمان، لە بەیاننامەیەکدا ئاماژەی بەوەكردووە: لە مانگی ئازاری 2023 کۆمەڵێک كۆمەڵێكی لە یاسا دەرچوو هاوڵاتی روسی ئەلیزابێس تسورکۆڤیان رفاندووە، لە تاوانێکدا کە رەنگدانەوەی واقیعی دۆخی ئەمنی شارەکانی عێراق نییە. جەختیشیکردەوە: دەزگا ئەمنییەکان دوور لە چاوی میدیاکان کاریان کردووە بۆ پاراستنی نهێنی زانیارییەکان و زامنكردنی سەلامەتی رفێنراوەکە. وتەبێژەكەی سودانی ئاماژەی بەوەشکردووە: هەوڵە ئەمنی و هەواڵگرییە ناوازەكان بووە هۆی دۆزینەوەو ئاشكراكردنی شوێنی دەستبەسەرکردنی لە ٩ی ئەیلولدا، كە دواتر رادەستی باڵیۆزخانەی ئەمریکا کراوەتەوە، گوازراوەتەوە بۆلای خوشکەکەی کە خاوەنی رەگەزنامەی ئەمریکییە. راشیگەیاندووە: دەزگاکان بەردەوامن لە بەدواداچوون بۆ هەموو ئەو کەسانەی کە تێوەگلاون لەم تاوانە، تا رادەستی دادگا بكرێن.
سەرۆکایەتیی هەرێمی کوردستان پەیامێکی لەبارەی هێرشی ئیسرائیل بۆ سەر دەوحە بڵاوکردەوە و دەڵێت، "ئاسايش و سه‌قامگيريى ناوچه‌كه ده‌خاته مه‌ترسييه‌وه". سەرۆکایەتیی هەرێمی کوردستان دەشڵێت، "به ته‌واوى پشتيوانى قه‌ته‌رين و داوا له كۆمه‌ڵگه‌ى نێوده‌وڵه‌تى ده‌كه‌ين هه‌موو هه‌وڵێک بدات بۆ رێگرى له‌و كارانه و گێڕانه‌وه‌ى ئاشتى و ئارامى بۆ ناوچه‌كه". دەقى پەیامەکە.. سه‌ركۆنه‌ى هێرشى ئه‌مڕۆى ئيسرائيل بۆ سه‌ر ده‌وحه ده‌كه‌ين كه ئاسايش و سه‌قامگيريى ناوچه‌كه ده‌خاته مه‌ترسييه‌وه. به ته‌واوى پشتيوانى قه‌ته‌رين و داوا له كۆمه‌ڵگه‌ى نێوده‌وڵه‌تى ده‌كه‌ين هه‌موو هه‌وڵێك بدات بۆ ڕێگرى له‌و كارانه و گێڕانه‌وه‌ى ئاشتى و ئارامى بۆ ناوچه‌كه.
