.jpg)
هاوڵاتی سەرەتای هەفتەی داهاتوو بەغدا مووچەی پێشمەرگە و هێزە ئەمنییەکان دەنێرێت. هۆکاری دواکەوتنی ناردنی مووچە، ناردنی کۆدی مووچەی هێزە ئەمنییەکان لە هەولێرەوە بۆ بەغدا بووە. بەگوێرەی میدیای نزیک لە پارتی، محەممەد شیاع سوودانی و مەسرور بارزانی رێککەوتوون لە بری لیستی مووچە، کۆدی مووچەی هێزە ئەمنییەکان بنێردرێت بۆ بەغدا بۆ ئەوەی مووچەکانیان ڕەوانە بکرێت و دابەشکردنی مووچەی مانگی دوو دەستپێبکات. ئەو میدیایە باسی لەوەکردووە هەردوو سەرۆکوەزیران مەسرور بارزانی و محەممەد شیاع سوودانی، لەسەر میکانیزمی ناردنی کۆد لەبری وردەکاری ناوی هێزە ئەمنییەکان و پێشمەرگە رێککەوتون تاوەکوو مووچەکانیان خەرجبکرێت، وەزارەتی دارایی عێراق چاوەرێی گەیشتنی ئەو کۆدانەیە. هاوکات بڕیاربووە ئەم هەفتەیە مووچەی هێزە ئەمنییەکان و پێشمەرگە لە بەغداوە خەرج بکرێت و لە هەرێمی کوردستانیش دەست بەدابەشکردنی مووچەی مانگی دوو بکرێت، بەڵام بەهۆی دواکەوتنی ناردنی کۆدی هێزە ئەمنییەکان و پێشمەرگە، ناردنی پارەش دواکەوت و مایەوە سەرەتای هەفتەی داهاتوو. بەگوێرەی ڕێککەوتنەکە تا ئەو کاتەی موچە بە نیشتمانیی دەکرێت، فەرمانبەرانی هەرێم موچەکانیان بە کاش وەردەگرن هاوکات هەفتەی داهاتوو کە بڕیارە شاندی حکومەتی هەرێمی کوردستان سەردانی بەغدا بکات و لەگەڵ وەزارەتی دارایی کۆببنەوە بڕیارە بابەتی هەژماری من یەکلای بکرێتەوە.
هاوڵاتی تونجەر باقرخان هاوسەرۆکی گشتیی دەم پارتی، لە ئاهەنگی نەورۆزی ئامەد بانگی لە کوردانى هەر چوار بەشی کوردستان کردو یەکێتی نەتەوەیی پێکبهێنن، دەشڵێت: "ئەوە سێ ساڵە سیاسەتی گۆشەگیری بەڕێوە دەبەن، ناتوانن ئیرادەی ملیۆنان کەس گۆشەگیر بکەن، ناتوانن داوای ئاشتی و دیموکراسی ملیۆنان کەس بخەنە گۆشەوە". ئاهەنگی نەورۆزی ئامەد بە درووشـمی “ڕاپەڕە کاتی ئازادی و سەرکەوتنە” ئەمڕۆ پێنجشەممە بەڕێوەچوو، تونجەر باقرخان هاوسەرۆکی گشتیی پارتی یەکسانی و دیموکراسی گەلان (دەم پارتی) لە ئاهەنگەکەدا قسەی کرد و نەورۆزی لە سەدان هەزار ئامادەبوو پیرۆزکرد. باقرخان لە وتارەکەیدا پەیامێکی ئاڕاستەی تورکیا کرد و وتی ،" ئەوە سێ ساڵە سیاسەتی گۆشەگیری بەڕێوە دەبەن، ناتوانن ئیرادەی ملیۆنان کەس گۆشەگیر بکەن، ناتوانن داوای ئاشتی و دیموکراسی ملیۆنان کەس بخەنە گۆشەوە." وتیشی: "باشترە گوێ لە داخوازی ئەو ملیۆنان کەسە بگرن. پێتان دەڵێین، لەبری شەڕ، چارەسەر هەڵبژێرن، ئەگەر ناونیشانی چارەسەرتان دەوێت، زۆر نزیکە، لە دوورگەی ئیمراڵیە." هاوکات هاوسەرۆکی گشتیی دەم پارتی ، لە ئاهەنگی نەورۆزی ئامەد داوای لە کوردانى هەر چوار پارچەی کوردستان کرد یەکێتی نەتەوەیی پێکبهێنن و ڕایگەیاند، "پێویستە لایەنە ئۆپۆزیسیۆنەکان نەکەونە ژێر فشاری دەسەڵات و خاوەنداری زیاتر لە پرسی کورد بکەن، پاشان بانگەوازی لە هەموو کوردێک کرد و ڕایگەیاند: ئەوان بە هەموو بستێکی کوردستان دەڵێن “تیرۆریستان” لە سلێمانی تا دهۆک و کۆبانێ، لە هەر چوارپارچەی کوردستان تۆپ دەبارێنن، واتە دوژمنی هەر چوار پارچەی کوردستانن، بانگەواز لە کوردانی چوار پارچەی کوردستان دەکەم، ئەگەر ئەمڕۆ ڕۆژی یەکێتی نەتەوەیی نەبێت، ئیتر کەیە؟" هەروەها جەختیکردەوە، ئەگەر یەکێتی خۆیان بنیات بنێین، دەتوانین ڕێگە لە ئۆپەراسیۆن و شەڕی دژی کوردان بگرین، پێویستە کورد یەکێتی خۆی بنیات بنێت و ئاستەنگەکانی بەردەمی هەڵبگرێت. ئەمڕۆ پێنجشەممە ٢١ی ئازار ئاهەنگی نەورۆز لە هەرچوار پارچەی کوردستان بە ڕێوڕەسمی چیاجیا بەڕێوەچوو لە ئامەدیشلە پاركی نەورۆزی ناوچەی رەزانی ئامەدی باكووری كوردستان مەراسیمی ملیۆنی پیرۆزبایی نەورۆز بە دروشمی 'رابن، كاتی ئازادی و سەركەوتنە' دەستیپێكرد ولە رێوڕەسمەكەدا چەندین وتار پێشكەشكران تێیدا داوای ئازادكردنی عەبدوڵا ئۆجەلان رێبەری زیندانیكراوی پەكەكە كرا. هەروەها لە بەشێكی دیكەی ئەو وتارانەدا داوا لە هاووڵاتیانی باكووری كوردستان كرا بە گەرموگوڕییەوە بەشداری هەڵبژاردنی شارەوانییەكان ببن لە 31ی ئاداردا و پەیامی ئەو زیندانیانە خوێندرایەوە كە ماوەی ١١٦ رۆژە لە پێناو ئازادیی ئۆجەلان و چارەسەری دیموكراتیكی پرسی كورد مانیان لە خواردن گرتووە. هاوکات لە مەراسیمی نەورۆزی ئامەد ژمارەیەكی بەرچاو لە هونەرمەندان لەوانە دوو هونەرمەندی رۆژهەڵاتی كوردستان غەزەڵ مستەفا و فەرەج عەلیپوریش بەشداربوون و گۆرانیان پێشكەش كرد.
هاوڵاتی ئه‌ندامێكی خانه‌ی ڕاپه‌ڕاندنی بزووتنه‌وه‌ی گۆڕان ڕایده‌گه‌یه‌نێت، گه‌ر پارتی بایكۆت بكات و به‌شداری له هه‌ڵبژاردنی په‌رله‌مانی كوردستان نه‌كات، پێناچێت ڕێگه به ئه‌نجامدانی پرۆسه‌كه له هه‌ولێر و دهۆك بدات. سه‌فین مه‌لا قه‌ره، ئه‌ندامی خانه‌ی ڕاپه‌ڕاندنی بزووتنه‌وه‌ی گۆڕان و ئه‌ندامی وه‌فدی حزبه‌كه‌ی بۆ كۆبوونه‌وه له‌گه‌ڵ پارتی دیموكراتی كوردستان، به ده‌نگی ئه‌مریكای وت: "وه‌فدی پارتی له‌گه‌ڵ ئێمه باسی ڕێگریكردنیان له هه‌ڵبژاردن نه‌كرد، به‌ڵام گه‌ر به‌شداری نه‌كه‌ن، پێموایه ناهێڵن هه‌ڵبژاردن له هه‌ولێر و دهۆك ئه‌نجام بدرێت". وتیشی، "پێموانیە پارتی بچێتە ژێر باری ئەنجامدانی هەڵبژاردنەوە، گەر هەڵبژاردنیش ئەنجام نەدرێت کاریگەری خراپی دەبێت و دام و دەزگاکانی هەرێم دەکەونە بۆشایی دەستورییەوە." ڕۆژی 18 ی مانگی 3 ی 2024، مەکتەبی سیاسی پارتی دیموکراتی کوردستان بەشداری نەکردنی لە هەڵبژاردنی پەرلەمانی کوردستان ڕاگەیاند، هۆکارەکەشی بۆ ئەوە گێڕایەوە نایانەوێت بەشداربن لە پرۆسەیەکدا کە نایاسایی، نادەستوری و لە سایەی سیستمێکی سەپێنراودا بێت، دوای ئەو ڕاگەیاندنەش ئەو حیزبە کۆبونەوەکانی لەگەڵ لایەنە جیاجیاکانی پرۆسەی سیاسی لە هەرێم دەستپێکرد و لەو چوارچێوەیەدا ڕۆژی 19 ی مانگی 3 ی 2024، وەفدێکی باڵای مەکتەبی سیاسی پارتی لەگەڵ بزووتنەوەی گۆڕان کۆبوونەوە. سەفین مەلا قەرە، کە بەشداری کۆبوونەوەی نێوان پارتی و گۆڕانی کردبوو باسی لەوەشکرد کە،"پارتی هیچ داواکارییەکیان نەبوو، ڕوونکردنەوەیان دا لەسەر هۆکاری بەشداری نەکردنیان لە هەڵبژاردن، وتیان ئێمە هەڵبژاردنی پاک و بێگەردمان دەوێت و گومانمان هەیە لەوەی هەڵبژاردنە پاک بێت." هاوکات سەبارەت بەوەی لە حاڵەتی ڕێگریکردندا لە هەڵبژاردن تا چەند ئەگەری ئەنجامدانی هەڵبژاردن لە پارێزگاکانی سلێمانی و هەڵەبجە هەیە، سەفین مەلا قەرە دەڵێت،"پێناچێت هەڵبژاردن لە سلێمانی و هەڵەبجەش بەڕێوەبچێت گەر لە هەولێر و دهۆک نەکرێت، بەڵام گەر پارتی ڕێگری بکات عێراق و دادگا هەڵوێست وەردەگرن." ڕۆژی 10 ی مانگی 6 ی ساڵی 2024 وەکو وادەی هەڵبژاردنی پەرلەمانی کوردستان دیاریکراوە و هەڵبژاردنەکە لەلایەن کۆمیسیۆنی باڵای سەربەخۆی هەڵبژاردنەکانی عێراقەوە بەڕێوەدەبرێت و بڕیاری کشانەوەی پارتی لە هەڵبژاردنەکان دوای بریارێکی دادگای فیدراڵی بوو کە له‌سه‌ر سكاڵایه‌كی فراكسیۆنی یه‌كێتی نیشتمانی كوردستان له خولی پێنجه‌می په‌رله‌مانی كوردستان، شێوازی هه‌ڵبژاردنی له یه‌ك بازنه‌ییه‌وه بۆ چوار بازنه‌یی گۆڕی و 11 كورسی پێكهاته‌كانی لابردو ژماره‌ی كورسییه‌كانی په‌رله‌مانی له 111 كورسییه‌وه بۆ 100 كورسی كه‌مكرده‌وه.
هاوڵاتی هێزەکانى پاراستنى گەل- هەپەگە لە راگەیەندراوێکدا بڵاوى کردەوە، گەریلاکانی ئازادی لە زاپ، لە ١٩ی ئازاردا ئۆپەراسیۆنی شۆڕشگێڕی شەهید جوان – شەهید ئەندۆکیان ئەنجامدا. ئەمڕۆ پێنجشەممە ٢١ی ئازاری ٢٠٢٤ هێزەکانى پاراستنى گەل- هەپەگە لە راگەیەندراوێکدا بڵاوى کردەوە، گەریلاکانی ئازادی لە زاپ، لە ١٩ی ئازاردا ئۆپەراسیۆنی شۆڕشگێڕی شەهید جوان – شەهید ئەندۆکیان ئەنجامدا، لەو چالاکییەدا ٤١ سەربازی سوپای تورکیا کوژران. دەقی راگەیەندراوی هێزەکانی پاراستنی گەل - هەپەگە لەبارەی ئۆپەراسیۆنەکەوە: ڕێپێوانی سەرکەوتنی هەڵمەتی گەریلاکانی ئازادیی کوردستان بێپسانەوە بەردەوامە، گەریلاکانمان پێشوازیان لە جەژنی ژیانەوە و بەرخودانی نەورۆز بە ڕۆحی کاوەی هاوچەرخ هەڤاڵ مەزڵوم دۆغان کرد، گەریلاکانی ئازادی کوردستان کە بە سەرکەوتنی گەورەی ئاسمانی نەورۆزی ٢٠٢٤یان کردە دیاری بۆ گەلی کورد، لە سەر زەویشەوە لە ١٩ـی ئاداری ٢٠٢٤دا بە ئۆپەراسیۆنی شۆڕشگێڕیی گورزی قورسیان لە سوپای تورک وەشاند و بەم جۆرە جەژنی نەورۆزی گەلە وڵاتپاڕێزەکەمانیان پیرۆز کرد. لە گۆڕەپانی بەرخودانی شاخی ئامێدی لە هەرێمی شەهید دەلیلی ڕۆژئاوای زاپ، لە دژی سێ بارەگای سوپای تورک ، ڕۆژی ١٩ـی ئادار کاتژمێر ٠٩:٢٥ ئۆپەراسیۆنی شۆڕشگێڕی شەهید جوان- شەهید ئاندۆک بەڕێوەچوو، ئۆپەراسیۆنی شۆڕشگێڕی بە تاکتیک و تەکنیکێکی تایبەت بە دەستپێشخەری هێزەکانمان دەستیپێکرد و سەرەتا لە داگیرکەران لە گۆڕەپانی شەهید جەمرە درا، لەو گورزە قورسەدا ٢ کۆنتینەر، خێمەیەک، سەنگەرێک لەناوبران، ١٥ داگیرکەر سزادران، ٩ داگیرکەریش برینداربوون، دوای ئەو لێدانە گورزی کاریگەر لە داگیرکەران لە گۆڕەپانی شەهید جەمرە وەشێندرا، لە گورزی باسکی یەکەمی ئۆپەراسیۆنی شۆڕشگێڕیدا ٢ داگیرکەر سزادران، داگیرکەرێک برینداربوو، ٢ سەنگەر و چەکێکى نارنجۆک هاوێژی زنجیردار لەناوبران. لە گۆڕەپانی شەهید جەسور لە چوار قۆڵەوە گورزی کاریگەر لە داگیرکەران وەشێندرا، لەوێ بەگشتی ٢٤ داگیرکەر سزادران، داگیرکەرێکیش برینداربوو، هەروەها هێزەکانی ئۆپەراسیۆنی شۆڕشگێڕی چوونە سەر تەرمی ٧ داگیرکەر و دەستیان بەسەر بۆمبهاوێژێکی بی ٧، چەکێکی نیوئۆتۆماتیک، زنجیر و ١٥٠ فیشەکی، دوربینێکی ڕۆژ، ئامێرێکی دەستنیشانکردن، سیستمێکی دەنگ، دەستکێشێک، ٢ باتری تەرمال، ئاداپتۆرێک و دوو کامێرا، هێزە پرۆفیشناڵەکانی گەریلا دەستیان بەسەر چەکێکی بۆمبهاوێژی بی ٧دا گرت و ئەو چەکەیان لە دژی داگیرکەران بەکارهێنا، بە ڕۆکێتی بی ٧ گورز لە زرێپۆشێکی داگیرکەران وەشێندرا. بە چەکی سوک و نیو ئۆتۆماتیک گورز لە داگیرکەران لە گۆڕەپانی شەهید پیردۆغان وەشێندرا، لە ئەنجامدا کامێرایەکی چاودێری و سێ پڕۆژێکتۆر لەناوبران. هێزەکانی ئۆپەراسیۆنی شۆڕشگێڕی گورزی بەهێزیان لەو داگیرکەرانە وەشاند کە دەیانویست بە ئۆتۆمبێلی زرێپۆش دەستوەردان لە گۆڕەپانی چالاکیەکەدا بکەن، ئۆتۆمبێلە زرێپۆشەکان دوای ئەو گورزەی بەریان کەوت ناچاربوون بکشێنەوە. لە ئۆپەراسیۆنی شۆڕشگێڕی شەهید جوان- شەهید ئاندۆکدا بە گشتی ٤١ داگیرکەر سزادران، ١١ داگیرکەریش برینداربوون، چوونە سەر تەرمی ٧ داگیرکەر و دەستیان بەسەر بۆمبهاوێژێکی بی ٧، چەکێکی نیو ئۆتۆماتیک، زنجیر و ١٥٠ فیشەکی، دوربینێکی ڕۆژ، ئامێرێکی دەستنیشانکردن، سیستمێکی دەنگ، دەستکێشێک، ٢ باتری تەرمال، ئاداپتۆرێک و ٢ کامێرادا گرت، نارنجۆکهاوێژێکی زنجیردار، چەکێکی کەسی ئێم پی تی- ٥٥، ٧ کامێرا، ١٢ کامێرای مۆبیس، ٨ مرۆژێکتۆر، ٧ سەنگەر، ٣ کۆنتینەر، ٢ خێمە و ڕادارێک لەناوبران. هەڤاڵانمان ئەکین و جانشێر، کە لەو ئۆپەراسیۆنە شۆڕشگێڕیەدا بە گیانی نەورۆز چوونە سەر دوژمن و بە قارەمانێتیەوە شەڕیان کرد، شەهیدبوون، زانیاری فراوان لە سەر ناسنامەی هاوڕێ شەهیدەکانمان دواتر بۆ گەلە وڵاتپارێزەکەمان و ڕای گشتی بڵاودەکرێتەوە.
هاوڵاتی بڕیارە ئەمڕؤ سەرۆک وەزیرانی عێراق سەردانی شاری هەولێر بکات و لەگەڵ سەرۆک وەزیرانی هەرێمی کوردستان لەبارەی پرسی مووچەوە کۆبوونەوە ئەنجام بدات. بەپێی ئەو زانیارییانەی کە لە میدیاکان بڵاوکراونەتەوە، ئەمڕۆ پێنجشەممە 21ی ئازاری 2024 محەمەد شیاع سودانی، سەرۆک وەزیرانی عێراق سەردانی هەولێر دەکات، دوای بەشداریکردنی لە ئاهەنگی نەورۆز لە چیای کۆڕەک لەسەر پرسی مووچە لەگەڵ مەسرور بارزانی، سەرۆک وەزیرانی هەرێم کۆدەبێتەوە. هەروەها لە سەردانەکەیدا بڕیارە سەرۆک وەزیرانی عێراق لەگەڵ نێچیرڤان بارزانی، سەرۆکی هەرێمی کوردستان و بەشێک لە بەرپرسانی دیکەی هەرێم کۆبێتەوە.
هاوڵاتی شارەزایەکی کەشناسی رایدەگەیەنێت لە سبەینێ هەینی-وە شەپۆلێکی دیکەی بارانبارین ناوچە جیاوازەکانی هەرێمی کوردستان دەگرێتەوە. شاڵاو هیدایەت، شارەزای کەشوهەوا بە هاوڵاتی راگەیاند "لە رۆژی هەینی بەدواوە تاوەکو دوای ناوەڕاستی هەفتەی داهاتوو بەهۆی کاریگەری چالاکبوونی تۆپەڵە هەوایەکی شێداری مەداری و نزمە پاڵە پەستۆی دەریای ناوەڕاست و دەریای سوور بە هاوکاری بەرەی هەوای ساردی باکوور دووبارە دوو حاڵەتی باران بارین تەواوی ناوچەکان دەگرێتەوە هەردووحاڵەتەکەش باشن و بەتەواوکاری هەردووکی لە هەموو گەرمیان و هەرێم بارانێکی زۆر دەبارێت و هەورە بروسکە و تەرزەشی لەگەڵ دەبێت لەگەڵ روودانەوەی لافاو لەناوچە جیا جیاکاندا و بارینی بەفری باش لە ناوچە شاخاوییە بەرز و سنوورییەکان". ئەو کەشناسە ئاشکراشیکرد "مانگی چوار و پێنجی داهاتووش باش دەبن بە تایبەت تایبەت مانگی چوار لافاوی زۆری تێدایە و پڕ باران دەبێت لەمانگی سێ باشتر دەبێت". ئەوەشی وت "لەئەنجامی کۆتاییدا ئەگەری ئەوە هەیە لەبەشێک ناوچەکان دوو بەرامبە رو سێ بەرامبەر لەچاو رێژەی ئاسایی ساڵانە زیاتر بێت بڕی بارانی ساڵانە تەنانەت لە هەندێک شوێن ئەگەر هەیە لەوەرزی پڕ بارانەکەی 2018 - 2019 زیاتر ببارێت".
هاوڵاتی ئەندامێکی پێشووی لیژنەی دارایی لە ئەنجومەنی نوێنەرانی عێراق رایدەگەیەنێت حکومەتی هەرێمی کوردستان بەرپرسە لە دابینکردنی مووچەی فەرمانبەران، ئاماژەی بەوەشکردووە ئەو پارەی عێراق ناردووەیەتی دابەشنەکرێت بەغدا دەتوانێت بلۆکی بکات. شیروان میرزا، ئەندامی پێشووی لیژنەی دارایی لە ئەنجومەنی نوێنەرانی عێراق بە دەنگی ئەمەریکای راگەیاندووە "حکومەتی هەرێمی کوردستان بەرپرسە لە دابینکردنی مووچەی فەرمانبەران، لەئێستاشدا لە دوای دەرچوونی بڕیاری دادگای فیدراڵی بەشێکی بەرپرسیارێتی خستووەتە سەر شانی حکومەتی عێراق بە (تەمویل-پارەدارکردنی) هەرێمی کوردستان، بەڵام بەداخەوە هەردوو حکومەتی هەرێم و عێراق هیچ هەنگاوێکیان بۆ جێبەجێکردنی بڕیارەکانی دادگای فیدراڵی نەناوە". ئاماژەی بەوەشکردووە "ئەو پارەیەی بەغدا ناردوویەتی دەکرا لەگەڵ داهاتی ناوخۆ کە بەڕێککەوتنی هەرێم لەگەڵ بەغدا خۆی وتویەتی ٣٣٠ ملیارە، هی مانگی دووش حساب بکەین کە لەنیوەی مانگی سێ رۆیشت، لەگەڵ پارەی هاوپەیمانان هەمووی بیست ملیارێکی جیاوازی هەیە دەکرا حکومەتی هەرێم پڕی بکردایەتەوە و مووچەی دابەش بکردایە بەم رەمەزانە". وتوشیەتی "ئەو پارەیەی عێراق ناردوویەتی بە لیست و ناوی وەزارەتەکان هاتووە، دەستبەسەرداگرتن و دابەشنەکردنی جۆرێکە لە یاسا شکێنی و تێکدانی پەیوەندییەکان، لەڕاستیدا ئەگەر هەر بۆ مووچە دابەش نەکرێت، ئەوا لە دەسەڵاتی حکومەتی عێراقی خۆیەتی، لەوانەیە بلۆکی بکات، یا سەحبی بکاتەوە، یاخود بڕیار بدات کە هیچ کەس بۆی نییە دەستکاری بکات".
هاوڵاتی وەزارەتی گواستنەوە و گەیاندنی حکومەتی هەرێمی کوردستان رێژەی بارانبارینی 48 کاتژمێری رابردووی بڵاوکردەوە. لە راگەیەندراوەکەدا وەزارەتی گواستنەوە و گەیاندنی حکومەتی هەرێمی کوردستان بڵاویکردەوە، زۆرترین بڕى باران بارین لە ماوەى 48 کاتژمێرى رابردوو لەگەڵ دەستپێکى ئەم شەپۆڵە باران بارینە لە هەندێ وێستگەى کەشناسی بەو شێوەیە بوو: - دهۆک 200 ملم. - زاخۆ 96 ملم. - کانى ماسی 202 ملم. - سەرسەنگ 200 ملم. - زاویتە 277 ملم. - بارزان 154 ملم. - مێرگەسوور 175 ملم. - پێنجوێن 121 ملم. - تەوێڵە 118 ملم. - بەرزنجە 117 ملم. ئاماژە بەوەشکراوە، لە وەرزى باران بارینى ساڵى 2021- 2022 سەنتەرى دهۆک بە درێژاى وەرزەکە تەنها 249 ملم باران باریوە.
هاوڵاتی بەبۆنەی جەژنی نەورۆزەوە لاهور شێخ جەنگی پەیامێکی پیرۆبایی بەبۆنەی جەژنی نەورۆزەوە پەیامێکی پیرۆزبایی بڵاوکردەوە و ئاماژەی بەوەکرد پێویستمان بە سەرەتاییەکی نوێی و جیاوازە بۆ حوکمڕانی. لاهور شێخ جەنگی لە پەیامێکی ڤیدیۆیدا پیرۆزبایی جەژنی نەورۆزی لە گەلی کورد کرد و رایگەیاند "وەک چۆن نەورۆز سەرەتایەکی نوێیە، ئێستاش پێویستمان بە سەرەتاییەکی نوێ و جیاوازە بۆ حوکمڕانی". ئاماژەی بەوەشکرد "دوای زیاتر لە ٣٣ ساڵ دەرفەت ئەزموونی سیاسی و حوکمڕانی هەرێمی کوردستان لەناو شکستێکی قوڵدا دەژی، شکستێک کە بەرهەمی عەقڵییەتی خۆسەپێن و گوێنەدان بووە بە خواست و ئیرادەی خەڵک". وتیشی "بەداخەوە دەسەڵاتدارانی هەرێمی کوردستان لەبری دانپێدانان بە شکست پاساو ریزدەکەن، بە رای ئێمە ئەم ئینکارییە بەشێکی گەورەیە لە بەردەوامی دان بەم دۆخە نەخوازراوەی کە ئێستا هەیە". روونیکردەوە "دەبێت ئەم دۆخەی ئێستا بگۆڕێت لەبری دامەزراوەی حزب دامەزراوە نیشتمانییەکان باڵادەستبن، هۆکاری سەرەکیش بۆ کەمبوونەوەی متمانە بە دامەزراوە نیشتیمانییەکان ئەنجامنەدانی هەڵبژاردنە لەکاتی خۆیدا کە دوای چەندجارێک لە دواخستنی تاوەکو ئێستاش دڵنیایی نییە بۆ ئەنجامدانی هەڵبژاردنی پەرلەمانی کوردستان". لاهور جەنگی ئاماژەی بەوەشدا "ئێمە لە بەرەی گەل کە سەکۆیەکی سیاسی نوێیە و بەشداری لە هەڵبژاردنی پەرلەمانی کوردستان دەکەین، بە باوەڕێکی بەهێزەوە سەرەتایەکی نوێ دەستپێدەکەین، کە بۆ پاراستنی شکۆ و ژیان و بژێوی خەڵکی کوردستانە." لە کۆتایی پەیامەکەشدا لاهور شێخ جەنگی وتی "ئەم دۆخەی کە ئێستا هەیە هەرگیز بەردەوام نابێت و گۆڕانکاریی گەورەیی و ریشەیی بەڕێگەوەیە و یادی نەورۆزی داهاتوو لە دۆخێکی جیاواز لەم دۆخە دەکەینەوە".
هاوڵاتی سەرۆکی هەرێمی کوردستان بە بۆنەی جەژنی نەورۆزەوە پەیامێکی بڵاوکردەوە و داوا لە لایەنەکان دەکات به گيانى به‌رپرسياريه‌تيى نيشتمانى و به لێكگه‌يشتن، ناكۆكييه‌كان چاره‌سه‌ر بكه‌ن تا بتوانين پێكه‌وه ڕووبه‌ڕووى هه‌ڕه‌شه و ئاڵنگارييه‌كان ببينه‌وه و فيدراڵى و قه‌واره‌ى سياسى و ماف و ده‌سكه‌وته ده‌ستوورييه‌كانمان بپارێزين. نێچیرڤان بارزانی، سەرۆکی هەرێمی کوردستان رایگەیاند "نه‌ورۆز، جه‌ژنى نه‌ته‌وه‌يى و سه‌رى ساڵى تازه‌ى كوردى، به گه‌رمى له خێزان و كه‌سوكارى سه‌ربه‌رزى شه‌هيدان، له هه‌ر كوردێك و هه‌موو پێكهاته‌كانى گه‌لى كوردستان له هه‌ركوێ بن، پيرۆز ده‌كه‌م. هيواى ساڵێكى تازه‌ى پڕ له خۆشى و ته‌ندروستيى باش، ئارامى و ئاسووده‌يى و سه‌ركه‌وتن بۆ هه‌مووان ده‌خوازم، ئه‌مڕۆ كه به دۆخێكى هه‌ستياردا تێده‌په‌ڕين، داوا له لايه‌نه سياسييه‌كانى كوردستان ده‌كه‌م، به گيانى به‌رپرسياريه‌تيى نيشتمانى و به لێكگه‌يشتن، ناكۆكييه‌كان چاره‌سه‌ر بكه‌ن تا بتوانين پێكه‌وه ڕووبه‌ڕووى هه‌ڕه‌شه و ئاڵنگارييه‌كان ببينه‌وه و فيدراڵى و قه‌واره‌ى سياسى و ماف و ده‌سكه‌وته ده‌ستوورييه‌كانمان بپارێزين. هه‌مووان له هه‌مان كه‌شتيداین و ئه‌گه‌ر هاوهه‌ڵوێست و يه‌كڕيز باین، دۆخه‌كه به ئه‌مڕۆ نه‌ده‌گه‌يشت". ئاماژەی بەوەکرد "گه‌لى كوردستان هه‌رگيز واز له ئازادى و مافه‌كانى ناهێنێت. مێژوو سه‌لماندوويه‌تى تا نكۆڵى له كورد و كوردستان بكرێت و مافه‌كانى پێشێل بكرێت، عێراق خۆشى و سه‌قامگيرى به‌خۆيه‌وه نابينێت. با هه‌موومان له عێراق له هه‌ڵه‌كانمانه‌وه فێر ببين. جێبه‌جێنه‌كردنى ده‌ستوور و فيدراڵى و ڕێككه‌وتنه سياسييه‌كان، ده‌ستيده‌ستيكردن به شايسته‌كان و هه‌وڵى بچووككردنه‌وه‌ى هه‌رێمى كوردستان و پێشێلكردنى مافه ده‌ستوورييه‌كانى، جگه له زيان هيچ سوودێكى بۆ عێراق نابێت". ئەوەشی وتوە "له‌م جه‌ژنه پيرۆزه‌دا جه‌خت له بڕوا و سياسه‌تى نه‌گۆڕمان ده‌كه‌ينه‌وه كه هه‌رێمى كوردستان وه‌ك هه‌ميشه له ناوچه‌كه فاكته‌رى ئارامى و سه‌قامگيرى ده‌بێت. خوازيارى په‌يوه‌نديى باش و دۆستانه و دراوسێيه‌تيى باشه له‌سه‌ر بنه‌ماى ڕێز و به‌رژه‌وه‌نديى هاوبه‌ش. هه‌ر له‌م بۆنه‌يه‌دا پيرۆزبايى له‌و گه‌لانه‌ش ده‌كه‌ين كه جه‌ژنى نه‌ورۆز ده‌گێڕن و ئه‌م ياده ده‌كه‌نه‌وه". لە کۆتایی پەیامەکەدا دەڵێت "سوپاسى تێگه‌يشتن و گيانى به‌رپرسياريه‌تى و خۆڕاگريى فه‌رمانبه‌ران و خه‌ڵكى كوردستان ده‌كه‌م. له نزيكه‌وه ئاگادارى بارى ژيان و گوزه‌رانيانين. چاره‌سه‌ركردنى ئه‌م دۆخه، كارى له‌پێشينه‌ى هه‌موومان له هه‌موو دامه‌زراوه‌كانى هه‌رێمى كوردستانه. دڵنيايان ده‌كه‌مه‌وه كه ئه‌م سه‌ختيانه‌ش تێده‌په‌ڕن و ده‌بنه ڕابردوو. به ئومێده‌وه به‌ره‌و ژيان و داهاتوويه‌كى باشتر هه‌نگاو ده‌نێين و كوردستان بۆ هه‌ميشه وڵاتى پێكه‌وه‌ژيان و لێبورده‌يى و فره‌يى ده‌مێنێته‌وه".
هاوڵاتی وەزارەتی دارایی عێراق 37 ملیار دیناری موچەی کەسوکاری شەهیدان و ئەنفالکراوانی خستە سەر هەژماری حکومەتی هەرێم لەلقی هەولێری بانکی ناوەندی. ئەمڕۆ دووشەممە 20ی ئاداری 2024 وەزارەتی دارایی عێراق نووسراوێکی ئاراستەی یەکەی سیستمی خەرجکردنی وەزارەتەکەی کردووە، تێیدا هاتووە، "بڕی 37 ملیار و 123 ملیۆن و 814 هەزار و 706 دینار بخرێتە سەر هەژماری حکومەتی هەرێمی کوردستان. ئەو پارەی کە بەغدا ناردوێتی تایبەتە بە موچەى کەسوکارى شەهیدان و ئەنفالکراوانەو ئەو بڕە پارەیە بۆ دابەشکردنی مووچەی مانگی دوویانە. ئەو بڕەی وه‌زاره‌تی دارایی عێراق ناردوێتی ئەمڕۆ 37 ملیار دینارە بەوەش کۆی گشتی ئەو پارەیەی بەغدا بۆ هەرێمی ناردوە تائێستا بۆ دابەشکردنی مووچەی فەرمانبەران نزیکەی 608 ملیاری دینارە. بەڵام تا ئێستا حکومەتی هەرێمی کوردستان بە فەرمی وادەی دابەشکردنی موچەی مانگی دووی فەرمانبەرانی ڕانەگەیاندووە.
هاوڵاتی ئه‌مساڵ هاوكات له‌گه‌ڵ مانگی پیرۆزی ره‌مه‌زان هاوڵاتیانی كورد له هه‌ر چوار پارچه‌ی كوردستان نه‌ورۆزی "به‌رخۆدان" به‌ڕێده‌كه‌ن، کۆنسەی بەڕێوەبەریی کۆنگرەی نەتەوەیی کوردستان (كه‌نه‌كه) ده‌ڵێت، ئەم نەورۆزە نەورۆزی بەرخودانەو تورکیا هێرشەکانی بۆ سەر رۆژئاوا و باشوری کوردستان زیادکردوە و، پلان و ئامانجی لە ناوبردنی هەمو دەستکەوتەکانی کوردە. کۆنسەی بەڕێوەبەریی کۆنگرەی نەتەوەیی کوردستان له راگه‌یه‌ندراوێكدا پیرۆزبای نەورۆز لە گەلی کورد دەکات و باسی لەوەکردووە کە،" ئەمڕۆ گەلی کورد بە رەنج و بەرخۆدانی خۆی ساڵەهایە بە قوربانیدانی مەزنەوە نەورۆزی کردووەتە جەژن و خۆشی و شادی گەورەی جەماوەری و بەرخۆدان. بەو تێکۆشان و قوربانیدانەش لە ئاستی نێودەوڵەتیدا نەورۆزی کردووەتە جەژنێکی کوردانە و لە شار و گوند و زیندان و لە هەر جێگایەکی ژیان کوردان نەورۆزیان کردووەتە سەنگەری تێکۆشان بۆ ئازادیی و رزگاری." وەک لە ڕاگەیەندراوەکەدا هاتووە، ئەمساڵ لە سەرانسەری کوردستاندا ئاگری نەورۆز "بەگوڕوتین ترە"، لە باشور و رۆژئاوای کوردستان بە فەرمی جەژنی نەورۆز پیرۆز دەکرێت و لە رۆژهەڵات و باکوری وڵاتیش سەرەڕای هەمو ئاستەنگیەکان جەژنی نەوروز پیرۆز دەکرێت و ئاگری ئەو جەژنە بە گوڕتر هەڵدەکرێت. باس لەوەشکراوە، ساڵی رابردوو لە هەموو روویەکەوە بووبووە ساڵی تێکۆشان و لەمیانی ئەو ساڵەدا دوژمنەکانمان لە زۆر شوێنی کوردستان چالاکانە و بە هێزگەلی زەبەلاحەوە هێرشیان کرد. بەتایبەتی دەوڵەتی تورک، کە دوژمنی سەرەکیی گەلی کورد و دەستکەوتووەکانیەتی، هێرشەکانیان بۆ سەر رۆژئاواو باشوری کوردستان زیادکرد. ئەوەش خراوەتەڕوو، پلان و ئامانج دەوڵەتى تورک لە ناوبردنی هەموو دەستکەوتەکانی کوردە. لە بەرامبەر ئەو هێرشانەیان تەڤگەری ئازادیخوازییەوە لە سەرانسەری کوردستان بەرخۆدانێکی مەزنیان ئەنجام دا. بەتایبەتی ئۆپەراسیۆنەکانی هێزەکانی هەپەگە لە خواکورک، مەتینا، زاپ و ئاڤاشین قارەمانانە لە دژی داگیرکەری بەرگریان لە خاکی کوردستان کرد. ئاماژە بەوەشکراوە، سەران و دەوڵەتى تورک ماوەیەکە بە شێوەیەکی دەوری سەردانی عێراق و باشوری کوردستان دەکەن و هەروەها ئەوان داوەتی ئەنقەرە دەکەن و ئامانجی دەوڵەتی تورک لەم چاوپێکەوتنانەدا ئەوەیە، کە حکومەتی عێراق و دەسەڵاتداری هەرێمی کوردستانیش بکەنە شەریکی هێرشەکانیان بۆ سەر تەڤگەری ئازادیی کوردستان. کەنەکە ڕاشى گەیاندووە، ئێران بە هەموو شێوەیەک گەلی کورد و چالاکوانانیی بە ئامانج دەگرێ و دەیەوێ هێزە ئازادیخوازەکانی گەلی کورد لەناو ببات. هەر چەندە لە باشوری کوردستان پێگە و قەوارەیەکی فەرمی هەیە، لەهەمان کاتدا کێشە و پرسگرێکان بەردەوامن و دۆخی ناوچەکانی دەرەوەی دەسەڵاتداری هەرێمی کوردستان لە خراپیدایە. ئەوەش هاتووە، دوژمنانمان لەپێناو لاوازکردن و لەناوبردنی قەوارەیەی هەرێمی کوردستان لە پلانگێریدان. ساڵێک زیاتر بەسەر وادەی هەڵبژاردنەکانی پەڕلەمانی هەرێمی کوردستان تێپەڕیوە و بۆشاییەکی دەسەڵاتداری شەرعی لە ئارادایە. بابەتی هەڵبژاردن بووەتە کریزێکی قووڵ، ئەمەش شەرعیەتی حکومەت دەخاتە ژێر پرسیارەوە و ترس لەسەر دامو دەزگاکانی کوردستان و فیدرالیەتی عێراق درووست دەکات. لە درێژەى ڕاگەیەندراوەکەدا هاتووە، لە رۆژئاواى کوردستان داگیرکاری و هێرشەکانی دەوڵەتی تورکیا بەردەوامن و فشارەکانیان لە زیادبووندان. رژێمی سوریاش لە قۆزتنەوەی هەر دەرفەتێکە بۆ لەناوبردنی دەستکەوتەکانی گەلەکەمان لە رۆژئاوا. کەنەکە وتوشیانە، دۆخێکی تایبەت و ناهەموار لە ناو زیندانەکاندا هەیە. لە زیندانەکانی دەوڵەتی تورکیا و ئێراندا بە دەیان هەزار زیندانی کورد و کوردستانی هەن و لەژێر فشاری مەزنی ئەشکەنجەداندان.لە بەڕێز عەبدوڵا ئۆجالان و سێ لە هەڤاڵانی لە زیندانی ئیمڕاڵی، ئەوە بۆ ماوەی سێ ساڵ دەچێت هیچ ئاگاداریەک نییە و سۆراغیان نادیارە. هەموو زیندانیە سیاسییەکان چاویان لە ئێمە و لە خەباتی ئێمەیە، بۆیە دەبێ ئێمە لە ویست و خواستەکانی ئەوان ببینە جێگای ئومێد و بە سەرخستنی شۆڕش ئەوان ئازاد بکەین. لە بەشێکى دیکەى ڕاگەیەندراوەکەدا دەشڵێن، ئەم بارودۆخە ئەرکێکی زۆر دەخاتە سەر شانی ئێمە. پێویستە لەبەرامبەر هەموو داگیرکاراندا تەگبیری خۆمان بکەین. پێویستە هێزی پاراستن و بەرخۆدان بەهێزتر بکەین. پێویستە هێرشی دوژمنان تێکبشکێندرێن. پێویستە دەستکەوتەکان بپارێزرێن و دەستکەوتی نوێ بەدەست بێنین. بۆ هەموو ئەم ئەرکانەش پێویستە سەرەتا یەکڕیزی ناوماڵی کوردان بێتە دی و یەکێتی نەتەوەیی بەهێز بکرێت. پێویستە ئەمساڵ بکەینە ساڵی ئازادی. هەروەها، باس لەوەکراوە، ئێمە لە دۆخێکی ئاوادا پێشوازی لە نەورۆزی ئەمساڵ دەکەین. نەورۆز بە واتای خۆی و بە رۆحی بەرخۆدان پیرۆز دەکەین. داوا لە گەلی خۆمان دەکەین و دەڵێین: وەک هەر ساڵێک بچنە مەیدان و کۆڵانان و بە واتاو رۆحی بەرخۆدان نەورۆز پیرۆز بکەن. لە کۆتایدا هاتووە، لەم قۆناغە گرنگەدا لە پڕۆسەی تێکۆشان بۆ ئازادی و رزگاری کوردستان، ئاگری نەورۆز ببێتە رووناکیەکی گەش و تەبایی و یەکێتی نەتەوەیی کوردستان و ئێمە بەم بیروباوەڕ و رۆحەوە، نەورۆز بە دڵگەرمی نەتەوەیی و نیشتمانی لە هەموو کوردستانیان پیرۆز دەکات
هاوڵاتی دوایین ئامار لەبارەی زیانەکانی لافاوەکەی دهۆک لەلایەن ژوورى ئۆپەراسیۆن و بەڕێوەبردنى قەیران و کارەساتی هەرێمی کوردستانەوە بڵاوکرایەوە، تێیدا ئاماژە بەوە کراوە، سێ کەس گیانیان لەدەستدا و 11 کەسیش بریندار بوون. بێوار عه‌بدولعه‌زیز، وته‌بێژی به‌رگریی شارستانی پارێزگای دهۆك ڕایگەیاند: بەهۆی ئەو لافاوەی پارێزگای دهۆکى گرتەوە، پاش ئەوەی دوو کەس گیانیان لەدەست دا، هاوڵاتییه‌كی دیكه‌ی ته‌مه‌ن 15 ساڵ له گه‌ڕه‌كی ره‌زا، دواى ئەوەى کەتوەتەوە ئاوەوە، بەهۆی تەزوی کارەباوە، گیانی لەدەست داوە و ئەوەش بوە سێیەمین قوربانیی لافاوەکە. وتیشى: هەر بەهۆى لافاوەکەى دوێنێوە 11 کەس بریندار بون و 120 ی دیکەیش لە مەترسی رزگار کراون، لە ئێستاشدا 627 کەس لە هۆتێل و مۆتێلەکانى شارەکە دەمێننەوە بەهۆى ئەوەى زیان بەر ماڵەکانیان گەیشتوە. هه‌ربەهۆی لافاوەکەوە 50 ئۆتۆمبێل لە دهۆک زیانیان پێگەیشتووەو كه‌شناسیی ئه‌و شاره‌ش دەڵێت: لە کاتژمێر 9ی بەیانی دوێنێ سێشەممەوە تا 9ی شەو، 133 ملیمەتر باران له شاره‌كه‌دا باریوە. هاوکات کەشناسیی هەرێمی کوردستان لە راگەیێندراوێکدا دەڵێت، "لە ئەنجامی بەردەوامبوونى کاریگەریی هەردوو نزمە پاڵەپەستۆى دەریاى سوور و ناوەڕاست لەسەر هەرێمى کوردستان، پێشبینى دەکرێت ئەمشەو بارین بەشێوەى نمەباران و مامناوەند بێت؛ کە هەندێک جار هەورەتریشقەشی لەگەڵە، هەروەها بەفریش لە ناوچە شاخاوییە سنوورییەکان دەبارێت." پێشبینى دەکرێت بارانبارین لە 9:00ی شەو تاوەکو 9:00ى بەیانى بەمشێوەیە بێت: هەولێر: 9 - 15 ملیمەتر سلێمانی: 8 - 12 ملیمەتر دهۆک: 10 - 16 ملیمەتر هەڵەبجە: 10 - 15 ملیمەتر راپەرین: 12 - 16 ملیمەتر گەرمیان: 7 - 12 ملیمەتر زاخۆ: 10 - 15 ملیمەتر سۆران: 8 - 12 ملیمەتر
هاوڵاتی ئەمڕۆ سێشەممە سەرۆک کۆماری عێراق لەبارەی بڕیارەکەی دادگای فیدراڵی سەبارەت بە مووچەی فەرمانبەرانی هەرێم هەڵوێستی خۆی راگەیاند و ئاماژەی بەوەکرد دەستووری عێراق بەڕوونی هەرێمی کوردستان و ئەو دەسەڵاتانەی ئێستای پەسندکردووە. دوای دەرچوونی بڕیاری دادگای فیدراڵی عێراق ژمارە (224 و یەکخستنی 269/ فیدراڵی /2023) لە 21ی شوباتی 2024 ئەمڕۆ سێشەممە 19ی ئازاری 2024 د. لەتیف رەشید، سەرۆك کۆماری عێراق لەگەڵ سەرۆکی دادگای باڵای فیدراڵی کۆبووەوە بۆ راوێژکردن لەبارەی ناوەڕۆکی بڕیارەکەی دادگای باڵای فیدراڵی، لە دوای کۆبوونەوەکە لە راگەیەندراوێکدا سەرۆک کۆمار رایگەیاند "پرۆسەی سیاسی لە دوای ساڵی 2003 لەسەر چەند بنەمایەکی نەگۆڕ داڕێژراوە، کە خواستی سەرکردە سیاسییەکانی لەسەر بووە و لە دەستووردا چەسپاوە و یەکێک لە دیارترین ئەو پرەنسیپانە ئەوەیە، کە عێراق دەوڵەتێکی فیدراڵییە و سیستمی دەسەڵات کۆماری نوێنەرایەتی پەرلەمانییە، دەستوور بەڕوونی هەرێمی کوردستان و ئەو دەسەڵاتانەی ئێستای پەسندکردووە، ئەمەش ئەوە دەگەیەنێت کە دەسەڵاتدارانی هەرێمی کوردستان دەسەڵاتی تەواویان بەسەر هەرێم و هاوڵاتییاندا هەیە، بەشێوەیەک کە جگە لە دەسەڵاتە تایبەتەکانی حکومەتی فیدراڵ، دەستوور و یاسا پێشێل نەکات". ئەوەشخراوەتەڕوو "سیاسەتی دارایی و گومرگی و دەرکردنی دراو و رێکخستنی سیاسەتی بازرگانی لە سنووری هەرێمەکان و پارێزگاکان لە عێراق و داڕشتنی سیاسەتی نەختینەیی، دەسەڵاتە تایبەتەکانی حکومەتی فیدراڵە، بەڵام جێبەجێکردنی ئەم سیاسەتە و دیاریکردنی میکانیزمەکانی جێبەجێکردن، لەدەسەڵاتەکانی هەرێمدایە". هەروەها سەرۆکی دادگای فیدراڵی ئاماژەی بەوەکرد "دادگا پابەندە بەوەی دامەزرێنەرانی پرۆسەی سیاسی لەسەری ڕێککەوتوون و ئەوەی لە دەستووردا ئاماژەی پێکراوە، کە عێراقییەکان پەسندیانکردووە و پەیوەندی نێوان دەسەڵاتەکانی فیدراڵی و هەرێمەکانی رێکخستووە، دادگای باڵای فیدراڵیش بەپەرۆشە کە ئەوەی لە دەستوور و یاسا کارپێکراوەکاندا هاتووە جێبەجێ بکات". وتیشی "بڕیاری دادگای فیدراڵی پەیوەندیدار بە مووچەی فەرمانبەرانی هەرێمی کوردستانی عێراق ئامانجی پاراستنی بەرژەوەندی گشتی و بەدیهێنانی دادپەروەری کۆمەڵایەتییە و وەزارەتی دارایی فیدراڵی هەماهەنگییەکی راستەوخۆی لەگەڵ وەزارەتی دارایی و ئابووری لە حکومەتی هەرێمی کوردستان هەیە سەبارەت بە بابەتی بڕیارەکە و دیاریکردنی چوارچێوەیەک بۆ جێبەجێکردنی بڕگەکانی، بەشێوەیەک کە خەرجکردنی مووچە بەبێ وەستان مسۆگەربکات و بە هۆکاری هونەری یاخود گرتنەبەری ڕێوشوێنەکان نەوەستێت، چونکە میکانیزمی بە بانکیکردن (توطین)ی مووچە، پێویستی بە ماوەیەک هەیە بەپێی نوسراوی وەزارەتی دارایی فیدراڵ، لەبەرئەوە مووچە بەکاش دەدرێت بەو فەرمانبەرانەی پرۆسەی بە بانکیکردنی مووچەیان بەهۆی ڕێوشوێنە تەکنیکییەکانەوە تەواو نەبووە". هەروەها دادگا پشتگیری و پارێزەری مافەکانی گەلە و لە پەیوەندی و راوێژی بەردەوامدا دەبێت لەگەڵ سەرۆك کۆمار و پەیوەندی بەردەوام لەگەڵ وەزارەتی دارایی فیدراڵ بۆ نەهێشتنی ئەو بەربەستانەی ڕەنگە روبەڕوی جێبەجێکردنی بڕیارەکە ببنەوە. لە کۆتایی کۆبوونەوەکەدا سەرۆک کۆماری عێراق جەختیکردەوە لە جێبەجێکردنی بڕگەکانی دەستوور و یاساکان لە رێکخستنی پەیوەندی نێوان پێکهاتەکانی گەلی عێراق و کارکردن بۆ کەمکردنەوەی ئەو نەهامەتیانەی خەڵکی کوردستان بەهۆی ناڕێکی لە دابەشکردنی مووچەوە سەرچاوەیان گرتووە.
.jpg)
هاوڵاتی بەڕێوەبەرایەتیی کەشناسی و بوومەلەرزەزانی هەرێمی کوردستان لەبارەی کەشوهەوای ئەمشەوەوە راگەیەندراوێکی بڵاوکردەوە و ئاماژە بەوەدەکات، ئەمشەو بارانبارین بەردەوام دەبێت. لە راگەیەندراوەکەی بەڕێوەبەرایەتیی گشتیی كەشناسی و بوومەلەرزەزانی هەرێمی كوردستان هاتووە "لە ئەنجامی بەردەوامبوونى کاریگەرى هەردوو نزمە پاڵە پەستۆى دەریاى سوور و ناوەراست لەسەر هەرێمى کوردستان، پێشبینىدەکرێت ئەم شەو بارانبارین بەشێوەى نمە باران و مام ناوەند کە هەندێکجار هەورە تریشقەشی لەگەڵ دەبێت، هەروەها بەفریش لە ناوچە شاخاوییە سنوورییەکان دەبارێت". کەشناسی هەرێم پێشبینیکردووە تاوەکو کاتژمێر 9:00ی بەیانی بارانبارین بەمشێوەیە بێت: - هەولێر 9 - 15 ملم. - سلێمانی 8 - 12 ملم. - دهۆک 10 - 16 ملم. - هەڵەبجە 10 - 15 ملم. - راپەرین 12 - 16 ملم. - گەرمیان 7 - 12 ملم. - زاخۆ 10 - 15 ملم. - سۆران 8 - 12 ملم.
