بەنگین ڕێكانی: پۆستی سەرۆككۆماری عێراق لای كورد دەمێنێتەوە

هاوڵاتی بەهۆی دابەشنەکردنی مووچەوە بایکۆتی فەرمانگەکان و ناوەندەکانی خوێندن لە سنووری پارێزگای سلێمانی و ئیدارەی راپەڕین و ئیدارەی گەرمیان دەستیپێکرد. ئەمڕۆ یەکشەممە 24ی ئازاری 2024 کارمەندانی بەڕێوەبەرایەتییەکانی هاتووچۆی سلێمانی و کارەبا و باج و دادگای سلێمانی و فەرمانگەکانی دادنووس و دەستەبەری کۆمەڵاتی و بەشێک لە فەرمانگە تەندروستییەکان و شارەوانی رۆژهەڵات و رۆژئاوا و بەڕێوەبەرایەتی رێگەوبان و بەشێک لە ناوەندەکانی خوێندن و چەند فەرمانگەیەکی دیکەی سلێمانی بایکۆتی دەوامیان راگەیاند بەهۆی دابەشنەکردنی مووچەوە. هەروەها د. حارس محەمەد، بەڕێوەبەری نەخۆشخانەی کەلار بە هاوڵاتی راگەیاند "کارمەندان و پزیشکانی نەخۆشخانەکەمان بایکۆتی دەوامیان کردووە و بڕیاریانداوە تاوەکو مووچە دابەشنەکرێت نەگەڕێنەوە سەر کارەکانیان". بەڕێوەبەری نەخۆشخانەی کەلار ئاماژەی بەوەشکرد "هیچ جۆرە نەشتەرگەرییەک ناکرێت لە نەخۆشخانەکە و بینینی نەخۆش راگیراوە و دەرمانیش دابەشناکرێت". هەر بەهۆی دابەشنەکردنی مووچەوە بەشێک لە فەرمانگەکانی سنووری ئیدارەی راپەڕین و نەخۆشخانەی شەهید پێشڕەو لە قەزای چەمچەماڵ و فەرمانگەی کارتی نیشتمانی لە چەمچەماڵ بایکۆتی دەوامیان کردووە و داوای دابەشکردنی مووچە دەکەن. لەلایەکی دیکەشەوە بەهۆی خراپی دۆخی ئابوورییەوە خوێندکارانی زانکۆکانی سلێمانی و چەرمو و راپەڕین و هەڵەبجە بایکۆتی دەوامیان کردووە بڕیارنداوە تاوەکو دوای جەژنی رەمەزان نەچنەوە بۆ دەوام. ئەم بایکۆتە لە کاتێکدایە کە ئاوات شێخ جەناب، وەزیری دارایی و ئابووری هەرێمی کوردستان لە نوێترین چاوپێکەوتنیدا رایگەیاند، ئامادەنین ئەو پارەیە دابەش بکەن کە بەغدا بۆ مووچەی فەرمانبەرانی هەرێمی ناردووە تا ئەو کاتەی مووچەی هێزە ئەمنییەکانیش دەگات.

هاوڵاتی کۆمەڵەی پیشەسازیی نەوتی کوردستان "ئەپیکۆر" رایدەگەیەنێت بە هۆی راگرتنی هەناردەی نەوتی هەرێمی کوردستان داهاتی عێراق نزیکەی 11 ملیار دۆلار کەمیکردووە. لە ساڵیادی راگرتنی هەناردەی نەوتی هەرێمی کوردستان کۆمەڵەی پیشەسازیی نەوتی کوردستان "ئەپیکۆر" راگەیاندراوێکی بڵاوکردەوە و تیایدا ئاماژەی بە زیانەکانی راگرتنی نەوتی هەرێمی کوردستان کردووە و رایگەیاند "بەهۆی راگرتنی هەناردەی نەوتی هەرێمەوە داهاتی عێراق نزیکەی 11 ملیار دۆلار کەمیکردووە". ئاماژە بەوەشکراوە "بڕی قەرزی ئەپیکۆر لای حکومەتی هەرێمی کوردستان، یەک ملیار دۆلارە کە لە مانگی ئەیلولی 2022 بۆ مانگی ئازاری 2023یە، هەروەها زیاتر لە 400 ملیۆن دۆلار وەبەرهێنانی کۆمپانیاکانی ئەپیکۆر لە هەرێمی کوردستان راگیراوە". ئەوەشخراوەتەڕوو "داهاتی ساڵانەی کۆمپانیا نێودەوڵەتییەکانی بواری نەوت بە رێژەی 60% کەمیکردووە بەهۆی ئەوەی فرۆشی ناوخۆی جێگەی فرۆشی بازاڕە نێودەوڵەتییەکانی گرتووەتەوە". وەک لە راگەیەندراوەکەدا هاتووە، پرۆسەی بەرهەمهێنانی نەوت لە هەرێمی کوردستان بەردەوامە و جیاوازییەکەی تەنیا لە داهات و نرخی فرۆشتندایە کە بەراورد بە پێشووتر بە رێژەی 60% کەمبووەتەوە و بەو پێیەش ئێستا نرخی بەرمیلێک نەوتی هەرێمی کوردستان لە نێوان 30 بۆ 35 دۆلار مامەڵەی پێوەدەکرێت. لە رۆژی 25ی ئازاری 2024 هەناردەکردنی نەوتی هەرێمی کوردستان و کەرکوک بەهۆی بڕیارێکی دادگای نێوبژیوانیی نێودەوڵەتی لە پاریس راگیرا، هەناردەکردنی نەوتی هەرێمی کوردستان تاوەکو ئێستاش دەستیپێنەکردووەتەوە.

هاوڵاتی وەزیری دارایی حکومەتی هەرێمی کورستان رایگەیاند، ئەو پارەیەی بەغدا ناردوێتی مووچەخۆرانی هەرێم دەکات بە دوو بەشەوەو ئەو پارەیەی هەیە بەشی سەرجەمی مووچەخۆران ناکات و دابەشکردنی بەشێکی موچەخۆران و دابەشنەکردنی موچەی بەشێکی دیکە بۆمبێکی کاتییە و کارەسات دروست دەکات. ئاوات شێخ جەناب وەزیری دارایی هەرێمی کوردستان لە چاوپێکەوتنی لەگەڵ کۆمەڵێک رۆژنامەنوس رایگەیاند، کێشەی ئەوان دابەشکردنی موچە یان دابەشکردنی نییە، بەڵکو کێشەکە ئەوەیە لە ساڵی ٢٠١٢ سیاسەتێک دروستبوە کە هەرێمی کوردستانی بە دۆخی خراپی ئەمڕۆ گەیاندوە. وەزیری دارایی و ئابووری حکومەتی هەرێمی کوردستان ئامادەیی وەزارەتەکەی بۆ دابەشکردنی مووچەی مانگی دوو دەربڕی و  رایگەیاند؛ "لەسەر کێشەی هێزە ئەمنییەکان پێنج رۆژ لەمەوبەر رێککەوتبووین کۆدی تایبەتیان بۆ دروستبکەین و ئێستا کۆدەکانمان رەوانەی بەغدا کردووە، ئێستا چاوەڕوانی پارەناردنین بۆ ئەوەی دەستبکەین بە دابەشکردنی مووچە".  دەشڵێت؛ "کاتێک بەغدا پارەی خستە سەر هەژمارەکەمان، ئێمە پارەکە رادەکێشیهن و دابەشیدەکەین، بۆ ئەم مانگەش خۆمان ئامادە کردووە کاتێک لیستی مووچە دەنێرین، هەم وەکو یاسای خانەنشینی و هەم وەکو فەرمانبەری مەدەنی، بچینە سەر یاسای مووچەی عێراقی" ئاماژەی بەوەشکرد، دادگای فیدڕاڵی عێراق بڕیاریداوە موچەی فەرمانبەرانی هەرێمی کوردستان هاوشێوەی فەرمانبەرانی عێراق دابەش بکرێت، بۆ ئەو مەبەستەش تا ئێستا نەگەیشتونەتە رێککەوتن لەگەڵ حکومەتی بەغدا. ئەوەشی خستەڕو ناردنی مووچە بۆ هەرێمی کوردستان هەموو مانگێک لە ئەنجوومەنی وەزیرانی عێراقەوە بە بڕیارێکی سیاسی بووە، بەڵام ئێستا بووە بە ئەرکێکی نیشتمانی لە ئەنجوومەنی وەزیرانی عێراق و ئەوەی لەسەر ئێمە بووە لیستی مووچە بووە کە داواکراوە و ئێمە ناردوومانە، سەرجەم داهاتە ناوخۆییەکانمان خستووەتە بەردەستیان، واتا هەموو کارە تەکنیکییەکانمان ٪١٠٠ جێبەجێکردووە. وەزیری دارایی هەرێم باسی لەوەشکرد، لەگەڵ حکومەتی عێراق گەیشتون بەو رێککەوتنەی لە رێگەی کۆدەوە پارەی موچەی کەرتە سەربازییەکانی هەرێمی کوردستان بنێردرێت، ئەمەش جیاکاری نییە بۆ هەرێمی کوردستان بەڵکو موچەی حەشدی شەعبیش بەو شێوەیە دابەش دەکرێت. ئەوەشی ئاشکراکرد، وەزارەتی دارایی هەرێم ئامادەیە مووچەی نەک مانگی دوو بەڵکو مانگی سێش دابەشبکرێت هەرکاتێک پارەی پێویست هەبێت  بەو مەرجەی وەزارەتی دارایی عێراق پارەکەی بنێردرێت،" بەڵام کێشەکە ئەوەیە سیاسەت کۆنتڕۆڵی موچە دەکات، هەمو ناردنی موچەیەک پێویستی بە رێگەپێدانی سەرۆک وەزیرانی عێراق هەبوە، لە ئێستاشدا هەوڵی سیاسی خەریکن کێشەکە چارەسەر دەکەن." سەبارەت بە ئەگەری کشانەوەی ئەو بڕە پارەیەی لە بەغداوە نێردراوە بۆ هەرێم ڕایگەیاند لەڕووی یاساییەوە کەس ناتوانێت ئەو پارەیەى خراوەتە سەر حسابی حکومەتى هەرێم بیکشێنێتەوە. هاوکات ئاوات شێخ جەناب باسی لەوەکرد کە  نزیکەى ٣٠٠ هەزار موچەخۆرى هەرێم ناوى بۆ موچە نەهاتووەتەوە و ئەمەش وەک بۆمبێکى تەقیتکراو و ئاگرێک وایە خراوەتە نێو ماڵى کوردەوە و پێویستى بە حیکمەتە بۆ چارەسەرکردنى. لەبارەى بەکارهێنانی داهاتی ناوخۆ بۆ پڕکردنەوەی کورتهێنانی مووچە ڕایگەیاند، پێنج سەرچاوەى سەرەکى داهاتى ناوخۆمان هەیە و ٣٠٠ بۆ ٣٥٠ ملیار دینارى مانگانەیە و ١٥%ى کاش نییە، ٦٠ ملیارى بۆ نەسریە دەچێت و ١٨٠ ملیارى بۆ موچەیە و ئەوەى دەمێنێتەوە بۆ پرۆژەیە و لە ئێستادا ئەو بڕە پارەیە بەشی پڕکردنەوەی کورتهێنانی موچە ناکات. سەبارەت بە کۆبونەوەکەی ئەنجومەنی وەزیرانیش کە تیایدا بڕیاردا مووچە بەم شێوەیەی ئێستا دابەشنەکرێت  ئاوات شێخ جەناب ئەوەی ئاشکرا کرد لە کۆبوونەوەی ئەنجوومەنی وەزیران هەموو لایەنەکان باسیان لە دابەشکردنی مووچە و گرفتەکانی کردووە و لەوێ پرسیار کرا ئاخۆ کەس رازییە مووچە نەدرێت بە هێزە ئەمنییەکان و پێشمەرگە؟ یەک کەس ناڕەزایەتی دەرنەبڕیوە. پرسی نەوت؛ ئێستا لە 14 کێڵگەی نەوتی هەرێمی کوردستان تەنیا نۆ کێڵگە کار دەکەن وەزیری دارایی هەرێم پێیوایە گرێبەستە نەوتییەکانی هەرێمی کوردستان باش نین، ''بەڵام پشتگیریی ئەوە دەکەم کە پیشەسازیی نەوتیی خۆمان هەبێت، ئەمە مافێکی دەستووری و یاساییە و بەر لەوەی کە ئەم حکومەتە نوێیەی عێراقیش پێکبهێنرێت، ئێمە پیشەسازیی نەوتمان هەبوو.'' ئاوات شێخ جەناب وتی: ئێستا لە 14 کێڵگەی نەوتی هەرێمی کوردستان تەنیا نۆ کێڵگە کار دەکەن و لە 1/4/2023ەوە تا ئەمڕۆ، 45 ملیۆن بەرمیل نەوتیان لێ بەرهەمهێنراوە کە 11 ملیۆن و  800 هەزار بەرمیل لە 25ـی حوزەیرانی ساڵی رابردووەوە تاوەکو 01-12-2023 دراوەتە بە عێراق. وەزیری دارایی هەرێمی کوردستان لەبارەی راگرتنی هەناردەی نەوت بۆ عێراق دەڵێت، ''لەو 11 ملیۆن و 800 هەزار بەرمیلەی کە بۆ عێراق نێردراوە، تێچووی بەرهەمهێنان و گواستنەوەی یەک بەرمیلیش لەلایەن عێراقەوە نەدراوە و بەلاش بردوویەتی، بۆیە دواتر  رامانگرتووە. بەپێی قسەکانی ئاوات شێخ جەناب، لە کۆی نەوتی بەرهەمهێنراو لە 01-04-2023ـوە، 33 ملیۆن و 900 هەزار بەرمیل ماوەتەوە کە بەپێی گرێبەستی کۆمپانیاکان، 45٪ـی بۆ کۆمپانیاکانە و 55٪ـیشی بۆ هەرێمی کوردستانە، کە دەکاتە زیاتر لە 18 ملیۆن بەرمیل. وەک ئاوات شێخ جەناب ئاماژەی دا، حکومەتی هەرێمی کوردستان لەو بڕە نەوتە، تەنیا 17 ملیۆن بەرمیلی لە رێگەی تانکەرەوە بە 31 دۆلار فرۆشتووە و لە فرۆشەکەی مانگانە نزیکەی 50 ملیۆن دۆلار بۆ حکومەت ماوەتەوە. وەزیری دارایی ئاماژەی بەوەش کرد، لەو 50 ملیۆن دۆلارە مانگانە 22 بۆ 24 ملیۆن دۆلار دەدرێتە کۆمپانیای دانەگاز بۆ دابینکردنی کارەبا، جگە لەوەش بەشێکی دیکەی خەرجی هەن کە بڕێکی زۆر پارە دەبڕن و لەو 50 ملیۆن دۆلارە بۆیان خەرج دەکرێت.   پڕۆژەی هەژماری من: بە وتەی وەزیری دارایی، پرۆژەی 'هەژماری من' بانک نییە، زانیاری هەڵە و تێنەگەیشتن لەسەر ئەو پرسە هەیە، هەژماری من پرۆژەیەکە بۆ تەوتین، جیاوازی لەگەڵ تەوتینەکەی عێراق ئەوەیە کە ئەو سیستمەی ئێمە لە هەژماری من کاری پێدەکەین، تەوتین و 19 خزمەتگوزاریی دیکەیە کە پێنج بانک تاوەکو ئێستا بەشدارییان تێدا کردووە کە سەرجەمیان عێراقین و لەلایەن بانکی ناوەندییەوە متمانەیان پیدراوە. ئاوات شێخ جەناب دەشڵیت؛ "پرۆژەی هەژماری من بە رەزامەندیی سەرۆکوەزیرانی عێراق و بانکی ناوەندیی عێراق دروستکراوە، پێنج بانکە بەشداربووەکەش لەنێو ئەو 47 بانکەن کە لە بەغدا تەوتین دەکەن و بڕیارە سێ بانکی دیکەی عێراقیش تێیدا بەشداربن، بەڵام تەوتینی عێراق تەنیا کارتێکە و دەچیت پارەی کاشی پێ رادەکێشیت و بەدەر لەمە هیچ مامەڵەیەکی دیکەی ناتوانی پێبکەیت." ئاوات شێخ جەناب نەبوونی پارەی کاش بە گرفتی هەرە سەرەکی دابەشنەکردنی مووچە وەسفدەکات و دەڵیت ماوەی ساڵێکە نەخۆشخانەی منداڵبوونی هەولێر کە 800 کارمەندن، لە رێگەی هەژماری منەوە مووچەکانیان وەردەگرن و لە ساڵی رابردوو مووچەی 12 مانگەکەیان وەرگرتووە.    

هاوڵاتی لە پێنجەمین ساڵیادی لەناوبردنی رێکخراوی تیرۆریستی داعش لە رۆژئاوای کوردستان و سوریا، ھەسەدە داوای چارەسەرکردنی دۆسییەی دەستگیرکراوانی ئەو رێکخراوە تیرۆریستییە دەکات. ئەمڕۆ شەممە، هێزەکانی سوریای دیموکرات لە پێنجەمین ساڵیادی کۆنترۆڵی جوگرافی رێکخراوی داعش لە سووریا و رۆژئاوای کوردستان،رایگەیاند، هێشتا داعش “مەترسییەکی گەورە” بۆ سەر رۆژئاوای کوردستان دروست دەکات، بە دووبارە خۆ رێکخستنەوەی لە رێگەی شانە نووستووەکانیەوە و کۆنتڕۆڵی جوگرافی هەندێک ناوچەدا. ئاماژەیان بەوەشکرد، کامپی هۆل “بۆمبێکی کات بۆداڕێژراو” پێکدەهێنێت و “ترسەکان لە زیادبووندایە سەبارەت بە ئەندامانی خێزانەکانی رێکخراوەکە، کە فێرکارییەکانیان لە چوارچێوەی ئەم ژینگەیەدا وەردەگرن، کەوا ژینگەیەکی پڕ لە تیرۆرە، ئەمەش خۆی لە خۆیدا مەترسییە لەسەر داهاتووی ناوچەکە و جیهان”. لە راگەێنراوەکەدا هاتووە، هێرشەکانی تورکیا و میلیشیا ئۆپۆزسیۆنە دڵسۆزەکانیان بۆ سەر ناوچەکانی رۆژئاوای کوردستان “هەموو هێزێک بۆ رێکخراوەکە دەڕەخسێنێت بۆ دووبارە رێکخستنەوەی ریزەکانی”، هەروەها ناوچەکانی ژێر دەسەڵاتی تورکیا لە سووریا “بوونەتە جێگەیەکی پارێزراو بۆ داعش، لەوێشەوە پلانی هێرشەکانی بۆ سەر ناوچەکانمان دادەڕێژێت”. هەربۆیە هێزەکانی سوریای دیموکرات داوایان لە کۆمەڵگەی نێودەوڵەتی و وڵاتانی هاوپەیمانی کرد، کێشەی دەست بەسەرداگیراوانی داعش یەکلایی بکەنەوە، هەروەها داوای پێکهێنانی دادگایەکی نێودەوڵەتیان کرد بۆ لێپرسینەوەیان، یان ئەو وڵاتانە هاووڵاتیانی خۆیان بگەڕێننەوە، کە ئەندامی رێکخراوەکەن.  

هاوڵاتی رێكخراوى سى پى تى ئه‌مریكى لە ڕاپۆرتێکدا باس لەو ئۆپراسیۆنە دەکات کە بڕیارە سوپای تورکیا لە سنورەکانی هەرێمی کوردستان ئەنجامی بدات و ئاماژەی بەوەکردووە کە ئۆپراسیۆنه‌ نوێیه‌كه‌ى سوپاى توركیا بۆ سەر زنجیرە چیای گارا دەبێت وژیانی “190 خانەوادە لە 39 گوندی ئاوەدانی دەووروبەری چیای گارا" دەکەوێتە مەترسییەوە. رێكخراوى سى پى تى ئه‌مریكى كه‌ یه‌كێك له‌ كاره‌كانى بریتیه‌ له‌ چاودێریكردنى ئۆپراسیۆنه‌ سه‌ربازیه‌كانى توركیا و ئێران له‌نێو خاكى هه‌رێمى كوردستان نوێترین راپۆرتى خۆى له‌باره‌ى ئۆپراسیۆنه‌ نوێیه‌كه‌ى سوپاى توركیا له‌ناو خاكى هه‌رێمى كوردستان بڵاوكردەوە: له‌ راپۆرته‌كه‌یدا، رێكخراوى سى پى تى شوێنى ئۆپراسیۆنه‌ نوێیه‌كه‌ى توركیاى ئاشكرا كردووه‌ و ئاماژه‌ى به‌وه‌كردووه‌، “ئۆپراسیۆنی ئەمجارەی سوپای تورکیا بۆ سەر زنجیرە چیای گارا دەبێت کە بە درێژایی 38.9 کیلۆمەتر هەردوو پارێزگای هەولێر و دهۆک بەیەکەوە دەبەستێتەوە و ناوەندیی بەیەکەوەبەستنەوەی هەر چوار قەزای مێرگەسۆر و ئاکرێ و ئامێدی و زاخۆشە. تیمی کوردستانی عێراقی رێكخراوه‌كه‌ له‌ راپۆرته‌كه‌یدا هۆشداریدەدات لە ئاوارەبوون و دروستبوونی مەترسی بۆ سەر گیانی گوندنشینان به‌هۆى ئۆپراسیۆنه‌ نوێیه‌كه‌وه‌ و له‌ راپۆرته‌كه‌یاندا باس له‌وه‌ده‌كه‌ن، “190 خانەوادە لە 39 گوندی ئاوەدانی دەووروبەری چیای گارا لە قۆناغی جێنەجێکردنی ئۆپەراسیۆنەکەی تورکیادا مه‌ترسى گیانیان له‌سه‌ره‌”. سى پى تى له‌ راپۆرته‌كه‌یدا ئه‌وه‌شیان ئاشكرا كردووه‌، “لە قۆناغی ئامادەکاریدا، تورکیا گوندەکانی دەووروبەری چیای گارای بۆردوومانکردووە و فشاریخستۆتە سەر گوندنشینان بۆ جێهێشتنی گوندەکانیان. لە ئەنجامی ئەو بۆردوومانانەدا، چوار هاووڵاتی مەدەنی دانیشتووی گوندەکانی دەووروبەری چیای گارا شەهیدبوون و هاووڵاتییەکی تری مەدەنیش برینداربووە”. جێگەیباسە لە چاوپێکەوتنێکیدا بۆ هاوڵاتی «جەبار یاوەر» پسپۆری بوارەکانی سەربازی و ئەمنی ڕایگەیاند "تورکیا بەدرێژایی 200 کیلۆمەترو لەهەندێ ناوچەش بەقوڵایی 10 کیلۆمەترو لەهەندێ ناوچەی دیکەش بەقوڵایی نزیکەی 40 کیلۆمەتر بنکەو سەربازگەی هەیە لەناو خاکی عێراق لەهەرێمی کوردستاندا کە بەخۆی بڵاویدەکاتەوە لەسەر نەخشەکانی وەزارەتی بەرگری تورکیا کە تائێستا نزیکەی 87 بنکەی سەربازی لەناو خاکی عێراقدا لەهەرێمی کوردستاندا هەیە". هاوکات به‌پێى ئاماره‌كانى رێكخراوی سى پى تى ، ” لە ماوەی 70 رۆژی سەرەتای ساڵی 2023دا، تورکیا 141 بۆردوومانی لە پارێزگای دهۆکدا ئەنجامداوە کە لەو ژمارەیە 75 بۆردوومان بۆ سەر گوندەکانی دەووروبەری چیای گارا بووە”.  

هاوڵاتی وەزارەتی پەروەردەی حکومەتی هەرێمی کوردستان بڕیاری کەمکردنەوەی دەوامی دا لە مانگی رەمەزاندا. سامان سیوەیلی، وتەبێژی وەزارەتی پەروەردەی حکومەتی هەرێمی کوردستان رایگەیاند، لە مانگی رەمەزاندا لەگەڵ دەستپێکردنەوەی دەوامی ناوەندەکانی خوێندن، وێڕایی پیرۆزبایی ئەم مانگە پیرۆزە لە پەروەردکاران و مامۆستایان و قوتابیان، لەسەر فەرمانی وەزیری پەروەردە بڕیاردرا کە لە مانگی رەمەزان ئاسانکاری لە دەوامی ناوەندەکانی خوێندنی حکومی بکرێت، بەم شێوەیە:  ١- هەر وانەیەک تەنها (٣٠) سی خولەک دەبێت.  ٢- بەڕێوەبەری ناوەندەکانی خوێندن ئاسانکاری تەواو بکەن بۆ مامۆستایان، بەتایبەت مامۆستایانی ئافرەت.  ٣- قوتابخانەکانی ئێواران(مسائي) بەهەمان شێواز (١٠) خولەک لە هەر وانەیەک کەمدەبێتەوە و دەسەڵاتی ڕێکخستنی دەوامی ناوەندەکانی خوێندنی ئێواران لەمانگی رەمەزاندا دەدرێتە بەڕێوەبەری ناوەندەکە. 

هاوڵاتی کۆڵبەرێکی خەڵکی جوانڕۆ بەناوی پەیمان ئەحمەدی، لە کاتی کۆڵبەری کردن لە سنووری نەوسوود بە تەقەی راستەوخۆی هێزە چەکدارەکانی حکومەت کوژرا. بەپێی راپۆرتێکی بڵاوکراوەی رێکخراوی مافی مرۆڤی هەنگاو، ئەمڕۆ شەممە 23ی ئازاری 2024 هێزە چەکدارەکانی ئێران جێگیر لە سنووری نەوسوود، تەقەیان لە ژمارەیەک کۆڵبەر کردووە و لەئاکامدا کۆڵبەرێک بەناوی پەیمان ئەحمەدی تەمەن 35 ساڵ و خەڵکی گوندی کاکاڕەشی سەر بە شاری جوانڕۆ کوژراوە. بەوتەی سەرچاوەیەکی ئاگادار، تەرمی ئەو کۆڵبەرە بۆ یەکێک لە نەخۆشخانەکانی شاری کرماشان گواستراوەتەوە و تا ئێستا رادەستی بنەماڵەکەی نەکراوەتەوە، پەیمان ئەحمەدی، یەکەمین کۆڵبەری کوژراو لەلایەن هێزە چەکدارەکانی کۆماری ئیسلامی ئێران لە ساڵی نوێی کوردیدا.

هاوڵاتی ئەمڕۆ شەممە لە بازاڕەکانی هەرێمی کوردستان نرخی مریشکی زیندوو دابەزی و بۆ هەر کیلۆیەک بڕی 500 بۆ 600 دینار دابەزیوە. مریشکفرۆشێک لە شاری سلێمانی بە هاوڵاتی راگەیاند "ئەمڕۆ شەممە 24ی ئازاری 2024 نرخی کیلۆیەک مریشکی زیندوو بۆ سێ هەزار 250 دینار دابەزی و بەروارد بە رۆژانی دیکە نرخەکەی 500 بۆ 600 دینار دابەزیوە". ئەو مریشکفرۆشە وتی "نازانرێت نرخی مریشک چی لێدێت، چونکە رۆژانە بەردەوام نرخی مریشک گۆڕانکاری تیادا روودەدات". لە ناوەڕاستی مانگی شوباتی ئەمساڵ، نرخی کیلۆیەک مریشکی زیندوو گەیشتە چوار هەزار دینار، لەئێستاشدا رێژەیەکی زۆر لە جوجک لە کێڵگەکاندا بەخێوکراون تاوەکو بەرهەمی مریشک زۆربن لە بازاڕەکاندا و نرخەکەی دابەزێت.

هاوڵاتی بەڕێوەبەرایەتی کەشناسی و بوومەلەرزەزانی هەرێمی کوردستان رەوشی کەشوهەوای 48 کاتژمێری داهاتووی بڵاوکردەوە و بەپێی پێشبینییەکان بێت باران بارین بەردەوام دەبێت. کەشناسی هەرێم رایگەیاند "ئەمڕۆ شەممە 23- 3- 2024 ئاسمان هەوری تەواو دەبێت لە زۆربەی کاتەکاندا لەگەڵ بارینی نمە باران هەندێکجار مامناوەند دەبێت، هەروەها ئەگەری بارینی بەفرێکی کەم لە ناوچە شاخاویە سنووریەکاندا هەیە و پلەکانی گەرما نزیک دەبێـت لە تۆمارکراوی دوێنێ . هەروەها بەپێی پێشبینییەکان بێت سبەی یەکشەممە 24- 3- 2024 ئاسمان هەوری تەواو دەبێت لەگەڵ ئەگەری بارینی بارانی پچر پچر, لە کاتەکانی ئێوارەدا رێژەی دابارین زیاتر دەبێت لە ناوچەکانی گەرمیان و هەلەبجە و هەندێک ناوچە لە باشووری پارێزگای سلێمانی و پلەکانی گەرما  نزیک دەبێت لە تۆمارکراوی ئەمرۆ. بەرزترین پلەکانی گەرمای پێشبینیکراو بە پلەی سیلیزی : - هەولێر: 17 - سلێمانی: 15 - دهۆک: 16 - کەرکوک: 18 - هەڵەبجە: 17 - زاخۆ: 17 - سۆران: 13 - حاجی ئۆمەران: 6 - گەرمیان: 22

هاوڵاتی بەهۆی دابەشنەکردنی مووچە و خراپی دۆخی ئابووری خوێندکارانەوە لە سێ زانکۆ خوێندکاران بڕیاری بایکۆتکردنی دەوامیاندا. لە راگەیەندراوێکدا دەستەی نوێنەرایەتی خوێندکارانی زانکۆی هەڵەبجە رایانگەیاند، بەهۆی خراپی بارودۆخی ئابووری، بە دەنگی زۆرینەی خوێندکاران بڕیاریانداوە تاوەکو 1ی نیسان بایکۆتی خوێندن بکەن، ئەگەر بارودۆخی ئابووری بەمجۆرە بەردەوام بێت، تاوەکو دوای جەژنی رەمەزان بایکۆت بەردەوامدەبێت. هەروەها هەرمان كامیل، وتەبێژی نوێنەرانی زانكۆی چەرموو ڕایگەیاند، لە سۆنگەی هەستكردنمان بە بەرپرسیارێتی بۆ هاوڕێ و خوێندكارەكانمان، بڕیارماندا بە بایکۆتکردنی خوێندن تاوەکو دوای جەژنی رەمەزان. لە ئیدارەی راپەڕینیش خوێندکارانی زانکۆی راپەڕین و کەمپسی قەڵادزێ بڕیاری بایکۆتیان داوە و جەختیان لەوەکردووەتەوە لەم دۆخەی ئێستادا ناتوانن دەوام بکەن. تاوەکو ئێستا خوێندکارانی زانکۆی سلێمانی هیچ بڕیارێکیان نەداوە لەبارەی بایکۆتکردنی دەوام، ئەگەر دۆخەکە بەمجۆرەبێت و دەست بە دابەشکردنی مووچە نەکرێت، ئەوا پێدەچێت خوێندکارانی زانکۆی سلێمانیش بایکۆتی خوێندن بکەن.

هاوڵاتی  جێگری سەرۆک وەزیرانی هەرێمی کوردستان وەڵامی پێشەوا هەورامانی، وتەبێژی حکومەتی هەرێمی دایەوە و رایگەیاند، ئەو کەسەی بەناوی وتەبێژی حکومەتەوە قسە دەکات، تەنها تەعبیر لە خۆی و تیمە وەزاریەکەیان دەکات  دوای ئەوەی وتەبێژی حکومەتی هەرێمی کوردستان ڕایگەیاند "ئەوانەی لە کوردستان پشتگیریی دادگای فیدراڵی دەکەن لەبەر ئەوەیە کە لە بەرژەوەندیی ئەوان هەڵسوکەوت دەکات و بڕیاری نادەستووری دەدات." رۆژی هەینی 22ی ئاداری 2024 بافڵ تاڵەبانی، سەرۆکی یەکێتیی نیشتمانیی کوردستان لە نووسینێکدا لە تۆڕی کۆمەڵایەتیی فەیسبووک وتی، "ئێمە پشتیوانیی خۆمان بۆ بڕیارەکانی دادگای فیدراڵی و رۆڵی لە پاراستنی دەستوور، دادپەروەری و سیستمی دیموکراسی دووپات دەکەینەوە." سەرۆکی یەکێتی ئاماژە بەوە دەکات، هەر جۆرە "ناوزڕاندن و مامەڵەیەکی خراپ"یش بەرامبەر دادگای فیدراڵیی عێراق رەتدەکەنەوە و دەڵێت، ئەو دادگەیە "سەربەخۆ و پیشەییە، کە بەشداری کارایە لە پاراستنی سیستمی سیاسی لە عێراق و پاراستنی سەربەخۆیی، ئەوەش لە قووڵایی ئەرکە دەستووری و نیشتمانییەکانە." دوای ئەو نووسینە، پێشەوا هەورامانی، وتەبێژی حکومەتی هەرێمی کوردستان نووسینێکی لە تۆڕی کۆمەڵایەتیی فەیسبووک بڵاوکردەوە و تێیدا دەڵێت، "ئێمە هەموومان لەگەڵ سەروەریی یاسا و دادگەیەکی بێلایەن و دەستووریداین، بەڵام تائێستا بەپێی دەستوور، عێراق دادگایەکی دەستووریی نییە و ئەو دادگایە بە نادەستووری بەردەوامە و بڕیارەکانیشی نایاسایی و نادەستوورین." بە وتەی پێشەوا هەورامانی، "ئەوانەی لە کوردستان پشتگیریی ئەو دادگایە دەکەن، لەبەر ئەوەیە لە بەرژەوەندیی ئەوان هەڵسوکەوت دەکات و بڕیاری نادەستووری دەدات". لە وڵامی ئەمەدا سەمیر هەورامی، وتەبێژی جێگری سەرۆکی ئەنجومەنی وەزیران ڕاگەیەندراوێکى بڵاوکردەوە و دەڵێت: کەسێک بەناو وتەبێژی حکومەتی هەرێمی کوردستانەوە لێدوانی داوە لەبارەی بڕیارەکانی دادگای فیدراڵی و مافی موچەخۆرانی کوردستانەوە.  دەشڵێت:  لە کابینەی نۆیەمی حکومەتی هەرێمدا، کەسێکمان نەبووە و نییە کە وەک وتەبێژ، هەڵوێستەکانی تەعبیری لە سیاسەت و بۆچونەکانی تیمی وەزاری یەکێتی بکات، بەڵکو ئەو کەسەی بەناوی وتەبێژی حکومەتەوە قسە دەکات، تەنها تەعبیر لە خۆی و تیمە وەزاریەکەیان دەکات بۆیە ئەوەی وتوویەتی هیچ پەیوەندییەکی بە یەکێتییەوە نییە. لە ڕاگەیەندراوەکەى سەمیر هەورامیدا هاتووە: لەبری لێدوان و قسەو تۆمەت بەخشینەوە، واباشتر بوو بەهەموومانەوە هەوڵی چارەسەر کردنی گرفتەکان بدەین و مافی موچەخۆران دەستەبەر بکەین.  هەرێمی کوردستان و دەستکەوتەکان بەبێ متمانە و پشتگیری خەڵکی کوردستان و تەنها بە دروشم ناپارێزرێت. ناکۆکی نێوان لایەنەکان سەبارەت بە بڕیارەکانی دادگای فیدراڵی لەسەر هەڵبژاردن و مووچەی فەرمانبەران و یەکلاکردنەوەی سکاڵاکان  تا دێت زیاتر دەبێت و گەیشتۆتە شەڕە بەیاننامەو ڕاگەیەندراوی جیاواز بەرامبەر بە یەکتری. دەستپێکی ناکۆکی نێوان لایەنەکانیش دوای ئەوە هات رۆژی 21-02-2024  کە دادگەی باڵای فیدراڵیی عێراق رایگەیاند، دەبێت ژمارەی کورسییەکانی پەرلەمانی کوردستان لە 100 کورسی تێنەپەڕێت و کورسیی کۆتای پێکهاتەکانیشی بە نادەستووری ناوبرد. ئەو بڕیارەی دادگەی فیدراڵیی عێراق لەسەر بنچینەی سکاڵایەک بوو کە لەلایەن زیا جەبار، سەرۆکی فراکسیۆنی یەکێتیی نیشتمانیی کوردستان لە خوولی پێنجەمی پەرلەمانی کوردستان و ئامانج شەمعون، سەرۆکی فراکسیۆنی رافیدەین لە ئەنجوومەنی پارێزگای سلێمانی لەبارەی کورسی کۆتاکان و بازنەی هەڵبژارنی پەرلەمانی کوردستان تۆمار کرابوو دوا بەدوای بڕیارەکەش پارتی دیموکراتی کوردستان دادگاکەی بە نادەستوری ناوبرد و بڕیاری بایکۆتی هەڵبژاردنی دا و تورکمانەکان و  10 حیزب و لایەنی کریستیان هاوشێوەی پارتی بایکۆتی هەڵبژاردنەکانیان کرد. لەبەرامبەر ئەمەدا حزبەکانی دیکەی وەک یەکێتی و گۆڕان و یەکگرتوو بەرەی گەل پاڵپشتی خۆیان بۆ بڕیارەکەی دادگا و ئەنجامدانی هەڵبژاردن ڕاگەیاند و نانکۆکی نێوان حیزبەکان سەبارەت بە بڕیارەکانی دادگاکە دەستی پێکرد.

هاوڵاتی حکومەتی عێراق ئامادە نییە بودجەی پێویست بۆ هێزەکانی پێشمەرگە تەرخان بکات بە بیانووی ئەوەی هێزێکی "سیادی" نییەو هێزێکی ناوخۆیی هەرێمی کوردستانە. جەبار یاوەر، ئەمینداری پێشووی وەزارەتی پێشمەرگەی حکومەتی هەرێمی کوردستان بە دەنگی ئەمەریکای ڕاگەیاندووە، عێراق وتویەتى بەپێی دەستور پێشمەرگە هێزێکی سیادی هاوشێوەی سوپای عێراق نییە، بەڵکو وەکو پۆلیس و ئاسایش هێزێکی ناوخۆیی هەرێمە، بۆیە دەبێت هەرێم لە بودجەی خۆی خەرجییان دابین بکات. هەندێکجاریش بیانووی ئەوە دەهێننەوە گوایە ژمارەی هێزەکانی پێشمەرگە زۆرە. وتیشی، "حکومەتە یەک لە دوای یەکەکانی عێراق هیچ بودجەیەکیان بۆ وەزارەتی پێشمەرگە خەرج نەکردووە. ئەو بڕە پارەیەش لە یاسای بودجەی عێراق دا بۆ پێشمەرگە دانراوە بەشی موچەو پێداویستی یەک لیوای پێشمەرگە دەکات." بەپێی یاسای بودجەی عێراق، بودجەی تەرخانکراو بۆ وەزارەتی بەرگری عێراق 9 تریلیۆن و 764 ملیار دینارە، پشکە بودجەی وەزارەتی پێشمەرگە لەم بڕە پارەیە، 228 ملیارو 304 ملیۆن دینارە. هاوکات لەشەڕی نێوان هێزەکانی پێشمەرگەو چەکدارانی ڕێکخراوی داعش، 1810 پێشمەرگە گیانیان لەدەستداو 10720 پێشمەرگەش برینداربوون،لەو بارەیەوە سەرچاوەیەکی باڵا لە وەزارەتی پێشمەرگەی حکومەتی هەرێم کە داوایکرد ناوی بڵاونەکرێتەوە، بە دەنگی ئەمەریکای ڕاگەیاندوە،"تا ئێستا هیچ بڕە پارەیەک لەلایەن حکومەتی عێراقەوە بۆ کەسوکاری شەهیدو بریندارەکان تەرخان نەکراوە." جێگەیباسە هەرچەندە حکومەتی عێراق ماوەی هەفتەیەکە بڕی 600 ملیار دیناری ناردووە بۆ موچەی موچەخۆرانی هەرێم، بەڵام حکومەتی هەرێم تا ئێستا ئەو بڕە پارەیەی بەسەر موچەخۆراندا دابەش نەکردووە بەبیانووی ئەوەی عێراق موچەی هێزە ئەمنی و سەربازییەکانی نەناردووە.

هاوڵاتی ئەمساڵ لە هەرچوار پارچەی کوردستان نەورۆزی "بەرخودان" بەڕێوەچوو ، بە گوێرە میدیاکانی تورکیاش دەسەڵاتدارانی تورکیا زیاتر لە ۲۰۰ کەسیان دەستگیرکردوە، کە لەنێویاندا ۳۸ منداڵ هەیە بە تۆمەتی لەبەرکردنی جلی کوردی و ڕەنگی قەدەغەکراوە  لە پێش و لە کاتی ئاهەنگگێڕانی ۲۱ی ئازاری ساڵی نوێی کوردی. بە پێی ڕاپۆرتی میدیا تورکی و کوردیەکان هاوکات  دامەزراوەی مافەکانی مرۆڤی تورکیا کە بەڵگەنامەی پێشێلکارییەکان و مامەڵەکردن لەگەڵ قوربانیانی ئەشکەنجە لەو وڵاتە بڵاودەکاتەوە ڕایگەیاند لە ئاهەنگەکانی نەورۆزدا لە تورکیا زیاتر لە ٢٠٠ کەس دەستگیرکراون و  لەنێویاندا ۳۸ منداڵ هەیە و بەلایەنی کەمەوە 70 لەوانە لە 17 ی مانگی سێدا لە میانەی خۆپیشاندانێکی نەورۆزدا لە ناوچەی یێنیکاپی ئەستەنبوڵ دەستگیرکراون هاوکات  نۆ لە دەستگیرکراوەکانی ئەو خۆپیشاندانە منداڵ بوون و ڕووبەڕووی توندوتیژی پۆلیس بوونەتەوە. هۆکاری دەستگیرکردنی ئەو هاوڵاتییانە بەهۆی لەبەرکردنی جلوبەرگ و بەرزکردنەوەی ئاڵا بووە بە ڕەنگەکانی  سوور و سەوز و زەرد کە ڕەنگی ئاڵای  پارتی کرێکارانی کوردستان (پەکەکە)یە . پۆلیسی تورکیا  دەڵێت هەندێک لە دەستگیرکراوەکان پۆستەری عەبدوڵا ئۆجالانیان بەرزکردۆتەوە لە میانەی کۆبونەوەو ئاهەنگەکاندا. لەم بارەیەوە سییلان ئاککا کوپۆلۆ یاسادانەرێکی پارتی دیموکراتی دیاربەکرە ڕایگەیاند لە بەشێکی زۆری کۆبونەوەکاندا نە ئاڵای پەکەکە بەرزکراوەتەوە نە وێنەی عەبدوڵا ئۆجەلان بەڵام پۆلیسی تورکیا بەبێ هۆ هێرشی کردۆتە سەر ژمارەیەکی زۆر لە بەشداربوانی ئاهەنگەکان. وتیشی ئەو سەرکوتکردنەی تورکیا پێش هەڵبژاردنەکانی تورکیایە کە بڕیارە لە 31 ی مانگی سێدا ئەنجام بدرێت و حکومەتی تورکیاش نەورۆز بەکاردەهێنێت بۆ ئەوەی هێرش بکاتە سەرمان.    

هاوڵاتی نورى مالیکى سەرۆکى هاوپەیمانى دەوڵەتى یاسا لە چاوپێکەوتێکدا ڕایدەگەیەنێت، مەسعود بارزانی دڵنیایی پێداوە کە پارتی بەشداریی لە هەڵبژاردنى پەرلەمانى کوردستان دەکات. مالیکى لە چاوپێکەوتنێکدا لەگەڵ کەناڵى سۆمەریە باسی لە پەیوەندییەکی تەلەفونی نێوان خۆی و مەسعود بارزانی کرد و ڕایگەیاند، لەگەڵ مەسعود بارزانی پەیوەندییەکی تەلەفۆنیم ئەنجامدا، دڵنیایی پێدام کە پارتی لە هەڵبژاردنەکانی هەرێم ناکشێتەوە، بەڵام چاوەڕێی لێکدانەوەی بڕیارەکەی دادگای فیدراڵی دەکەن. مالیکى ئاشکراى دەکات کە بەڵێنێکى بە مەسعود بارزانى داوە و دەڵێت: بارزانیم دڵنیاکردەوە ئەو کێشانەی نێوان هەرێم و بەغدا بەم نزیکانە چارەسەر دەبێت. سەرۆکى هاوپەیمانیی دەوڵەتى یاسا راشیگەیاند، یەکێک لەو کێشانەى کۆتایینەهاتووە، یاساى نەوت و گازە کە لە 2007 دەنگى لەسەر دراوە رەوانەى ئەنجوومەنى نوێنەران کراوە، ئەوەى پەسەندکردنەکەى دواخستووە، ئەو هەموارانەن هەرێمى کوردستان و وەزارەتى نەوت پێشکەشیان دەکەن. لەبارەى دادگاى فیدراڵیشەوە مالیکى وتى: دادگای فیدراڵی دەزگایەکی بێلایەن و لایەنێکی ژیرە کە کاردەکات بۆ چارەسەرکردنی کێشە سیاسییەکانی نێوان لایەنە جیاوازەکان و دادگای فیدراڵی هەڕەشەی لە کەس نەکردووە و بەبێ بەڵگە تۆمەتی خراوەتە پاڵ. ڕۆژی 18 ی مانگی 3 ی 2024، مەکتەبی سیاسی پارتی دیموکراتی کوردستان بەشداری نەکردنی لە هەڵبژاردنی پەرلەمانی کوردستان ڕاگەیاند، هۆکارەکەشی بۆ ئەوە گێڕایەوە نایانەوێت بەشداربن لە پرۆسەیەکدا کە نایاسایی، نادەستوری و لە سایەی سیستمێکی سەپێنراودا بێتدوای ئەو ڕاگەیاندنەش ئەو حیزبە کۆبونەوەکانی لەگەڵ لایەنە جیاجیاکانی پرۆسەی سیاسی لە هەرێم دەستپێکرد. ڕۆژی 10 ی مانگی 6 ی ساڵی 2024 وەکو وادەی هەڵبژاردنی پەرلەمانی کوردستان دیاریکراوە و هەڵبژاردنەکە لەلایەن کۆمیسیۆنی باڵای سەربەخۆی هەڵبژاردنەکانی عێراقەوە بەڕێوەدەبرێت و بڕیاری کشانەوەی پارتی لە هەڵبژاردنەکان دوای بریارێکی دادگای فیدراڵی بوو کە له‌سه‌ر سكاڵایه‌كی فراكسیۆنی یه‌كێتی نیشتمانی كوردستان له‌ خولی پێنجه‌می په‌رله‌مانی كوردستان، شێوازی هه‌ڵبژاردنی له‌ یه‌ك بازنه‌ییه‌وه‌ بۆ چوار بازنه‌یی گۆڕی و 11 كورسی پێكهاته‌كانی لابردو ژماره‌ی كورسییه‌كانی په‌رله‌مانی له‌ 111 كورسییه‌وه‌ بۆ 100 كورسی كه‌مكرده‌وه‌.  

هاوڵاتی سەرۆکی یەکێتیی نیشتمانیی کوردستان پەیامێکی لەبارەی بڕیارەکانی دادگای فیدراڵی بڵاوکردەوە و رایدەگەیەنێت سەربەخۆیی دەسەڵاتی دادوەری یەکێکە لە پایە بنەڕەتییەکانی سیستمی دیموکراسی و رەوتی حوکمڕانی وڵاتانی پێشکەوتوو، ئاماژە بەوەشدەکات پشتیوانی بڕیارەکانی دادگای فیدراڵی دەکەن. بافڵ جەلال تاڵەبانی، سەرۆکی یەکێتیی نیشتمانیی کوردستان رایگەیاند "سەربەخۆیی دەسەڵاتی دادوەری یەکێکە لە پایە بنەڕەتییەکانی سیستمی دیموکراسی و رەوتی حوکمڕانی وڵاتانی پێشکەوتوو. چەسپاندنی سەروەری یاسا و دادپەروەری لە پایەکانی سەقامگیری سیاسی و کۆمەڵایەتین کە زامنی مافی هاوڵاتییان و کۆمەڵگەیە لە عێراق و هەرێمی کوردستان". ئاماژەی بەوەشکرد "لە کاتێکدا ئێمە پشتیوانی خۆمان بۆ بڕیارەکانی دادگای فیدراڵی و ڕۆڵی لە پاراستنی دەستوور، دادپەروەری و سیستمی دیموکراسی دووپات دەکەینەوە، هەموو ناوزڕاندن و مامەڵەیەکی خراپیش رەتدەکەینەوە بەرامبەر دادگای باڵای فیدراڵی، کە دادگایەکی سەربەخۆ و پیشەییە کە بەشداری کارایە لە پاراستنی سیستمی سیاسی لە عیراقدا و پاراستنی سەربەخۆیی ئەوەش لەقوڵایی ئەرکە دەستووریی و نیشتمانییەکانە". وتیشی "دەسەڵاتی دادوەری عیراقی بە سەربەخۆییەکەی ناسراوە و رێزگرتن لەوسەربەخۆییەش رەنگدانەوەی پێشکەوتنی کۆمەڵگەیە و فاکتەرێکی گرنگە کەهاوڵاتییان لەسایەیدا هەست بەسەقامگیری، ئاسایش، ئۆقرەیی و زامنی مافەکانیان دەکەن". سەرۆکی یەکێتی دەڵێت "با پێکەوە کاربکەین بۆ بەهێزکردنی روحییەتی هانابردن و رێزگرتنی ڕەها بۆ یاسا، سەربەخۆیی و بێلایەنی دەسەڵاتی دادوەری جێگیر بکەین، کە سەرۆک مام جەلال رۆڵی گرنگی هەبووە لە چەسپاندنیدا لە چوارچێوەی دەستووری عێراقدا".