چنار سەعد: پارتى یەکەمی بێ رکابەرە وەک هەمیشە

  هاوڵاتى وەزارەتی پێشمەرگە ڕایگەیاند:" بە مەبەستی دوو کۆبوونەوەی جیای سەربازی و هەواڵگری، وەفدێكی باڵای وەزارەتی پێشمەرگە، بە سەرۆکایەتی  جەبار یاوەر، ئەمینداری گشتیی وەزارەت، بەرەو بەغدا بەرێکەوت. بەپێی راگەیێندراوەکە، بڕیارە دوو کۆبوونەوەی جیا لە نێوان هەواڵگریی سەربازی وەزارەتی پێشمەرگە و هەواڵگریی بەرگریی عێراق لە  فەرماندەیی ئۆپەراسێۆنە هاوبەشەکان بەڕێوەبچێت. هەر بەپێی راگەیێندراوەکە  بڕیارە لە نێو باڵەخانەی وەزارەتی بەرگری کۆبوونەوەیەک لەنێوان ئەمینداری گشتیی وەزارەت و ئەمینداریێتی گشتی بەرگریی بەغدا بکرێت، لە کۆبوونەوەکەدا گفتوگۆ لەسەر دۆخی ئێستای ناوچەکە و مەترسییەکانی داعش، هەنگاوەکان لەبارەی چارەکردنی کێشەکانی نێوان سوپای عێراق و هێزی پێشمەرگە، بۆ بەیەکەوە رۆڵ بینین لە راوەدوونان و تێکشکاندنی داعشدا دەکرێت. وەزارەتی پێشمەرگە ئاماژەی بەوەشکردووە، کۆبوونەوەکانی نێوان پێشمەرگە و بەرگریی بەردەوامە و هەردوولا بە ئامانجی بنبڕکردنی تیرۆریستان و پڕکردنەوەی ئەو ناوچانەی بۆشایی ئەمنی هەیە، لەگفتوگۆدان. هاوکات تاوتوێکردن و بەکردەیی کردنی ئەنجامدانی ئۆپەڕاسیۆنی هاوبەشی نێوان پێشمەرگە سوپا لەئەولەویەتی گفتوگۆکاندایە. لە ماوەی ئەم هەفتەیەدا ئەوە دووەمجارە وەفدی وەزارەتی پێشمەرگە سەردانی بەغدا دەکات. رۆژی شەممە 4-12-2021  فەرماندەکانی وەزارەتی پێشمەرگە و سوپای عێراق لە بەغدا کۆبوونەوە.

هاوڵاتى شانەی راگەیاندنی ئەمنی عێراق رایگەیاند: "ئاسایشمان بۆ گوندی لهێبان لە باکووری پارێزگای کەرکووک دابینکرد و هیچ ماڵێکی ئەو گوندە لەلایەن تیرۆریستانەوە نەسووتێندراوە". ئەمرۆ دووشەممە 6ی کانووەنی یەکەمی 2021، شانەی راگەیاندنی ئەمنی عێراق، لە راگەیێندراوێکدا سەبارەت بە دۆخی گوندی لهێبان لە باکووری پارێزگای کەرکووک رایگەیاند، "هێزە ئەمنییە هاوبەشەکان کار دەکەن بۆ گەڕاندنەوەی دانیشتووانی گوندی لهێبانی سەرە بە شارۆچکەی سەرگەڕان لە باکووری پارێزگای کەرکووک بۆ گوندەکەیان، چونکە ئەو گوندە دووچاری هەڕەشەی چەتەکانی داعشی تیرۆریست ببووەوە، بەڵام هێزەکانی فیرقەی 14ی سوپای عێراق و هێزێکی میحوەری 5ی پێشمەرگە ئاسایشیان بۆ ناوچەکە دابینکرد". وەک لە راگەیێندراوی شانەی راگەیاندنی ئەمنی عێراقدا هاتووە، "ئەو هەواڵانە رەتدەکەینەوە کە لە تۆڕە کۆمەڵایەتییەکان بڵاوکراونەتەوە سەبارەت بەوەی گوایە چەند ماڵێکی هاووڵاتییان لە گوندی لهێبان لەلایەن چەکدارانی تیرۆریستەوە سووتێندراون". شەوی رابردوو 05-12-2021 گوندی لهێبان لە سنوری سەرگەڕانی کەرکووک، بەهۆی هەڕەشەی داعشەوە بە تەواوی چۆڵکرا. 65 خێزان لە گوندی لهێبان نیشتەجێ بوون کە هەموویان بەهۆی هێرشی داعش گوندەکەیان چۆڵکرد و زۆربەیان چوون بەرەو شاری هەولێر و دیبەگە، بەڵام ئەمڕۆ بەشێکی زۆری ئەو خێزانانە گەڕانەوە گوندەکە. لهێبان لە بۆشایی ئەمنی نێوان سەنگەرەکانی هێزەکانی پێشمەرگە و سوپای عێراقدایە لە دامێنی زنجیرە چیای قەرەچووخ بە ئاراستەی سەرگەڕان. لە 27ی مانگی 11ی رابردووەوە، چەکدارانی داعش لە سنوورەکانی کەرکووک، گەرمیان و مەخموور پێنج هێرشیان ئەنجامداوە، بەهۆیانەوە 22 پێشمەرگە و سێ هاونیشتمانی شەهیدبوون.

هاوڵاتى وتەبێژی ڕاگەیاندنی هەپەگە ڕایگەیاند:" ئامادەین پارێزگاریی لە گەلی خۆمان بكەین، ئەگەر پێویست بێت و ڕێگەمان پێبدرێ". ئەمرۆ دووشەممە 6ی کانووەنی یەکەمی 2021،سەردار یەكتاش، وتەبێژی ڕاگەیاندنی هەپەگە سەبارەت بە هێرشەكانی داعش بۆسەر باشووری كوردستان وەڵامی پرسیاری ئاژانسی فورات نیوزی دایەوە و ئامادەیی هەپەگەی بۆ شەڕی داعش لە باشووری كوردستان دووپاتكردەوە. لەسەرەتای قسەكانیدا، سەردار یەكتاش، وتەبێژی ڕاگەیاندنی هەپەگە وتی: لە دەروروبەری كەركوك جموجوڵی داعش هەیە و گۆڕدراوە بۆ هێرشكردن، خەڵكی مەدەنیی و پێشمەرگە شەهید دەبێت، بەو بۆنەیەوە سەرەخۆشی لە خانەوادەی شەهیدان و گەلی باشوور دەكەین. دەشڵێت: داعش كە لەلایەن شەڕڤانانی ئازادیی كوردەوە تێكشكێنراوە، ئێستا دووبارە هێرشەكانیان بۆسەر گەلەکەمان زیاتر نیگەرانمان دەكات. لەبارەی سەرهەڵدانەوەی داعش لە كەركوك، وتی: ئەو جموجوڵ و سەرهەڵدانەوەیە ئەنجامی پیلانێكە و توركیا لەو پلانەدا بەدەر نییە، بەتایبەت لێدوانەكانی ئەو گروپانەی توركیا دروستی كردوون لە ناوچەكەدا ئەو هێرشانەی داعش هەیە، باشتر لە پیلانەكە تێدەگەین. وتەبێژی ڕاگەیاندنی هەپەگە ئامادەی گەریلاكانی كوردستانی دەربڕی بۆ پاراستنی خاكی كوردستان لە دەستی داعش و وتی: پاراستنی گەلەکەمان بە ئەركی خۆمان دەزانین و ئەگەر پێویست بە ئێمە بكات و ڕێگەمان بدرێت، ئێمە وەك هەپەگە ئامادەین گەلەکەمان لەو ناوچانە بپارێزین. ئاشكراشی كرد، ئەو هاوكارییانەی بۆ پێشمەرگە نێردراون لەلایەن هاوپەیمانانەوە لە بەرامبەر گەریلادا لە هەرێمەكانی پاراستنی مەدیادا جێگیركراون، لەكاتێكدا پێویستە ئەو هێزانە لەجیاتی ئەوەی لە دژی گەریلا بوەستێنرێنەوە لە دژی دووژمنانی گەلی كورد جێگیركرابانایە و جێگیركردنی هێز لەبەرامبەر گەریلادا، خزمەت بە دۆزی كورد ناكات. ئەوەشی خستەڕوو، تێكشكاندن و ڕووبەڕووبونەوەی داعش بە هێزی زۆر و پییشاندانی لە ڕاگەیاندنەوە نابێت، پێویستە بە یەكەی بچوك بچوك هێرش بكرێتە سەریان، هەپەكە لەو بوارەدا بە ئەزمونە و بە ئەنجام گەیشتووە.

هاوڵاتى  وەزارەتی سامانە سروشتییەکان دەڵێت:" لەم ڕۆژانەدا پەرلەمانتار عەلی حەمە ساڵح، بابەتێکی ناڕاستی لەبارەی قۆرخکاری لە دۆسیەی بەنزین و گازوایل و نەوتی سپی بڵاوکردووەتەوە کە دوورە لە ڕاستییەوە و هیچ بنەمایەکی نییە" ئەمرۆ دووشەممە. 6ی کانووەنی یەکەمی 2021، لە ڕاگەیەندراوێکدا كەمال ئەتروشی وەزارەتی سامانە سروشتییەکان ئەوەشدەخاتەڕوو، پاڵاوتگەی لاناز، پاڵاوتگەیەکی حکومی نییە و وەزارەتمان هیج بڕە نەوتێکی خاوی بۆ دابین ناکات و بەپیی ڕێنمایی (ژمارە 1 ی ساڵی 2020)ی وەزارەتمان، زۆر بە ڕوونی تیایدا ئاماژە بەوە کراوە کە وەزارەتمان پابەند نییە بەدابینکردنی نەوتی خاو بۆ پاڵاوتگەکان، بۆیە خۆیان بەرپرس دەبن لە دابینکردنی نەوتەکە وەک هەموو پاڵاوتگە ڕێگە پێدراوەکانی تر. ئاماژە بەوەشدەکات، بەپێی ڕاپۆرتی دامەزراوەی دیلۆیت، وەزارەتمان ڕۆژانە کەمتر لە 25هەزار بەرمیل  دەپاڵێوێت بۆ پێویستی وێستگەکانی کارەبا، لەهەمان کاتدا بری 950هەزار لیتر بەنزین بەرهەم دەهێنریت، لە هەمانکاتدا حکومەتی فیدرال، ڕۆژانە یەک ملیۆن لیتر بە نرخی 660 دینار دابین دەکات. ڕوونکردنەوەیەک لە وەزارەتی سامانە سروشتیەکان بە داخەوە لەم ڕۆژانەدا پەرلەمانتار عەلی حەمە ساڵح، بابەتێکی ناڕاستی لەبارەی قۆرخکاری لە دۆسیەی بەنزین و گازوایل و نەوتی سپی بڵاوکردووەتەوە کە دوورە لە ڕاستییەوە و هیچ بنەمایەکی نییە . بۆیە بە پێویستی دەزانین ئەم ڕاستیيانە ڕوون بکەینەوە ١- بەپێی ڕاپۆرتی دامەزراوەی (دیلۆیت)، وەزارەتمان ڕۆژانە کەمتر لە (٢٥٠٠٠ بەرمیل ) دەپاڵێوێت بۆ پێویستی وێستگەکانی کارەبا، لەهەمان کاتدا بری ٩٥٠،٠٠٠ لتر بەنزین بەرهەم دەهینریت، لە هەمانکاتدا حکومەتی فیدرال، ڕۆژانە ١٠٠٠،٠٠٠ لبتر بە نرخی ٦٦٠ دینار دابین دەکات،شێوازی دابەشکردنی بە شیوەی (نۆرە- مناوەبەیە) بەسەر ئەو بەنزینخانانەوە کە لەڕێگەی لیژنەی تایبەت لەوەزارەتمان و بەڕێوبەرایەتی نەوت و کانزاکان لە پارێزگاکان دابەش دەکرێت بەڕەچاوکردنی ناوجە هەژارنشینەکان،بەڵام لەبەر کەمی ڕێژەی بەنزین و زۆری بەنزینخانەکان توانای دابینکردن بو هەموو بەنزینخانەکان کەمە، ئەو کومبانیایانەی بە گواستنەوەو کڕینی بەنزینیش ڕاسپێردراون لەگەڵ ئەو بەنزینخانانەی دەیفرۆشن، پابەند کراون بە مەرج و ڕێنماییەکانی وەزارەت و نرخی فرۆشتن کە وەک هاوکاری بە ٦٩٠ دینار بۆ لیترێک دانراوە، ئەمەش چاودێری چڕ دەکرێت لە ڕێگەی لیژنەکان لە پارێزگاکان و پۆلیسی نەوت و گاز بە جۆرێک چەندین بەنزینخانە کە سەرپێچیان کردووە داخراون و سزای مادی دراون. سەبارەت بە فرۆشتنی بەنزین لە زۆر بەنزینخانە بە زیاتر لەو نرخە، ئەوە بەنزینی تیجاریەو نرخەکەی پابەندە بە نرخی برێنت کە نرخێکی جیهانییە،جیا لەوەی بازاڕی سووتەمەنی بازاڕێکی ئازادە. ٢-سەبارەت بە (نەوتی سپی) : سەرەرای بڕیاری (ژ.١١٩) ئەنجومەنی وەزیران،وەزارەتمان بە هیج شێوەیەک ڕێگری لە هاوردەکردنی سووتەمەنی نەکردووه و لە پێناو پاراستنی تەندروستی هاووڵاتییان، وەزارەتمان بەهیج شێوەیەک ئاسانکاری ناکات بۆ هێنانی هیج سووتەمەنیەک کە کوالیتیەکەی گونجاو نەبێت. ئەگەر ڕێگریش کرابێت ئەوە بە دلنیاییەوە تەنیا بەهۆی نەبوونی مۆڵەتی وەزارەتمان بووە کە هەندی کەس بی بەربرسانە بەرامبەر تەندروستی هاووڵاتییان هەوڵیانداوە بەڕێگای نەگونجاو هاوردەی بکەن. ٣-سەبارەت بە (نرخی نەوتی سپی) : نرخی نەوتی سپی کە لە (پلات) بە نزیکەیی دەتوانین پشت بە بەرهەمی (جێت)، ببەستین لەماوە نزیکەی ٢٠ ڕۆژ پێش ئەمڕۆ، ئەگەر وا دابنێین ئەو ماوەیەی پێویست بووه تا بگاتە هەرێم، ئەوا بؤ هەر تەنێک لە ١٥/١١/٢٠٢١ (٧١٦) $ بوو، دوای هەموو تێچوویەکی تا دەگاتە هەرێم، نرخەکەی بۆ هەر بەمیلێک نزیکەی ١٤٠$ دەبێت . لەهەمانکاتدا دوو جۆر نەوتی سیی بەرهەمی ناوخۆی پاڵاوگەکانی عیراق هەیە  و بەتیجاری لە بازاڕی بۆرسەی پارێزگاکان بەپێی کوالیتی بەم شێوەیەیە:  پارێزگای هەولێر:  سیلڤەر ٢٠٠- نرخ (١٥٥،٠٠٠ دینار برمیل) سیلڤەر ١٥٠٠ - نرخ (١٤٥،٠٠٠ دینار برمیل) نرخی تیجاری بەنزینخانە (١٧٠،٠٠٠ دینار) پارێزگای سلێمانی:  سیلڤەر ٢٠٠-نرخ(١٥٠،٠٠٠ دینار برمیل) سیلڤەر ١٥٠٠-نرخ(١٤٥،٠٠٠ دینار برمیل) نرخ تیجاری بەنزینخانە(١٦٥٠٠٠ دینار) پارێزگای دهۆک  سیلڤەر ٢٠٠-نرخ(١٦٠،٠٠٠ دینار برمیل) سیلڤەر ١٥٠٠-نرخ(١٥٥٠٠٠ دینار برمیل) تیجاری بەنزینخانە(١٧٦،٠٠٠ دینار برمیل) ٤-سەبارەت بە (پالاوتگەی لاناز): پاڵاوتگەی لاناز، پاڵاوتگەیەکی حکومی نییە و وەزارەتمان هیج بڕە نەوتێکی خاوی بۆ دابین ناکات و بەپیی ڕێنمایی (ژ. ١ ی سالی ٢٠٢٠)ی وەزارەتمان، کە لە ڕۆژنامەی (وقایع) دا بڵاوکراوەتەوە، زۆر بە ڕوونی تیایدا ئاماژە بەوە کراوە کە وەزارەتمان پابەند نییە بەدابینکردنی نەوتی خاو بۆ پاڵاوتگەکان،بۆیە خۆیان بەرپرس دەبن لە دابینکردنی نەوتەکە وەک هەموو پاڵاوتگە ڕێگە پێدراوەکانی تر، بەهۆی بەرز بوونەوەی نرخی برێنت و کەمیوونەوەی هاوردەکردنی بەرهەمی بەنزین بەشێوەیەکی زۆر بەرجاو، وەزارەتمان هەموو هەوڵێکی خۆی خستە گەڕ بۆ دابینکردنی بەنزین بەنرخ و کوالیتیەکی گونجاو لە پێناو هاوکاریکردنی هاووڵاتییان. پالاوگەی ناوبراو وەک هاوکاری و پابەندبوون بە بڕیاری وەزارەتمان، بڕێکی بەنزینی بەشیێوەیەکی کاتی کە لەتوانای بوو، نرخی ٧٣٠ دینار دابینی کرد و بە پێی بڕیاری لیژنەی تایبەتی وەزارەتمان، بەسەر بەنزینخانەکان دابەش کرا. ٥- سەبارەت بە ناوی (نەبەز محمد) : لە هیج بازگەیەک، جگە لە مۆڵەتی وەزارەتمان کە بۆ دڵنیابوونەوەیە لە کوالیتی سووتەمەنی ئەویش لە پێناو پاراستنی گیانی هاووڵاتیان، هیچ جۆرە رێگرییەک ناکرێت و هیچ پارەیەکیش وەرناگیرێت و بە هیچ شێوەیەکیش ڕێگەی پێ نادرێت . هەر کەس و لایەنێکیش ئەو کارە بکات، ڕێکاری یاسایی بەرامبەر دەگیرێتەبەر.  سەبارەت بە دەنگۆی هەبوونی ٢٠٠٠ ملیۆن لیتر گازیش لای کەسێک ، هەر بۆ زانیاری  ، دابینکردنی ئەو برە گازە ، ڕۆژانە پێویستی بە پاڵاوتنی زیاتر لە (٥٠،٠٠٠) بەرمیل نەوتی خاوە! واتە مانکانە زیاتر لە (١،٥٠٠،٠٠٠) بەرمیل کە ئەمەش لە خەیاڵ دەچێت و دوورە لە ڕاستییەوە.

هاوڵاتى وه‌زاره‌تی پێشمه‌رگه‌ی حكومه‌تی هه‌رێمی كوردستان رایگه‌یاند، به‌ هه‌ماهه‌نگی له‌گه‌ڵ ژووری ئۆپراسیۆنه‌كانی نه‌ینه‌وای سه‌ر به‌ سوپای عیراق، هێزه‌كانی پێشمه‌رگه‌ له‌ گوندی لهێبا جێگیر ده‌كرێن. له‌ راگه‌یه‌ندراوێكی وه‌زاره‌تی پێشمه‌رگه‌ی حكومه‌تی هه‌رێمی كوردستاندا هاتووه‌: به‌یانی ئه‌مڕۆ دووشه‌ممه‌ 6ی كانوونی یه‌كه‌می 2021، هێزێکی پێشمەرگەی کوردستان بۆ پاراستنی سەرو ماڵی هاوڵاتیانی کورد گەیشتە گوندی لهێبان. ئاماژه‌ی به‌وه‌شداوه‌: دوای گەیشتن و چوونە ناوەوەی پێشمەرگە بۆ گوندەکە کۆبونەوەیەک لە نێوان فەرماندەکانی هێزی پێشمەرگەی کوردستان و فەرماندەکانی ژووری ئۆپەراسیۆنەکانی نینوی ئەنجامدراو بۆ ئەو مەبەستەش هەماهەنگی لە نێوان پێشمەرگەی کوردستان و سوپای عیراقدا هەیە. دوو شەو بەرلەئێستا لە گوندی لهێبانی ناحیەی‌ سەرگەڕانی‌ پارێزگای‌ کەرکوک داعش هێرشیکرد و دانیشتوانی‌ ناوچەکەش رووبەڕوویان بوونەوە، دوێنێش، دانیشتوانەکەی گوندەکەیان جێهێشت و هۆکارەکەشیان بۆ هاوکارینەکردنیان لەلایەن سوپای عیراق و پێشـمەرگە گەڕاندووەتەوە. لە ئەمڕۆدا، دانیشوانی گوندەکە گەڕانەوە شوێنەکانی خۆیان و هێزێکی زۆری پێشمەرگە و سوپای عیراق گەیشتنە گوندی لهێبان. ئەوەش لەکاتێکدایە، شەوی رابردوو، جارێکی دیکە چەکدارانی داعش لە گوندی قەرەسالم لە ناحیەی پردێی پارێزگای کەرکوک هێرشیانکردە سەر سەنگەرێکی هێزی پێشمەرگە، بەوهۆیەوە چوار پێشمەرگە شەهید بوون. ماوەی زیاتر لە هەفتەیەکە، چەکدارانی داعش هێرشەکانیان بۆ سەر سەنگەرەکانی هێزەکانی پێشمەرگە زیاتر کردووە و بەوهۆیەوە 22 پێشمەرگە و سێ هاوڵاتی شەهید بوون.

 هاوڵاتى لەدوای 12 كاتژمێر كۆبونەوە لەگەڵ خوێندكارانی سەرجەم زانكۆ و پەیمانگاكان بافڵ جەلال تاڵەبانی، به‌ڵێنیداوه‌ لە رێگەی تیمی یەکێتی لە حکومەتی ھەرێم کار بۆ گەڕاندنەوەی دەرماڵەی خوێندکاران بکات، بڕیاریشیداوه‌ ھەموو داواکاری خوێندکارانی 27 زانکۆ جێبەجێ بکات. ​ئەمڕۆ دووشه‌ممه‌ 6ی كانوونی یه‌كه‌می 2021، میدیای فه‌رمی یه‌كێتی بڵاویكرده‌وه‌: بافڵ جەلال تاڵەبانی، بۆ ماوەی زیاتر لە 12 كاتژمێر لەگەڵ سەرجەم نوێنەری خوێندکارانی زانکۆ و پەیمانگاکانی 14 شار و قەزا و ناحیە لە مەکتەبی سیاسی یەکێتی کۆبوەوە و دوای گوێگرتن لە داواکاری ھەموویان، بڕیاریدا سەرجەم داواکارییەکانیان جێبەجێ بکات.  بافڵ جەلال تاڵەبانی بڕیاریدا لە رێگەی تیمی یەکێتی لە حکومەتی ھەرێم کار بۆ گەڕاندنەوەی دەرماڵەی خوێندکاران بکات و بڕیاریشدا بێ بەرامبەر پاس بۆ گواستنەوەی خوێندکارانی دەرەوەی شار و بەشەناوخۆییەکان دابین بکات، بڕیاریشیدا سەرجەم خزمەتگوزارییەکانی بەشەناوخۆییەکان بە ئینتەرنێتیشەوە بۆ خوێندکاران دابین بکات. ئەوەشی بڵاوکردووەتەوە: "یەکێکی تر لە بڕیارەکانی بافڵ تاڵەبانی دوورخستنەوەی دەستی حزبە لە زانکۆ و پەیمانگاکان، دڵنیایشیدا بە خوێندکاران کە کوالێتی خوێندن بۆ پێگەیاندنی نەوەیەکی ھۆشیار و داھێنەر باشتر بکرێت".  

  هاوڵاتى وەزارەتی رۆشنبیری ڕایگەیاند:" بڵاوکردنەوەی ئەو وێنە و ڤیدیۆیانەی داعش بەرهەمیان دەهێنێت، قەدەغەیە". شەوی رابردوو لە تۆڕە کۆمەڵایەتییەکان بەشێک لە پەیج و میدیاکان ئەو وێنانەیان بڵاوکردەوە کە داعش بڵاویکردنەوە و باسی لەوە کردبوو کە ساتی هێرشکردنە سەر هێزەکانی پێشمەرگەیە. لە نووسراوی وەزارەتی رۆشنبیریی حکومەتی هەرێمی کوردستان کە ئەمڕۆ دووشەممە 06-12-2021 دەرچووە، ئاماژە بەوە کراوە، "ئاگاداری گشت میدیا بیندراوەکان و پۆرتاڵەکانیان دەکەینەوە کە بە هیچ جۆرێک ئەو وێنە و ڤیدیۆیانە بڵاونەکەنەوە کە لەلایەن تیرۆریستانی داعشەوە بەرهەمهێندراون و تایبەتن بە هێرشەکانیان بۆسەر هێزی پێشمەرگە و خەڵکی سڤیل". هەر لەو نووسراوەی وەزارەتی رۆشنبیریدا هاتووە، "بڵاوکردنەوەی ئەم وێنە و ڤیدیۆیانە بە بێئاگایی ئەم کەناڵانە دەبن بە رایەڵێکی میدیایی تیرۆریستان و لەوێوە ترس و تۆقاندن و دڵەڕاوکێ لەنێوان هاووڵاتییاندا بڵاودەکەنەوە، ئەمەش پێچەوانەی ماددەی سێیەم بڕگەی سێیەمە لە رێنوێنیی ژمارە 1ی ساڵی 2014ی وەزارەتی رۆشنبیری و لاوان، تایبەت بە رێکخستنی فریکوێنسی سپەیس لە هەرێمی کوردستان". هەر کەناڵێک پێچەوانەی ئەو گشتاندنە هەڵسوکەوت بکات، وەزارەتی رۆشنبیری دەڵێت، "رووبەڕووی لێپرسینەوەی یاسایی دەبێتەوە، پاراستنی ئاسایشی نیشتمانی و ئاشتی کۆمەڵایەتی ئەرکی سەر شانی هەموولایەکە، بۆیە پێویستە پابەندی یاسا و رێنوێنییەکان بن".

  هاوڵاتى شەوی رابردوو لەسەر کەلی قەرەسالم لە ناوچەی شێخ بزێنی شارۆچکەی پردێ لە سنووری کەرکوک، چەکدارانی داعش هێرشیان کردە سەر سەنگەرێکی پێشمەرگە و به‌هۆی هێرشه‌كه‌وه‌ چوار پێشمه‌رگه‌ شه‌هید بوون و ژماره‌یه‌كیش بریندارن. چەکدارانی داعش لەماوەی هەفتەیەکدا چوار هێرشیان بۆ سەر هێزەکانی پێشمەرگە لە چەند ناوچەی جیاواز و گوندە کوردنشینەکانی ناوچە کێشەلەسەرەکان کرد، بەهۆیەوە تاوەکو ئێستا 22 پێشمەرگە و سێ هاونیشتمانی شەهید بوون، کە یەکێکیان منداڵێکی تەمەن 10 ساڵ بوو.  هەر لەبارەی هێرشەکەی شەوی رابردووی چەکدارانی داعش، وەزارەتی پێشمەرگەی هەرێمی کوردستان راگەیێنراوێکی بڵاوکردەوە و وتی "ئەمشەو یەکشەممە 5-12-2021 تیرۆریستانی داعش پەلامارێکی دیکەی دڕندانەیان بۆ سەر خاڵێکی سەنگەرەکانی لیوای 126ـی هێزی پێشمەرگە لەنزیک ی گوندی " قەرەسالم" ئەنجامدا. لەم پەلامارە ترسنۆکانەیەدا، شەهید و بریندار لەریزەکانی هێزی پێشمەرگە هەیە. تیرۆریستان راوەدوونران و بارودۆخەکە لەژێر کۆنتڕۆڵدایە." بەهۆی رووداوەکانی 16ی ئۆکتۆبەری 2017ەوە و دروستبوونی بۆشایی ئەمنی لەنێوان هێزەکانی پێشمەرگە و سوپای عێراق، هێرشەکانی چەکدارانی داعش کە لەناوەڕاستی 2017 ەوە کۆتایی هاتنی خەلافەتەکەیان راگەیێنرا، دەستیانپێکردووەتەوە و ماوەی 10 رۆژ دەبێت ئەو هێرشانە پتر هێزەکانی پێشمەرگە و گوندنشینانی کوردیان کردووەتە ئامانج.

هاوڵاتى بەپێی ئاماری ئەنجوومەنی هەناردەکارانی تورکیا لە 11 مانگی رابردوودا لە ناو وڵاتانی رۆژهەڵاتی ناوەڕاستدا، تورکیا زۆرترین کاڵای بۆ هەرێمی کوردستان و عێراق هەناردە کردووە، لەو ماوەیەدا بایی 8 ملیار و 7 ملیۆن و 574 هەزار دۆلار کاڵای بۆ هەرێمی کوردستان و عێراق هەناردە کردووە.  بەگوێرەی داتاکانی ئەنجوومەنی هەناردەکارانی تورکیا، کە رۆژی شەممە 4ی کانوونی یەکەمی 2021 بڵاوکراوەتەوە، هەناردەی تورکیا لە 11 مانگی ئەمساڵدا بەبەراورد بە هەمان وادە لە ساڵی 2020دا بە رێژەی 33.8% زیادیکردووە. واتا هەناردەی تورکیا لە 151 ملیار و 800 ملیۆن و 621 هەزار دۆلارەوە گەیشتووەتە 203 ملیار و 141 ملیۆن و 161 هەزار دۆلار.   زۆرترین ئەو کاڵایانەی لە وادەیەدا تورکیا بۆ وڵاتانی رۆژهەڵاتی ناوەڕاست هەناردەی کردووە بریتین لە، مادەی کیمیایی و بەرهەمەکانی، دانەوێڵە، پاقلەمەنی، چەرەزات، پۆڵا، مۆبیلیات، کاخەز و بەرهەمەکانی دارستان لەگەڵ خشڵ، کە 52.8%ی کاڵا هەناردەکراوەکان پێکدەهێنن. لە ماوەیەدا تورکیا بایی  3 ملیار و 570 ملیۆن و 787 هەزار دۆلار مادەی کیمیایی و بەرهەمەکانی، 3 ملیار و 234 ملیۆن و 885 هەزار دۆلار دانەوێڵە، پاقلەمەنی، چەرەزات وبەرهەمەکانی و  2 ملیار و 910 ملیۆن و 784 هەزار دۆلاریش پۆڵا هەناردە کراوە.  تورکیا لە ماوەی ئەو 11 مانگەدا زۆرترین هەناردەی بۆ هەرێمی کوردستان و عێراق بووە. لەو ماوەیەدا هەناردەی تورکیا بۆ هەرێمی کوردستان و عێراق بەبەراورد بە هەمان وادەی ساڵی 2020 بە رێژەی 22.3% زیادیکردووە و لە 6 ملیار و 545 ملیۆن و 758 دۆلارەوە بۆ 8 ملیار و 7 ملیۆن و 574 هەزار دۆلار.  کۆمپانیاکانی ئیستەنبووڵ لە 11 مانگی ئەمساڵدا ئاستی هەناردەیان بۆ هەرێمی کوردستان و عێراق بەبەراورد بە ساڵی رابردوو بە رێژەی 33.6% زیادیکردووە و لە 1 ملیار و 809 ملیۆن و 630 هەزار دۆلارەوە بووەتە 2 ملیار و 417 ملیۆن و 194 هەزار دۆلار.  کۆمپانیاکانی ئیستەنبووڵ هەر لەو ماوەیەدا، بۆ میسر بایی 1 ملیار و 481 ملیۆن و 558 هەزار دۆلار، بۆ ئیمارات بایی 1 ملیار و 295 ملیۆن و 823 هەزار دۆلار، بۆ ئێران بایی 913 ملیۆن و 292 هەزار دۆلار، بۆ لوبنان بایی 774 ملیۆن و 563 هەزار دۆلار و بۆ قەتەر بایی 509 ملیۆن و 75 هەزار دۆلار کاڵایان هەناردە کردووە.  

هاوڵاتى شێروان شێروانى پەیامێکى بڵاوکردەوە و ڕایگەیاند:" پەیمانی ئازادی یان ئازادی، كەڵبژین یان ناژین، عەشقێكە كە هەموو ترسێك لە بەرامبەرماند ا بێمانا دەبێت، دەشڵێت" ئەگەر ئەوان دەمانكوژ ن و ڕاوماندەنێن بۆئەوەی مەملەكەتێك لە ترس و مردن پێشانبدەن، ئەوا هێزی بەرخودان لە هێزی مردن زۆر زۆر لای ئێمە گەورەترە". ئەمڕۆ یەکشەممە 5ی كانوونی یه‌كه‌می 2021، شێروان شێروانى پەیامێکى بڵاوکردەوەوڕایگەیاند:" سڵاو لە بەخودانی ناوزیندانەوە بۆ  پاكڕەوانی ئازادیی ئەمساڵ لەسەر گڵكۆی سەردەشت عوسمانەوە پەیمانی سەردەم و ساڵێكی تر نوێدەكەینەوە، پەیمانێك كە سەردەشتی نەمر پێشەكییەكەی داڕتووە و بە خوێنی تۆیش گەشەی كردووە و بە بەخودانی من و هاوڕێكانیشم بەردەوام دەبێت". ئاماژەى بەوەشکردوە، پەیمانی ئازادی یان ئازادی، كەڵبژین یان ناژین، عەشقێكە كە هەموو ترسێك لە بەرامبەرماند ا بێمانا دەبێت، دەشڵێت" ئەگەر ئەوان دەمانكوژ ن و ڕاوماندەنێن بۆئەوەی مەملەكەتێك لە ترس و مردن پێشانبدەن، ئەوا هێزی بەرخودان لە هێزی مردن زۆر زۆر لای ئێمە گەورەترە". شێروانی جەخت دەکاتەوە کە ئەوان زاڵمن، بەڵام هەرگیز بەهێز نین، ئەوان قات لەبەرن، بەڵام هەرگیر ڕۆشنبیر و ڕۆشنفكر نین، ئەوان حەشامەتێكی چەكدارین، بەڵام هەرگیز نێچیرڤان نین، ئەوان دەیەها كورسین، بەڵام دەنگ نین، ئەوان سەدان كەناڵن، بەڵام هەرگیز خاوەن دۆز نین، ئەوان خاوەنی چەندین زیندانین، بەڵام مرۆڤێكیان پێدەستەمۆ ناكرێت. لەکۆتاییدا دەشڵێت"ئێمە بە مردنیش هەر نەمرین، ئەوان بە ساغیش هەر مردوون، ئێمە لە زیندانین، بەڵام ئازادین، ئەوان بەرەڵان، بەڵام زیندانین، ئێمە سومعەو شكۆمان گەواهیدەرمانە، ئەوان سومعە سوك و گومان لەخۆن". شێروان شێراوانی یەکێک بوو لەو دەیان رۆژنامەنوس و چالاکوانانەى بادینان کە دەستگیرکرا بوو لە ١٦ی شوباتى ئەمساڵ دادگای هەولێر سزای شەش ساڵ زیندانى بەسەر شێروان شێروانى و چوار لە هاوڕیێیەکانیدا سەپاند.

 هاوڵاتى   ئەندامی ئەنجومەنی باڵای سیاسی و بەرژەوەندییەکانی یەکێتی ڕایگەیاند:" وردبینی سەركردایەتی سیاسی كوردستان لەم قۆناغەدا و لەم دانوستانەدا، لەوەدایە دەست بە شادەماری پرۆسەی سیاسی عێڕاق بگرێ‌ و پێ‌ لەسەر ئامانجە گرنگەكانی كوردایەتیش دابگرێ‌". ئەمڕۆ یەکشەممە 5ی كانوونی یه‌كه‌می 2021، مەلا بەختیار، ئەندامی ئەنجومەنی باڵای سیاسی و بەرژەوەندییەکانی یەکێتی لە نوسینێكیدا لە فەیسبوكی تایبەتی خۆی  بەناونیشانی( دانوستان لەنێوان موچە و كێشەی هاوچەرخی كوردایەتیدا ) ڕایگەیاند:" وردبینی سەركردایەتی سیاسی كوردستان لەم قۆناغەدا و لەم دانوستانەدا، لەوەدایە دەست بە شادەماری پرۆسەی سیاسی عێڕاق بگرێ‌ و پێ‌ لەسەر ئامانجە گرنگەكانی كوردایەتیش دابگرێ‌. لەلایەكەوە مەیدان و پێگەی عێڕاق گرنگە. لە بەرانبەریشدا خوێندنەوەی هاوكێشەكانی ناو عێڕاق و لایەنەكانیش، هاوكات ئاستەنگەكانی ناو عێڕاق لەم دانوستانەدا، لەگەڵ حكومەتی تازە پێكهێنراودا گرنگە. سەركەوتن لەم دانوستانەدا، چارەنوسسازە. بە پێچەوانەشەوە، ژێركەوتنی، بۆ ناوخۆی كوردستان مەترسیدارە". لەبەشێكی دیكەی وتارەكەیدا نوسیویەتی:"  لە ناوخۆی كوردستانیشدا، گەرچی گەندەڵی و كەموكوڕیش زۆرن، بەڵام ناكرێ‌ هەڵوێست لە ناوخۆدا، زاڵبكرێ‌ بەسەر راپەڕاندنی ئەركەكانیان لە بەغداد. لەهەمان كاتدا، چاو لە گەندەڵی و كەموكوڕیەكان نەپۆشرێ‌!". دەقی وتارەكەی مەلا بەختیار:. دانوستان، ئەنجامێكی سیاسی زۆربەی كێشە سیاسیەكانی جیهانە. لە كوردستانیشدا، تاقە راپەڕین و شۆڕش، لە سەردەمی عوسمانی و لە دوای دامەزراندنی دەوڵەتی عێڕاقەوە ( ١٩٢١ ) سەرداران و سەركردایەتی كوردایەتی كلاسیكدا، ناوبەناو دانوستانیان لەگەڵ حكومەتەكاندا هەر كردووە. گرنگترین دانوستان لە سەرەتای هاتنی كۆڵۆنیالیستی بەڕیتانیا و دامەزرانی حكومەتی پاشایەتیدا، دانوستانی شێخی نەمر و بەڕیتانیا و دەسكەلاكانیان بوو.. كە لە ئەنجامدا گەیشتە كۆمەڵەی گەلان و پەیمانی سیڤەریش ( ١٩٢٠ ) بەڵام لە ژێر فشاری كەمالیەكاندا، بە رێككەوتنی ( لۆزان – ١٩٢٣ ) هەڵیان وەشاندەوە. لەدوای راپەڕینی بارزانیەكان و راپەڕین و حكومەتی شێخ مەحمودەوە، هەتا شۆڕشی ئەیلول، دانوستانی ستراتیژی نەكراوە. لە ( ١٩٦٣ )وە، بۆ بۆ یەكەمین جار، دەروازەی دانوستان و دیبلۆماسیەتی فراوان بۆ كوردایەتی سەردەمی جەنگی سارد كراوەتەوە. مەخابن سەری نەگرت. هەتا بەیاننامەی ١١/ی ئازاری ١٩٧٠ دانوستانی تریش لە ١٩٦٣ وە بۆ ١٩٧٠ كراون، بەڵام بێهودە بوون. گرنگترین دانوستان كە گەیشتە بەیاننامەیەكی هەرە گرنگ، دانوستان و بەیاننامەی ١١/ی ئازاری ١٩٧٠، بڕیار بوو دوای ( ٤ ) ساڵ ئۆتۆنۆمی بێتە دی.. بەڵام كاتێك بەعسیەكان لەگەڵ شورەوی و فەرەنسا و رۆژهەڵاتی ئۆروپا، پەیوەندییان تۆكمە و تەكنەلۆژیای جەنگییان دەستەبەر كرد و حیزبی شیوعیش چووە پاڵیان، لە بەیاننامەكە پاشگەز بوونەوە و ١٩٧٤ جەنگیان دژی گەلی كوردستان سەپاندەوە. لە شەڕدا رژێم دەرەقەتی پ.م نەهاتن. بۆیە خیانەتنامەی جەزائیریان لەگەڵ شا دا ٦/٣/١٩٧٥ مۆر كرد. دەكرا شۆڕشی كوردستانم ئەم خیانەتنامەیە رەت بكاتەوە و ستراتیژی شۆڕشەكە لە شەڕی بەرەییەوە، بۆ شەڕی پارتیزانی بگۆڕێ‌، هەروەكو چۆن ساڵی ١٩٧٦ یەكێتی و پارتی هاوزەمان شۆڕشی پارتی زانییان بەرپاكرد. بەڵام بە داخەوە، لەبری گۆڕینی تاكتیكی شەڕ، كۆتایی بە شۆڕشی ١٤ ساڵە هێنرا. رژێم، وای دەزانی كوردستان چیكە شۆڕشی تیا بەرپا ناكرێتەوە. رێك بە پێچەوانەوە، بۆ یەكەمین جار بوو لە مێژوودا، دوای ساڵێك و سێ‌ مانگ، سەرلەنوێ‌ شۆڕش بەرپاكرایەوە. ئەم جارەشیان نەك یەك لایەن، بەڵكو دوو لایەنی سەرەكی بەرپایان كرد ( یەكێتی و پارتی ). پاشان لایەنەكانی تریش بەتایبەتی پاسۆك و حیزبی شیوعی. لە شۆڕشی نوێدا، دوو جار دانوستانی مێژوویی لەسەر ئامانجی ئەوكاتەی كوردستان كراوە. یەكەمیان : ١٩٨٣- ١٩٨٥ لە نێوان یەكێتی و رژێمی عێڕاق. لەبەر ئەوەی یەكێتی ئامادە نەبوو دەست بەرداری كەركوك بێ‌ و ئامادەش نەبوو بچێتە ناو بەرەی نیشتیمانی عێراقەوە بە رابەرایەتی بەعس.. سوریش بوو لەسەر ئاوەدانكردنەوەی دێهاتەكان و نەهێشتنی تەعریب، دانوستانەكە شكستی خوارد. دووەمیان: دانوستانی نێوان بەرەی كوردستانی و رژێمی عێڕاق، دوای شكستی عێڕاق لە داگیركردنی كوییت، كەچی سەدام بە چەشنێ‌ نوقمی خەیاڵپڵاوی دیكتاتۆریەت بوبوو، وای دەزانی ئەمریكا كە جەنگی كوییتی راگرت و كوردیش دوچاری كۆڕەو كرا، ئیتر كورد دوچاری هەمان چارەنوسی خیانەتنامەی جەزائیر دەكرێتەوە. ئەم بۆچونەی سەدام، كورتبینی بوو لەو دۆخە جیهانیە و لە خوێندنەوەی سیستەمی نوێی جیهان.. دوای جەنگی سارد! هەر ئەم كورتبینییەش سەری خوارد!! سەدام وای دەزانی، بۆی دەچێتە سەر بە داهاتی نەوت، زلهێزەكان دەستەمۆ بكات. نەیدەزانی كاروانی سیاسەتی نێودەوڵەتی دوای جەنگی سارد، دیكتاتۆریەتی سەدامی جێ‌ هێشتووە و ستراتیژیەكی نوێ‌ لە رۆژهەڵاتی ناوەڕاستدا دەگوزەرێ‌!! كە بەداخەوە، جارێكی دیكە، سازش لەنێوان زلهێزەكان و گەورە وڵاتانی ئیقلیمی، پێچەوانەی چارەنوسی كوردایەتی و دیموكراسی، دێتە دی سەركردایەتی سیاسی كوردستان، لەو دۆخەدا باشتر سیاسەتی نێودەوڵەتی خوێندبوەوە.. بۆیە كە دانوستانی دوای كۆڕەوی بەهاری ١٩٩١ شكستی خوارد ( بەرەی كوردستانی ) ئامانجەكانی زیاتر كرد و كردیە فیدراڵی. یەكێتی لەو هەلومەرجەدا رۆڵی داینەمۆی بۆ چەسپاندنی فیدراڵ گێڕا. لەم دۆخە بە دواوە، دانوستان ئاراستەكەی گۆڕدرا. لە ئاراستەی دانوستان لەگەڵ رژێم، بۆ ئاراستەی سەلماندنی فیدراڵ لەناو هێزەكانی ئۆپۆزسیۆندا. ئەمەش كارێكی قورس بوو.. هەتا توانرا، لە كۆنگرەی سەلاحەدینەوە (١٩٩٢) پاشان كۆنگرەی نیویۆرك و لەندەن ( ١٩٩٢ – ٢٠٠٢ ) بە دانوستان و ململانێ‌، فیدراڵیزم پەسەند بكرێ‌. ئەمەش سەركەوتنێكی سیاسی گەورە بوو. لەدوای روخانی بەعس و پێكهێنانەوەی عێڕاقەوە، لە قوناغی دامەزراندنەوەی وڵاتەكە، كێشەی كورد و سەركردایەتی سیاسی كوردستان، وەكو هاوبەشی عێڕاق دەچونە سەر مێزی دانوستان. ئەنجامەكەشی پەسەندكردنی دەستوری هەمیشەیی عێڕاق، بە مادەی ( ١٤٠)وە بوو. ئەمەش لە دوای (٨٢) ساڵ لە دامەزراندنی عێراق و ئەو هەموو شۆڕش و دانوستانە بێ‌ ئەنجامانەی لە عێراقدا كران، وەرچەرخانی سیاسی- دەستوری بوو. ئێستا ( ١٦ ) ساڵ بەسەر نوسینی دەستوری هەمیشەیی عێڕاق تێ‌ دەپەڕێ. بەڵام حكومەتەكانی عێڕاق، بە هەمان روحیەتی ( ٢٠٠٣ ) دانوستان لەگەڵ كورد ناكەن، ئەو كاتە وەكو هێزی سەرەكی هاوبەشی عێڕاق سەیری هێزە سیاسیەكانی كوردستانیان دەكرد، ئێستا روانگەیان گۆڕدراوە. مادەی (١٤٠) فەرامۆش دەكرێ‌، نەوت و گاز بە گەزی خۆیان دەپێون. بودجە و موچە كراوەتە كێشەی سەرەكی. كێشە سیاسی یە سەرەكیەكان كراوەتە لاوەكی!! ئەمەش بەڕای ئێمە، مەترسیدارترین روداوی سیاسییە لە دوای روخاندنی سەدامەوە. بۆیە، ئەركی سەركردایەتی سیاسی كوردستانە، بە هەموو لایەنەكانیەوە، بودجە و موچە، وەكو دوو بڕگەی پاكێجی دانوستان، بخەنە بەرنامەی دانوستانەوە. لە بەرنامەكەدا..كێشەی سیاسی وەكو مافێكی دیموكراسی – دەستوری بكرێتە ئەركی سەرەكی.. مادەی ١٤٠ و نەهێشتنی تەعریبی كۆن و نوێ‌، بكرێتە بنەما. ئینجا، قەرەبوو كردنەوەی ئەنفال، كیمیاباران، راگواستنی گوندەكان و تەواوی قوربانیەكانی كوردستان،.. لەگەڵ حكومەتی نوێی عێڕاق بكرێنە بەشێكی پاكێجی دانوستان، كە بڕیارە وەكو حكومەتی هەڵبژاردنی پێشوەختە هەر شیعە پێكی بهێنێ‌. ئەم حكومەتە سەرەنجامی خۆپیشاندانی خەڵك و ململانێی گەورەی نێوان شیعە و سونە و لایەنەكان.. هەروەها لە دۆخی رێكخستنەوەی داعشەكان و مۆڵ خواردنیان لە عێڕاق دوای پاشەكشەیان لە سوریا پێك دێ‌. لە دۆخێكی وادا، مایەی نیگەرانیە كە هێشتا ماڵی كورد یەك نەخراوە. شیعەكان كارێكی ئاقڵانەیان كرد، كە گرفتە ناوخۆییەكانیان لە هی كوردستانیەكان زۆرترە ، كەچی توانییان شەختەی نێوانیان بتوێننەوە و پێ‌ دەچێ‌ بەرەو رێككەوتن و پێكهێنانی حكومەتیش پێشكەون. كورد، بە دوا خستنی رێككەوتنی هێزە سیاسیەكان، كایەیەكی گرنگی سیاسی لەسەرەتای پێكەوە نانی حكومەتدا، لەدەستدا. بەڵام بێ‌ كوردیش مەحاڵە حكومەتی عێڕاق پێك بێ‌؛ كەوابێ‌ بۆ دانوستان، كورد پێویستە پاكێجی تەواوی ئامانجەكانی ئامادە بكات؛ ئینجا بەدیقەتەوە، ریزبەندی هێزە عێڕاقیەكان، ئەوانەی بۆ پێكەوە نانی حكومەت رێك دەكەون و ئەوانەی رێكیش ناكەون، هەڵوێست بەرانبەریان وەربگرێ‌. راستە كورد گیرۆدەی كێشە ناوخۆیی و قەیرانی ئابوری و، هی تریشە، ئەمەش خالێ‌ لاوازی دانوستانە؛ بەڵام لە بەرانبەریشدا، عێڕاق و هێزە عێڕاقیەكانیش، لە ناوچەكەدا و لە جیهاندا، هەروەها لە ناو خۆیاندا، كێشەیان لە كورد زیاتر هەیە. زۆربەی خەڵك لێیان ناڕازیە و ئاستەنگی ئابوری زۆریشیان هەیە. جگە لە گرفتی هەمە چەشنەی گەندەڵی و خزمەتگوزاری.. تاد. وردبینی سەركردایەتی سیاسی كوردستان لەم قۆناغەدا و لەم دانوستانەدا، لەوەدایە دەست بە شادەماری پرۆسەی سیاسی عێڕاق بگرێ‌ و پێ‌ لەسەر ئامانجە گرنگەكانی كوردایەتیش دابگرێ‌. لەلایەكەوە مەیدان و پێگەی عێڕاق گرنگە. لە بەرانبەریشدا خوێندنەوەی هاوكێشەكانی ناو عێڕاق و لایەنەكانیش، هاوكات ئاستەنگەكانی ناو عێڕاق لەم دانوستانەدا، لەگەڵ حكومەتی تازە پێكهێنراودا گرنگە. سەركەوتن لەم دانوستانەدا، چارەنوسسازە. بە پێچەوانەشەوە، ژێركەوتنی، بۆ ناوخۆی كوردستان مەترسیدارە، دەستەبەری پێشوەختەش، یەكێتی ریزی كوردایەتیە.. كوردایەتی هاوچەرخ! ئەم كوردایەتیە هاوچەرخە، دەبێ‌ تاقیكردنەوەكانی دانوستانەكانی رابردوو، سود لێوەربگیرێ‌.. لە هەمان كاتدا، لە روانگەیەكی هاوچەرخی سەردەمی جیهانگیریەوە، بیر لە هێزەكانی كوردایەتی بكرێ‌ و بەگیانی لێبوردەییەوە، ریزەكانی ئەم هێزانە لەسەر رێبازیكی هاوبەش رێكبخاتەوە. بەدی هێنانی ئەركەكانی كوردایەتی لە بەغداد، ئەركی سەرەكی هەموو لایەنەكانی كوردستانە.. لە ناوخۆی كوردستانیشدا، گەرچی گەندەڵی و كەموكوڕیش زۆرن، بەڵام ناكرێ‌ هەڵوێست لە ناوخۆدا، زاڵبكرێ‌ بەسەر راپەڕاندنی ئەركەكانیان لە بەغداد. لەهەمان كاتدا، چاو لە گەندەڵی و كەموكوڕیەكان نەپۆشرێ‌!  

هاوڵاتى ئەمڕۆ مووچەى وەزارەتى پەروەردە دابەش کراو بڕیارە سبەینێ‌ مووچەی ئەنجومەنی ئاسایشی هەرێمی كوردستان دابەشبكرێت. بەپێی ئەو خشتەیەی وەزارەتی دارایی و ئابووری حكومەتی هەرێمی كوردستان بڵاویكردووەتەوە، سبەینێ‌ دووشەممە مووچەی مانگی 11ی ئەنجومەنی ئاسایش دابەشدەكرێت. تائێستا مووچەى سەرجەم وەزارەت و شوێنەکان دابەش نەکراوە ئەوەش بەوتەى بەرپرسانى حکومەت بەهۆى کۆ نەبوونەوە داهاتەکانى ناوخۆو نەهاتنى ٢٠٠ ملیارەکەى بەغداوە.

  هاوڵاتى وەزیری پێشمەرگەی حکومەتی هەرێمی کوردستان داوا لە سێ سەرۆکایەتیەکەی هەرێم دەکات، "باڵاترین نیشانه‌ی ئازایه‌تی بەو خێزانە ببەخشرێت کە سێ کوڕیان شەهیدبوو". ئەمڕۆ یەکشەممە 5ی كانوونی یه‌كه‌می 2021،  شۆڕش ئیسماعیل وەزیری پێشمەرگە لەكاتی سەردانكردنی سەنگەرەكانی پێشمەرگە ڕایگەیاند، "له‌گه‌ڵ سوپای عێراق گه‌یشتوینه‌ته‌ رێككه‌وتنێكی سه‌ره‌تایی ئومێدمان وایه‌ نه‌ك سنورێكی دیاریكراو بۆ داعش دابنرێت، به‌ڵكو به‌ته‌وازی بنه‌بڕی بكه‌ین، ئێمه‌ ده‌مێكه‌ هاوارمانه‌ و داوامانكردوه‌ له‌ هاوپه‌یمانان به‌ڵام سوپای عێراق خه‌مسارد بوه‌ و هه‌مو ئه‌وانه‌ی له‌ ناوچه‌ جێناكۆكه‌كان شه‌هیدبون به‌رپرسیارێتیه‌كه‌ی ده‌گه‌ڕێته‌وه‌ بۆ سوپای عێراق چونكه‌ خه‌مسارد بوه‌ له‌وه‌ی پێكه‌وه‌ ئه‌و ناوچانه‌ پڕبكرێته‌وه‌ و ئۆپه‌راسینۆنی هاوبه‌ش بكرێت و نه‌یه‌ڵین داعش به‌و ئازادیه‌ له‌ هه‌ركوێیه‌ك ویستی چالاكی بكات". هەروەها وتیشی "داوا له‌ هه‌رسێ سه‌رۆكایه‌تیه‌كه‌ی هه‌رێمی كوردستان ده‌كه‌م باڵاترین نیشانه‌ی ئازایه‌تی به‌و خێزانه‌ ببه‌خشرێت کە سێ کوڕیان شەهید بووە". بەوتەی وەزیری پێشمەرگە، له‌گه‌ڵ سوپای عێراق گه‌یشتوینه‌ته‌ رێككه‌وتنێكی سه‌ره‌تایی ئومێدمان وایه‌ نه‌ك سنورێكی دیاریكراو بۆ داعش دابنرێت.

هاوڵاتى وەزارەتی کارەبای حکومەتی هەرێمی کوردستان رایگه‌یاند:"  بەهۆی هاتنی سەرما و زیادبوونی خواست لەسەر کارەبا، کاتژمێرەکانی پێدانی کارەبای نیشتمانی بۆ 10-12 کاتژمێر کەمبووەتەوە. ئەمڕۆ یەکشەممە 5ی كانوونی یه‌كه‌می 2021، وەزارەتی کارەبای حکومەتی هەرێمی کوردستان راگەیێندراوێکی لەبارەی کارەبای نیشتمانی بڵاوکردەوە و رایگەیاند: "هاووڵاتییانی کوردستان ئاگادار دەکەینەوە کە بەهۆی هەڵکشانی خواست لەسەر کارەبا بۆ 6000 مێگاوات و هاتنی شەپۆلێکی سەرما و سۆڵە، ماوەکانی پێدانی کارەبا بۆ 10-12 کاتژمێرێک کەمبووەتەوە". ئێستا لە هەرێمی کوردستان، توانای بەرهەمهێنانی کارەبا بۆ هاوبەشانی کارەبا 2800 مێگاواتە. وەزارەتی کارەبا ئاماژە بەوەدەکات، کار بۆ گەڕاندنەوەی دوو یەکەی وێستگەی هەڵمیی خەبات دەکات و تاوەکو کۆتایی ئەم هەفتەیە 300 مێگاوات کارەبا بۆ ناو تۆڕی نیشتمانی کارەبا دەگەڕێتەوە و دۆخی کارەبا باشتر دەبێت.  

هاوڵاتى جێگری سەرۆکوەزیرانی هەرێمی کوردستان رایگه‌یاند:" پیاوانی پۆلیس شایەنی رێزلێگرتنن بۆ ئەو ئەرکە نیشتمانییەى بەجێى دەگەیەنن لەپاراستنی ئارامی و جیبەجێکردنی یاسا و خزمەتکردنی کۆمەڵگە‌، هەرئەوانیش یەکەم وێستگەى پاراستنی کۆمەڵن لەتاوان و هەڵسوکەوتە چەوتەکان". ئەمڕۆ یەکشەممە 5ی كانوونی یه‌كه‌می 2021، قوباد تاڵەبانی، جێگری سەرۆکوەزیرانی هەرێمی کوردستان لە پەیامێکدا نووسیویەتی :" پرسە و سەرەخۆشی ئاراستە‌ی خانەوادە و هاوڕێ و ئازیزانی نەقیبی کۆچکردوو (محەممە‌د لەتیف عەبدولکەریم) دەکەم و هیوای زوو چاکبوونەوە بۆ بریندارانی دیکەی ئەو رووداوە دەخوازم، داواکارم لە دەزگا ئەمنییەکان بکەرى ئەو رووداوە رادەستی دادگە بکەن بۆئە‌وە‌ی بەپێى یاسا سزاى دادپەروەرانەى خۆی وەربگرێت." جێگری سەرۆکوەزیرانی هەرێمی کوردستان ئاماژەی بۆ ئەوەشكردووە "پەرۆشیمان بۆ جێبەجێکردنی یاسا لەم هەرێمەدا دووپات دەکەینەوە و راشیدەگەیێنین کە پیاوانی پۆلیس شایەنی رێزلێگرتنن بۆ ئەو ئەرکە نیشتمانییەى بەجێى دەگەیێنن لە پاراستنی ئارامی و جێبەجێکردنی یاسا و خزمەتکردنی کۆمەڵگە‌، هەر ئەوانیش یەکەم وێستگەى پاراستنی کۆمەڵن لە تاوان و هەڵسوکەوتە چەوتەکان." شەوی رابردوو لە گەڕەکی تانجەرۆ لە شاری سلێمانی تەقە لە مەفرەزەیەکی پۆلیسی بەڕێوەبەرایەتیی تووندوتیژی دژی ژنان لە کرا و بەهۆیەوە نەقیبێکی پۆلیس بەناوی (محەممەد لەتیف) کوژرا و چەند پۆلیسێکی دیکە برینداربوون.