هاوڵاتى سەرۆکی بۆردی دانەگاز رایگەیاند: " کۆی تێچووی پڕۆژەکەش 630 ملیۆن دۆلارە، کە ئامانجی پڕۆژەکە زیادکردنی ئاستی بەرهەمهێنانی گازە بەڕێژەی 50٪ بۆ 690 ملیۆن پێ سێجا لە رۆژێکدا". بەگوێرەی راگەیێندراوێکی کۆمپانیای دانەگازی ئیماراتی، دەزگای دارایی پەرەپێدانی نێودەوڵەتیی ئەمریکا بۆ ماوەی حەوت ساڵ پاڵپشتی لە پڕۆژەی فراوانکردنی کێڵگەی کۆرمۆر دەکات و کۆی تێچووی پڕۆژەکەش 630 ملیۆن دۆلارە، کە ئامانجی پڕۆژەکە زیادکردنی ئاستی بەرهەمهێنانی گازە بەڕێژەی 50٪ بۆ 690 ملیۆن پێ سێجا لە رۆژێکدا. مەجید جەعفەر، بەڕێوەبەری جێبەجێکاری کۆمپانیای کرێستن پێترۆڵیەم و سەرۆکی بۆردی دانەگاز رایگەیاند: "ئەو گرێبەستەی لەگەڵ دەزگای دارایی پەرەپێدانی نێودەوڵەتیی ئەمریکا واژۆمان کردووە جەخت لە گرنگی پەرەپێدانی سەرچاوەکانی گازی سرووشتى لە هەرێمی کوردستان دەکاتەوە، ئەوەش لەپێناو پشتگیریکردنى گەشەى ئابووریی هەرێمی کوردستان". مەجید جەعفەر راشیگەیاند، سەرەڕای ئەو ئاڵنگارییانەی کە کۆرۆنا بەدوای خۆیدا هێناونی، ئەوان لە وەبەرهێنانەکانیان بەردەوام بوون و رێککەوتنەکەشیان لەگەڵ دەزگای دارایی پەرەپێدانی نێودەوڵەتیی ئەمریکا سەرکەوتنێکی گەورەیە بۆ پەرەدان بە سەرچاوە سرووشتییەکانی هەرێمی کوردستان. هاوکات دێڤ جاگەدێسان، بەڕێوەبەری جێبەجێکاری کۆمپانیای دەزگای دارایی پەرەپێدانی نێودەوڵەتیی ئەمریکا رایگەیاند، "وەبەرهێنانەکانی DFC لە کێڵگەی کۆرمۆر دەستگەیشتنی خەڵکی هەرێمی کوردستان بە وزە زیاتر دەکات، ئەو پڕۆژەیەش دەرخەری وەبەرهێنانی بەردەوامی ئەمریکایە لە هەرێمی کوردستان". زیادکردنی بەرهەمهێنانی گازی هەرێمی کوردستان پڕۆژەی KM-250 قۆناخی یەکەمی فراوانکردنی کێڵگەی کۆرمۆرە بۆ زیادکردنی ئاستی بەرهەمهێنانی گاز بۆ رۆژانە یەک ملیار پێ سێجا. بڕیاربوو لە ساڵی 2020 دەست بە فراوانکردنەکە بکرێت، بەڵام بەهۆی تەشەنەکردنی ڤایرۆسی کۆرۆنا کارەکانی پڕۆژەکە بۆ ماوەیەک وەستان و لە مانگی نیسانی ئەمساڵدا دەست بە پڕۆژەکە کرا، بڕیاریشە لە نیسانی ساڵی 2023 قۆناخی یەکەمی فراوانکردنەکە تەواو بێت. پێرل پێترۆڵیەم دەڵێت، تاوەکو ئێستا کۆمپانیای دانەگاز و هاوبەشەکانی بڕی 2.1 ملیار دۆلار وەبەرهێنانیان لە کێڵگەی کۆرۆمۆر کردووە و بڕی زیاتر لە 341 ملیۆن بەرمیل گازی هاوتای نەوت لە کێڵگەکە بەرهەمهاتووە کە بێ پچڕان گازی سرووشتییان بۆ وێستگەکانی چەمچەماڵ و بازیان دابینکردووە، ئەوە جگە لە دابیبکردنی گازی شلکراوە کە بوونەتە هۆی کەمبوونەوەی تێچووەکانی حکومەت و بوواژنەوەی ئابووریی هەرێمی کوردستان. دکتۆر پاتریک ئاڵمان وارد، بەڕێوەبەری جێبەجێکاری کۆمپانیای دانەگاز لەبارەی وەبەرهێنانەکانیان لە هەرێمی کوردستان رایگەیاند: "لەگەڵ هاوبەشەکانمان لە پێرل پێترۆڵیەم شانازی بە پەرەپێدانی کەرتی گازی هەرێمی کوردستان دەکەین کە ئامانج لێی دابینکردنی گازی پاک و بووژانەوەی ئابووریی هەرێمی کوردستانە. ئەو رێککەوتنە سەلمێنەری متمانە بەردەوامەکەمانە بە هەرێمی کوردستان و داهاتووە پرشنگدارەکەی". کۆنسیۆرتۆمی پێر پێترۆڵیەم ئاماژەی بەوە داوە لە کەمکردنەوە کاریگەری گۆڕانی کەشوهەوا بە وەبەرهێنانەکانیان لە گازدا هاوکاری هەرێمی کوردستانیان کردووە بەشێوەیەک فڕێدانی 42 ملیۆن تۆن لە گازی دوانەئۆکسیدی کاربۆنیان کەمکردووەتەوە، ئەوەش بە دابینکردنی گازی سرووشتی بۆ وێستگەکانی بەرهەمهێنانی کارەبا. پێر پێترۆڵیەم دەڵێت، لەنێوان ساڵانی 2018 و 2021 وێستگەی گازی کۆرمۆر سوودی لە زیادبوونی بەرهەمهێنانی گاز بە رێژەی 45٪ بینیوە بەشێوەیەک ئاستی بەرهەمهێنانی رۆژانە گەیشتووەتە 106 هەزار بەرمیل هاوتای نەوت، ئەو پڕۆژەیەش گەورەترین پڕۆژەی گازە لە هەموو عێراق. لە مانگی نیسانی ساڵی 2007دا دانەگاز و کرێستن پێترۆڵیەم گرێبەستیان لەگەڵ حکومەتی هەرێمی کوردستان واژۆکرد بۆ وەبەرهێنان لە کێڵگە گازییەکانی کۆرمۆ و چەمچەماڵ لە هەرێمی کوردستان، گرێبەستەکە لە بەرهەمهێنان، بەبازاڕکردن و فرۆشتنی گاز و بەرهەمەکانی پێکدێت. دوای 15 مانگ لە کێڵگەی کۆرمۆر دەستکرا بە بەرهەمهێنانی گازی سرووشتی. لە تشرینی یەکەمی ساڵی 2008 توانرا بۆ مەبەستی پیشەسازی سوود لە گازە وەربگیرێت. لە ساڵی 2009، کۆنسیۆرتۆمی پێرل پێترۆڵیەم دروستبوو کە کۆمپانیاکانی دانەگاز و کرێسنت پێترۆڵییەم وەک دوو هاوبەشی سەرەکی و کۆمپانیاکانی OMV، MO و RWE پێکدێت. هەر یەک لە دانەگاز و کرێسنت پێترۆڵییەم خاوەنی 35٪ی پشکەکان و OMV، MO و RWEش هەر یەکەیان خاوەنی 10٪ی پشکەکانی وەبەرهێنانن لە کێڵگەی گازی کۆرۆمۆر.
هاوڵاتی وەزارەتی دارایی و ئابوری هەرێمی کوردستان رایگەیاند:" لە 1839 دۆسیەی پلە تایبەتەکان 1170 كەیس هەموارکراوەتەوە تەنها 669 كەیس ڕاگیراوە". ئەمڕۆ 7ی ئەیلولی 2021 ئاوات جەناب نوری وەزیری دارایی و ئابوری سەردانی بەڕێوبەرایەتی خانەنشینی كرد و بە وردی تاوتوێی پرۆسەی پێداچوونەوەی بە خانەنشینانی پلە تایبەت كرد. وەزارەتی دارایی و ئابوری هەرێمی کوردستان لەراگەیەنراوێکدا رایگەیاند:" بە وردی تاوتوێی پرۆسەی پێداچونەوەی بە خانەنشینانی پلە تایبەت كراوە و بۆ هەمو لایەك ئاشكرای دەكەین كە تاوەكو ئێستا پێداچونەوەی بە دۆسیەی خانەنشینی پلە تایبەتەكان كە ژمارەیان 1839 كەسە، زیاتر لە 60% كۆتایی پێهاتوە، لەوانەش (140) سەدو چل دانە دۆسیەی وەزیر موچەکانیان بۆ خەرج کراوە و (42) چل و دو دۆسیەی وەزیریش موچەکانیان ڕاگیراوە چونکە بە فعلی وەزیر نەبون". وەزارەتی دارایی ئەوەشی راگەیاندووە كە هەر كەس زانیاری زیاتری لەسەر كەیسەكەی ویست دەتوانێت پەیوەندی بكات بەم ژمارە موبایلانەوە:. 07504918109 07701590809 بەڕێز/ لەشكری ئیبراهیم حەسەن جێگری بەڕێوبەری گشتی خانەنشینی دەقی رونکردنەوەکەی وەزارەتی دارایی: پاش ئەوەی ئەمڕۆ 7ی ئەیلولی 2021 ئاوات جەناب نوری وەزیری دارایی و ئابوری سەردانی بەڕێوبەرایەتی خانەنشینی كرد و بە وردی تاوتوێی پرۆسەی پێداچوونەوەی بە خانەنشینانی پلە تایبەت كرد. بۆ هەموو لایەك ئاشكرای دەكەین كە تاوەكو ئێستا پێداچوونەوەی بە دۆسیەی خانەنشینی پلە تایبەتەكان كە ژمارەیان 1839 كەسە، زیاتر لە 60% كۆتایی پێهاتووە. بۆ بەدواداچوونی دۆسییەكانی خۆیان، پلە تایبەتە بەرێزەكان دەتوانن بە پەیوەندیكردن بەم دوو ژمارەیەوە زانیاری تەواو لەسەر دۆسیەكانیان وەرگرن: 07504918109 07701590809 بەڕێز/ لەشكری ئیبراهیم حەسەن جێگری بەڕێوبەری گشتی خانەنشینی ئاماری پلە تایبەتەکانی خانەنشین کە موچەیان هەموارکراوەتەوە و ئەوانەشی كە موچەیان ڕاگیراوه: بەرێوەبەری گشتی 369دۆسیەی بەرێوەبەری گشتی هەموارکراوەتەوە هیچ کەم و کوڕی لە دۆسیەکانیان نیە تەواو بووە مووچەکانیان بۆ خەرج کراوە. 396 دۆسیەی بەرێوەبەری گشتی دۆسیەکانیان خزمەتیان تێدانیە موچەکانیان ڕاگیراوە کە بە بڕیاری تایبەت خانەنشین بوون. راوێژکار 193 دۆسیەی ڕاوێژکار هەموارکراوەتەوە هیچ کەم و کوڕی لە دۆسیەکانیان نیە تەواو بووە مووچەکانیان بۆ خەرج کراوە. 145دۆسیەی راوێژکار مووچەکانیان راگیراوە چونکە دۆسیەکانیان خزمەتی تێدانیە تاکو ڕاژەکانیان نەهێنەوە مووچەکانیان بۆ خەرج ناکرێت بەڵام لەکاتی هێنانەوەی ڕاژەیان کە بوو بە 15 ساڵ مووچەکانیان بۆ راستدەکرێتەوە جیاوازی مووچەکەیان بۆ خەرج دەکرێت. بریکاری وەزیر 74 دۆسیەی بریکاری وەزیر هەموارکراوەتەوە هیچ کەم و کوڕی لە دۆسیەکانیان نیە تەواو بووە مووچەکانیان بۆ خەرج کراوە. 86 دۆسیەی بریکاری وەزیر مووچەکانیان راگیراوە چونکە دۆسیەکانیان خزمەتی تێدانیە تاکو ڕاژەکانیان نەهێنەوە مووچەکانیان بۆ خەرج ناکرێت بەڵام لەکاتی هێنانەوەی ڕاژەیان کە بوو بە 15 ساڵ مووچەیان بۆ راستدەکرێتەوە جیاوازی مووچەکەیان بۆ خەرج دەکرێت. وەزیر 140 دۆسیەی وەزیر مووچەکانیان بۆ خەرج کراوە بە ڕێژەی (%25) کاتێک راژەیان هێناوە بە گوێرەی راژەکەیان مووچەیان بۆ راستدەکرێتەوە جیاوازی مووچەیان بۆ خەرج دەکرێت نابێت ڕێژەی مووچەیان لە (%50) زیاتر بێت . 42 دۆسیەی وەزیر مووچەکانیان ڕاگیراوە چونکە بە فعلی وەزیر نەبوونە بەڵام لە هەمان کاتدا پێشمەرگە بوونە لەرێزی بزووتنەوەی رزگاریخوازی کوردستان کاتێک ڕاژەی پێشمەرگاتیان هێناوە مووچەیەک بە شایستەی خۆیان لە خانەنشینی پێشمەرگە بۆ دابین دەکرێت. ئەندام پەرلەمان 394 دۆسیەی ئەندام پەرلەمان مووچەکانیان بۆ خەرج کراوە بە ڕێژەی (%25) کاتێک راژەیان هێناوە بە گوێرەی راژەکەیان مووچەیان بۆ راستدەکرێتەوە جیاوازی مووچەیان بۆ خەرج دەکرێت نابێت ڕێژەی مووچەیان لە (%50) زیاتر بێت . کۆی گشتی ئەو دۆسیانەی کەهەموار کراوەتەوە کە دەگاتە 1170 دانە ئەم بە پێی یاسای چاکسازی ژمارە (2) ی ساڵی 2020 مووچەکانیان بۆیان خەرج کراوە. کۆی گشتی ئەو دۆسیانەی کە ڕاگیراوە کە دەگاتە 669 دانە ئەم مانگە مووچەیان بۆ خەرج ناکرێت چونکە بە پێی یاسای چاکسازی ژمارە (2) ی ساڵی 2020 ڕاژەیان تێدانیە یاخود لە ١٥ ساڵ کەمترە.
هاوڵاتى وەزیری پێشمەرگەی حكومەتی هەرێم داوا لە هەنگاریا دەكات، لە ڕێگەی كه‌ناڵه دیبلۆماسیه‌كانیانەوە رێگە لە پڕۆسه‌ی به‌عه‌ره‌بكردن و ڕاگواستنی زۆره ملێی كورد بگرێت لە ناوچە دابڕێنراوەكان. ئەمڕۆ سێ شەممە، 7ی ئەیلوولی 2021 وەزارەتی پێشمەرگە بڵاویكردەوە، شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان، د.پ. دیزمیس تاماش، مامۆستای زانكۆ له هه‌نگاریا و دۆستی دێرینی كورد و كۆلۆنێل پیته‌ر لوشتاك، به‌رێوبه‌ری ئۆفیسی په‌یوه‌ندییه سه‌ربازییه‌كان له‌كونسوڵخانه‌ی هه‌نگاریا و شاندێكی یاوه‌ری كۆبویەوە. لەسەرتای دیدارەكەدا وەزیری پێشمەرگە وتی: هه‌مووان له‌وه تێگه‌یشتوون هێزی پێشمه‌رگه‌ی كوردستان شه‌ڕی له‌بری جیهان و پاراستنی ئازادی و ئاشتی كۆمه‌ڵگه‌ی مرۆڤایه‌تی كرد. وەك لە ڕاگەیەندراوەكەدا هاتووە، لە دیدارەكەدا وەزیری پێشمەرگە، باسی له خراپی دۆخی ناوچه كوردستانییه‌كانی ده‌ره‌وه‌ی هه‌رێم و به‌رده‌وامی پڕۆسه‌ی به‌عه‌ره‌بكردن و راگواستنی زۆره ملێ كرد، بۆ ئه‌مه‌ش وتی: هه‌نگاریا دۆستی دێرینی كورده و خوازیارم له‌رێگه‌ی كه‌ناڵه دیبلۆماسیه‌كانتانه‌وه به‌رۆڵی ئه‌رێنیی خۆتان هه‌ڵسن بۆ رێگه‌گرتن له‌و پڕۆسه نامرۆڤانه‌یه كه دژ به به‌به‌هاكان و مافی مرۆڤه.
هاوڵاتى زەبیحوڵڵا موجاهید، وتەبێژی بزوتنەوەی تاڵیبان لە کۆنگرەیەکی رۆژنامەوانیدا حکومەتی نوێی ئەفغانستانی راگەیاند ناوی سەرۆك وەزیر و وەزیرەكانی حكومەتە كاتیەكەی ئەفغانستان: مه‌لا محه‌مه‌د حه‌سه‌ن ئاخوند سه‌رۆكی حكومه‌ت مه‌لا عه‌بدولغه‌نی براده‌ر جێگری سەرۆكی حكومەت عەبدولسەلام حەنەفی جێگری سەرۆك وەزیران ئەمیرخان موتەقی وەزیری دەرەوە محەمەد یەعقوب موجاهید وەزیری بەرگری خەلیل حەقانی وەزیری پەنابەران هیدایەتوڵا بەدری وەزیری دارایی ئەسەدەدین حەقانی وەزیری ناوخۆ محمەمەد حەنیف وەزیری ئابوری مەلا خەیروڵا خێرخوا وەزیری رۆشنبیری و راگەیاندن مەلا عەبدولحەكیم شەرعی وەزیری داد نوروڵا نوری وەزیری هۆزەكان‌و سنور پێشتر سوهەیل شاهین وتەبێژی بزوتنەوەی تاڵیبان ڕایگەیاندبوو بەمنزیكانە حكومەتی ئەفغانستان ڕادەگەیەنن و ئەمڕۆش تاڵیبان ڕایگەیاند، حكومەتی كاربەڕێكەر دەستبەكار دەبێت.
هاوڵاتى وته‌بێژی هاوپه‌یمانی نێوده‌وڵه‌تی دژ به داعش، كه ئه‌مه‌ریكا سه‌ركردایه‌تی ده‌كات ئاشكرایكرد، داعش ئه‌و توانایه‌ی نییه خاكی عێراق داگیر بكات. بەپێی هەواڵێکی ئاژانسی فەرمی حکومەتی عێراق "واع"، واین ماروتۆ، وته‌بێژی هاوپه‌یمانی نێو ده‌وڵه‌تی دژ به داعش راشیگه‌یاندووە، داعش سوود له بۆشایی ئه‌منی وه‌رده‌گرێت، له‌سه‌ر ئاستی چه‌ند شارێك چالاكییه‌كانیان ده‌بینرێن، هاوشێوه‌ی رێكخراوی ئه‌لقاعیده له ساڵی 2010. روونیكرده‌وه، هێزه هێراقییه‌كان و هاوپه‌یمانی نێو ده‌وڵه‌تی، پێشوه‌خته كار ده‌كه‌ن بۆ لێدانی شانه‌كان نووستووه‌كان و بنكه سه‌ربازییه‌كانیان و سه‌رچاوه داراییه‌كانی داعش. ئاماژه‌ی بەوەشکردووە، داعش ناتوانێت خاكی عێراق داگیر بكات، به‌م دواییه‌ش داعش ژماره‌یه‌ك هێرشی كرده سه‌ر هێزه ئه‌منییه‌كانی عێراق، بۆ به‌رپه‌چدانه‌وه‌یان، مسته‌فا كازمی وه‌ك سه‌ركرده‌ی هێزه چه‌كداره‌كانی عێراق، به‌ڵێنی داوه به دوایانه‌وه بێت، ئه‌گه‌ر زانیاری هه‌بێت داعش له عێراق و سووریا زیندوو ده‌بێته‌وه، هاوپه‌یمانی به‌رده‌وام ده‌بێت له گورز وه‌شاندن.
.jpg)
هاوڵاتى وەزیرى دارایی هەرێم رایگەیاند:" یاسایی چاكسازی جیاوازی لە نێوان هیچ پلە و پۆستێك ناكات دەبێت هەمووان پابەندی یاسای چاكسازی بن". دەڵێت:" خۆم راستەوخۆ سەپەرشتى دۆسیەى خانەنشینى پلە تایبەتەکان دەكەم". سەرلەبەیانی ئەمرۆ 7ی ئەیلولی 2021 بەپێی راگەیەنراوێکى وەزارەتى دارایی، ئاوات جەناب نوری وەزیری دارایی و ئابوری بە یاوەری دكتۆر عبدولحەكیم خسرەو سەرۆكی فەرمانگەی هەماهەنگی و بەدواداچوونی ئەنجومەنی وەزیران، سەردانی بەڕێوبەرایەتی گشتی خانەنشینی كرد. ئاماژە بەوەشکراوە، لەو سەردانەدا، ئاوات جەناب نوری وەزیری دارایی و ئابوری و دكتۆر عبدولحەكیم خسرەو لەگەڵ جێگری بەرێوبەری خانەنشینی كوردستان كۆبوونەوە ، بەوردی تاوتوێی پرۆسەی پێداچوونەوەی بە خانەنشینی پلە تایبەتەكانی كرد. وەزیری دارایی و ئابوری لە كۆبوونەوەكەدا ئاماژەی بەوە كرد، یاسایی چاكسازی جیاوازی لە نێوان هیچ پلە و پۆستێك ناكات دەبێت هەموومان پابەندی یاسای چاكسازی بین. وەزیری دارایی و شاندی یاوەری هەروەها سەردانی بەشەكانی خانەنشینی كرد و وتى " ئێمە هەمیشە پاڵپشتی ئێوەین ، بۆ ئەوەی جێبەجێكردنی یاسایی چاكسازی ببێتە چەترێك بۆ كۆكردنەوەی دادپەروەری كۆمەڵاتی."
هاوڵاتى سەرۆکی حکومەتی هەرێمی کوردستان رایگەیاند:" کابینەی نۆیەم بەردەوام دەبێت لەسەر درێژەدان بە پرۆسەی چاکسازی و رووبەڕووبوونەوەی گەندەڵی و نەهێشتنی بەهەدەردانی سامانی گشتی". سەرۆکی حکومەتی هەرێمی کوردستان لەگەڵ سەرۆکی دەستەی دەستپاکی هەرێمی کوردستان کۆبووەوە و رایگەیاند، کابینەی نۆیەم بەردەوام دەبێت لەسەر درێژەدان بە پرۆسەی چاکسازی و رووبەڕووبوونەوەی گەندەڵی و نەهێشتنی بەهەدەردانی سامانی گشتی. رۆژی سێشەممە 7-09-2021، مەسرور بارزانی، سەرۆکی حکومەتی هەرێمی کوردستان پێشوازی لە ئەحمەد ئەنوەر، سەرۆکی دەستەی دەستپاکی کرد. بەپێی راگەیێندراوێکی ماڵپەڕی حکومەتی هەرێمی کوردستان لە دیدارەکەدا سەرۆکی حکومەت دووپاتیکردەوە کە "کابینەی نۆیەمی حکومەتی هەرێمی کوردستان، سوورە لەسەر درێژەدان بە پرۆسەی چاکسازی و رووبەڕووبوونەوەی گەندەڵی و نەهێشتنی بەهەدەردانی سامانی گشتی." هەر لە کۆبوونەوەکەدا وەک لە راگەیێندراوەکە هاتووە، "جەخت لە گرنگیی هەماهەنگیی نێوان دەزگا پەیوەندیدارەکانی هەرێمی کوردستان کرایەوە، لە پێناو رووبەڕووبوونەوەی گەندەڵی و خزمەتکردنی زیاتری هاووڵاتییان و نەهێشتنی قۆرخکاری و رووتین."
هاوڵاتى سەرۆکی هەرێمی کوردستان رایگەیاند:" سوپاسی وڵاتانی یەکێتی ئەوروپا دەكەم کە لە شەڕی داعش هاوکاریی عێراق و هەرێمی کوردستانیان کردووە سەرۆکی هەرێمی کوردستان دوای کۆتاییهاتنی کۆبوونەوەی لەگەڵ جۆزێپ بۆرێل، بەرپرسی سیاسەتی دەرەوەی یەکێتی ئەوروپا لە کۆنگرەیەکی رۆژنامەوانی هاوبەشدا باسی نێوەڕۆکی کۆبوونەوەکەی کرد و ئاماژەی بەوە کرد، "باسی بەرەنگاربوونەوەی داعش و هەڵبژاردنمان کرد." جۆزێپ بۆرێلیش ئاماژەی بەوە کرد، هەرێمی کوردستان و هێزی پێشمەرگە رۆڵی گەورەیان هەبووە لە تێکشکاندنی داعش، ئەوانیش بەردەوام دەبن لە هاوکاریکردنی هێزەکانی پێشمەرگە و هەرێمی کوردستان لەو شەڕە. نێچیرڤان بارزانی، سەرۆکی هەرێمی کوردستان ئاماژەی بەوەشکرد، "سەردانەکەی جۆزێپ بۆرێل نیشانەی هاوسۆزیی یەکێتیی ئەوروپایە بۆ عێراق و هەرێمی کوردستان." سەرۆکی هەرێمی کوردستان وتی، سەردانەکەی بۆرێل "لەکاتێکی گرنگدایە و بەرزی دەنرخێنین." لەبارەی نێوەڕۆکی کۆبوونەوەیشیان لە نیوەڕۆخوانێکدا، سەرۆکی هەرێمی کوردستان رایگەیاند، "ئاسایش و سەقامگیریی پەیوەندییەکانی یەکێتیی ئەوروپا لەگەڵ عێراق، پەیوەندی و کێشەکانی نێوان هەولێر و بەغدا، شەڕی دژی داعش و هەڕەشەکانی، هەڵبژاردنەکانی عێراق و گرنگیی بەشداریکردنی تیمەکانی چاودێریی یەکێتیی ئەوروپا، دۆخی ناوچەکە، پرسی کۆچ و چەند بابەتێکی دیکەی جێگەی بایەخی هاوبەش." سەرۆکی هەرێمی کوردستان سوپاسی وڵاتانی یەکێتیی ئەوروپای کرد کە لە شەڕی داعش هاوکاریی عێراق و هەرێمی کوردستانیان کردووە و یارمەتیی مرۆییان پێشکەش کردوون. گۆڕانی کەشوهەوا کە کاریگەریی لەسەر تەواوی گۆی زەوی هەیە، هەرێمی کوردستانیش لەو کاریگەرییانە بەدەر نییە. نێچیرڤان بارزانی، سەرۆکی هەرێمی کوردستان رایگەیاند، "تا دێت روونتر دەبێتەوە کە گۆڕانی کەشوهەوا بۆ ئاسایش و پێشکەوتنی عێراق مەترسییە." سەرۆکی هەرێمی کوردستان وتیشی بەوە "خۆشحاڵن" کە سێ پارێزگای هەرێمی کوردستان لە پەیمانی پارێزگارانی ئەوروپا بوونەتە ئەندام، بەهۆی ئەوەی بە پشتگیریی یەکێتیی ئەوروپا پلانی خۆگونجاندنی کەشوهەوا و وزەیان پەرەپێداوە. یەکێتیی ئەوروپایشی هاندا کە بەردەوام بێت لە پاڵپشتییەکانی.
هاوڵاتى وەزیری ناوخۆی حکومەتی ھەرێمی کوردستان رایگەیاند:" ڕێژەی تاوان لەھەرێمی کوردستان بەشێوەیەکی بەرچاو زیادیکردوە. ئەمڕۆ سێ شەممە، 7ی ئەیلوولی 2021 ڕێبەر ئەحمەد وەزیری ناوخۆی حکومەتی ھەرێم لەکۆنگرەیەکی ڕۆژنامەوانیدا ڕایگەیاند، بەھۆی نەبونی ھەماھەنگی نێوان دەسەڵاتی دادوەریی‌و ھێزە ئەمنییەکان، ڕێژەی تاوان لەھەرێم ڕوی لەھەڵکشان کردوە. وەزیری ناوخۆی ھەرێم دەشڵێت:"نابێت کێشە یاساییەکان لەڕێگەی سوڵحی عەشایەرییەوە چارەسەربکرێت". ڕێبەر ئەحمەد داوای لەدادوەرەکان کرد، ھەرکەسێک مافی ئازادبونی بەکەفالەت نەبێ، ئازادنەکرێت.
شاناز حەسەن بەڕێوەبەری گشتی ئاوو ئاوەڕۆی هەرێم جەخت لەوەدەكاتەوە نەبەستنی پێوەری ئاو هیچ سزایەكی نیەو دەشڵێت:»ئەو پارەیەی كە ئێستا لەهاووڵاتیان وەردەگیرێت تەنیا كرێی ئاوە نەك نەبەستنی پێوەری ئاو». ئاری ئەحمەد، بەڕێوەبەری گشتی ئاوو ئاوەڕۆی هەرێم لەلێدوانێكدا بەهاوڵاتى وت:»تائێستا نەبەستی پێوەری ئاو هیچ سزایەكی نیەو نە سزاكە بەپارە بۆ هیچ هاووڵاتیەك هاتووەتەوە نە لێشی وەرگیراوە». هەروەها وتیشی:» لەئێستادا ئەوەی وەردەگیرێت تەنیا كرێی ئاوە، جا بەپێوەر بێت بۆ ئەوانەی كە پێوەری ئاویان بەستووە یان بەبێ پێوەر بۆ ئەوانەی تائێستا پێوەرەكەیان نەبەستووە». هاوكات، بەڕێوەبەری گشتی ئاوو ئاوەڕۆی هەرێم باسی لەوەشكرد «ئەو هاوبەشانەی كە پێوەری ئاویان نەبەستووە، مانگانە 80 هەزاریان لێوەردەگیرێت، بەڵام ئەوانەی پێوەری ئاویان بەستووە، مانگانە 45 هەزاری بۆ دەنووسرێت لەدوای ئەوەوە بە پێوەرەكە هەژمار دەكرێت». بەستنی پێوەری ئاو لەساڵی 2015وە لەهەرێمی كوردستان لەڕێگەی پڕۆژەیەكەوە دەستی پێكرد، تائێستا نزیكەی لەسەدا 64ی بەشداربووی ئاو لەهەرێمدا پێوەری ئاوی بەستووە، لەو ژمارەیەی كە زیاتر لە 982 هەزار هاوبەشی ئاو هەیە. هەندێك لە پەرلەمانتارانی پەرلەمانی كوردستان نووسراوێكی فەرمییان داوەتە سەرۆكایەتی پەرلەمان سەبارەت بەسزادانی نەبەستنی پێوەری ئاوو رایدەگەیەنن ئەو سزادانە نایاساییە و پێویستە هەڵبوەشێنرێتەوە. عومەر گوڵپی، ئەندامی فراكسیۆنی كۆمەڵ لەپەرلەمانی كوردستان، لەلێدوانێكدا بەهاوڵاتى وت:»بەنووسراوی فەرمی داوامانكرد سەرۆكایەتی پەرلەمان حكومەت لە نایاساییبوونی سزای نەبەستنی (پێوەری ئاو)ی هاووڵاتیان ئاگاداربكاتەوەو سزاكە هەڵوەشێنێتەوەو لە بری ئەوە كار بەیاسا نوێیەكە بكەن». عومەر گوڵپی هێمای بۆ ئەوەشكرد حكومەت دەبێت لەمامەڵەكردن لەگەڵ بابەتی پێوەری ئاو بەرنامەو سیاسەتێكی نوێ بگرێتە بەر كەگونجاو بێت لەگەڵ دۆخی ژیانی هاووڵاتیان‌و كێشەو داواكانیان‌و خراپی دۆخی ئاوی خواردنەوە لەژمارەیەك شارو شارۆچكەدا. ئەو پەرلەمانتارەی كۆمەڵ پێشیوابوو لەكاتی هەڵبژاردن بەداخەوە بە پسوڵەی سزایەكی پێنجسەد هەزارییەوە لەبەردەرگای كەسوكاری شەهیدانی ئەنفال و جینۆساید وەستاون، لەكوێش؟ لەناحیەی شۆڕش و قەزای چەمچەماڵ، پسوڵەی سزای نەبەستنی ئاویان بە 500 هەزار دینار بۆ هاتووەتەوە. ئەندامێكی دیكەی پەرلەمانی كوردستان جەخت لە سزادانی هاووڵاتیان دەكاتەوە كە پێوەری ئاویان نەبەستووە. دابان محەمەد، ئەندامی فراكسیۆنی گۆڕان لەپەرلەمانی كوردستان لەلێدوانێكدا بەهاوڵاتى وت:» لەپەرلەمانی كوردستان و لەپرۆژەیاسای پاراستنی تۆڕە بنچینەكانی ئاوو ئاوەڕۆدا، رەتمان كردەوە هیچ سزایەكی هاووڵاتیان بدرێت بەهۆی نەبەستنی پێوەر». ئەم پەرلەمانتارە داواش لە هاووڵاتیان دەكات هیچ كەسێك پارەی سزای نەبەستنی پێوەری ئاو نەدات و وتی:» ئەو سزایانەی لەڕابردوو و ئێستاشدا هاتوونەتەوە، هەژمار ناكرێت، هیچ پاڵپشتییەكی یاسایی نیە بۆ نەبەستنی پێوەری ئاو، سزاكان تەنیا فشارەو ئەگەر یاساو لێپێچینەوە هەبێت، دەبێت بەرپرسانی وەزارەتی شارەوانی و ئەوانەی تێوەگلاون! سزا بدرێن نەك هاووڵاتیان». «گەورەترین سەرپێچی و كاری نایاسایی وەزارەتی شارەوانی ئەوەیە، لەماوەی رابردوودا سزای نەبەستنی پێوەری بەسەر خەڵكدا سەپاند هەر جارەو بەبڕێك، پارە لەهەندێك كەس وەرگیراوە، ئێستا لەدووڕیانی ئەوەدان ئەو پارانە بۆ خەڵك بگێڕنەوە یاخود بەردەوام بن لەسزادانی خەڵك! بۆیە پێویستە داواكاری گشتی لەسەر ئەم پرسە بێتە دەنگ»، پەرلەمانتارەكەی گۆڕان وای وت.
.jpg)
هاوڵاتى قایمقامی پارێزگای هەڵەبجە جەخت لەوە دەكاتەوە كە لەڕێگەی دوو رێكخراوی فەرەنسییەوە هاوكاری دەگەیەنرێتە پارێزگاكەیان بۆ نەخۆشخانەی كیمیاوی و ئاوەدانكردنەوەی گوندی هاوار (كاكەییەكان). دوای تەواوبوونی سەردانەكەی بۆ بەغدا، ئیمانوێل ماكرۆن، سەرۆكی فەرەنسا لەكاتی سەردانی بۆ هەرێمی كوردستانی لە بەرواری 29ی ئابی 2021، لەكۆنگرەیەكی رۆژنامەوانیدا كە لەگەڵ نێچیرڤان بارزانی سەرۆكی هەرێمی كوردستان ئەنجامیدا تێیدا باسی هاوكاری و هەماهەنگی نێوان فەرەنسا و هەرێمی كوردستانی كرد لە رووی مرۆییەوە. ئیمانوێل ماكرۆن سەرۆكی فەرەنسا رایگەیاند:» ئێوە دەزانن كە دۆستایەتیەكی تایبەت لەنێوان فەرەنساو كوردستان هەیە؛ گەلی كوردو گەلی فەرەنسا پەیوەندییەكی تایبەت لەنێوانیاندا هەیە كە لەبڕیاری نەتەوەیەكگرتووەكانەوە دەستپێدەكات بەتایبەت بڕیاری ژمارە 688ی ئەنجوومەنی ئاسایشی نێودەوڵەتی كە وەكو بنچینەیەكە بۆ هەرێمی كوردستانی ئۆتۆنۆمی....بەڕاستی مێژوویەكی دۆستانەی گەرموگوڕمان هەبووە كە لەلایەن رۆشنبیرەكانمانەوە بەردەوام بوو». هەروەها راشیگەیاند:»لەهاوكاریكردن لەبارەی بڕینی مێژووییتان بەردەوام دەبین و هەربۆیە لەچەند هەفتەی داهاتوودا فەرەنسا هاوكاریی نەخۆشخانەی هەڵەبجە دەكات كە قوربانیانی هێرشی كیمیایی چارەسەر دەكات». هاوكات ماكرۆن راشیگەیاند:» ئێمە ژمارەیەك پرۆژەی كۆنكرێتی لەم بوارەدا جێبەجێ دەكەین، بەسەرۆك وەزیرانی عێراقم وت، هاوكارییەكانمان بەیەكەوە لەهەموو بوارەكاندا زیاددەكەین، بۆ گەشەپێدانی ئەم هەرێمە لەخزمەت و بەرژەوەندی گەلی كورددا». نوخشە ناسیح، قایمقامی پارێزگای هەڵەبجە لەلێدوانێكدا بەهاوڵاتى وت:» ئولیڤیێ دێكوتینی كونسوڵی فەرەنسا لەهەولێر لەگەڵ نوێنەری حكومەتی فەرەنسا لە 16ی ئازاری ئەمساڵدا، تەبعەن كونسوڵی فەرەنسا زۆر ئارەزووی ئەوە دەكات ئیش بۆ هەڵەبجە بكەن، بەتایبەت چەند جارێك هاتووە بۆ نەخۆشخانەی چارەسەری بەركەوتووانی كیمیاوی كە چیان پێویستە تا دابینی بكەن». ناوبراو باسی لەوەشكرد كە كونسوڵی فەرەنسا وەك كونسوڵی وڵاتانی دیكە نەبووەو بەجددی هاتۆتە پێشەوەو بەڵێنی پێداین كە هەوڵدەدات» ئێمە بەردەوام داوا دەكەین لەوڵاتان كە نوێنەرایەتیان هەیە لەهەرێمدا سەردانی پارێزگاكە دەكەن، بەڵام كەسیان وەك كونسوڵی فەرەنسا بە عەمەلی نەهاتۆتە پێشەوە». قایمقامی ناوەندی پارێزگای هەڵەبجە وتیشی:» كونسوڵی فەرەنسا پێیوتین حەز دەكەن هاوكاری كەمایەتییە ئایینی و نەتەوەییەكان بكەن وەك كاكەییەكان و پێكەوەچوون بۆ گوندی هاوار، كە پرۆژەی ئاویان بۆ جێبەجێ دەكەن». هەروەها نوخشە ناسیح باسی لەوەشكرد كە لە 16ی ئازاری ئەمساڵدا و لەیادی كیمیابارانی هەڵەبجەدا نوێنەری بەشی قەیرانەكانی حكومەتی فەرەنسا هاتە هەڵەبجە، وتیشی:» حكومەتی فەرەنسا فەند دەدات بەچەند رێكخراوێك، رێكخراوێكی فەرەنسی هاتووە كە پرۆژەیەكی خزمەتگوزاری گوندی هاوار دەكەن دەكەوێتە بواری جێبەجێكردنەوە، چەند پێداویستییەك بۆ نەخۆشخانەی چارەسەری كیمیاوی دەكڕن». هاوكات ئەوەشی روونكردەوە كە رێكخراوێكی دیكەی فەرەنسی بۆ ماوەی نۆ مانگ خولی راهێنان دەكاتەوە بۆ نەخۆشخانەی چارەسەری كیمیاوی هەڵەبجەو نەخۆشەكان كە لەڕووی دەروونییەوە چۆن مامەڵە بكەن و لەگەڵیاندا بكرێت و بڕیارە ئەو كارانە بكەن. قایمقامی ناوەندی پارێزگای هەڵەبجە ئەوەشی دووپاتكردەوە كە فەرەنسا یەكێكە لەو وڵاتانەی دەیانەوێت بەردەوام بن لەهاوكارییەكانیان بۆ پارێزگای هەڵەبجە
هاوڵاتى نوێنه‌ری نه‌ته‌وه‌یه‌كگرتوه‌كان له عێراق رایگەیاند:" ه‌هیچ جۆرێك رازی نابن پرۆسه‌ی هه‌ڵبژاردنه‌كان دوابخرێت و پێویستیشه له‌واده‌ی خۆیدا ئه‌نجامبدرێت". ئەمڕۆ سێ شەممە، 7ی ئەیلوولی 2021 جینین پلاسخارت نوێنه‌ری نه‌ته‌وه‌یه‌كگرتوه‌كان له عێراق له‌كۆنگره‌یه‌كی رۆژنامه‌وانیدا رایگه‌یاند:" به‌هیچ جۆرێك رازی نابن پرۆسه‌ی هه‌ڵبژاردنه‌كان دوابخرێت و پێویستیشه له‌واده‌ی خۆیدا و له 10ی (تشرینی یه‌كه‌م/10)ی ئه‌مساڵ ئه‌نجامبدرێت، هه‌روه‌ها نابێت هیچ لایه‌نێك هه‌وڵی ساخته‌كاری بكات و له‌به‌رژه‌وه‌ندی خۆی پرۆسه‌كه بشكێنێته‌وه. نوێنه‌ری نه‌ته‌وه‌یه‌كگرتوه‌كان له عێراق ئه‌وه‌شی خسته‌ڕو:" بۆئه‌وه‌ی متمانه‌ی گشتی دروست ببێت، ئێمه هانی خه‌ڵك ژنان ده‌كه‌ین به‌شداری له پرۆسه‌ی هه‌ڵبژاردنه‌كان بكه‌ن و بۆئه‌و مه‌به‌سته‌ش له‌گه‌ڵ رێكخراوه‌كانی كۆمه‌ڵی مه‌ده‌نی له‌سه‌ر هێڵین بۆئه‌وه‌ی جێپه‌نجه‌ی ژنان له‌و هه‌ڵبژاردنه‌دا دیار بێت". جینین پلاسخارت باسی له‌وه‌شكرد:" پێویسته سه‌رجه‌م چین و توێژه‌كان و ئاواره‌كان و گه‌نجان و كه‌مینه‌كان و ته‌واوی پێكهاته‌كان به‌شداری له پرۆسه‌ی هه‌ڵبژاردنه‌كان بكه‌ن، نه‌ته‌وه‌یه‌كگرتوه‌كانیش وه‌رگێڕی دابینكردوه بۆئه‌وه‌ی هه‌ماهه‌نگیه‌كی ته‌واو له‌گه‌ڵ كۆمسیۆنی باڵای هه‌ڵبژاردنه‌كان هه‌بێت تا به‌وردی چاودێری پرۆسه‌كه بكه‌ن". له‌په‌یامێكیشدا بۆ هاوڵاتیان داوایكرد:" سه‌رجه‌میان به‌شداری له پرۆسه‌ی هه‌ڵبژاردنه‌كان بكه‌ن و وتی، "ئه‌گه‌ر ده‌نگ نه‌درێت پێگه‌ی ئه‌و كه‌سانه به‌رزده‌كرێته‌وه كه دژی به‌رژه‌وه‌ندیه‌كانی خه‌ڵكی عێراق ده‌وه‌ستنه‌وه، له‌هه‌مانكاتدا دیمكراسی ده‌رفه‌تێكه بۆئه‌وه‌ی به‌رده‌وام كاری له‌سه‌ر بكرێت و گۆڕانكاری بكرێت". جینین پلاسخارت له‌په‌یامێكیشدا بۆ ده‌زگاكانی راگه‌یاندن:" داوایكرد هه‌وڵی بێلایه‌نی بده‌ن له‌نێوان پارته سیاسییه‌كان و خۆیان به‌دوربگرن له‌بڵاوكردنه‌وه‌ی هه‌واڵی ساخته و نادروست و راگه‌یاندنه‌كان ده‌توانن متمانه ببه‌خشن به پرۆسه‌ی هه‌ڵبژاردنه‌كان، بۆیه پشت به‌ئێوه ده‌به‌ستین بۆ گه‌یاندنی هه‌واڵ و راپۆرته‌كان".
هاوڵاتى بەشێک لەلایەنگرانی هێزەکانی بەگری نیشتیمانی پەنجشیر لەکابوڵی پایتەختی ئەفغانستان خۆپیشاندانیان ئەنجامدا و "دەستوردانی پاکستان"یان لەکاروباری ناوخۆیی وڵاتەکەیاندا ئیدانە کرد. بەگوێرەی ئەو وێنە و ڤیدیانەی بڵاوکراونەتەوە بۆ بڵاوپێکردنی خۆپیشاندانەکەی کابوڵ، چەکدارانی بزوتنەوەی تاڵیبان دەستڕێژی گولـلە بەهەوادا دەکەن و هەوڵی بڵاوەپێکردنی خۆپیشاندانەکە دەدەن. گردبوونەوەی ئەمڕۆ لەکاتێکدایە دوێنێ دووشەممە ئەحمەد شا مەسعود، فەرماندەی هێزەکانی بەرگری نیشتیمانی پەنجشیر لەیەکەمین لێدوانیدا دوای کۆنتڕۆڵکردنی ویلایەتەکەی لەلایەن بزوتنەوەی تاڵیبانەوە رایگەیاند، دان بەوەدا دەنێن کە تەواوی ئەفغانستان لەلایەن تاڵیبانەوە کۆنتڕۆڵکراوە، بەڵام روبەڕوبونەوەی ئەو بزوتنەوەیە بەردەوام دەبێت و داوای بەرپاکردنی شۆڕش دەکەن دژی تاڵیبان. بەرەبەیانی دوێنێ زەبیحوڵا موجاهید، وتەبێژی بزوتنەوەی تاڵیبان لە هەژماری فەرمی خۆی لەتویتەر بڵاویکردەوە، "دواین پێگەی دوژمنان لە ویلایەتی پەنجشیر بەتەواوی کۆنتڕۆڵکرا، لەئێستادا ویلایەتەکە بەتەواوی دەکەوێتەژێر ئەمارەتی ئیسلامی و سیستەمی سیاسی تاڵیبانەوە".
شاناز حەسەن وەزارەتی دارایی و ئابووریی هەرێمی كوردستان رایگەیاند:» بڕی ئەو مووچانەی وەرگیراوە لەلایەن ئەو مووچەخۆرانەوە كە زیاتر لە مووچەیەكیان وەرگرتووە لێیان وەردەگیرێتەوە و تەنیا ئەو مووچەیە وەردەگرێت كە خۆیان هەڵیانبژاردووە». دووشەممە 6ی ئەیلولی 2021 وەزارەتی دارایی و ئابووریی حكومەتی هەرێمی كوردستان لەنووسراوێكدا كە واژۆی ئاوات شێخ جەناب، وەزیری دارایی لەسەرە، بڵاویكردووەتەوە و رایگەیاندووە:» بڕی ئەو مووچانەی وەرگیراوە لەلایەن ئەو مووچەخۆرانەوە كە زیاتر لە مووچەیەكیان وەرگرتووە پێش 1-7-2020 لێیان وەرناگیرێتەوە». هەروەها تێیدا هاتووە كە» بەڵام ئەوانەی لەدوای 1-7-2020 زیاتر لە مووچەیەكیان وەرگرتووە لێیان وەردەگیرێتەوە و تەنیا ئەو مووچەیە وەردەگرێت كە خۆیان هەڵیانبژاردووە، هەر بڕە پارەیەكیش لەپێش ئەو بەروارە لێیان وەرگیرابێ بۆیان دەگەڕێندرێتەوە». حكومەتی هەرێم ساڵی رابردوو لەپەرلەمانی كوردستان یاسای چاكسازی پەسەند كردو تێیدا بڕیاردرا كابینەی نۆیەم دەست بەجێبەجێكردنی ماددەو بڕگەكانی بكات، كە تێیدا باسی ئەوانە كراوە كە بە نایاسایی دوو مووچەو سێ مووچەیی وەردەگرن لێیان ببڕدرێت تا دادپەروەری لە دابەشكردنی مووچەدا بێتە دی. بەرپرسێكی باڵا لە وەزارەتی دارایی و ئابووری حكومەتی هەرێم كە نەیویست ناوی بنووسرێت بۆ هاوڵاتى ئەوەی ئاشكرا كرد، لەئێستادا بەهۆی جێبەجێكردنی یاسای چاكسازییەوە تەنیا بڕیارەكە دەرچووە كە مووچەكانیان لێوەردەگیرێتەوە، بەڵام تائێستا دیارینەكراوە بە چ میكانیزمێك لێیان وەردەگیرێتەوە. هەروەها وتیشی:» نازانرێت رێژەیەك لە مووچەكانیان دەبڕدرێت یاخود لە مووچەكانیان مانگانە لێیان وەردەگیرێتەوە». سەرۆكی لیژنەی دارایی لە پەرلەمانی كوردستان دەڵێت:» بڕیارەكە دەرچووە لێیان وەردەگیرێتەوە، لەوانەیە لەو مووچەیە بێت كە هەیانە». زیاد جەبار، سەرۆكی لیژنەی دارایی لەپەرلەمانی كوردستان، بە هاوڵاتى وت:» بەپێی یاساكە كە ماوەیەكی دوورودرێژە سیستمی بایۆمەتری كراوە، بەوردی لە تەحقیقدا بووە و وردبینی تەواوی تێداكراوە نەكا هەڵەیەك بكرێت، كەسێك بەهەڵە و بەناهەق مووچەكەی ببڕدرێت و وانەبێت، بۆیە لە ئەنجامدا بڕیاردراوە ئەوانە راستەقینەن و مووچەكانیان ببڕدرێت». هەروەها سەرۆكی لیژنەی دارایی ئەوەشی خستەڕوو بەپێی ئەوەی لەنووسراوەكەدا باسكراوە و مووچەكانیان لەمانگی حەوتەوە لێوەردەگیرێتەوەو ئەوەشی پێشتر تێپەڕیوەو و رۆیشتووە لەپێش بەرواری 1ی 7ی 2020 وە لێان وەرناگیرێتەوە. لە یاسای چاكسازیدا باسی شێوازی وەرگرتنەوەكەی نەكراوە، چونكە خۆی لە بنەڕەتدا ئەوەی كراوە پێچەوانەی یاسایە كە ئەوانە زیاتر لە مووچەیەكیان وەرگرتووە. زیاد جەبار ئەوەشی دووپاتكردەوە كە بەدڵنیاییەوە كە بڕیارەكە دەرچووە لێیان وەردەگیرێتەوە، وتیشی:»لەوانەیە لەو مووچەیەی بێت كە هەیانە». هاوكات، شێركۆ جەودەت، ئەندامی فراكسیۆنی یەكگرتوو لە پەرلەمانی كوردستان، لەلێدوانێكدا بەهاوڵاتى وت:»ئەو بڕیارە بۆ ئەوانەیە كە سەرە مووچەن و لەمووچەیەك زیاتریان هەیە لەسیستمی بایۆمەتریدا دەركەوتووە، بەپێی بڕیارەكەی وەزارەتی دارایی بەو شێوەیە مامەڵەیان لەگەڵدا دەكرێت كە مووچەكانیان لێوەربگیرێتەوە». « لەم مانگەوە مووچەكانیان تەواو رادەگیرێت، وەزارەتی دارایی داواشیان لێدەكات ئەو مووچانەی وەریانگرتووە بەزیادە لێیان وەربگیرێتەوە»، شێركۆ جەودەت وای وت. شێركۆ جەودەت ئەوەشی روونكردەوە كە لە یاسای چاكسازیدا باسی شێوازی وەرگرتنەوەكەی نەكراوە، چونكە خۆی لە بنەڕەتدا ئەوەی كراوە پێچەوانەی یاسایە كە ئەوانە زیاتر لە مووچەیەكیان وەرگرتووە.
هاوڵاتى نه‌خۆشخانه‌ی هیوا له راگه‌یه‌ندراوێكدا رایگەیاند:" قوباد تاڵه‌بانی، جێگری سه‌رۆك وه‌زیرانی هه‌رێمی كوردستان له‌سه‌ر ئه‌ركی خۆی پێشکەوتوترین ئامێری سۆناری بە بەهای 60 هەزار دۆلار لە ڕێی کۆمپانیای بەهجە بۆ نەخۆشخانەكه‌یان دابین كرد". نه‌خۆشخانه‌ی هیوا له راگه‌یه‌ندراوێكدا ئاماژه به‌وه ده‌كات كه دابینكردنی ئه‌و ئامێره گرنگیەکی زۆری بۆ نەخۆشخانەکە هەیە چونكه پێشتر کێشەی کەمی ئامێری سۆناریان هەبوه‌و بەشێک لە نەخۆشەکان ناچاربوون لەدەرەوی نەخۆشخانەکە پشکنینی سۆنار ئەنجام بدەن یاخود نەدەتوانرا ئەو ڕێژە نەخۆشەی کە سەردانیان ده‌كردن سۆناریان بۆ ئەنجام بدرێت و ده‌ڵێت "ئەم ئامێرە نوێیە لە توانایدایە لە ماوەیەکی کەمدا زۆرترین نەخۆش بپشکنێت". له راگه‌یه‌ندراوه‌كه‌دا هاتووه كه "هەر وەک چۆن نەخۆشخانەی هیوا لەسەر دەستی خوالێخۆشبوو (مام جەلال) دروستکراوە و بەردەوام پاڵشتی نەخۆشخانەیان کردبوو ئێستەش بە هەمان شێوە ئەو پاڵپشتیانە بەردەوامی هەیە و دڵنیایش دراوە پێمان کە هەر بەوشێوەیە بەردەوام دەبێت". راگه‌یه‌ندراوه‌كه ئه‌وه‌شی به‌بیرهێناوه‌ته‌وه كه ساڵی پار قوباد تاڵه‌بانی، جێگری سه‌رۆك وه‌زیرانی هه‌رێمی كوردستان لە ئۆکتۆبەری پەمەیی (مانگی هۆشیاری شێرپەنجەی مەمک) سەردانی نەخۆشخانەیان کرد و پشتگیری پرۆژەیەکی کرد بە هەماهەنگی لەگەڵ بەشی جێندەری نوسینگەکەی زیاترله هەزار 100 هه‌زار دۆلار وەک کۆمەک کۆکرایەوە و توانرا سودێکی تەواوی لێ ببینرێ بۆ کڕینی دەرمان و پێداویستی پزیشکی نەخۆشخانەکە.
.jpg)
