هاوڵاتى پەرلەمانتارێکی پارتی ڕایگەیاند :" دەوڵەتی تورکیا و سەربازەکانی بە هاوکاری هەندیک کۆمپانیا، دارەکانی ئەو دەڤەرانەی کە داگیریان کردووە، دەبڕنەوە و دەیانبەن بۆ تورکیا. ئه‌مڕۆ پێنجشه‌ممه 27ى ئایارى 2021، ڕێڤنگ هروری پەرلەمانتاری پارتی لە پەرلەمانی هەرێمی کوردستان ڕایگەیاند :" دەوڵەتی داگیرکەری تورکیا دەستی بە سووتاندن و بڕینەوەی دارستانەکانی دەڤەری بادینان کردووە". هروری ڕاشیگەیاندووە، کە تورکیا کۆمپانیای داربڕەوی بۆ بڕینەوەی دارەکان هێناوەتە بەرواری باڵا و دەڤەری زاخۆ و لەگەڵ ئەو میلیشیانەی کە هێناویانیە بۆ هەرێم دارەکان دەبڕنەوە و دەیانبەن بۆ تورکیا و لەوێ دەیفرۆشن. لە 23ی مانگی رابردوودا سوپای تورکیا ئۆپەراسیۆنی ناسراو بە "چڕنووکی هەورە برووسکە"ی بە پاساوی رووبەڕووبوونەوەی گەریلاکانی پارتی کرێکارانی کوردستان - پەکەکە لە بەرزاییەکانی سنووری پارێزگای دهۆک دەستپێکرد تا ئێستا زیاتر بە ٤٥ کم هاتۆتە ناو خاکی هەرێمی کوردستانەوە.
هاوڵاتى تۆڕی پاراستنی تەندروستی گشتی ڕایگەیاند، لەلایەن وەزیری داراییەوە بڕیاریانداوە پارەی دەرمان مانگانە بڕی ۲٪ خەرج بکەن بۆ کۆمپانیاکانی دەرمان لە نەخۆشخانەکانی (نانەکەلی و ڕزگاری لە هەولێر ، هیوا لە سلێمانی ، ئازادی لە دهۆک ). ئه‌مڕۆ پێنجشه‌ممه 27ى ئایارى 2021، تۆڕی پاراستنی تەندروستی گشتی لەراگەیاندراوێکدا ڕایگەیاند،" بەگوێرەی ئەو بەڵگانەی دەست تۆڕەکەمان کەوتوە سەبارەت بە خەرجکردنی شایستەی دارایي کۆمپانیاکانی دەرمان، بەداخەوە ئەم کابینەی حوکمەتی هەرێمی کوردستان ڕۆژ دوای ڕۆژ زوڵم و زۆرداری بەرامبەر هاوڵاتیانی کوردستان زیاتر دەکات و زۆر بێباکە بەرامبەر ژیانی هاونیشتیمانیانی”. هەروەها هاتووە،” لە تازەترین بڕیاریدا بڕیاری کە لەلایەن وەزیری داراییەوە دراوە، بڕیاریانداوە کە پارەی دەرمان مانگانە بڕی ۲٪ صرف بکەن بۆ کۆمپانیاکانی دەرمان دوای گەیشتنی دەرمانەکان بە نەخۆشخانەکان. واتا دوای ٥۰ مانگ (زیاتر لە ٤ ساڵ) کۆمپانیاکان دەتوانن پارەکانیان دەست بکەوێت لەوکاتەی کە دەرمانەکان دابین دەکەن بۆ حکومەت”. جەختکراوەتەوە کە،” بێگومان ئەم بریارە بە ڕەزامەندی (سەرۆکی حکومەت و جێگرەکەی ، وەزیری تەندروستی)ە”. تۆڕەکە ڕایشیگەیاندووە،” ئەمە لەکاتێکدایە لە ساڵانی پێشوتر لەکاتی گەیشتنی دەرمان بە نەخۆشخانەکان حکومەت یەکسەر پارەی دەرمانەکانی بۆ کۆمپانیاکانی دەرمان صرف کردوە”. هۆشداری دراوە لەوەی کە،” دەرکردنی ئەو بڕیارە بۆتە هۆی ئەوەی بەشێوەیەکی گشتی ئەزمەی دەرمان لە کەرتی گشتی دروست بێت و نەخۆشخانە شێرپەنجەییەکان زەرەرمەندی یەکەم بن و ژیانی چەندەها نەخۆشی شێرپەنجە بکەوێتە مەترسیەوە”. لە بڕیارەکەی وەزارەتی دارایدا هاتوە،”خەرجکردنی پارەی کۆمپانیاکانی پاککەرەوەو خواردن ٦۰٪ و ۷۰٪ دەبێت”. هاتووە،”تۆڕەکەمان ئەم بڕیارە بە بڕیارێکی بەرنامەداڕێژراو دەزانێت بۆ ئەوەی ئەو خزمەتگوزاریە کەمەی لەکەرتی گشتی هەیە نەیهێڵن و نەخۆش ناچار بە نەخۆشخانە تایبەتەکان بکەن”. لە بەشێکی تری ڕاگەیەندراوەکەدا هاتووە،”تۆڕەکەمان داوا لە سەرۆکی حوکمەت و جێگرەکەی و وەزیرانی دارای و تەندروستی دەکات لەماوەی کەمتر لە ۷ ڕۆژدا ئەوبڕیارەیان هەڵبوەشێننەوەو شایستەی دارایی بۆ کۆمپانیاکانی دەرمان صرف بکەن، هەروەک چۆن لە ساڵانی ڕابردو و شەڕی داعش و قەیرانی دارای صرف کراوە”. لە کۆتایدا هاتووە،”بە پێچەوانەوە گیان لەدەستان یاخود تێکچونی تەندروستی هەر نەخۆشێک بەتایبەت نەخۆشانی شێرپەنجە لە ئەستۆی سەرۆکی حکومەت و جێگرەکەی و وەزیرانی دارای و تەندروستیدایە”.
هاوڵاتى لیژنە هاوبەشەکانی قایمقامییەتی سلێمانی رایگەیاند، لە هەڵەتێکدا لیژنەکانیان دەستیان بەسەر ژمارەیەک ئاژەڵی کێویدا گرتوە کەلەلایەن راوچی و کاسبکارانەوە لە ژێرپردەکەی ناوبازاڕی سلێمانی بەهاوڵاتیان دەفرۆشرێت. ئەمڕۆ هەینی، ،٢٨ئایاری ٢٠٢١ لەشکر حەمید سەرۆکی لیژنەی هاوبەشەکانی قایمقامیەت لەراگەیاندراوێکدا رایگەیاند، " لە هەڵەتێکدا بە هاوکاری ئاسایش و پۆلیس و لیوای یەکی پاراستنی سلێمانی، لیژنەکانیان دەستیان بەسەر ژمارەیەک ئاژەڵی کێویدا گرتوە کەلەلایەن راوچی و کاسبکارانەوە لە ژێرپردەکەی ناوبازاڕی سلێمانی بەهاوڵاتیان دەفرۆشرێت". سەرۆکی لیژنەی هاوبەشەکانی قائیمقامیەت ئاماژەی بەوەشکردووە، هەڵمەتەکە لەسەر بڕیاری قائیمقامی سلێمانی بەردەوام دەبێت و، تیایدا رێگری لە راوکردن و کڕین و فرۆشتن بە ئاژەڵە کێویەکانەوە دەکرێت. لەبارەی ئامانجی هەڵەمەتەکەشەوە، لەشکرد حەمید ئەوەشی خستەڕوو، هەڵمەتەکە بۆ پارێزگاری کردنە لەسروشت و پاراستنی ئەو ئاژەڵانە و بەردەوامیش دەبێت تا دیاردەکە بنەبڕدەکرێت.
.jpg)
هاوڵاتى پرۆژەیاسای بایدن بۆ بودجەی ساڵی 2022 کە بە شەش ترلیۆن دۆلار دانراوە، گەورەترین بودجەی ئەمریکایە لەدوای جەنگی جیهانی دووەمەوە. بایدن پرۆژەیاسای تایبەت بە بودجەی ساڵی 2022 بە 6 ترلیۆن دۆلار داناوە، بەڵام بەشێک لە ئەندامانی کۆنگرێس دەڵێن ئەو بڕە پارەیە قەرزی گشتی حکومەت دەگەیێنێتە لووتکە. ساڵی دارایی لە ئەمریکا لە 1ی مانگی 10 هەموو ساڵێک دەستپێدەکات و لە 30ی مانگی ئەیلوولی ساڵی داهاتوو کۆتایی دێت. ئەمە یەکەمین بودجەیە کە ئیدارەی بایدن ئامادەی دەکات و بڕیارە ئەمڕۆ هەینی پێشکەشی کۆنگرێسی بکات، کە لە هەردوو ئەنجوومەنەکانیدا (پیران و نوێنەران) دیموکراتەکان زۆرینەن. بودجە 6 ترلیۆنییەکەی ئیدارەی بایدن دوو ترلیۆن دۆلاری بۆ بنیاتنانەوە و نۆژەنکردنەوەی ژێرخانی ئابووری و 1.6 ترلیۆن دۆلار بۆ پەرەپێدانی پرۆسەی خوێندن و هێزی کار تەرخانکراوە. پرۆژەیاسای بودجەی بایدن پشتی بە زیادکردنی باج لەسەر سامانداران و خاوەن کارگەکان بەستووە؛ بەگوێرەی زانیارییەکانی نێو کۆشکی سپی بایدن پلانی هەیە بۆ زیادکردنی بڕی بودجەی ساڵانەی ئەمریکا بە جۆرێک کە تاوەکو ساڵی 2030 بگاتە 8 ترلیۆن و 200 ملیار دۆلار. پێشنیازکردنی بودجەی ساڵی 2022 بە دوو ترلیۆن دۆلار رەخنەی بەشێك لە ئەندامانی کۆنگرێسی لێکەوتووەتەوە کە پێشبینی دەکەن قەرزی گشتیی وڵات بە بەراورد لەگەڵ بودجەکانی دوو ساڵی رابردوو زیاتر دەکات، بەڵام ئیدارەی بایدن پێشبینی دەکات قەرزی گشتی وڵات تاوەکو 2030 بەرەو هەڵکشان دەڕوات و لەدوای ئەو ساڵە دەست بە داکشان دەکات تاوەکو دەگاتە ئاستی باڵانس، واتە کۆی داهات و خەرجییەکان یەکسان دەبنەوە. ئەمریکا ساڵانە کورتهێنانی بودجە تۆماردەکات و لە ساڵی 2020 بەهۆی سەرهەڵدانی پەتای کۆڤید-19 زیاتر لە 3.1 ترلیۆن دۆلار کورتهێنانی تۆمارکرد، کە سێ هێندەی کورتهێنانی ساڵی 2019 بوو، لەمساڵیشدا تاوەکو ئێستا زیاتر لە 1.9 ترلیۆن دۆلار کورتهێنان تۆمارکراوە.
هاوڵاتى لیژنەی باڵای پێوەری زیرەكی كارەبا، ئاگاداری ئەو هاوبەشانەی كارەبا دەكاتەوە كە پێوەری زیرەكیان بۆ بەستراوە، ئەگەر كارەبا زیاتر لە ئاستی دیاریكراو بەكاربهێنن، ئەوا كارەباكەیان دەكوژێتەوە. ئەمڕۆ هەینی،٢٨ئایاری ٢٠٢١ لیژنەی باڵای پێوەری زیرەكی كارەبا، لە راگەیاندراوێكدا رایگەیاند،"ئاگاداری ئەو هاوبەشانەی كارەبا دەكەینەوە كە پێوەری زیرەكیان بۆ بەستراوە، ئەگەر وزەی كارەبای بەكارهاتویان لەو ئاستەی دیاریكراوە زیاتر بو ئەوا وەكو ئاگاداركردنەوەیەك وزەی كارەبای ئەو هاوبەشە دەكوژێتەوەو دوای 150 چركە (ثانيه) كارەباكەی بۆ دەگەڕێتەوە." وتوشیەتی"خۆ ئەگەر لەماوەی 30 خولەكدا(دەقیقە) پێنج جار بڕینی كارەبای لەسەر یەك رویدا، ئەوا كارەبای هاوبەشەكە زیاتر دەبڕدرێت و دوای 45 دەقیقە كارەباكەی دەگەڕێتەوە." لیژنەكە داوای لەو هاوبەشانە كردوە كە پابەندی ئەو ئەمپێرە كارەبایە بن كە دیاریكراوەو ئەگەر لەماوەی 45 دەقیقە زیاتر كارەبای نەهاتەوە ئەو كات سەردانی فەرمانگەی سیانەكان بكەن. لیژنەی باڵای پێوەری زیرەكی كارەبا، داواشی لە هاوبەشانی كارەبا كردوە لەكاتی بونی هەر كێشەیەك پەیوەندی بەم ژمارە تەلەفونانەی خوارەوە بكەن بۆ پێدانی رێنمایی: - وەزارەتی كارەبا : 07507050953 -07507050954 (كاتژمێر 9 تاكو 2ی دوای نیوەڕۆ) - هەولێر: 07728500390 / 07728500396 / 07514903975 - سلێمانی: 053127 - 07701394642 - دهۆك: 07504942191 / 07504209170 - هەڵەبجە: 0538850366 / 0538851231 - گەرمیان: 07501266988 - سۆران: 07512679273
هاوڵاتى بەڕێوەبەری گشتی بەنداوەکانی هەرێمی کوردستان رایگەیاند، کەمبارانی پاساو نییە بۆئەوەی وڵاتانی دراوسێ ئاوی هەرێمی کوردستان ببڕن، دەبێت دۆخی هەرێم لەبەرچاو بگرن بەتایبەت ئێران ئاوی روباری سیروانی وشککردوە. ئەمڕۆ هەینی،٢٨ئایاری ٢٠٢١ ئەکرەم ئەحمەد، بەڕێوەبەری گشتی بەنداوەکانی هەرێمی کوردستان رایگەیاند، ئەمساڵ ئاستی ئاوی بەنداوەکان بە رێژەیەکی زۆر کەمبوەتەوە و بەنداوی دەربەندیخان 12.5 مەتر بەراورد بە ساڵی رابردو ئاستی ئاوەکەی دابەزیوە، بەنداوی دوکانیش هەشت مەتر دابەزیوە، هۆکاری سەرەکیی کەمئاویی بەنداوەکان کەمیی بارانبارینە، بەڵام ئەمە پاساو نییە بۆئەوەی وڵاتانی دراوسێ ئاوی هەرێمی کوردستان ببڕن، بەتایبەت ئێران ئاوی رووباری سیروانی وشککردوە. بەڕێوەبەری گشتیی بەنداوەکانی هەرێمی کوردستان ئاماژەی بەوەش کرد "پلانی دانوستاندن هەیە لەگەڵ وڵاتانی دراوسێ، بڕیارە وەزیری سەرچاوەکانی ئاوی عێراق 13ی حوزەیران سەردانی تاران بکات و بەڕێوەبەری بەنداوی دەربەندیخانیش بەشداریی کۆبونەوەکانیان دەبێت، چونکە خراپترین دۆخی کەمئاوی لە روباری سیروان و بەنداوی دەربەندیخانە، دەیانەوێت ئێران لە موعاناتی ئەو خەڵکە ئاگاداربکەنەوە". بەوتەی ئەکرەم ئەحمەد، "ئاوی بەنداوەکان بە تەنها، کێشەی وشکەساڵی چارەسەر ناکات، بەڵام ئاستی ئاوی بەنداوەکانمان زۆر خراپە، ئەمساڵ کەمئاوی کاریگەریی زۆری لەسەر هاوڵاتیان دەبێت، بەتایبەت ئەوانەی لەسەر روبارەکانن، ئاوی بیرەکانیش زۆرتر دادەبەزێت، ئەمساڵ ئەو زەوییە کشتوکاڵییانەی دەوروبەری روبارەکان لە هەرێمی کوردستان و ناوەڕاستی عێراقیش ئاگادارکراونەتەوە کە کشتوکاڵ نەکەن، چونکە ئاوەکە کەمە". لەبارەی هۆکاری تەواونەکردنی ژمارەیەک بەنداو کە پێشتر بڕیاردرابوو دروستبکرێن ئاماژەی بەوە کرد، "17 بەنداوی نوێ بەهۆی کەمیی بودجە کارەکانیان وەستاون، داواشمان لە ئەنجومەنی وەزیران کردوە ئەو بەنداوانە تەواوبکرێن، بەڵام تاوەکو ئێستا هیچ وەڵامێک نەبوە".
هاوڵاتى نوسینگەی سەلیم جبوری سەرۆکی پێشوی پەرلەمانی عێراق رایگه‌یاند:" هەوڵی تیرۆرکردنی سەلیم جبوری دراوە و دو لەفەرانبەرانی نوسینگەکەی بەسەختی بریندارن". شەوی رابردو، لە هێرشێكی چەكداریدا لە پارێزگای دیالە دو لە پاسەوانەكانی سەلیم جبوری، سەرۆكی پێشوی پەرلەمانی عێراق بریندار بون. هەروەها نوسینگەی سەرۆکی پێشوی پەرلەمانی عێراق هەواڵی هەوڵی تیرۆرکردنی سەلیم جبوری پشتڕاستکردەوە و ئاشکراشیکرد، بەهۆی ئەو هەوڵەوە دو کارمەندی نوسینگەکەیان لەپارێزگای دیالە بریندارن. لەراگەیەنراوەکەدا هاتوە، سەرەڕای سەرکۆنەکردنی ئەو کارە، داوا لەهێزە ئەمنییەکان دەکەین لێکۆڵینەوەی بەپەلە دەستپێبکەن و ئەنجامدەرانی ئەو کارە دەستنیشان بکەن و روبەڕوی یاسایان بکەنەوە، چونکە ئەوانە نمونەی ئەوانی دیکەن کە کوشتن و تیرۆریان ئەنجامداوە. نوسینگەی جبوری ئاماژەی بەوەش کردوە، ئەوانەی هەوڵی تیرۆرکردنیان داوە پێیانوایە دورن لەبەرپرسیارێتی و یاسا نایانگرێتەوە، لەبەرئەوە دو جار ئەرکی هێزە ئەمنییەکانە لە دەستگیرکردنی ئەنجامدەرانی ئەو هەوڵە، دەشڵێت،" ئەوانە باوەڕیارن بەرکابەری دادوەرانە نیە، تەنها توندو تیژی و چەک دەکەنە ئامرازێک بۆ ترساندنی بەرامبەرەکانیان." نوسینگەی سەلیم جبوری داوای كردوە لێكۆڵینەوەی بەپەلە بكرێت لە روداوەكەو بكەرانی ئاشكرابكرێن و بدرێنە دادگا.
هاوڵاتى وەزارەتی دەرەوەی ئەمریكا رایگەیاند، لە هەر هەوڵێكی حكومەتی عێراق دەكەن بۆ لێپرسینەوە لە گروپە میلیشیاكان و ئەو گروپانەی پەلاماری هاوڵاتیان دەدەن . نید برایس، وتەبێژی وەزارەتی دەرەوەی ئەمریكا رایگەیاندووە، ئەوان پێشوازی لە هەر هەوڵێكی حكومەتی عێراق دەكەن بۆ لێپرسینەوە لە گروپە میلیشیاكان و ئەو گروپانەی پەلاماری هاوڵاتیان دەدەن و رێگرن لەوەی هاوڵاتیان بە ئازادی رای خۆیان دەرببڕن و گردبوونەوەی ئاشتیانە بكەن. ئەو راگەیانراوەی وەزارەتی دەرەوەی ئەمریكا دوای ئەوە دێت كە لەڕۆژانی رابردوودا خۆپیشاندان لەمەیدانی تەحریری شاری بەغدا دەستی پێكردووە و لەلایەن هێزە ئەمنییەكانیشەوە تەقە لەخۆپیشاندەران كرا، بەو هۆیەوە خۆپیشاندەرێك كوژرا و چەند كەسێكی دیكەش برینداربوون. هەر لەسەر ئەو رووداوەش مستەفا كازمی، سەرۆك وەزیرانی عێراق فەرمانیكرد بەپێكهێنانی لیژنەیەكی لێكۆڵینەوە بۆ هۆكاری دروستبوونی گرژییەكان.
هاوڵاتى هۆشیار زێبارى ئه‌ندامى مه‌کته‌بى سیاسى پارتى رایگه‌یاند:"پێویسته هه‌رێم و عێراق له‌یه‌ک کاتدا پابه‌ندبونه‌کانیان به بودجه جێبه‌جێ بکه‌ن، هه‌رێم له‌به‌رانبه‌ر وه‌رگرتنى پشکه‌که‌ى هه‌ندێ نه‌وت راده‌ست بکات". ئه‌مڕۆ پێنجشه‌ممه 27ى ئایارى 2021، وشیار زێبارى له‌چاوپێکه‌وتنێکدا له‌گه‌ڵ ته‌فزیۆنى فه‌رمى حزبه‌که‌ى رایگه‌یاند:"ده‌بێت حکومه‌تى کازمى نیازپاکییه‌ک نیشان بدات له‌باره‌ى بودجه‌وه، هه‌رێمیش هه‌روه‌ها پابه‌ندبوونى خۆى جێبه‌جێ بکات". هه‌روه‌ها راشیگه‌یاند:"پێویسته به‌غدا پاره بنێرێت پاش لێبڕینى پابه‌ندبوونه‌کانى هه‌رێم، هه‌رێمیش هه‌ندێ نه‌وت راده‌ست بکات، کێ پێشوه‌خت ئه‌وه ده‌کات نازانم به‌ڵام لانى که‌م پێکه‌وه بیکه‌ن باشتره". له‌باره‌ى دۆخى ئازادى راده‌ربڕین له‌هه‌رێم و ره‌خنه‌کان له‌و باره‌یه‌وه، زێبارى ده‌ڵێت "نابێت په‌یامه‌کانى تایبه‌ت به پێشێلى ئازادى راده‌ربڕین و رۆژنامه‌گه‌رى به‌که‌مى وه‌ربگرین، پێویسته به‌جدى وه‌ریبگرین وریابین له‌و پرسه‌دا چونکه ئه‌وه کۆده‌بێته‌وه، چونکه قه‌زیه‌ى هه‌رێم له‌سه‌ر ئه‌و مه‌سه‌له‌یه پێشکه‌وت". هه‌روه‌ها له‌باره‌ى په‌یوه‌ندییه‌کانیان له‌گه‌ڵ یه‌کێتى، زێبارى باسى له‌وه‌کرد په‌یوه‌ندییه‌کانیان گه‌رم نییه و ناکۆکى سیاسى هه‌یه له‌نێوانیاندا، ناکرێت له‌یه‌ک کاتدا له حکومه‌ت بیت و ئۆپۆزسیۆنیش بیت.
هاوڵاتى لاهور شێخ جه‌نگى هاوسه‌رۆکى یه‌کێتیى نیشتمانیى کوردستان رایده‌گه‌یه‌نێـت که‌یسى سزادانى ڕۆژنامه‌نوسان و چالاکوانانى بادینان کاریگه‌ریى خراپى ده‌بێت له‌سه‌ر ناو و ناوبانگى حکومه‌ت و ده‌شڵێت:" سلێمانى بووه به شوێنى له‌دایکبونى ئازادى و میدیاى ئازاد له کوردستان". لاهور شێخ جه‌نگى هاوسه‌رۆکى یه‌کێتی، له هه‌ژمارى تایبه‌تى خۆى له‌تۆڕى کۆمه‌ڵایه‌تى فه‌یسبوک نوسیویه‌تی: "ئه‌مڕۆ له شارى سلێمانى پێشوازیمان کرد له مارتن هوس باڵیۆزى یه‌کێتیى ئه‌وروپا له عێراق و ڤێنسنت گیوم پۆپۆ لێپرسراوى نوسینگه‌ى یه‌کێتیى ئه‌وروپا له هه‌رێمى کوردستان، له دیدارێکدا بیروڕامان ئاڵوگۆێ کرد سه‌باره‌ت به پێشهات و گۆڕانکارییه سیاسى و ئه‌منییه‌کانى عێراق و هه‌رێمى کوردستان و پرسى مافه‌کانى مرۆڤ و ئازادى ڕاده‌ربڕین و ڕاگه‌یاندن. هه‌روه‌ها لاهور شێخ جه‌نگى جه‌ختیکرده‌وه که کێشه هه‌ڵپه‌سێردراوه‌کانى نێوان حکومه‌تى هه‌رێم و حکومه‌تى فیدراڵى کرد و پابه‌ندکردنى هه‌ردولاى دوپاتکرده‌وه بۆ چاره‌سه‌رکردنى کێشه‌کان له ڕێگه‌ى دیالۆگ و په‌نابردنه به‌ر ده‌ستور و ڕێککه‌وتنه واژۆکراوه‌کانى نێوانیان، راشیگه‌یاند، "بونى نه‌خشه‌ڕێگایه‌کى بنه‌ڕه‌تى و درێژخایه‌نمان به گرنگ زانى بۆ یه‌کلاییکردنه‌وه‌ى هه‌مو کێشه‌کان". هاوکات، هاوسه‌رۆکى یه‌کێتى ئه‌وه‌شى نوسیووه که هه‌ردولا هاوڕابوون له‌سه‌ر پاراستنى مافه‌کانى مرۆڤ و فراوانکردنى پانتایى ئازادى ڕاده‌ربرین و ڕاگه‌یاندن له هه‌رێمى کوردستان، دوپاتیانکرده‌وه که سه‌ربه‌خۆیى دادگا له که‌یسى سزادانى ڕۆژنامه‌نوسان و چالاکوانانى بادینان بپارێزرێت"که به ڕاى ئێمه ئه‌و که‌یسه کاریگه‌ریى خراپى ده‌بێت له‌سه‌ر ناو و ناوبانگى حکومه‌ت و هه‌رێمى کوردستان که چه‌ندین ساڵه خه‌باتمان بۆ کردوه و قوربانیمان بۆ داوه تا گه‌یشتوین به‌و ئاسته‌ى ئێستا". لاهور شێخ جه‌نگى هه‌ڵوێستى یه‌کێتى نیشتمانیى کوردستانیشى دوپاتکرده‌وه بۆ پشتیوانیکردنى میدیاى ئازاد و پشتگیریکردنى چالاکوانان و ئاماژه‌ى به‌وه‌کرد، "هه‌ر به‌و پشتیوانییه سلێمانى بوه به شوێنى له‌دایکبونى ئازادى و میدیاى ئازادى کوردستان، یه‌کێتیى به‌رده‌وامیش ده‌بێت له‌سه‌ر ئه‌و سیاسه‌ته و کارى زیاتریش ده‌که‌ین بۆ پته‌وکردنى کۆڵه‌که‌کانى دیموکراسى و ئازادى ڕاده‌ربڕین و ڕاگه‌یاندن له هه‌رێمى کوردستان".
هاوڵاتى به‌ڕێوه‌به‌رى سه‌نته‌رى میترۆ ڕایده‌گه‌یه‌نێت، تا کاتى پێشکه‌شکردنى پڕۆژه‌یاساى ڕێکخستنى میدیاى ئه‌لیکترۆنى بۆ سه‌رۆکایه‌تى په‌رله‌مان، ده‌نگده‌ران نه‌یانده‌زانى به‌چ میکانیزیمێکى کاریکاتێرى پڕۆژه‌یاسا ڕاده‌ستى سه‌رۆکایه‌تى ده‌کرێت؟، ده‌شڵێت:" په‌رله‌مانتارێک شۆفێره‌که‌ى ئیمزاى بۆ کردووه یان ته‌زویرى ئیمزاى په‌له‌مانتار کراوه". له‌نوسینێکدا به‌ناونیشانى "کاتێکى نه‌گونجاو بۆ پڕۆژه‌یه‌کى هه‌ستیار" دیارى محه‌مه‌د به‌ڕێوه‌به‌رى سه‌نته‌رى میترۆ ڕایگه‌یاندووه:"هه‌موو بڕگه‌یه‌کى یاساییو رێنماییو بڕیارێکى وه‌زاره‌تیی، به‌رامبه‌ر ده‌زگاکانى میدیا ڕه‌تده‌که‌ینه‌وه که پێچه‌وانه‌ى ماده‌کانى یاساى ژمارى 35ى ساڵى 2017 یاساى کارى ڕۆژنامه‌گه‌رى بێت". ده‌قى نوسینه‌که: "کاتێکى نه‌گونجاو بۆ پرۆژه‌یه‌کى هه‌ستیار" تا کاتى پێشکه‌شکردنى پرۆژه یاساى رێکخستنى میدیاى ئه‌لیکترۆنى بۆ سه‌رۆکایه‌تى په‌رله‌مانى کوردستان، ده‌نگده‌ران نه‌یانده‌زانى به چ میکانیزیمێکى کاریکاتێرى پرۆژه یاسا راده‌ستى سه‌رۆکایه‌تى ده‌کرێت؟ بۆ نمونه په‌رله‌مانتار "به‌بێ ئه‌وه‌ى پرۆژکه بخوێنێته‌وه ئیمزاى له‌سه‌ر کردووه"، په‌رله‌مانتارێکیش "شوفێره‌که‌ى ئیمزاى بۆ کردووه" یان "ته‌زویرى ئیمزاى په‌له‌مانتار کراوه". دڵمان له مستماندا بوو تا ئێواره‌ى دووشه‌ممه 17ى ئاب، لیژنه‌ى رۆشنبیرى و کۆمه‌ڵگه‌ى مه‌ده‌نى له‌په‌رله‌مانى کوردستان سه‌باره‌ت به پێشنیازه یاساى رێکخستنى میدیاى ئه‌لکترۆنى له هه‌رێمى کوردستان – عێراق ئه‌و تێبینیانه‌ى سه‌باره‌ت به‌ناوه‌ڕۆکى پێشنیازه یاساکه گه‌یشته لیژنه‌که‌یان به هه‌ند وه‌رگرت، بڕیاریاندا "ناوه‌رۆکى پێشنیازه یاساکه ره‌تبکه‌ینه‌وه به‌و شێوازه‌ى که ئێستا هه‌یه" ئاماده‌کاریى بکه‌ن دواى پرس و راوێژ له‌گه‌ڵ پسپۆڕان و میدیاکاران و لایه‌نه په‌یوه‌ندیداره‌کان بکه‌ن، به‌مه‌به‌ستى ئاماده‌کردنه‌وه‌ى به ناوه‌ڕۆکێکى گونجاو که تێکهه‌ڵکێشبێت به‌و سه‌رنج و تێبینییانه‌ى له‌لایه‌ن پسپۆڕان و میدیاکارانه‌وه بۆ لێژنه‌که‌یان هاتووه. بێ ئه‌وه‌ى لیژنه‌ى رۆشنبیرى رایبگه‌یه‌نێت که پرۆژه‌که‌یان خستۆته‌وه به‌رده‌م "پسپۆڕان و میدیاکاران و لایه‌نه په‌یوه‌ندیداره‌کان" وه‌ک خۆیان بریاریان له‌سر دابوو، ئه‌مجاره‌یان پرۆژه‌که چۆته ژوورێکى وه‌زراه‌تى رۆشنبیرى له ناو وه‌زاره‌ته‌وه، ئه‌مرۆ وته‌بێژه‌که‌یان مژده‌ى راگه‌یاندنى رێکخستنى میدیاى ئه‌لیکترۆنى و هه‌موارکردنى رێنمایى ژماره 1ى ساڵى 2014 (رێکخستنى فریکوێنسى سپه‌یس له هه‌رێمى کوردستان) راگه‌یاند. له‌دوو ساڵى رابردوودا، دوو هه‌وڵى هه‌ڵگه‌ڕانه‌وه به‌سه‌ر یاساى ژماره 35ى ساڵى 2007 یاساى رۆژنامه‌گه‌رى له هه‌رێمى کوردستان، هه‌بوون. هه‌وڵه‌کان بریتى بوون له پێشکه‌ش کردنى دوو پڕۆژه یاسا، یه‌که‌مینیان پرۆژه یاساى دامه‌زراندنى ئه‌نجومه‌نى باڵاى میدیا له هه‌رێمى کوردستان، هه‌روه‌ها پرۆژه یاساى ڕێکخستنى میدیا ئه‌لیکترۆنی، یه‌که‌میان ساڵى 2019 شکستى پێهینرا، دووهه‌مینیان، ساڵى 2020. سه‌نته‌رى میترۆ رایده‌گه‌یه‌نین: 1ـ هه‌موو بڕگه‌یه‌کى یاساییو رێنماییو بڕیارێکى وه‌زاره‌ى به‌رامبه‌ر ده‌زگاکانى میدیا ره‌تده‌که‌ینه‌وه که پێچه‌وانه‌ى ماده‌کانى یاساى ژمارى 35ى ساڵى 2017 یاساى کارى رۆژنامه‌گه‌ری. 2ـ ڕێکخستنى میدیاى ئه‌لیکترۆنى ده‌بێت له‌ژینگه‌یه‌کى سیاسى سه‌قامگیر گفتوگۆى له‌سه‌ربکرێت‌و نه‌که‌وێته نێو ململانێى سیاسیو حزبییه‌وه، هه‌روه‌ها ناکۆک نه‌بێت له‌گه‌ڵ پێودانگه نێوده‌وڵه‌تییه‌کانى تایبه‌ت به‌مافى ئازادى راده‌ربڕین و ئازادى ڕۆژنامه‌گه‌ری. 3ـ سه‌باره‌ت به‌هه‌موارکردنى ڕێنمایى ژماره یه‌کى ساڵى 2014ى وه‌زاره‌تى ڕۆشنبیری، رێکخستنى فریکوێنسى سپه‌یس له‌هه‌رێمى کوردستان، میترۆ به‌حه‌زه‌ره‌وه ته‌ماشاى ئه‌م هه‌نگاوه‌ى وه‌زاره‌ت ده‌کات به‌تایبه‌تیش ئێستا وه‌رگرتنى مۆڵه‌تى میدیاى بینراو بیستراو له‌بنچینه‌دا ئاڵۆزکراوه، داواده‌که‌ین هه‌موارکردنه‌که په‌رچه‌کردارنه‌بێت به‌رامبه‌ر هه‌ڵه‌ى پیشه‌یى هه‌ندێ ده‌زگاى میدیا که ده‌بێت له‌چوارچێوه‌ى به‌نده‌کاى یاساى ڕۆژنامه‌گه‌رى مامه‌ڵه‌یان له‌گه‌ڵدا بکرێت، نه‌ک ڕێنماییو بڕیارى وه‌زاری. دیارى محه‌مه‌د به‌ڕێوه‌به‌رى سه‌نته‌رى میترۆ
.jpg)
هاوڵاتى وه‌زاره‌تى ته‌ندروستى حکومه‌تى هه‌رێمى کوردستان رایگه‌یاند، له دوێنێوه نۆ هه‌زارو 838 پشکنینى کۆرۆنا کراون، له‌نێویاندا 670 توشبوى نوێى کۆرۆنا تۆمارکراون و پێنج که‌سیش گیانیان له‌ده‌ستاوه‌و 749 توشبوش چاکبونه‌وه. ده‌قى راگه‌یه‌ندراوى وه‌زاره‌تى ته‌ندروستى حکومه‌تى هه‌رێم:
هاوڵاتى هه‌ریه‌ک له سه‌رۆکایه‌تى کۆمار و ئه‌نجومه‌نى وه‌زیران و په‌رله‌مان و ئه‌نجومه‌نى دادوه‌رى عێراق، راگه‌یه‌ندراوێکى هاوبه‌شیان بڵاوکرده‌وه و رایانگه‌یاند:"هه‌ڵبژاردن له‌واده‌ى خۆیدا به‌ڕێوه‌ده‌چێت و دواناخرێت". ئه‌مڕۆ پێنجشه‌ممه 27ى ئایارى 2021، له کۆشکى به‌غداد به ئاماده‌بونى به‌رهه‌م ساڵح، سه‌رۆک کۆمارى عێراق و مسته‌فا کازمی، سه‌رۆکى ئه‌نجومه‌نى وه‌زیران و محه‌مه‌د حه‌لبوسی، سه‌رۆکى په‌رله‌مان و دادوه‌ر فائق زێدان، سه‌رۆکى ئه‌نجومه‌نى باڵاى دادوه‌رى کۆبونه‌وه‌یه‌ک به‌ڕێوه‌چو سه‌باره‌ت به پێشهاته‌کانى ئه‌م دواییه‌ى وڵات و ده‌رئه‌نجامه مه‌ترسیداره‌کانی. به‌پێى راگه‌یه‌ندراوى هاوبه‌شى کۆبونه‌وه‌که، به‌شداربوانى کۆبونه‌وه‌که جه‌ختیانکرده‌وه روداوه‌کانى ئه‌م دواییه‌ى وڵات پێویستى به یه‌کخستنى هه‌وڵه نیشتمانییه‌کانه به‌ئاڕاسته‌ى ھێنانه‌دى ئاسایش و ئارامى و پاراستنى شکۆ و سه‌روه‌رى ده‌وڵه‌ت و جێبه‌جێکردنى پرۆسه‌ى نیشتماى که هێزى گه‌ل و چالاکییه سیاسى و کۆمه‌ڵایه‌تییه‌کان بونیادیان ناوه. هه‌روه‌ها ئه‌نجامدانى هه‌ڵبژاردنه‌کان له واده‌ى دیاریکراوى خۆیدا له مانگى ئۆکتۆبه‌رى داهاتو ئه‌رکێکى ده‌ستورى و نیشتمانییه، بۆیه پاشگه‌زبونه‌وه‌ى تێدا نییه و پێویسته ببێته ده‌رفه‌تێک بۆ ده‌ربازبون له کێشه و ئاسته‌نگه‌کان که وڵات پێیه‌وه ده‌ناڵێنێ، تا گۆڕانکارى بنه‌ڕه‌تى بێته‌کایه‌وه به ئاڕاسته‌ى راستکردنه‌وه‌ى ھه‌ڵه‌کان به رێگه‌ى ئاشتی. ده‌قى راگه‌یه‌ندراوى چوار سه‌رۆکایه‌تیه‌که‌ى عێراق: ئه‌مڕۆ پێنجشه‌ممه 27-5-2021 له کۆشکى به‌غداد به ئاماده‌بوونى د. به‌رهه‌م ساڵح، سه‌رۆک کۆمارى عێراق و مسته‌فا کازمی، سه‌رۆکى ئه‌نجومه‌نى وه‌زیران و محه‌مه‌د حه‌لبوسی، سه‌رۆکى ئه‌نجومه‌نى نوێنه‌ران و دادوه‌ر فائق زێدان، سه‌رۆکى ئه‌نجومه‌نى باڵاى دادوه‌رى کۆبوونه‌وه‌یه‌ک به‌ڕێوه‌چوو سه‌باره‌ت به پێشهاته‌کانى ئه‌م دواییه‌ى وڵات و ده‌رئه‌نجامه مه‌ترسیداره‌کانی. به‌شداربووانى کۆبوونه‌وه‌که جه‌ختیانکرده‌وه رووداوه‌کانى ئه‌م دواییه‌ى وڵات پێویستى به یه‌کخستنى هه‌وڵه نیشتمانییه‌کانه به‌ئاڕاسته‌ى ھێنانه‌دى ئاسایش و ئارامى و پاراستنى شکۆ و سه‌روه‌رى ده‌وڵه‌ت و جێبه‌جێکردنى پرۆسه‌ى نیشتماى که هێزى گه‌ل و چالاکییه سیاسى و کۆمه‌ڵایه‌تییه‌کان بونیادیان ناوه له پێناو رزگارکردنى وڵات له قه‌یران و ئاسته‌نگه‌کان و ئه‌نجامدانى هه‌ڵبژاردنى دادپه‌روه‌رانه. ئاماده‌بووانى کۆبوونه‌وه‌که جه‌ختیشانکرده‌وه به‌رده‌وامى گرژییه ئه‌منییه‌کان و ده‌ستدرێژیکردنه سه‌ر ده‌سه‌ڵاتى ده‌وڵه‌ت و پاراستنى مافه‌کانى بۆ ده‌ستگرتن به‌سه‌ر بڕیارى ئه‌منى و سه‌ربازى پێشلکارییه‌کى مه‌ترسیداره بۆ سه‌ر ده‌سه‌ڵات و شکۆى ده‌وڵه‌ت له سه‌پاندنى یاسا و پارێزگاریکردن له ئاسایشى هاووڵاتیان، ھه‌روه‌ک سه‌قامگیرى وڵات ده‌خاته ژێر مه‌ترسى راسته‌قینه‌وه، بۆیه پێویسته ھێز و لایه‌نه سیاسییه‌کان هه‌ڵوێستى جددیان ھه‌بێت بۆ رێگرتن له‌و جۆره رووداوانه و پشتیوانى ده‌وڵه‌ت بکه‌ن بۆ رێکخستنه‌وه‌ى چه‌ک ته‌نھا له ده‌ست ده‌وڵه‌ت و یه‌کخستنى تواناکان و دوور خستنه‌وه‌ى فیتنه و به‌هێزکردنى یه‌کڕیزى نیشتمانى و دانبه‌خۆداگرتن، هه‌روه‌ها گرنگه بڕیارى یه‌کگرتوو و جددى بۆ کۆتایى ھێنان به قه‌یرانه‌کان به گوێره‌ى ده‌ستوور و یاسا و رێگریکردن له دروستبوونى گرژى زیاتر ده‌ربکرێت. به‌شداربووانى کۆبوونه‌وه دووپاتیانکرده‌وه له‌سه‌ر پێویستى رێزگرتن له‌و بڕیارانه‌ى که له‌لایه‌ن دادگاوه ده‌رده‌چێت، ھه‌روه‌ھا رێزگرتن له جێبه‌جێکردنى رێکاره‌کانى دامه‌زراوه‌کانى ده‌وڵه‌ت له‌باره‌ى دۆسێ یاساییه‌کان و رێگرینه‌کردن له بڕیاره‌کانى دادگا له ده‌ره‌وه‌ى چوارچێوه‌ى ده‌ستوور و پابه‌ندبوون به رێوشوێن و ده‌قه یاساییه‌کان له پێناو به‌رز راگرتنى سه‌روه‌رى یاسا و بنه‌ماى به ھاووڵاتى بوون له ده‌وڵه‌تێک که پارێزه‌رى گه‌ل و زامنى مافى ته‌واوى هاووڵاتییه‌کانى بکات به‌بێ جیاوازی. له کۆتاى کۆبوونه‌وه‌که‌دا به‌شداربووان ته‌ئکیدیانکرده‌وه هه‌ڵبژاردنى ئه‌نجومه‌نى نوێنه‌رانى داهاتوو گرنگییه‌کى یه‌کجار گه‌وره‌ى هه‌یه، به‌تایبه‌تى که دواى داواکارییه جه‌ماوه‌رییه‌کان ھات بۆ چاکسازی، هه‌روه‌ها دواى که‌ڵه‌که‌بوونى قه‌یرانه‌کان و خراپ به‌ڕێوه‌بردن و ته‌شه‌نه‌کردنى گه‌نده‌ڵی، بۆیه ئه‌نجامدانى هه‌ڵبژاردنه‌کان له واده‌ى دیاریکراوى خۆیدا له مانگى ئۆکتۆبه‌رى داهاتوو ئه‌رکێکى ده‌ستوورى و نیشتمانییه، بۆیه پاشگه‌زبوونه‌وه‌ى تێدا نییه و پێویسته ببێته ده‌رفه‌تێک بۆ ده‌ربازبوون له کێشه و ئاسته‌نگه‌کان که وڵات پێیه‌وه ده‌ناڵێنێ، تاوه‌کو گۆڕانکارى بنه‌ڕه‌تى بێته‌کایه‌وه به ئاڕاسته‌ى راستکردنه‌وه‌ى ھه‌ڵه‌کان به رێگه‌ى ئاشتی، له‌و چوارچێوه‌یه‌شدا و بۆ هێنانه‌دى ئه‌و ئامانجانه پێویسته مه‌رجى پێویست بۆ پرۆسه‌ى هه‌ڵبژاردن دابنرێت و هیچ پاشه‌کشه‌یه‌ک نه‌کرێ له جێبه‌جێکردنى پێوه‌ره‌کانى پاک و بێگه‌ردى له ته‌واوى قۆناغه‌کاندا، ھاوکات زامنى به‌شدارى به‌رفراوانى خه‌ڵک بکرێت، له پێناو فه‌راھه‌مکردنى خواستى ئازادانه‌ى گه‌ل له هه‌ڵبژاردنى نوێنه‌ره‌کانیان دوور له ساخته‌کارى و فرتوفێڵ و گوشار، وه‌ک ده‌رفه‌تێک بۆ ھێنانه‌کایه‌وه‌ى خواستى راسته‌قینه‌ى خه‌ڵک.
هاوڵاتى بافڵ تاڵه‌بانى هاوسه‌رۆکى یه‌کێتى نیشتمانى کوردستان رایگه‌یاند:" یه‌کێتى له‌گه‌ڵ بوونى میدیایه‌کى ئازاد و بوێردایه، چونکه پێمانوایه ئه‌زموونى دیموکراتى ھه‌رێم و ئه‌م کۆمه‌ڵگایه‌ى شانازى پێوه‌ده‌که‌ین به‌ستراوه‌ته‌وه به ده‌نگى ئازاد و میدیاى ئازاد و ئازا، راشیگه‌یاند:" له‌گه‌ڵ سزادانى سیاسى نه‌بوون و نابن، بۆ ئه‌وه‌ش ناشیانه‌وێت چیتر گه‌نجه‌کانى بادینان ببنه قوربانى مه‌رامى سیاسی". ئه‌مڕۆ پێنجشه‌ممه 27ى ئایارى 2021، به‌پێى راگه‌یه‌نراوێکى نوسینگه‌که‌ى بافڵ تاڵه‌بانی، ھاوسه‌رۆکى یه‌کێتیى له ده‌باشان پێشوازیکردوه له مارتن هووس، باڵیۆزى یه‌کێتیى یٔه‌وروپا له عێراق و ڤێنسنت گیووم پۆپۆ، به‌رپرسى نووسینگه‌ى یه‌کێتیى یٔه‌وروپا له هه‌رێمى کوردستان. له‌دیدارێکدا گفتوگۆى ورد و ھه‌مه‌لایه‌نه کراوه له‌سه‌ر پرسى ئازادى راده‌ربڕین، رۆڵى میدیا و ره‌خساندنى زه‌مینه‌ى له‌بارتر بۆ پیشه‌ى رۆژنامه‌وانى و ده‌ستخستن و پێدانى زانیارى به راگه‌یاندنکاران. بافڵ تاڵه‌بانى رایگه‌یاندووه، یه‌کێتیى نیشتمانیى کوردستان له‌سه‌ره‌تاوه له‌سه‌ر بنه‌ماى ئازادى و ئازادى راده‌ربڕین دامه‌زراوه و یه‌کێک له‌کۆڵه‌که‌کانى بونیادى یه‌کێتی، ره‌خنه و ره‌خنه له‌خۆگرتن و ره‌خساندنى زه‌مینه‌ى له‌بار بووه بۆ نووسه‌ر و رۆژنامه‌نووسان. نابێت به‌ناوى یاساوه سنووره‌کانى کارى رۆژنامه‌وانى به‌رته‌سک بکرێته‌وه و دژى هه‌موو رێگرى و سنووردارکردنێکى کاره‌کانى ئه‌و توێژه گرنگه‌ى کۆمه‌ڵگاین. ھاوسه‌رۆک راشیگه‌یاند:" یه‌کێتى له‌گه‌ڵ بوونى میدیایه‌کى ئازاد و بوێردایه، چونکه پێمانوایه ئه‌زموونى دیموکراتى ھه‌رێم و ئه‌م کۆمه‌ڵگایه‌ى شانازى پێوه‌ده‌که‌ین به‌ستراوه‌ته‌وه به ده‌نگى ئازاد و میدیاى ئازاد و ئازا، که بۆ ئه‌وه‌ش ھه‌موو ھه‌وڵێکمان روو له ڕه‌وینه‌وه‌ى ئه‌و بۆچوونانه‌یه که له‌سه‌ر ئاستى کۆمه‌ڵگاى نێوده‌وڵه‌تی". هاوکات سه‌باره‌ت به سزادراوانى بادینانیش بافڵ تاڵه‌بانى جه‌ختیکردوه‌ته‌وه که "له‌گه‌ڵ سزادانى سیاسى نه‌بووین و نابن، بۆ ئه‌وه‌ش نامانه‌وێت چیتر گه‌نجه‌کانى بادینان ببنه قوربانى مه‌رامى سیاسی، له هه‌وڵه‌کانمان به‌رده‌وامین له‌پێناو ئازادکردنیان". هاوسه‌رۆکى یه‌کێتى داوا له سه‌رۆکى ھه‌رێمى کوردستان ده‌که‌ن له‌به‌رامبه‌ر ئه‌م که‌یسه سیاسییه ده‌سه‌ڵاتى خۆى به‌کاربهێنێت و ده‌بێت به‌ھه‌مووان رێگرى له‌م پێشهاته مه‌ترسیداره بکه‌ن که له‌ئه‌گه‌رى به‌رده‌وامبوونیدا ناوبانگى ھه‌رێمه‌که‌مان له‌که‌دارده‌کات.
هاوڵاتى دوو تۆمه‌تبارى بازرگانى مادده‌ى هۆشبه‌ر رووبه‌رى ئاسایش ده‌بنه‌وه‌و کارمه‌ندێک و یه‌کێک له تۆمه‌تباره‌کان بریندار ده‌بێت، ئاسایشى راپه‌رینیش روونکردنه‌وه‌ى له‌سه‌ر ده‌دات. ئه‌مڕۆ پێنجشه‌ممه 27ى ئایارى 2021، له ڕوونکردنه‌وه‌یه‌کى ئاسایشى ڕاپه‌ڕین باسى له‌وه‌کردووه، دواى هه‌وڵیان بۆ ده‌ستگیرکردنى تۆمه‌تبارێکى مادده‌ى هۆشبه‌ر، ڕووبه‌ڕووبونه‌وه ڕوویداوه‌و کارمه‌ندێکى ئاسایش بریندار بووه. به‌ڕێوه‌به‌رایه‌تى ئاسایشى ڕاپه‌ڕین له‌رونکردنه‌وه‌یه‌کدا رایگه‌یاند:" هێزه‌کانمان به‌فه‌رمانى دادوه‌ر له بنکه‌ى ئاسایشى زه‌ڵێى سه‌ر به‌ناحیه‌ى سه‌نگه‌سه‌ر دوو تۆمه‌تباریان به‌مادده‌ى هۆشبه‌ر ده‌ستگیر کرد، به‌رله‌وه‌ى ده‌ستگیربکرێن روبه‌ڕوى هێزه‌کانمان بونه‌وه، یه‌کێک له‌کارمه‌نده‌کان برینداربوو، له‌ئێستادا ته‌ندروستى کارمه‌نده‌که جێگیره". هاوکات ئه‌وه‌ش روونکراوه‌ته‌وه که هه‌ردوو تۆمه‌تباره‌که به‌فه‌رمانى دادوه‌ر به‌ندکراون و به‌پێى مادده‌ى (٢٦ و ٣٠ى له‌یاساى به‌ره‌نگاربونه‌وه‌ى مادده‌ى هۆشبه‌رو کارتێکه‌ره عه‌قڵیه‌کان) ڕاگیراون و لێکۆڵینه‌وه له‌گه‌ڵیاندا به‌رده‌وامه.
