عەباس عێراقچى: دانوستانی ئاشكرا لەگەڵ ئەمەریكا ناكەین

هاوڵاتی بڕیارە ئەنجومەنی نوێنەرانی عێراق لە دانیشتنی داهاتوویدا تاوتوێی لەشکرکێشییەکانی تورکیا بۆ سەر خاکی هەرێمی کوردستان و سزای سەر فڕۆکەخانەی سلێمانی بکات. فاتن قەرەغۆلی، ئەندامی لیژنەی گواستنەوە و گەیاندن لە ئەنجوومەنی نوێنەرانی عێراق بە رۆژنامەی سەباحی راگەیاندووە، "لە ماوەی رابردوودا سەردانی فڕۆکەخانەی سلێمانین کردووە و لەبارەی گەمارۆی سەر ئەو فڕۆکەخانەیە لەگەڵ سەرۆک وەزیرانی عێراق کۆبووینه‌وه‌”. ئاماژەی بەوەکردووە، “ئه‌و سزایه‌ى توركیا خستوویه‌تیه‌ سەر فڕۆكه‌خانه‌ى نێوده‌وڵه‌تى سلێمانى گه‌مارۆیی سیاسییە محەمەد شیاع سودانی، سەرۆک وەزیرانی عێراق داوایکردووە بەشێوازی دیپلۆماسی پرسەکە چارەسەربکرێت”. هەر لەسەر هەمان پرس، محەمەد شەمەری، ئەندامی لیژنەی ئاسایش و بەرگریی ئەنجومەنی نوێنەرانی عێراق به‌هه‌مان رۆژنامه‌ى وتوە، “لە دانیشتنەکانی ئایندەدا ئەنجومەنی نوێنەران گفتوگۆی زیاتر لەبارەی لەشکرکێشی تورکیا دەکات بۆ سەر ناوچە جیاوازەکانی پارێزگای دهۆک”.  

هاوڵاتی نه‌ته‌وه‌ یه‌كگرتووه‌كان لەبارەی کەمئاوی عێراقەوە هۆشداری ده‌دات و رایده‌گه‌یه‌نێت؛ عێراق له‌ ماوەی داهاتوودا رێژه‌یه‌كی كه‌م نه‌بێت، ناتوانێت بڕی ئاوی پێویست بۆ بەکارهێنان دابین بكات. ئەمڕۆ دووشه‌ممه‌ 22ی ته‌ممووزی 2024، غولام محه‌ممه‌د ئیسحاق، رێكخه‌ری نه‌ته‌وه‌ یه‌كگرتووه‌كان و ڕێكخه‌ری كاروباره‌ مرۆییه‌كان له‌ عێراق له‌ كۆنفرانسێكی رۆژنامه‌نووسیدا لەبارەی کەم ئاوی لە عێراق هۆشداری دا. دەشڵێت، عێراق له‌ ساڵی 2025دا ته‌نیا ده‌توانێت 15%ی رێژەی ئاوی پێویست دابین بكات. باسی لەوەشەکرد، عێراق یه‌كێكه‌ له‌و وڵاتانه‌ی كه‌وتووه‌ته‌ ژێر كاریگه‌رییه‌كی نه‌رێنی وشكه‌ساڵی و كه‌می ئاوەوە بۆیه‌ نه‌ته‌وه‌ یه‌كگرتووه‌كان له‌م بارەیەوە هاوكاریی عێراق ده‌كات. جێگەی ئاماژەیە، رۆژی سێشه‌ممه‌ 20ی كانوونی یه‌كه‌می 2022، محه‌مه‌د شیاع سوودانی، سه‌رۆكوه‌زیرانی عێراق له‌میانی به‌ڕێوه‌چوونی گه‌ڕی دووه‌می كۆنفرانسی به‌غدا بۆ هاوكاری و هاوبه‌شی له‌ عه‌ممانی پایته‌ختی ئوردن، وتارێكی پێشكه‌ش كرد و تێیدا باسی لە پرسی كه‌مئاوی کرد له‌ عێراقدا. سه‌رۆكوه‌زیرانی عێراق وتی، به‌هۆی كه‌مئاوییه‌وه ئێمه‌‌ له‌ژێر هه‌ڕه‌شه‌یه‌كی گه‌وره‌داین، پشكی عێراق له‌ ئاو كه‌مكراوه‌ته‌وه‌ و ئێمه‌ له‌ كێشه‌داین له‌گه‌ڵ ئێران و توركیا لەسەر ئەم پرسە، بۆیە داوایان لێده‌كه‌ین پشكی عێراق رەچاو بکەن و له‌رێگه‌ی سنووره‌وه‌ بڕی ئاوی پێویست بۆ عێراق به‌ربدرێته‌وه‌، بۆ ئه‌وه‌ی گه‌شه‌پێدان و سه‌قامگیری له‌ وڵاته‌كه‌مان به‌رده‌وامبێت". باسی لەوەشکرد، داوا له‌ هاووڵاتییان ده‌كه‌ین به‌هه‌ده‌ردانی ئاو كه‌مبكه‌نه‌وه‌ و ده‌ست بەم سامانە نیشتیمانشیەوە بگرن، وشكه‌ساڵی گه‌وره‌ترین هه‌ڕه‌شه‌یه‌ بۆ سه‌ر وڵاته‌كه‌مان به‌تایبه‌ت له‌ ناوچه‌كانی باشوور، داواش له‌ كۆمپانیا وه‌به‌رهێنه‌ره‌كان ده‌كه‌ین سوود له‌ ئاو وه‌ربگرن بۆ ئه‌وه‌ی خزمه‌تگوزاری كاره‌با پێشكه‌ش به‌ هاووڵاتییان بكه‌ن.  

هاوڵاتی وتەبێژی وەزارەتی كارەبای عێراق دەڵێت، حکومەتی هەرێمی کوردستان رۆژانە بە تێکڕا 900 مێگاوات کارەبا دەدات بە حکومەتی عێراق و ئەمەش كاریگەری لەسەر پێدانى كاتژمێرەكانی كارەبا هەیە. ئەمڕۆ دووشەممە، 22ی تەمووزی 2024، ئەحمەد موسا، وتەبێژی وەزارەتی كارەبای عێراق بە میدیا ناوخۆییەکانی رایگەیاند، بۆ دابینكردنی كارەباى 24 کاتژمێرى رۆژانە پێویستمان بە 48 هەزار مێگاوات هەیە، بەڵام ئێستاش عێراق رۆژانە 27 هەزار و 450 مێگاوات كارەبا بەرهەمدەهێنێت. ئەوەشی خستۆتەڕوو، هەرێمی كوردستان بە تێكڕا 900 مێگاوات كارەباى رۆژانە بە عێراق دەدات، ئەمەش كاریگەری لەسەر پێدانى كاتژمێرەكانی كارەبا هەیە. دەشڵێت، بێگومان لەڕێگەی هێڵەكانی گواستنەوەی وزەوە كارەبا دابین دەكەین، لەگەڵ ئێران چوار هێڵمان هەیە و لەگەڵ هەرێمی كوردستانیش هێڵمان هەیە، كە سەدان مێگاوات بۆ سیستەمی كارەبامان دابین دەكەن، ئەمەش یارمەتیدەرە بۆ بەردەوامبوونی پێدانی كارەبا. ئەحمەد موسا باسی لەوەشکردووە، بۆ دابینكردنی كارەبای عێراق رۆژانە پێویستمان بە 48 هەزار مێگاوات هەیە، بەڵام عێراق رۆژانە 27 هەزار و 450 مێگاوات كارەبا بەرهەمدەهێنێت. وتەبێژی وەزارەتی كارەبای عێراق ئاماژەی بەوەشکرد، هەرێمی كوردستان بە تێكڕا 900 مێگاوات كارەباى رۆژانە بە عێراق دەدات، ئەمەش كاریگەری لەسەر پێدانی کاتژمێرەکانى كارەبا هەیە و ئەو هاوكارییە گەورەیەشی وەزارەتی كارەبا لە رێگەی دابینكردنی بەشێك لە تاوەرەكانی گواستنەوەی كارەباوەیە لە پارێزگای دهۆك، لەو رێگەیەوە 300 مێگاوات کارەبا وەك قۆناغی یەكەم دەگوازرێتەوە. ئەوەشی ئاشکرا کرد، وەزارەتی كارەبای عێراق گرێبەستی لەگەڵ وەبەرهێنەرانی وێستگەكانی هەرێمی كوردستان هەیە، دوو هێڵ لە هەرێمەوە بۆ گواستنەوەی كارەبا بەستراوەتەوە بە پارێزگای دیالەوە، واتە هاوكاریمان هەیە و پێداویستی وزەمان لە هەرێمی كوردستانەوە پێدەگات. ئەمەش لە کاتێکدایە، هاوڵاتیانی هەرێمى کوردستان دەناڵێنن بەدەست كەمی و نەبوونی كارەبایی نیشتمانییەوە و لەو چوارچێوەشدا لە چەندین ناوچە گربونەوە دژى خراپى و کەمى کاتژمێرەکانى کارەبا لە ناوچە جیاوازەکان ئەنجامدراوە.  

هاوڵاتی ئەمڕۆ دادگای فیدراڵیی عێراق لەبارەی حەوت سکاڵا کۆبووەوە کە لە ماوەی رابردوودا لەبارەی کورسییەکانی پەرلەمانی کوردستان و دیاریکردنی کورسی پێکهاتەکان ئاڕاستەی دادگای فیدراڵی کرابوون. ئەمڕۆ دووشەممە 22ی تەموزی 2024، دادگای فیدراڵیی عێراق لەبارەی حەوت سکاڵا کۆبووەوە کە لە ماوەی رابردوودا لەبارەی کورسییەکانی پەرلەمانی کوردستان و دیاریکردنی کورسی پێکهاتەکان ئاڕاستەی دادگای فیدراڵی کرابوون، لە کۆبوونەوەکەدا دادگای فیدراڵیی حەوت سکاڵاکەی رەتکردەوە. سکاڵاکاران مادەی دوو لەیاسای تۆماری لیستی کاندیدانی پەسەندکردنی بۆ هەڵبژاردنی پەرلەمانی کوردستان، ژمارە 7ی ساڵی 2024 بە نادەستوری ناوبردووە و سکاڵایان لەسەر ئەو مادەیە لە دادگای فیدراڵی تۆمارکردووە، کە پەیوەستە بە ژمارەی کورسیەکانی پەرلەمانی کوردستان و دیاریکردنی کورسی پێکهاتەکان. لەبەرامبەریشدا دادگای فیدراڵی بەهۆکاری ئەوەی پێشتر ئەو پرسە لەلایەن دادگاکەوە یەکلاکراوەتەوە لە دانیشتنی 21-5-2024، بۆیە ئەمڕۆ بڕیاریدا بە رەتکردنەوەی سکاڵاکان. پێشتر دادگای فیدراڵی بڕیاریدابوو کە کورسییەکانی پەرلەمانی کوردستان لە 111 کورسییەوە بکرێت بە 100 کورسی و 11 کورسی کۆتاکانی لابرد، بەڵام دەستەی دادوەری ئەنجومەنی کۆمسیاران بڕیاریدا پێنج کورسی لە کۆی ئەو 100 کورسییەی دادگاکە بڕیاری لێداوە بۆ کۆتاکان تەرخانبکات.

هاوڵاتی سەرۆک وەزیرانی عێراق، مادە هۆشبەرەكان لە ئێستادا گەورەترین مەترسین لەسەر عێراق، ئاماژەی بەوەشدا مادە هۆشبەرەکان تەنیا كاریگەرییە خراپەكانیان لەسەر گەنجان نییە، بەڵكو دەبێتە هۆكاری ناسەقامگیری لە كۆمەڵگە. ئەمڕۆ دووشەممە 22ی تەموزی 2024، محەمەد شیاع سوودانی، سەرۆک وەزیرانی عێراق لەمیانەی بەشداریكردنی لە كۆنفرانسی رووبەڕووبوونەوەی مادە هۆشبەرەكان لە بەغدا وتارێكی پێشكەشكرد و رایگەیاند، "مادە هۆشبەرەكان لە ئێستادا گەورەترین مەترسین لەسەر وڵاتەكەمان، چونکە دەبنە هۆكاری هەڵوەشاندنەوەی خێزانەكان، هەروەها درووستبوونی بەشێكی تیرۆر بەرهەمی بەكارهێنانی مادەى هۆشبەرە". ئەوەشی وت، "مادە هۆشبەرەکان تەنیا كاریگەرییە خراپەكانیان لەسەر گەنجان نییە، بەڵكو دەبێتە هۆكاری ناسەقامگیری لە كۆمەڵگە، هەربۆیە ئەو كەسانەى بازرگانی بە مادەی هۆشبەرەوە دەكەن بە تووندی سزا دەدرێن". سودانی ئەوەشی ئاشکراکرد، "لەگەڵ وڵاتانی دراوسێ لە گفتوگۆداین بە مەبەستی هەماهەنگی كردن بۆ ڕووبەڕووبوونەوەی بازرگانیکردن بە مادەی هۆشبەر و درووستكردنی سیستەمێكی هاوبەش بۆ بە سزا گەیاندنی ئەو كەسانەی بازرگانی بەم مادانەوە دەكەن".

هاوڵاتی یەرەکە ناسنامەی سێ شەهیدی راگەیاند، کە لە ئەنجامی هێرشی دەوڵەتی تورکیا لە 14ی تەمووزدا لە پێنجوێن شەهیدبوون. ئەمڕۆ یەکشەممە، 21ی تەمووزی 2024، فەرماندەی یەکینەکانی رزگاریی کوردستان-یەرەکە، لە راگەیاندراوێکدا ناسنامەی سێ شەهیدی بڵاوکردەوە کە بەهۆى بۆردوومانی دەوڵەتی تورکیا لە پنجوێن شەهید بوون دەشڵێت، بەڵێن دەدەین، کە تادوایی لەسەر رێبازی ئەو شەهیدانە هەنگاو بنێین و بە دڵنیاییەوە خەونەکانیان دەهێنینەدی. لە راگەیاندراوەکەدا ئەوە خروەتەڕوو، وەک دەزانرێت لە رۆژهەڵاتی ناوەڕاستدا قۆناغێکی شەڕی جیهانی سێهەم لەئارادایە، لەم قۆناغەدا وەک گەلی کورد بە پرۆسەیەکی مێژوویدا تێپەڕدەبین، گەلە خۆڕاگرەکەمان لە هەر چوار پارچەی کوردستان و دەرەوەی وڵات بەشێوەی بێهاوتا تێدەکۆشێت. دەشڵێت، لەم کاتەدا گەلەکەمان لە هەموو کات زیاتر لە سەرکەوتنەوە نزیک بووەتەوە. یەرەکە باس لەوەشدەکات، لەم دواییەدا بەردەوام سوڕانەوەی فڕۆکەی سیخوریی بەسەر گۆڕەپانی پێنجوێن هەبووە، لە 14ی تەمووزدا فڕۆکەی جەنگی لە کاتژمێر 6 و 6:30دا سێ جار گۆرەپانەکانمانی بۆردوومان کرد. ئاماژە بەوەشدەکات، یەکینەیەکمان لەو کاتەی لەسەر ئەرکە شۆڕشگێڕییەکەیان بوون، بوونە ئامانجی ئەو بۆردوومانانە و لە ئەنجامدا سێ هەڤاڵمان شەهیدبوون. لە کۆتایی راگەیەندراوەکشدا هاتووە، سەرەخۆشی لەگەلی کوردستان بە تایبەتی بنەماڵەی شەهیدانی قارەمانمان دەکەین، لێرەدا جارێکی دیکە رایدەگەینین، لە پێناو سەرکەوتن لەسەر رێگەی ئەو شەهیدانە تا دوا دڵۆپی خوێنمان هەنگاو دەنێین و ئاواتەکانی ئەو هەڤاڵانەمان دەگەیەنینە سەرکەوتن. یەرەکە ناسنامەی ئەو شەهیدانەی بەم شێوەیە بڵاوکردۆتەوە، ناو و پاشناو: هیدایەت ڕەسوڵی ناسناو: جەنگاوەر میکایل کات و شوێنی بەشداربوون: 2020 مەریوان کات و شوێنی شەهیدبوون: 14ی تەمووزی 2024 پێنجوێن ناو و پاشناو: عومەر فرات ناسناو: ئاندۆک تۆڵهەڵدان کات و شوێنی بەشداربوون: 2020 فەرەنسا کات و شوێنی شەهیدبوون: 14ی تەمووزی 2024 پێنجوێن ناو و پاشناو: عیرفان زەندی ناسناو: ڕامان ڕێناس کات و شوێنی بەشداربوون: 2022 بانە کات و شوێنی شەهیدبوون: 14ی تەمووزی 2024 پێنجوێن

مەهران رەمەزان هاوڵاتی، سلێمانی یەکێک لە مەترسیدارترین سەرکردەکانی داعش رادەستی عێراق کرا و کە پارەی چەندین کردەی تیرۆریستیی رێکخراوەکەی لە عێراق و سووریا دابین کردووە. ئەمڕۆ شەممە، 20ی تەمووزی 2024، دەزگای ئاسایشی لوبنان رایگەیاند، یەکێک لە مەترسیدارترین سەرکردەکانی داعشی رادەستی حکومەتی عێراق کرد. دەشڵێت، بەرپرسی کاروباری دارایی داعشی لە سوریا و عێراق بە ناوی (ع. ع. دلێمی) تەمەن 50 ساڵ، رادەستی لایەنە پەیوەندیدارەکانی  حکومەتی فیدراڵی کرد. هاوکات، ئەمین ناسر، بەرپرسی نووسینگەی تۆڕی ڕاگەیاندنی عێراق لە بەیروت، لە لێدوانێکی ڕۆژنامەنووسیدا ئەوەی خستەڕوو، ئەو بەرپرسەی داعش، لە ساڵانی رابردوودا، پارەی چەندین کردەی تیرۆریستیی رێکخراوەکەی لە عێراق و سووریا دابین کردووە.   ئاماژەی بەوەشکردووە، ئەو تیرۆریستە یەکێک بووە لە مەترسیدارترین بەرپرسانی رێکخراوی تیرۆریستیی داعش و بەرپرس بووە لە ئامادەکردنی خۆکوژەکانی رێکخراوەکە.

هاوڵاتی جومانە غەلای، دوو ھاوپەیمانی و 13 حزب بەشداری ھەڵبژاردنی پەرلەمانی کوردستان دەکەن. ئەمڕۆ شەممە، 20ی تەمووزی 2024، جومانە غەلای وتەبێژی کۆمیسیۆنی باڵای سەربەخۆی ھەڵبژاردنەکانی عێراق رایگەیاند، 124 کاندید بەشێوەی سەربەخۆ بەشداری ھەڵبژاردنی پەرلەمانی کوردستان دەکەن. دەشڵێت: 19 کاندیدی پێکھاتەکانی کریستیان، 20 کاندیدی پێکھاتەی تورکمانیش تۆمارکراون. ئاماژەی بەوەشکرد، تا ناوەڕاستی مانگی داھاتوو تیروپشک بۆ ژمارەی لیست و کاندیدەکان دەکرێت. وتەبێژی كۆمسیۆنی باڵای هەڵبژاردنەكانی عێراق ناوی لیست و هاوپه‌یمانێتی و كاندیده‌كانی هەڵبژاردنی پەرلەمانی كوردستان به‌مجۆره‌ ئاشكرا كردوه‌:  ژمارەی هاوپەیمانێتی: 2 ژمارەی حزبەكان: 13 ژمارە لیستەكان: 139 كاندیدی سەربەخۆ: 124 كاندیدی پێكهاتەكان مەسیحی: 19 هەولێر: 7 سلێمانی: 4 دهۆك: 8 كاندیدی توركمان: 20 هەولێر : 14 سلێمانی: 6

مەهران رەمەزان هاوڵاتی، سلێمانی فڕۆکە جەنگییەکانی ئیسرائیل دامەزراوەیەکى گەورەى نەوتیىان لە یەمەن بۆردوومانکرد. ئەمڕۆ شەممە، 20ی تەمووزی 2024، دامەزراوەیەکى گەورەى نەوتیى لە یەمەن بۆردوومانکرا، لەم بارەوەیەوە ماڵپەڕى ئێکسیۆس ئاشکرایکرد، هێرشەکە لەلایەن فڕۆکە جەنگییەکانى ئیسرائیلەوە ئەنجامدراوە. میدیاى حوسییەکان رایانگەیاند، لە پارێزگاى حودەیدە لە یەمەن دامەزراوەیەکى گەورەى نەوتی بۆردوومانکراون. ماڵپەڕى ئێکسیۆس لە زارى بەرپرسێکى ئەمریکییەوە ئاماژەى بەوەکردووە، ئەو دامەزراوە نەوتییە لەلایەن فڕۆکە جەنگییەکانى ئیسرائیلەوە کراونەتە ئامانج. لەم بارەیەوە ئەو بەرپرسە ئەمریکییە ئەوەی ئاشکرا کردووە، فڕۆکە جەنگییەکانى ئیسرائیل دامەزراوەیەکى پاڵاوتنى نەوتیان بۆردوومانکردووە، ئەوەش لە تۆڵەى هێرشى درۆنیى حوسییەکان بۆ سەر ئیسرائیل. جێگەی ئەماژەیە، رۆژى هەینى، دەستەى پەخشى ئیسرائیل بڵاویکردەوە، بەهۆى کەوتنەخوارەوەى درۆنەوە لە ناوەڕاستى تەلئەڤیڤ و چەند سەند مەترێک دوور لە باڵیۆزخانەى ئەمریکا، هاوڵاتییەکى ئیسرائیلى گیانیلەدەستداوە و 10 کەسى دیکە برینداربوون.  

هاوڵاتی فەرماندەی  گشتیی هێزەکانی سوریای دیموکرات هەسەدە رایگەیاند، پشتیوانی له‌هەر هه‌وڵێك دەکەین بۆ گفتوگۆیەک کە دەبێتە هۆی وەستاندنی شەڕو گەیشتن بەچارەسەرێکی سیاسی بۆ قه‌یرانی‌ سوریا. ئەمڕۆ شەممە، 20ی تەمووزی 2024، مه‌زڵوم عه‌بدی‌، فەرماندەی  گشتیی هێزەکانی سوریای دیموکرات -هەسەدە- بەبۆنەی 12 ساڵەی “شۆڕشی 19ی تەمموز”، ئەو رۆژەی هێزەکانی حکومەتی‌ سوریا لەشاره‌كانی کۆبانێی‌‌و جه‌زیرەو عەفرین له‌ رۆژئاوای‌ كوردستان دورخرانەوە و دواتر ئیدارەی خۆسەر دامه‌زرێنرا، مەزڵوم عەبدی وتارێکی ڤیدیۆیی لەماڵپەڕی هێزەکانی سوریای دیموکرات -هەسەدە- بڵاوكرده‌وه‌ و رایگەیاند، هێزەکانی هێزەکانی سوریای دیموکرات‌ و پێکهاتەکانی باکوری رۆژهەڵاتی سوریا بنه‌مای‌ كاركردنی‌ تایبه‌تیان هه‌یه‌و به‌یه‌ك چاو سه‌یری‌ هه‌موو لایه‌ن‌ و پێكهاته‌كان ده‌كات. مەزڵوم عەبدی دەڵێت، قەیرانی سوریا بەتوندوتیژی‌و شەڕ چارەسەر ناکرێت، "ئامادەین بۆ گفتوگۆ لەگەڵ هەموو لایەنەکان‌ و هەموو هێزەکان بەتورکیاشەوە، پشتیوانی له‌هەر هه‌وڵێك دەکەین بۆ گفتوگۆیەک کە دەبێتە هۆی وەستاندنی شەڕو گەیشتن بەچارەسەرێکی سیاسی بۆ قه‌یرانی‌ سوریا.  ئەوەشی خستۆتەڕوو، هێزەکانی هێزەکانی سوریای دیموکرات‌ و پێکهاتەکانی باکووری رۆژهەڵاتی سوریا بنه‌مای‌ كاركردنی‌ تایبه‌تیان هه‌یه‌ و به‌یه‌ك چاو سه‌یری‌ هه‌موو لایه‌ن ‌و پێكهاته‌كان ده‌كات، لەسەر ئەو بنه‌مایه‌ش، "پێویستە بەرەو دیالۆگ بڕۆین بەمەبەستی دۆزینەوەی چارەسەرێکی ڕیشەیی بۆ قه‌یرانی‌ سوریا". ئاماژەی بەوەشکردووە، بۆ ئەوەی هەمووان هەست بەئاسودەیی‌و دڵنیایی بکەن، "هێزەکانمان له‌ئامادەیی ته‌واودان بۆ به‌رپه‌رچدانه‌وه‌ی‌ هەموو جۆرە هێرشێک بۆ سەر ناوچەکانمان". سه‌باره‌ت به‌و جوڵه‌و هه‌نگاوانه‌ی‌ له‌سه‌ر ئاستی‌ هه‌رێمیی‌و ناوچه‌كه‌ ده‌درێت بۆ نزیكبونه‌وه‌ له‌به‌شار ئه‌سه‌د، سه‌رۆكی‌ سوریا، عه‌بدی‌ ده‌ڵێت، نابێت له‌سه‌ر حیسابی گەل بێت. فەرماندەی  گشتیی هێزەکانی سوریای دیموکرات باس له‌وه‌ش ده‌كات، كه‌ هه‌سه‌ده‌ خاوه‌نی‌ 100 هه‌زار شه‌ڕكه‌رن‌و نوێترین جۆرەکانی تەکنەلۆجیای سەربازیی له‌به‌رده‌ستیاندایه‌.

هاوڵاتی سەرۆکی دەزگای شەهیدانی عێراق رایدەگەیەنێت، لێکۆڵێنەوە لە دۆسیەی مووچەی شەهیدان دەکرێت، ئاماژەی بەوەشکرد، نزیکەی 27 هەزار و 770 مووچەی شەهیدان راگیراون. ئەمڕۆ شەممە 20ی تەموزی 2024، عەبدولئیلاهـ نائیلی، سەرۆکی دەزگای شەهیدانی عێراق بە میدیای فەرمی عێراقی راگەیاندووە، "بە بڕیاری محەمەد شیاع سوودانی، سەرۆک وەزیرانی عێراق لیژنەیەک پکهێندراوە لێکۆڵێنەوە لە دۆسیەی مووچەی شەهیدان دەکەن، دوای ئەوەی زانیارییان "بەدەستگەیشت کەسانی تیرۆریست مووچەی شەهیدانەیان هەیە، هەروەها هەندێک لە مامەڵەکان ساختەن و بە بەرتیل رایی کراون". ئەوەشی وتەوە، "لە ئەنجامی ئەو کارەدا نزیکەی 27 هەزار و 770 مووچەی شەهیدان راگیراون؛ دۆسیەکانیان وردبینی تێدا دەکرێ کە زۆرترینیان لە پارێزگای ئەنبارن". عەبدولئیلاهـ نائیلی دەڵێت، "هیچ کەسێک مافی نافەوتێ، هەر کاتێک لیژنەکە وردبینی تەواوکرد و دەرکەوت مامەڵەکان دروست و بێ کێشەن، مووچە راگیراوەکانیان پێکەوە بۆ خەرج دەکرێت"، ئەوەشی وت "تەنیا لە ئەنبار هەزار و 15 ناوی وەهمی و ساختە ئاشکرا کراون". مووچە راگیراوەکان بەگوێرەی پارێزگاکان بەم جۆرەیە: ئەنبار 26 هەزار و 790، بەسرە 18، دیوانیە 236، سەماوە 6، نەجەف 3، بابل 73، بەغدا 247، دیالە 158، زیقار 3، سەلاحەدین 83، کەربەلا 7، کەرکوک 38، نیسان 9، نەینەوا 82 و واست 17.

هاوڵاتی جێگری پێشوتری سەرۆك وەزیرانی عێراق لەبارەی کشانەوەی هێزەکانی ئەمەریکا لە عێراق زانیاری نوێ ئاشکرادەکات و باس لە رێککەوتنی نێوان ئەمەریکا و بەغدا دەکات. ئەمڕۆ شەممە 20ی تەموزی 2024، بەها ئەعرەجی, جێگری پێشوتری سەرۆك وەزیرانی عێراق رایگەیاند، "بەغدا و ئەمەریکا بەمزوانە دەگەنە رێككەوتنێكی مێژویی لەبارەی كشانەوەی هێزەكانی ئەمەریكا لە عێراق". ئاماژەی بەوەکردووە، "خاڵەكانی كۆتایی دانران بۆ كشانەوەی ئەمریكا لە عێراق، داوا لە بەهەڵستكاران دەكەم ئارامی بپارێزن، ئەوەی هەوڵی هەڵكشانی ئاڵۆزییەكان بدات، دەیەوێت هێزەكانی ئەمریكا لە عێراق بمێنێتەوە". ئەوەشی خستەڕوو "محەمەد شیاع سودانی، سەرۆک وەزیرانی عێراق دەستكەوتی بەدەستهێناوە بە تەواوكردنی رەشنووسی كشانەوەی ویلایەتە یەكگرتووەكان، كشانەوە لە دیوە سیاسیەكەیدا بەدیهاتووە، هەندێك نیگەرانن لەو رێككەوتنەو هەوڵی تێكدانی دەدەن".

هاوڵاتی هێزەكانی بەڕێوەبەرایەتی هەواڵگری و ئاسایشی بەغدا دەستگیرکردنی هەشت بازرگانی مادەی هۆشبەری راگەیاند و دەستیش بەسەر بڕێک مادەی هۆشبەردا گیرا. ئەمڕۆ هەینی 19ی تەموزی 2024، هێزەكانی بەڕێوەبەرایەتی هەواڵگری و ئاسایشی بەغدا ڕاگەیەندراوێکی بڵاوکردەوە و رایگەیاند، " لە چەند ئۆپەراسیۆنێكدا جیاوازدا لە سنووری بەغدا هەشت بازرگانی مادەی هۆشبەر دەستگیركران، هەروەها دەست بەسەر بڕێكی زۆر مادەی هۆشبەر و چەكی سووكدا گیرا". ئاماژە بەوەشكراوە، "بازرگانەكانی ماددەی هۆشبەر بەپێی بڕگەكانی ماددی (٢٨)ی مادەی هۆشبەر فەرمانی دەستگیركردنیان بۆ دەرچووە". باس لەوەشکراوە، "رێكاری یاسایی بەرامبەر ئەو هەشت داواكراوە گیراوەتەبەر و ڕەوانەی دەسەڵاتی دادوەری كران، بۆ ئەوەی لێكۆڵینەوەیان لەگەڵ بكرێت و بە سزای خۆیان بگەیەندرێن".

هاوڵاتی شانەی راگەیاندنی ئەمنیی رایگەیاند، هێزی ئاسمانی عێراقی ژمارەیەک چەکدارانی داعشیان لە سنووری نێوان ئۆپەراسیۆنەکانی کەرکوک و سەلاحەدین لە زنجیرە چیای حەمرین کردە ئامانج.   بەرەبەیانی ئەمڕۆ هەینی، 19ی تەمووزی 2024، شانەی راگەیاندنی ئەمنیی فەرماندەیی ئۆپەراسیۆنە هاوبەشەکان لە راگەیێندراوێکدا رایگەیاند، پاش بەدواداچوونی وردی هەواڵگری بۆ ماوەی چەند رۆژێک بەهاوئاهەنگی لەگەڵ دەزگای دژە تیرۆر و شانەی بەئامانجکردنی سەر بە فەرماندەیی ئۆپەراسیۆنە هاوبەشەکان کاتژمێر 5ی بەرەبەیانی ئەمڕۆ هەینی هێزی ئاسمانی عێراقی ژمارەیەک چەکدارانی داعشیان لە سنووری نێوان ئۆپەراسیۆنەکانی کەرکووک و سەلاحەدین لە زنجیرە چیای حەمرین کردە ئامانج. فەرماندەیی ئۆپەراسیۆنە هاوبەشەکان لە راگەیێنداوەکەیدا ئەوەشی خستۆتەڕوو، دواتر زانیاری ورد لە بارەی هێرشە ئاسمانییەکەی چیای حەمرین بڵاودەکەنەوە.

مەهران رەمەزان هاوڵاتی، سلێمانی نوسینگەی محەمەد شیاع سودانی، رەتیدەكاتەوە پەیوەندی بەو پەیجانەوە هەبێت كە لە تۆڕە كۆمەڵایەتییەكان "زیادەڕۆیی دەكەن لە ستایشكردنی حكومەت و سەرۆك وەزیران". ئەمڕۆ پێنج شەممە، 18ی تەمووزی 2024، نوسینگەی راگەیاندنی محەمەد شیاع سودانی سەرۆك وەزیرانی عێراق راگەیەندراوێكی بڵاوكردوەتەوەو راگەیاند، رەتیدەكاتەوە پەیوەندی بەو پەیجانەوە هەبێت كە لە تۆڕە كۆمەڵایەتییەكان "زیادەڕۆیی دەكەن لە ستایشكردنی حكومەت و كەسی سەرۆك وەزیران. دەشڵێت، ئەم شێوازە لە ستایشكردن ئامانج لێی لێدان لە متمانەی هاوڵاتیان و چەواشەكردنی جەماوەرەو ئەوانەی لە پشت ئەو پەیجانەوە، لەو لایەن و بازنانەن كە بەهۆی هەنگاوەكانی روبەڕووبونەوەی گەندەڵییەوە زیانیان بەركەوتووە. ئەوەشی خستۆتەڕوو، حكومەت هێشتا كار بۆ بەدیهێنانی ئامانجەكانی دەكات و بەردەوامە لە تەواوكردنی پرۆژەكامە لە بواری گەشەپێدان و چاكسازیدا، لە هیچ قۆناغێكدا شێوازی ستایشكردن بەشێك نەبووە لە سیاسەتەكانی، ئەم شێوازە زیان بە خۆی و تیمەكەی دەگەیەنێت، بەتایبەتیش ئەو كارانەی كە حكومەت ئەنجامی دەدات ئەركی خۆیەتی. جێگەی ئاماژەیە، ئەم راگەیەندراوە دوای ئەوە دێت بەمدواییە لەناو لایەنەكانی چوارچێوەی هەماهەنگییەوە سودانی تۆمەتبار دەكرێت بەوەی هاوشێوەی مستەفا كازمی سەرۆك وەزیرانی پێشووی عێراق پارەیەكی زۆری حكومەت بە خەرج دەدات بۆ كڕین و بەڕێوەبردنی پەیجەكان لەناو تۆڕی كۆمەڵایەتی، بەمەبەستی جوانكردنی وێنەی خۆی و كارەكانی حكومەتەكەی.