نێچیرڤان بارزانی: بۆ جێبەجێکردنی دەستوور باشتر کاردەکەین

هاوڵاتی بانکی ناوەندیی ئێران بڵاویکردەوە، بە مەبەستی بەردەوامیدان بە جوڵەی گەشتیاری و بازرگانی لە نێوان عێراق و ئێران گۆڕانکاری کرا لە مامەڵە داراییەکان لە دۆلارەوە بۆ یۆرۆ، شارەزایەکی ئابووریش لە هەرێمی کوردستان دەڵێت "ئەو بڕیارە ئێران دەبێتە هۆی دابەزینی بەهای دۆلار". ئەمڕۆ سێشەممە 5ی ئازاری 2024  بانکی ناوەندیی ئێران لە راگەیەندراوێکدا ئاماژەی بەوەکرد "بە پشتبەستن بە سیاسەتی دراوی کۆماری ژمارە 14 بڕیاردراوە بە گۆڕانکاری لە مامەڵە داراییەکاندا لە دۆلارەوە بۆ یۆرۆ و تمەنی ئێرانی". بانکی ناوەندیی ئێران ئەوەشخراوەتەڕوو "هەر گەشتیارێک لە مانگی ئازاردا گەشت بۆ عێراق بکات بڕی هەزار یۆرۆی بە نرخی فەرمی بانکەکە بۆ دابین دەکرێت". سەعد عەبدوڵڵا گوڵپی، شارەزای بواری ئابووری لەبارەی بڕیارەکەی ئێرانەوە بە هاوڵاتی وت "لەڕووی سیاسییەوە مامەڵەنەکردن بە دۆلارەوە لە ئێران کاریگەریی خراپی دەبێت لەسەر ئەمەریکا، هەروەها لە بەرامبەریشدا کارکردن بە یۆرۆ لە قازانجی ئەوروپایە و ئەم بڕیارەش بۆ ئێران باشە و مامەڵە لەگەڵ ئەمەریکا ناکات". ئاماژەی بەوەشکرد "لە رووی ئابوورییەوە ئەم بڕیارە بۆ ئێران باشە، چونکە ئێران بە ئاسانی دۆلاری دەستنەدەکەوت بەڵکو لەڕێگەی عێراق و سوریا و لوبنانەوە دەیتوانی دۆلار بەدەستبهێنێت، هەروەها بەهۆی ئەو فشارانەی بانکی ناوەندیی عێراق دروستیکردووە لەسەر گەشتیاران و داخستنی کۆمەڵێک بانکی ئەهلیی لەلایەن ئەمەریکاوە وایکردووە کە ئێران لەرێگەی بانکەکانی عێراقەوە دۆلاری دەستبکەوێت، بۆیە ئێران ناچاربوو ئاڕاستەی خۆی لە دۆلارەوە بۆ یۆرۆ بگۆڕێت". ئەو شارەزای ئابوورییەش لەبارەی کاریگەریی ئەو بڕیارە لەسەر گەشتیارانی هەرێم و عێراق وتی "ئەم بڕیارە بۆ هەرێم و عێراق باشە، چونکە ئەو چاوچنۆکییەی ئێران هەیبوو بۆ دەستکەوتنی دۆلار لە عێراقەوە ببووە هۆکاری ئەوەی بەهای دۆلار بەرزبێتەوە لە عێراق و هەرێمی کوردستان، دوای ئەم بڕیارە چیتر ئەمە نامێنێت، چونکە گەشتیاران و ئەوانەی لە عێراق و هەرێمەوە دەچنە ئێران لە بری دۆلار یۆرۆ دەبەن لەگەڵ خۆیان، ئەمەش یارمەتی دابەزینی بەهای دۆلار دەدات".  

هاوڵاتی سەرۆکی دادگای فیدراڵی عێراق رایدەگەیەنێت سەرجەم فەرمانگە لاوەکییەکانی هەرێم دەتوانن راستەوخۆ مامەڵە لەگەڵ وەزارەتی دارایی عێراق بکەن. جاسم عومێرى، سەرۆکی دادگای فیدراڵی بە ئاژانسی هەواڵی عێراقییەی راگەیاندووە  "ئەو بڕیارانەی لەلایەن دادگای فیدراڵییەوە دەردەچن پابەندکەرن بۆ هەموو دەسەڵاتەکان، بۆیە سەرجەم فەرمانگە لاوەکییەکانی هەرێم دەتوانن راستەوخۆ مامەڵە لەگەڵ وەزارەتی دارایی عێراق بکەن". ئاماژەی بەوەشکردووە "بڕیارەکەی دادگای فیدراڵی کە دەرچووە، سەرۆکی حکومەتی فیدراڵی‌ و سەرۆکی حکومەتی هەرێمی پابەندکرد بەیەکلاکردنەوەی مووچەی فەرمانبەران‌ و خانەنشینان‌ و سودمەندانی پاراستنی کۆمەڵایەتی لەگەڵ بانکەکانی حکومەتی فیدراڵی‌ و لێبڕینی مووچەی هەرێم". ئەوەشی وتوە "سەلمێنراوە فەرمانبەران لە هەرێمى کوردستان مانگانە لەکاتى خۆیدا مووچەکانیان وەرناگرن، ناکرێت فەرمانبەرێک لە ناوەڕاست‌ و باشوورى عێراق هەموو مانگێک لەکاتى خۆیدا مووچەکەى وەربگرێت، بەڵام فەرمانبەران لە هەرێمى کوردستان لەم مافەیان بێبەش بن، هەروەها دەبێت سامانى نەوت‌ و گاز و سەرچاوەکانى دیکە بۆ تەواوى گەلى عێراق بێت". سەرۆکى دادگاى فیدراڵى دەشڵێت "هەڵنەبژاردن‌ و دیارینەکردنى سەرۆکێکى نوێ بۆ په‌رله‌مانى عێراق ماناى ئەوەنییە کارەکە بوەستێت، پێیوستە په‌رله‌مان بەشێوەیەکى ئاسایی کارەکانى بەڕێوەببات تا ئەوکاتەى کەسێکى دیکە بۆ ئەو پۆستە دیاریدەکرێت".

هاوڵاتی بە بۆنەی یادی ٣٣ ساڵەی راپەڕینی کوردستان کۆنگرەی نەتەوەیی کوردستان پەیامێکی بڵاوکردەوە و چەند داواکارییەک دەخاتەڕوو. لە پەیامەکەیدا کۆنگرەی نەتەوەیی کوردستان رایگەیاند "بە بۆنەی ٣٣ ساڵەی ڕاپەڕینی گەلی کوردستان پیرۆزبایی گەرمی خۆمان ئاڕاستەی تەواوی گەلەکەمان  بەگشتی و باشووری کوردستان بە تایبەتی دەکەین و سڵاوی رێزو وەفا بۆ خانەوادەی شەهیدان لەناویاندا شەهیدانی ڕاپەڕینی ١٩٩١ دەنێرین". ئاماژە بەوەشکراوە "وەک ئاشکرایە خەڵکی باشوری کورستان لە(٥)ی ئازاری ساڵی ١٩٩١ لە ڕاپەڕینێکی کەم وێنەدا بە بەشداری تەواوی چین و توێژەکان ولە ماوەیەکی زەمەنی یەکجار کورتدا، دەسەڵاتی بەعسی فاشییان لەتەواوی خاکی باشووری کوردستاندا ڕاماڵی، بەرهەمی ڕاپەڕین هەڵبژاردنی پەرلەمان و دامەزراندنی حکومەتی هەرێمی کوردستان بوو، ئەو ئەزموونە لەتەواوی کوردستانداخەونی چەند ساڵەی گەلەکەمان بوو". ئەوەش هاتووە "دوای ٣٣ ساڵ لە ئەنجامدانی ڕاپەڕین بەهۆی مۆدێلی خراپی حوکمڕانی و ناکۆکیەحزبیەکان ودەستوەردانی دەرەکی وزاڵبوونی ئەجێنداکانیان، دەستکەوتەکانی خەڵکی کوردستان کە خۆی لە بەرهەمی ڕاپەرین دەبینێتەوە لە ئێستادا لە هەموو کاتێک زیاتر،لە بەردەم هەڕەشەی لەناوچووندان". ئەوەشخراوەتەڕوو، لەوسۆنگەیەوە ئێمە لە کۆنگرەی نەتەوەیی کوردستان لە پێناو پاراستنی دەستکەوتەکانی ڕاپەڕین وگەشەپێدانی وڕاستکردنەوەی چەوتیەکانی رابوردوودا، داوا دەکەین: ـ پڕەنسیپەکانی ڕاپەڕین کە بریتی بوو لە یەکڕیزی نیشتمانی کاری لەسەر بکرێت تا کۆتایی بە پەرتەوازەیی سیاسی و بەرژەوەندی حزبی بهێندرێت و بنەماکانی ئازادی و دیموکراسی وهەڵبژاردنی پاک وبێگەرد پەیڕەوبکرێت و حوکمی رەشید بنیانتبنرێت. - کێشەکانی خەڵک چارەسەربکرێن و متمانەی جەماوەر بە ئەزموونی سیاسی کوردستان زیندووبکرێتەوە،ئەو متمانەیەی کەڕاپەڕینی سەرخست. لە کۆتایی پەیامەکەشدا هاتووە، لەم بۆنەیە و جارێکی ترکۆنگرەی نەتەوەیی کوردستان بانگەوازی سەرجەم لایەنە سیاسیەکانی کوردستان دەکات کە بۆ رووبەڕووبونەوەی ئاڵنگارییەکان ودانانی ستراتیژێکی نیشتمانی نەتەوەیی لەسەر مێزی گفتوگۆ کۆببنەوە، کەهەر ئەوەیان دەتوانێت ڕێگری لە ئەجێندای دوژمنان و داگیرکەرانی کوردستان بکات وگەلەکەمان ودەستکەوتەکانی بەکەناری ئارامی.

هاوڵاتی رۆژی دووشەممە 4/3/2024 ئەنجومەنی جێبەجێكردنی یەكگرتووی ئیسلامیی كوردستان  بە سەرپەرشتی مامۆستا سەلاحەدین محەمەد، ئەمینداری گشتی یەكگرتوو و د. هادی عەلی سەرۆكی ئەنجومەنی سەركردایەتی، د. محەممەد ئەحمەد سەرۆكی دەستەی باڵای چاودێری و ئەندامانی ئەنجومەن كۆبوونەوەی ئاسایی خۆی لە شاری هەولێر ئەنجامدا. لە کۆبوونەوەکەدا، ئەمینداری گشتی یەكگرتوو تیشكی خستە سەر بارودۆخی هەرێمی كوردستان و عێراق و ناوچەكە و ڕووداو و پێشهاتەكان خرایە بەر باس و تاوتوێكردن، بە مەبەستی وەرگرتنی هەڵوێستی پێویست و دەستنیشانكردنی ئەرك و بەرپرسیارێتی قۆناغەكە. هەروەها ئەنجومەنی جێبەجێكردن لە چوارچێوەی ئامادەكاریەكانی هەڵبژارنی پەرلەمانی كوردستان تاوتوێی راپۆرتی لیژنەكانی هەڵبژاردنی ( هەولێر و دهۆك و سلێمانی و هەڵەبجە)ى كرد و تەئكیدی كردەوە كە یەكگرتووی ئیسلامی كوردستان بەردەوامە لەسەر (پرۆژەی چوارچێوەی نیشتمانی دەنگی نارازی) كە كراوەيه لەبەردەم سەرجەم هێز و رێكخراو و كەسایەتیە نارازییەكانی شەقامی كوردستان، بە هیوای ئەوەی هەڵبژاردنەكەی 10/6/2024 سەرەتای قۆناغێكی نوێ بێ لە گۆرانكاری ریشەیی .  

هاوڵاتی ئەنجومەنی دادوەریی هەرێمی كوردستان ئامارەكانی جیابوونەوە و هاوسەرگیری لە ساڵی 2023 بڵاوكردەوە. ئەمڕۆ دووشەممە 4ی ئازاری 2023 ئەنجومەنی دادوەریی هەرێمی كوردستان ئامارەكانی ساڵی 2023ی بڵاوكردەوە، بەپێی ئامارەكە، زۆرترین رێژەی هاوسەرگیری لە پارێزگای سلێمانی بووە كە (20 هەزارو 427) حاڵەت بووە بەرێژەی (39%). ئەوەشخراوەتەڕوو، رێگەدان بە ژنهێنانی دووەم زۆرترین حاڵەت لە پارێزگای هەولێر بووە كە (34) حاڵەت بووە، هەروەها زۆرترین حاڵەتی لێكجیابوونەوەی هاوسەران "تەڵاق" لە پارێزگای هەولێر بووە كە (5 هەزارو 857) حاڵەت بووە بەرێژەی (33%). بەپێی ئامارەکە رێژەی هاوسەرگیری لە شارەکانی هەرێم بەم جۆرە بووە: -هەولێر: (17,543) -سلێمانی: (20,427)  -دهۆك: (12.499)  -گەرمیان: (2.618)  -كۆی گشتی: (53,087) هەروەها رێژەی جیابوونەوە لە شارەکانی هەرێم بەم جۆرەبوون: - هەولێر: (5,857)  رێژەی جیابوونەوە (33%) -سلێمانی: (5,438) رێژەی جیابوونەوە (37%) -دهۆك: (2,164) رێژەی جیابوونەوە (17%) -گەرمیان: (853) رێژەی جیابوونەوە (33%) -كۆی گشتی: (14,312) رێژەی جیابوونەوە لە هەرێمی كوردستان (27%)ە.

هاوڵاتی وەزیری دارایی و ئابووری هەرێمی کوردستان لەبارەی دواکەوتنی ناردنی لیستی مووچە بۆ بەغدا زانیاریی نوێ دەخاتەڕوو. ئاوات شێخ جه‌ناب، وه‌زیری دارایی و ئابووری حكومه‌تی هه‌رێمی كوردستان، له‌میانه‌ی دیدارێكی له‌گه‌ڵ کونسوڵی وڵاتی ژاپۆن لە هەرێمی کوردستان ئاشکرایکرد "راپۆرتی تەرازووی پێداچوونەوەی مانگی رابردوومان بۆ به‌غدا ناردووە و لە نزیکترین کاتدا لیستی مووچەی فەرمانبەران رەوانەی وەزارەتی دارایی عێراق دەکرێت". ئاماژەی بەوەشکرد "ە، هۆکاری دواکەوتنی ناردنی لیستی مووچەی فەرمانبەران پەیوەندی بە هەندێک ئاستەنگی هونەری و داواکارییە نوێكانی وەزارەتی دارایی عێراقەوە هەبوو، کە دەستکراوە بە جێبەجێکردنیان".

هاوڵاتی لەلایەن مەفرەزەكانی نووسینگەی نەهێشتنی تاوانی سەیدسادقەوە دوو تۆمەتبار دەستگیركران و دەستگیرا بەسەر بارێك دەرمانی قاچاغدا. بەڕێوەبەرایەتیی پۆلیسی سلێمانی رایگەیاند "دوای ئەوەی زانیاری گەیشتە دەست بەشی پۆلیسی سەیدسادق كە بارێك دەرمان هێنراوەتە سنووری قەزاكە، هێزەكانی پۆلیس لێكۆڵینەوە و بەدواداچوونەكانیان دەستپێكرد و دوای وەرگرتنی بڕیاری بەڕێز دادوەر توانرا لەلایەن نووسینگەی نەهێشتنی تاوانی سەیدسادقی سەربەبەشی پۆلیسی سەیدسادق دوو تۆمەتبار دەستگیربكرێن و دەستیشبگیرێت بەسەر ئەو بارە دەرمانەدا كە بە قاچاغ هێنرابووە هەرێمی كوردستان". ئاماژەی بەوەشکراوە "لە ئێستادا هەریەك لە تۆمەتباران (م،ع،ح لەدایكبووی 1995 - س،ج،ع لەدایكبووی 1984) بەبڕیاری دادوەرو بەپێی مادەی 50ی دەرمانخانەكان راگیراون و لێكۆڵینەوە لەگەڵیان بەردەوامە".

هاوڵاتی ئەمڕۆ دووشەممە ٤ی ئازاری ٢٠٢٤ نوێنەرانی پێکهاتەکانی هەرێمی کوردستان لە دژی دوایین بڕیارەکانی دادگای فیدراڵی بۆ هەڵوەشاندنەوەی کورسی کۆتاکان لە پەرلەمانی کوردستان گردبوونەوە و لە کۆنفرانسێکی رۆژنامەوانیدا بەیاننامەیەکیان بە زمانەکانی کوردی، تورکمانی، سریانی، عەرەبی و چەند زمانێکی دیکە ئاراستەی سەرۆک کۆماری عێراق، سەرۆکی دادگای فیدراڵی، دەسەڵاتدارانی هەرێمی کوردستان و کۆمەڵگەی نێودەوڵەتی کرد. لە بەیاننامەی پێکهاتەکان داوا لەو لایەنانە دەکەن کە بێدەنگ نەبن بەرامبەر بڕیاری دادگای فیدراڵی عێراق سەبارەت بە پێکهاتەکان دەڵێن "ئەو بڕیارە نادەدپەروەرییە، نادەستوورییە بەرامبەر بە پێکهاتەکان". ئاماژە بەوەشکراوە "بەپێی دەستوور، لەتیف رەشید، سەرۆک کۆماری ئێستای عێراق دەسەڵاتی هەیە و دەتوانێت لە دژی بڕیارەکانی دادگای فیدراڵی بوەستێتەوە و رێگری لە جێبەجێکردنیان بکات". وتیشیان "لەمەودوا ستەم و نادادپەروەریی قبووڵ ناکرێت"، هەروەها داوا لە لایەنەکانی هەرێمی کوردستان دەکەن کار بۆ راگرتنی ئەو بڕیارە بکەن و ئاماژە بەوەدەدەن "پێکهاتەکان هەمیشە پارێزگارییان لە هەرێمی کوردستان و قەوارە دەستوورییەکەی کردووە. هەموو پێکهاتەکان بەیەکەوە هەوڵیان داوە هەرێمی کوردستان زیاتر بەرەو پێش ببرێت، هاوکات جەخت لە یەکپارچەیی خاکی عێراق کراوەتەوە، بەڵام بە داخەوە لەلایەن یەکێتییەوە سوکایەتیی بە پێکهاتەکان کراوە. بەداخەوە بۆ ئەو لایەنە سیاسییانەی دڵیان بە هەڵوەشاندنەوەی کورسی کۆتا خۆشە".

هاوڵاتی دوو شەپۆلی جیاوازی باران بارین ناوچە جیاوازەکانی هەرێمی کوردستان دەگرێتەوە و ئەگەری بارینی بەفر هەیە لە ناوچە شاخاوییەکان. پشتیوان ئیبراهیم، شاره‌زای كه‌شوهەوا بە هاوڵاتی راگەیاند "دوو شه‌پۆلی بارانبارین هه‌رێمی كوردستان ده‌گرێته‌وه‌ کە لە ئێوارەی دوێنێ یەکشەممەوە شەپۆلی یەکەم دەستیپێکردووە کە شەپۆلێکی بارانبارینی لاواز ناوچە جیاجیاكانی هەرێمی کوردستان دەگرێتەوە کە سەرچاوەی دەریای ناوەڕاستە و تاوەکو شەوی سێشەممەی داهاتوو بەردەوام دەبێت". ئاماژەی بەوەشکرد "شەپۆلی دووەم لە درەنگانی شەوی چوارشه‌ممه‌ 6ی ئازاری 2024 دەستپێدەکات کە باران دەبارێت و هەورە تریشقەی لەگەڵ دەبێت و شەپۆلەکە تاوەکو رۆژی 11ی 3ی 2024 بەردەوام دەبێت، هەروەها ئەگەری هەیە لە شەپۆلی دووەمدا بەفر لە ناوچە شاخاوییە بەرزەکانیش ببارێت".

هاوڵاتی لێپرسراوی زەڕەنگەرانی سلێمانی رایدەگەیەنێت گۆڕانکارییەکی زۆر لە نرخی زێڕ روویداوە و رووی لە بەرزبوونەوە کردووە، ئاماژە بەوەشدەکات بازاڕی زێڕ زۆر لاواز بووە و مامەڵەی کەمی پێوەدەکرێت. دلێر تاهیر، لێپرسراوی زەڕەنگەرانی سلێمانی بە هاوڵاتی راگەیاند "نرخی کیلۆیەک زێڕ شەش دفتەر و 63 وەرەقەیە، هەروەها نرخی یەک مسقاڵ زێڕی عەیاری 21 بەبێ هەقدەست 290 دۆلارە و نرخی عەیارە 18ش 249 دۆلارە". ئاماژەی بەوەشکرد "نرخی زێڕ گۆڕانکاری زۆری بەسەردا هاتووە و بۆ هەر کیلۆیەک 19 وەرەقە نرخەکەی بەرزبووەتەوە، هەروەها بازاڕی زێڕ لاوازە و بەهۆی ئەم بەرزبوونەوەیە مامەڵەی کەمی پێوەدەکرێت". بەپێی پیشبینییەکانی شارەزایان بێت، نرخی زێڕ تاوەکو کۆتایی ساڵی 2024 زیاتر بەرزدەبێتەوە، هۆکارە سەرەکییەکانی ئەو بەرزبوونەوەیەش بۆ کەمکردنەوەی سوودی بانکی و دابەزینی بەهای دۆلار دەگەڕێنەوە.  

هاوڵاتی محه‌مه‌د شه‌یاع سودانی سه‌رۆكی ئه‌نجومه‌نی وه‌زیرانی عێراق سه‌رۆكایه‌تی كۆبونه‌وه‌یه‌كی هێزه‌ سیاسییه‌ براوه‌كانی هه‌ڵبژاردنه‌كانی ئه‌نجومه‌نی پارێزگای كه‌ركوكی كرد و ماوه‌ی دو هه‌فته‌ دیاریكرا بۆئه‌وه‌ی بگه‌ن به‌ڕێكه‌وتن. به‌گوێره‌ی راگه‌یه‌ندراوێكی نوسینگه‌ی راگه‌یاندنی سه‌رۆك وه‌زیران، محه‌مه‌د شه‌یاع سودانی سه‌رۆكی ئه‌نجومه‌نی وه‌زیران ئێواره‌ی ئه‌مڕۆ یه‌كشه‌ممه‌ سه‌رۆكایه‌تی كۆبونه‌وه‌یه‌كی كرد كه‌ هێزه‌ سیاسییه‌ براوه‌كانی هه‌ڵبژاردنه‌كانی ئه‌نجومه‌نی پارێزگای كه‌ركوكی له‌خۆگرتبو،له‌ كۆبوونه‌وه‌كه‌دا جه‌خت له‌ به‌رده‌وامی گفتوگۆكردنی نێوان هێزه‌ سیاسییه‌كان  بۆ دیاریكردنی پارێزگارێك بۆ كه‌ركووك و گه‌یشتن به‌ كارنامه‌یه‌كی هاوبه‌ش كرایه‌وه. هه‌روه‌ها دوو هه‌فته‌ش دیاریكرا بۆ ئه‌وه‌ی پارێزگارێك و سه‌رۆكی ئه‌نجوومه‌نی پارێزگا بۆ كه‌ركووك دیاریبكرێت. هاوکات لە کۆبونەوەکەدا سوودانی رایگه‌یاند، گرنگه‌ گفتوگۆی نێوان هێزه‌ سیاسییه‌كان له‌ پێناو پاراستنی ئاشتی كۆمه‌ڵایه‌تی شاری كه‌ركووك به‌رده‌وام بێت. رۆژی ٢١ی شوباتی ٢٠٢٤ محەمەد شیاع سودانی، سەرۆک وەزیرانی عێراق لەگەڵ لایەنە براوەکانی کەرکوک کۆبووەوە و بڕیاردرا بە پێکهێنانی هاوپەیمانى ئیدارەدانى کەرکوک کە بەشێوەیەکى راستەوخۆ لەلایەن خودى سودانییەوە چاودێرى دەکرێت.  

هاوڵاتی کۆمسیۆنی باڵای سەربەخۆی هەڵبژاردنەکانی عێراق ڕایگەیاند لە (5)ی ئادارەوە هەر حیزب و لایەنێکی سیاسیی لە هەرێمی کوردستان کە دەیەوێت هاوپەیمانی دروست بکات دەتوانن ناوی خۆیان تۆمار بکەن . کۆمیسیۆنی باڵای سەربەخۆی هەڵبژاردنەکانی عێراق لە ئاگادارییە کدا ئەمڕۆ یەکشەممە دوای دیاریکردنی ڕۆژی هەڵبژاردن لە هەرێم ،دەرگای بۆ تۆمارکردنی حیزب و لایەنە سیاسیەکانی هەرێمی کوردستان کردەوە بۆ تۆمارکردنی هاوپەیمانێتی کە لە رێککەوتی (5)ی ئەم مانگە تا (14)ی ئەم مانگە دەبێت و بەهیچ شێوەیەک وادەکە درێژ ناکرێتەوە. دەشڵێت: پێویستە لایەنەکان بۆ تۆمارکردنی حیزب و لیستەکانیان سەردانی بارەگای کاروباری حیزب و رێکخراوەکان بکەن لە بەغداد یاخود ئۆفیسەکانیان لە هەرێمی کوردستان. بەگوێرەی ڕاگەیەنراوێكی سەرۆكایەتیی هەرێم، نێچیرڤان بارزانی سەرۆكی هەرێم فەرمانی هەرێمی بۆ دیاریكردنی ڕۆژی هەڵبژاردنی خولی شەشەمی پەرلەمانی كوردستان واژۆكردوەو لەفەرمانەكەدا،  بڕیاریداوە بەدیاریكردنی ڕۆژی 10ی 6ی 2024 بەوادەی ئەنجامدانی هەڵبژاردنی گشتی بۆ خولی شەشەمی هەڵبژاردنی پەرلەمانی كوردستان.   ئەمە لەكاتێكدایە پێشتر سەرۆكی هەرێم چەندجارێك وادەی ئەنجامدانی هەڵبژاردنەكەی دیاریكردوە، دوایین وادەش، ڕۆژی 25ی شوباتی ڕابردوو بوو، بەڵام بەهۆی ئەوەی كۆمسیۆنی باڵای هەڵبژاردنەكانی عێراق نەیتوانی لەكاتی خۆیدا، ئامادەكارییەكان بۆ هەڵبژاردنەكە تەواوبكات، كاتی ئەنجامدانی هەڵبژاردنەكە جارێكی دیكە دواخرا.  

هاوڵاتی لاهور شێخ جه‌نگی له‌په‌یامێكدا پێشوازی له‌دیاریكردنی واده‌ی هه‌ڵبژاردنی په‌رله‌مانی كوردستان ده‌كات و به‌شدارییکردنی  كارای خه‌ڵكی كوردستان له‌م هه‌ڵبژاردنانه‌دا،بە ده‌رفه‌تێكی زێڕین دەبینێت  بۆ" راستكردنه‌وه‌ی رێڕه‌وی حوكمڕانی له‌ كوردستاندا." لاهور شێخ جه‌نگی ئەمڕۆ یەکشەممە  له‌لاپەڕەی تایبەتی خۆی لە تۆڕی کۆمەڵایەتی فەیسبوک پەیامێکی بڵاوکردەوە و دەڵێت، "سه‌رئه‌نجام دوای چه‌ندجارێك دواخستن، سه‌رۆكایه‌تیی هه‌رێمی كوردستان به‌ هه‌ماهه‌نگی له‌گه‌ڵ كۆمیسیۆنی باڵای سه‌ربه‌خۆی هه‌ڵبژاردنه‌كان له‌ عێراق، رۆژی 10ی (حوزه‌یران/6)ی ئه‌مساڵی وه‌كو رۆژی هه‌ڵبژاردنی خولی شه‌شه‌می په‌رله‌مانی كوردستان دیاریكرد". راشیگه‌یاندوه‌، "له‌كاتێكدا پێشوازی له‌و بڕیاره‌ ده‌كه‌ین، هیوادارین ئه‌مه‌ دوا واده‌ بێت و له‌ژێر هیچ بیانویه‌كدا، هه‌وڵی دواخستن یان ئاسته‌نگ دروستكردن بۆ ره‌نگدانه‌وه‌ی ئیراده‌ی خه‌ڵكی كوردستان له‌سه‌ر سندوقه‌كانی ده‌نگدان نه‌درێت". هاوکات باسی لەوەشکردووە، کە " بەشداریی کارای خەڵکی کوردستان لەم هەڵبژاردنانەدا، دەرفەتێکی زێڕینە بۆ راستکردنەوەی رێڕەوی حوکمڕانی لە کوردستاندا. هاوکات گەڕاندنەوەی شانوشکۆی هەرێمی کوردستانە لە کۆمەڵگای نێودەوڵەتیدا، وەک گەلێکی زیندوو کە بڕیار لە چارەنووس و ئاییندەی خۆی دەدات" دەقی پەیامەکەی لاهور شێخ جەنگی: هاووڵاتیانی خۆشەویستی کوردستان ئەم کاتەتان باش. سەرئەنجام دوای چەندجارێک دواخستن، سەرۆکایەتیی هەرێمی کوردستان بە هەماهەنگی لەگەڵ کۆمیسیۆنی باڵای سەربەخۆی هەڵبژاردنەکان لە عێراق، رۆژی 10ی حوزەیرانی ئەمساڵی وەکو رۆژی هەڵبژاردنی خولی شەشەمی پەرلەمانی کوردستان دیاریکرد. لەکاتێکدا، پێشوازی لەو بڕیارە دەکەین، هیوادارین ئەمە دوا وادە بێت و لەژێر هیچ بیانوویەکدا، هەوڵی دواخستن یان ئاستەنگ دروستکردن بۆ رەنگدانەوەی ئیرادەی خەڵکی کوردستان لەسەر سندوقەکانی دەنگدان نەدرێ. لێرەدا تەئکید دەکەمەوە کە لە سۆنگەی باوەڕمان بە پرەنسیپەکانی دیموکراسییەت، مافی هەڵبژاردن و خۆهەڵبژاردن بنچینەی سیستەمە دیموکراسییەکانن و نابێ و ناکرێ کەس لێی بێبەش بکرێ. بەشداریی کارای خەڵکی کوردستان لەم هەڵبژاردنانەدا، دەرفەتێکی زێڕینە بۆ راستکردنەوەی رێڕەوی حوکمڕانی لە کوردستاندا. هاوکات گەڕاندنەوەی شانوشکۆی هەرێمی کوردستانە لە کۆمەڵگای نێودەوڵەتیدا، وەک گەلێکی زیندوو کە بڕیار لە چارەنووس و ئاییندەی خۆی دەدات. بەم بۆنەیەوە دوبارە داواکارم کە نوێکردنەوە و دەرهێنانی کارتی دەنگدان ئیهمال نەکەن و ئەوە وەک ئەرکێکی نیشتمانی سەیر بکەن. هەر بژین لاهور شێخ جەنگی

هاوڵاتی دوای تێپەربوونی زیاتر لە دوو مانگ بەسەر راگرتنی چالاکوانێکی ناحیەی شیلادزێ، ئەمرۆ بە تۆمەتی تێکدانی ئەمنییەتی ناوچەکە بە شەش مانگ زیندانی کردن سزادرا. شەوی ٢٣ لەسەر ٢٤ی مانگی ١٢ی ساڵی رابردوو عەباس ئاڤاشین، چالاکوانی دیاری ناحیەی شیلادزێ لەلایەن هێزە ئەمنییەکان دەستگیرکرا، داخاز ئەڤاشین، برای عەباس ئەڤاشین بە هاوڵاتی راگەیاند "دوای تێپەڕبوونی زیاتر لە دوو مانگ لەسەر راگرتنی براکەم، ئەمرۆ یەکشەممە دادگا بۆ ماوەی شەش مانگ زیندانیکردنی بەسەر عەباس-دا سەپاند". برای ئەو چالاکوانە وتیشی "براکەم لەسەر تێکدانی ئەمنییەتی ناوچەکە و کۆمەڵێک هۆکاری دیکە دادگایی کراوە ". عەباس ئاڤاشین، چالاکوانێکی شیلادزێ یە،هاوکات بۆ بژێوی ژیانی خۆی دوکانێکی فرۆشتن و دانانی تلستار لە سەنتەری شیلادزێ هەیە، دواین پۆستی عەباس ئاڤاشین لەسەر دۆخی خراپی کارەبا بووە کە بەر لەدەستگیرکردنی بە چەند رۆژێک نوسیوەتی "شەو و رۆژ نۆ کاتژمێر کارەبای نیشتیمانی هەیە". براکەی رەتیدەکاتەوە کە عەباس هەوڵی دابێت ئەمنییەت تێکبدات دەشڵێت "هەموو کەسێک باش براکەم دەناسن، ئەوەی ئەو کردوویەتی تەنها چەند رەخنەیەک بووە لەسەر دۆخی کارەبا، دواکەوتنی مووچە، کەمی خزمەتگۆزاری، لەکاتی بڵاوکردنەوەی پۆستێک لەسەر ئەم بابەتانە باسی هیچ کەسێکی دیاریکراو نەکردووە واتە تەشهیری هیچ کەسێک نەکردووه". ئاماژەی بەوەشدا "ئەوماوەیەی عەباس راگیراوە هەمووی بۆ حساب دەکرێت، دوای تەواوکردنی حوکمەکەی ئازاد دەکرێت، لەئێستادا لە ئاسایشی گشتی گواستراوەتەوه بۆ چاکسازی زرکا لە شاری دهۆک".

هاوڵاتی سەرۆکی هەرێمی کوردستان  فه‌رمانى هه‌رێمى بۆ دياريكردنى رۆژى هه‌ڵبژاردنى داهاتووى په‌رله‌مانى كوردستان واژۆ كرد. ئه‌مڕۆ يه‌كشه‌ممه‌ 2024/3/3  نێچيرڤان بارزانى، سه‌رۆكى هه‌رێمى كوردستان، فه‌رمانى هه‌رێمى بۆ دياريكردنى رۆژى هه‌ڵبژاردنى داهاتووى په‌رله‌مانى كوردستان واژۆ كرد، له‌ فه‌رمانه‌كه‌دا پاڵپشت به‌ بڕگه‌ى (دووه‌م) له‌ ماده‌ى (ده‌يه‌م) له‌ ياساى سه‌رۆكايه‌تيى هه‌رێمى كوردستان ژماره‌ (1)ى ساڵى 2005ى هه‌مواركراو، نێچيرڤان بارزانى بڕيارى داوه‌ به‌ دياريكردنى رۆژى 2024/6/10 به‌ واده‌ى ئه‌نجامدانى هه‌ڵبژاردنى گشتى بۆ خولى شه‌شه‌مى هه‌ڵبژاردنى په‌رله‌مانى كوردستان. به‌پێى فه‌رمانه‌كه‌ هه‌موو لايه‌نه‌ په‌يوه‌نديداره‌كان پابه‌ند ده‌بن به‌ ئه‌نجامدانى كارى پێويست بۆ هاوكارى و هه‌ماهه‌نگى له‌گه‌ڵ كۆمسيۆنى باڵاى سه‌ربه‌خۆى هه‌ڵبژاردنه‌كان بۆ جێبه‌جێكردنى ئه‌م فه‌رمانه،‌ هه‌ر ئه‌مڕۆش له‌ رۆژى ده‌رچوونييه‌وه‌ جێبه‌جێ ده‌كرێت.