وەزارەتی دارایی: مووچەی مانگی تەممووز خرایە سەر هەژمارەکەمان

هاوڵاتی ئەمڕۆ سێشەممە، بەهۆی کۆبوونەوەی ئۆپێک، نرخی نەوت بەرزبووەوە.  دوێنی، بەهۆی کردنەوەی رێڕەوی نۆکەندی سوێس و رزگارکردنی کەشتییەکە، نرخی نەوت دابەزی، بەڵام ئەمڕۆ بەهۆی کۆبوونەوەی ئۆپێک کە ئەگەر هەیە درێژ بە کەمکردنەوەی بەرهەمی نەوت بدات بەرزبووەوە. نرخی یەک بەرمیل نەوتی برێنت  65 دۆلار و یەک سەنتە؛ هەروەها یەک بەرمیل نەوتی تێکساسیش، بۆ 61 دۆلار و 62 سەنت بەرزبووەوە. بڕیارە پێنجشەممە، ئۆپێک کۆببێتەوە و بڕیاری نوێ لەبارەی بەرهەمی نەوت بدات، ئەمەش کاریگەری لەسەر نرخی نەوت دادەنێت. ئەگەر سعوودییە لەسەر هەڵوێستی زیادنەکردنی بەرهەم بەردەوام بێت، نرخی نەوت ئەگەری بەرزبوونەوەی هەیە.

هاوڵاتی میحوه‌ری باكوری حه‌شدی شه‌عبی رایگەیاند، هیچ زانیارییەکیان لەبارەی موشەکبارانکردنی میحوەری پردێی هێزی پێشمەرگە نیە کەشەوی رابردو لەسەر رێگای كه‌ركوك- هه‌ولێر کراوەتە ئامانج و حه‌شدی شه‌عبیش هیچ پەیوەندییەکی بەو بۆردومانەوە نیە, بەڵام باوەڕیان وایە "سەنگەرەکانی پێشمەرگە لەناوچەی بۆشایی ئەمنییەوە کراونەتە ئامانج". عه‌لی حسێنی، وته‌بێژی میحوه‌ری باكوری حه‌شدی شه‌عبی لەراگەیەنراوێکدا دەنگۆی تۆمەتبارکردنیان بە کردنەئامانجی میحوەری پردێی هێزی پێشمەرگە رەتدەکاتەوە و رایگەیاند، "نازانین بۆردومانه‌كه‌ لەلایەن چ لایه‌نێك یان لە کام شوێنەوە‌ ئه‌نجامدراوه‌".  ئاماژەی بەوەشکردوە، هێزەکانیان په‌یوه‌ندییان به‌و موشه‌كانه‌وه‌ نیه‌، بەڵام چاوەڕێ دەکرێت موشەکەکان لەو ناوچانەوە ئاڕاستەکرابن كه‌ بۆشایی ئه‌منی لەنێوان هێزەکانی پێشمەرگەکانی و هێزەکانی عێراقدا هەیە. وته‌بێژی میحوه‌ری باكوری حه‌شدی شه‌عبی جەختیش دەکاتەوە هێزەکانیان لێکۆڵینەوە دەکەن لەشوێن و ئەو لایەنانەی موشەکەکانیان ئاڕاستەی سه‌نگه‌ره‌كانی هێزی پێشمه‌رگه‌ کردوە. شەوی رابردوو سەرچاوەیەک لە وەزارەتی پێشمەرگەی هەرێمی کوردستان بەوێستگەنیوزی راگەیاند، سێ موشەک ئاڕاستەی بازگەی شێراوە و  میحوەری پردێی هێزەکانی پێشمەرگە لەرۆژئاوای پارێزگای کەرکوک کراون. ئاماژەی بەوەشکرد، بەگوێرەی زانیارییە سەرەتاییەکان لەئەنجامی کردنەئامانجی سەنگەرەکانی پێشمەرگە هیچ زیانێکی لێ نەکەوتووەتەوە و بەمەبەستی زانینی هۆکاری رووداوەکەش، بەرپرسانی  میحوەری پردێی هێزەکانی پێشمەرگە دەستیان بە لێکۆڵینەوە کردوە. کردنەئامانجی سەنگەرەکانی پێشمەرگە لەکاتێکدایە 15ی شوباتی ئەمساڵیش چەند موشەکێک بەر فرۆکەخانەی نێودەوڵەتی هەولێر و چەند گەڕەکێکی شاری هەولێر کەوتن، لە ئەنجامدا ژمارەیەک هاوڵاتی مردن و ژمارەیەکی زیاتریش برینداربوون.

هاوڵاتی کۆمسیاری کاروباری ناوخۆی یەکێتی ئەوروپا رایگەیاند پێویستە تورکیا "بەزووترین کات" دەست بە وەرگرتنی ئەو کۆچبەرانە بکاتەوە کە لە یۆنانەوە بۆی دەنێردرێن. رۆژی دووشەممە، یێلڤا جۆهانسن، کۆمسیاری کاروباری ناوخۆی یەکێتی ئەوروپا سەردانی دوورگەی لیزبۆسی یۆنانی کرد کە زیاتر لە هەشت هەزار پەناخواز تێیدا دەژین. جۆهانسن داوای لە تورکیا کرد ئەو کۆچبەرانە وەربگرێتەوە کە لە یۆنان دەگەڕێنەوە. هاوکات یۆنان داوا لە ئەنقەرە دەکات کە بە شێوەیەکی باشتر چاودێریی رێگرەیکانی کۆچبەری بکات و سەدان لەو کۆچبەرانەشی کە داوای پەنابەرێتییان رەتکراوەتەوە، دووبارە لە ئەسینا وەربگرێتەوە. بڕیارە هەفتەی داهاتوو ئورسۆلا ڤۆندەر لاین و چارلس میشێڵ، سەرۆکەکانی کۆمسیۆن و ئەنجوومەنی یەکێتیی ئەوروپا سەردانی تورکیا بکەن و لەگەڵ رەجەب تەیب ئەردۆغان، سەرۆکی ئەو وڵاتە بۆ تاوتوێکردنی پرسی کۆچبەران و پرسە هەرێمییەکانی دیکە کۆببنەوە. یێلڤا جۆهانسن، کۆمسیاری کاروباری نێوخۆی یەکێتیی ئەوروپا بەڵێنی دا بە تەرخانکردنی 326 ملیۆن دۆلار لە پارەی یەکێتیی ئەوروپا بۆ کەمپە نوێیەکانی سەر دوورگەکانی لیزبۆس، خیۆس، ساموس، کۆس و لیرۆس کە نزیکەی 14 هەزار کەس تێیاندا نیشتەجێ بوون. هەروەها گوتیشی، پێویستە وڵاتانی ئەندام لە یەکێتیی ئەوروپا بگەنە چارەسەری سیاسی بۆئەوەی ئەو ئەرکە لەنێوان خۆیاندا دابەشبکەن. جۆهانسن دەڵێت، "سێ ساڵە هیچ بەرەوپێشچوونێک لە دۆزینەوەی چارەسەرێکی سیاسیدا نەبووە". نۆتیس میتۆراچی، وەزیری کۆچی یۆنان بە هەمان شێوەی جۆهانسن، داوای لە ئەنقەرە کرد، ئەو 1450 کۆچبەرە وەربگرێتەوە کە مافی پەنابەرێتییان رەتکراوەتەوە.

هاوڵاتی مەزڵوم كۆبانێ رایگەیاند: هێزەكانیان ئۆپراسیۆنێكی ئەمنی و مرۆییان لەناو كەمپی هۆل بەمەبەستی دەستگیركردنی تیرۆرستانی داعش و پاراستنی هاووڵاتیانی سڤیل ئەنجامداوە. مەزڵوم كۆبانی فەرماندەی گشتی هێزەكانی سوریای دیموكرات عەبدی لەتویتێكدا كە لەهەژماری تایبەتی خۆی لەتۆڕی كۆمەڵایەتی تویتەر بڵاویكردوەتەوە سەرلەنوێ‌ داوای لەوڵاتانی جیهان كردوە هاووڵاتییەكانیان كەلەناو كەمپی هۆلدان و چەكداری سەر بەگروپی تیرۆرستی داعش بوون،  بیانگەڕێننەوە وڵاتەكانیان. فەرماندەی هێزەكانی سوریای دیموكرات داواش لەو وڵاتانە كردووە لەپێناو باشتركردنی رەوشی كەمپی ئەلهۆل و دەستەبەركردنی سەقامگیری، هاوكاری و پاڵپشتی پێشكەشی كەمپی ئەلهۆل بكەن. بەیانی دوێنێ‌ 28ی 3ی 2021، هێزەكانی ئاسایشی ناوخۆ لەرۆژئاوای كوردستان هەڵمەتێكیان لەدژی شانەكانی داعش لەناو كەمپی هۆل دەستپێكرد، توانییان ژمارەیەك تیرۆرستی داعش دەستگیربكەن كە ژمارەیەكیان پلە باڵایان لەناو ئەو گروپەدا هەیە.  هۆڵی ئەلهۆل بەگەورەترین كەمپ دادەنرێت لەجیهانداو زیاتر لە 40 هەزار كەسی تێدایە كە زۆربەیان كەسوكارو خێزانی ئەندام و چەكدارانی داعش بوون و ژمارەیەكی زۆریان هاووڵاتی بیانین و وڵاتەكانیان ئامادە نەبوون وەریانبگرنەوە.

هاوڵاتی بەرپرسی میحوەری رۆژئاوای کەرکووکی ھێزی پێشمەرگەی کوردستان  رایگەیاند سێ مووشەک ئاراستەی میحوەری پێنجی پێشمەرگە لە پردێ کران  "زیانی نەبووە"  ئەوان وەکو پێشمەرگە وەڵامدانەوەیان بۆ رووداوەکە هەبووە. کەمێک بەر لەئێستا  نووری حەمە عەلی بەرپرسی میحوەری رۆژئاوای کەرکووکی ھێزی پێشمەرگەی کوردستان رایگەیاند هاوکات نووری حەمە عەلی ئاماژەی بەوە کرد، نازانن لە کوێوە مووشەکەکان ئاراستەکراون و لە لێکۆڵینەوەکانیان بەردەوامن. هبەپێی بەدواداچونەکانی هاوڵاتی"گومان دەكرێت موشەكەكان هەر لە سنوری ناحییەكەوە ئاڕاستەی ئەو سەنگەرانەی پێشمەرگە كرابن و لێكۆڵینەوەیان تیادا دەكەین." ئەوەش لەكاتێكدایە كە رۆژی 15ی شوباتی ئەمساڵیش بە چەند موشەكێك هێرش كرایە سەر هەولێر و موشەكەكان لە فڕۆكەخانەو چەند گەڕەكێكی شارەكە كەوتنەخوارەوە.

هاوڵاتی ئەنجومەنی باڵای دادوەری عێراق دیاریکردنی هەر 9 ئەندامەکەی دادگای فیدڕاڵی راگەیاند و دادوەر جاسم جەزا، سەرۆکی دادگای تێهەڵچوونەوەی سلێمانی و دادوەر د. عەبدولڕەحمان سلێمان، سەرۆکی دادگای تاوانەکانی دهۆک وەک پشکی کورد لەدادگاکە دیاریکران. بە پێی راگەیەنراوی دادگای فیدراڵی عێراق سەرۆك و جێگری سەرۆک و ئەندامانی دادگای فیدراڵیی عێراق بەم شێوەیە:   1-  دادوەر جاسم محەممەد عەبود، سەرۆکی دەستەی سەرپەرشتیاریی دادوەریی بۆ پۆستی سەرۆکی دادگای باڵای فیدراڵی.   2-  دادوەر سەمیر عەباس، سەرۆکی دادگای تاوانی ئەنبار، جێگری سەرۆکی دادگا.   3- دادوەر غالب عامر، سەرۆکی دادگای تێهەڵچوونەوەی واست، ئەندامی رەسەن.   4-  دادوەر حەیدەر جابر، سەرۆکی دادگای تێهەڵچوونەوەی نەجەف، ئەندامی رەسەن.   5-  دادوەر ئەیوب عەباس، ئەندامی دادگای پێداچوونەوە، ئەندامی رەسەن.   6- دادوەر حەیدەر عەلی نووری، سەرپەرشتیاری دادوەری دەبێتە ئەندامی رەسەن.   7-  دادوەر خەلەف ئەحمەد، ئەندامی دەستەی تێهەڵچوونەوە لە دادگای تێهەڵچوونەوەی سەلاحەددین، ئەندامی رەسەن.   8- دادوەر د. عەبدولڕەحمان سلێمان، سەرۆکی دادگای تاوانەکانی دهۆک، ئەندامی رەسەن.   9- دادوەر جاسم جەزا، سەرۆکی دادگای تێهەڵچوونەوەی سلێمانی، ئەندامی رەسەن.    ئەندامی یەدەگ: 10- دادوەر عادل عەبدولڕەزاق، سەرۆکی دادگای تێهەڵچوونەوەی بەسرە، ئەندامی یەدەگی دادگاکە.    11-  دادوەر خالد تەها، سەرۆکی دادگای تێهەڵچوونەوەی کەرخ، ئەندامی یەدەگی دادگاکە.   12-  دادوەر مونز ئیبراهیم، ئەندامی دادگای پێداچوونەوە، ئەندامی یەدەگی دادگاکە.   13- دادوەر تاهر سلێمان، سەرۆکی دادگای نێوجەوانانی دهۆک، ئەندامی یەدەگی دادگاکە.

هاوڵاتی ئێوارەی ئەمڕۆ دووشەممە نێچیرڤان بارزانی سه‌رۆكی هه‌رێمی كوردستان گەیشتە پاریسی پایتەختی فەڕەنسا و بڕیارە لەگەڵ ئیمانیۆل ماکرۆن، سەرۆک کۆماری فەڕەنسا و بەرپرسانی دیکەی باڵای ئەو وڵاتەوە کۆببێتەوە. سەردانەکەی سەرۆکی هەرێمی کوردستان بۆ فەرەنسا بە بانگهێشتی فەرمیی ئیمانوێل ماکرۆن، سەرۆککۆماری ئەو وڵاتەیە.  سەرۆکایەتی هەرێمی کوردستان بەیانیی ئەمڕۆ راگەیێندراوێکی لەبارەی سەردانەکە بڵاوکردەوە و تێیدا هاتبوو، لە کۆبوونەوەی هەردوو سەرۆک بره‌ودان به‌ په‌يوه‌ندييه‌كانى هه‌رێمى كوردستان و عێراق له‌گه‌ڵ فه‌ره‌نسا، دۆخى عێراق، هه‌رێمى كوردستان و ناوچه‌كه‌ به‌گشتى، په‌تاى كۆڤيد_19 و لێكه‌وته‌كانى، مه‌ترسييه‌كانى تيرۆر و ئه‌ركى هاوپه‌يمانيى نێوده‌وڵه‌تى، گرنگيى هاوكارى و هاوبه‌شيى هه‌مه‌لايه‌نه‌ بۆ به‌ره‌نگاربوونه‌وه‌ى داعش و چه‌ند پرسێكى ديكه‌ى جێى بايه‌خى هاوبه‌ش تاوتوێ ده‌كه‌ن. دواجار ئێوارەی رۆژی چوارشەممە 10-7-2019 بوو کە نێچیرڤان بارزانی، سەرۆکی هەرێمی کوردستان گەیشتە کۆشکی ئیلیزێ و، لەلایەن ئیمانوێل ماکرۆن پێشوازی لێکرا و بۆ ماوەی نزیکەی کاژێرێک کۆبوونەوە.  

هاوڵاتی عێراق یاداشتێکی لێکتێگەیشتنی لەگەڵ کۆمپانیای تۆتاڵی فەرەنسی واژۆکرد، ئەوەش بەمەبەستی جێبەجێکردنی ژمارەیەک پرۆژەی گەورە و یەکێکیشیان پرۆژەیەکی تایبەت بە سوودوەرگرتن لە وزەی خۆرە بۆ بەرهەمهێنانی 1000 مێگاوات کارەبا کە تێچوەکەیان دەگاتە ٧ملیر دۆلارە. بەپێی راگەیێندراوێکی وەزارەتی نەوتی عێراق، رێککەوتنی سەرەتاییان لەگەڵ کۆمپانیای تۆتاڵ واژۆ کردووە، ئەوەش بۆ جێبەجێکردنی چوار پرۆژە. یەکەم پرۆژە بریتییە لە وەبەرهێنان لە کێڵگە نەوتی و گازییەکان لە خوارووی عێراق و چارەسەرکردنی کێشەی گازی دەرچوو. ئەم پرۆژەیە بە دوو قۆناخ جێبەجێ دەکرێت و دواتر توانای بەرهەمهێنانی 600 ملیۆن پێ سێجا وزەی دەبێت. یەکێکی دیکەیان پرۆژەی سوودوەرگرتنە لە وزەی خۆر بەمەبەستی بەدەستهێنانی وزەی کارەبا و چاوەڕوان دەکرێت 1000 مێگاوات کارەبا بدات. دوو پرۆژەکەی دیکەش بریتین لە پرۆژەی کێڵگەی ئارتاوی و پرۆژەی ئاوی دەریا. ئیحسان عەبدولجەبار، وەزیری نەوتی عێراق و سەرۆکی ئەنجوومەنی وەزاریی وزە رایگەیاند، وەبەرهێنانی پرۆژە نوێیەکان لەگەڵ کۆمپانیای تۆتاڵی فەرەنسی دەگاتە حەوت ملیار دۆلار. وەزیری نەوتی عێراق روونیکردەوە، ئەو پرۆژانەی جێبەجێ دەکرێن بۆ عێراق پێویستن؛ پرۆژەی یەکەم کە گرنگترینیانە بریتییە لە کۆکردنەوە و دەرهێنانی گاز لە تەواوی کێڵگەکانی دەرەوەی رێککەوتنی گازی بەسرە کە بریتین لە کێڵگەکانی (ئارتاوی، رۆژئاوای قورنە/2، مەجنوون، توبە، لحیس) کە بڕێکی زۆری گازیان تێدا دەسووتێت. بە گوتەی وەزیری نەوتی عێراق، رێککەوتن لەگەڵ تۆتاڵ کراوە بۆ هەبوونی ژمارەیەک دامەزراوە لەو کێڵگانە بە ئامانجی سوودوەرگرتن لە گازی دەرچوو. لای خۆیەوە، پاتریک بویانیە، بەڕێوەبەری جێبەجێکاری کۆمپانیای تۆتاڵ رایگەیاند، کۆمپانیاکەی گفتوگۆی لەگەڵ لایەنی عێراقی کردووە بۆ جێبەجێکردنی پرۆژەی وەبەرهێنان لە کەرتی گازدا و گوتیشی، پرۆژەی دیکەی گرنگ هەن، وەکو وەبەرهێنانی زیاتر لە کێڵگە نەوتییەکان و بەرهەمهێنانی وزەی کارەبا لەڕێگەی سوودوەرگرتن لە تیشکی خۆر و راشیگەیاند، واژۆکردنی رێککەوتنەکە هەنگاوێکی گرنگە. ماجد مەهدی حنتووش، وەزیری کارەبای عێراق رایگەیاند، رێککەوتنی سەرەتاییان لەگەڵ کۆمپانیای تۆتاڵ واژۆ کردووە بۆ جێبەجێکردنی پرۆژەی بەرهەمهێنانی 1000 مێگاوات لەڕێگەی وزەی خۆرەوە.

هاوڵاتی بریكاری وه‌زاره‌تی ناوخۆی حكومه‌تی هه‌رێم دەڵێت، "ئێمە گۆڕانکاری دەکەین و سڵ لە هیچ شتێک ناکەینەوە، لە هیچ کەسێکیش قبوڵ ناکەین دەست بە پۆستەکەیەوە بگرێت". چه‌تۆ ساڵح، بریكاری وه‌زاره‌تی ناوخۆی حكومه‌تی هه‌رێمی كوردستان له‌میانی ئاڵوگۆڕی پۆستی چه‌ند به‌ڕێوه‌به‌رێك له‌ ئیدارەی ڕاپەڕین وته‌یه‌كی پێشكه‌شكرد و وتی، "ئێمە گۆڕانکاری دەکەین و سڵ لە هیچ شتێک ناکەینەوە، لە هیچ کەسێکیش قبوڵ ناکەین دەست بە پۆستەکەیەوە بگرێت و بە هەندێک رەچاوکردن قۆرخی بکات و بیکاتە موڵکی خۆی، کورسی موڵکی کەس نیە موڵکی گشتییە". وتیشی، "وەکو وەزارەتی ناوخۆ لەگەڵ قوباد تاڵەبانی، جێگری سەرۆک وەزیران لەسەر خەتین و راوێژ دەکەین و لیژنەی تایبەت هەیە لەو شوێنانەی پەیوەندیدارن و هەرکەسێک کاندید دەکرێت بە کۆمەڵێک فلتەردا دەردەچێت و کەسی شیاو بۆ شوێنی شیاو دیاریدەکرێت، ئەمجارە ئەوەنیە کەسی فڵان ئینتیمای بۆ فڵان کەس هەبێت". به‌وته‌ی بریكاری وه‌زاره‌تی ناوخۆی هه‌رێم، "گۆڕینی بەرپرسیارێتی شتێکی سروشتییە و حاڵەتێکی بەردەوامە، گۆڕانکاری لە وەزارەتی ناوخۆ بەتایبەت لە بەشە سەربازییەکە پێوەری خۆی هەیە".

هاوڵاتی وەزارەتی تەندروستی حکومەتی هەرێمی کوردستان ئاماری 24 کاژێری رابردووی تایبەت بە ڤایرۆسی کۆرۆنای بڵاوکردەوە و دەڵێت، لەو ماوەیەدا 839 تووشبووی کۆرۆنا دەستنیشانکراون، 10 تووشبوو گیانیان لەدەستداوە و 352 تووشبووی پێشووی ڤایرۆسەکەش چاکبوونەتەوە. بەگوێرەی راگەیێندراوی ژمارە 397ی وەزارەتی تەندروستی، هەشت هەزار و 955 پشکنین کراوە، ئەنجامی 839 پشکنین پۆزەتیڤ بووە و زۆرترین تووشبوو لە دهۆک بووە و لە هەڵەبجەش هیچ تووشبوویەکی کۆرۆنا دەستنیشان نەکراوە. ئاماری گشتیی کۆرۆناش تاوەکو ئێستا بەمشێوەیە: ملیۆنێک و 368 هەزار و 177 پشکنین کراون، ئەنجامی 120 هەزار و 319 پشکنینیان پۆزەتیڤ بوون، سێ هەزار و 653 لەو تووشبووانە گیانیان لەدەستداوە و 108 هەزار و 835 تووشبووش چاکبوونەتەوە، هاوکات حەوت هەزار و 831 تووشبووش لەژێر چارەسەردان. دەقی راگەیێندراوی وەزارەتی تەندروستیی هەرێمی کوردستان: ڕاگەیاندراوی (٢٤) کاتژمێری تایبەت بە نەخۆشی ڤایرۆسی کۆڕۆنای نوێ   COVID19 ژمارە (٣٩٧) ١. پشکنین: (٨٩٥٥ پشکنینی نوێ)  • (٣٠٩٦) هەولێر • (١٧٣١) سلێمانی • (٣٤٦٦) دهۆك • (٠) هەڵەبجە • (٥٨٢) گەرمیان • (٨٠) ڕاپەڕین ٢. تووشبوو: (٨٣٩ تووشبووی نوێ) • (٢١٧) هەولێر • (٢٢٣) سلێمانی • (٣٦١) دهۆك • (٠) هەڵەبجە • (٣٣) گەرمیان • (٥) ڕاپەڕین ٣. چاکبوون: (٣٥٢ چاکبوون) • (٦٨) هەولێر • (٧٩) سلێمانی • (١٨٧) دهۆك • (٣) هەڵەبجە • (١٣) گەرمیان • (٢) ڕاپەڕین ٤. مردن: (١٠ مردن) • (٢) هەولێر • (٤) سلێمانی • (٢) دهۆك • (٠) هەڵەبجە • (٢) گەرمیان • (٠) ڕاپەڕین ئاماری گشتی: کەڕەنتین هاوڵاتی ٢١٨٧١ (٢١٨٧١ دەرچوو) پشکنین ١٣٦٨١٧٧ (٤٩٠٢٨٠ هەولێر، ٢٩٤٣٧٠ سلێمانی، ٥٧٥٧٩٣ دهۆك، ٧٧٣٤ هەڵەبجە) تووشبوون ١٢٠٣١٩ (٤٢٢٧٠ هەولێر، ٣٤٧٥٠ سلێمانی، ٤٠١٧٢ دهۆك، ٣١٢٧ هەڵەبجە) چاکبوون ١٠٨٨٣٥ (٣٨٠٤٤ هەولێر، ٣٠٧١٥ سلێمانی، ٣٧١٠٧ دهۆك، ٢٩٦٩ هەڵەبجە) لەژێر چارەسەر ٧٨٣١ (٣٢٣٥ هەولێر، ٢٢٩١ سلێمانی، ٢٢٩٠ دهۆك، ١٥ هەڵەبجە) مردن ٣٦٥٣ (٩٩١ هەولێر، ١٧٤٤ سلێمانی، ٧٧٥ دهۆك، ١٤٣ هەڵەبجە) بۆ زانیاری زیاتر سەردانی داشبۆردی حکومەتی هەرێمی کوردستان بکەن لەم لینکە (https://gov.krd/coronavirus/dashboard/). وێڕای دەستخۆشی بۆ پزیشکان و کارمەندانی تەندروستی و هەموو تیمەکانی پزیشکی کە لە ئەرکدان، جەخت دەکەینەوە هاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسك و دەستکێش، وە لەکاتی پێویستدا پەیوەندی بکەن بە هێڵی گەرمی ژمارە (١٢٢).  وەزارەتی تەندروستی حکومەتی هەرێمی کوردستان     ٢٩ی ئازار ٢٠٢١  

هاوڵاتی-عەمار عەزیز میرزا خەلەف، فەرماندەیەکی پێشمەرگەیە لەمەزارگای شەرەفەددین لەشەنگال بەهاوڵاتی وت: «دۆخی ئەمنی شەنگال رۆژ بەڕۆژ بەرەو خراپتر دەڕوات بەتایبەت لەڕووی ئەمنییەوە، هۆکاری سەرەکی ئەم نەئارامییە دەگەڕێتەوە بۆ جێبەجێنەکردنی رێککەوتنی بەغداوهەولێر، رێککەوتنەکە لەمانگی تشرینی یەکەمی 2020 ئیمزاکراوە، بەڵام تائێستا تەنها لەسەدا 10%ی جێبەجێ کراوە، ئەگەر بارودوخەکە هەر بەم شێوەیە بڕوات وهێزەکانی نزیک لەیەبەشە بەتایبەت ئاسایشی ئێزدیخان لەشەنگال دەرنەچێت رەنگە شەڕ دروست بێت لەنێوان هێزەکانی یەبەشەو سوپای عێراق کەئەوەش دەرئەنجامی زۆر خراپی لێدەکەوێتەوە». میرزا خەلەف وتیشی: « سوپای عێراق 1ی نیسانی وەک دوایین وادە داوەتە ئەنجومەنی خۆسەری دیموکرات بۆ کشانەوەی ئاسایشی ئێزدیخان لەناوەندی شار، بەپێی زانیارییەکانم هێزەکانی یەبەشە خۆیان ئامادەکردووە بۆ وەڵامدانەوەی هەرهێرشێکی سەربازی لەلایەن سوپای عیراقەوە بۆ سەر هێزەکانی ئەوان، یەبەشە و حەشدی شەعبی نایانەوێت رێککەوتنی بەغداو هەولێر جێبەجێ بکرێت، چونکە لەبەرژەوەندی ئەواندا نییە». «بەرپرسیارەتی شەڕو ئاڵۆزی دەکەوێتە ئەستوی یەبەشە و حەشدی شەعبی، ئەگەر شەڕ دروست بێت ژمارەیەکی زۆر لەئێزدییەکان دەبنە قوربانی و جارێکی تر هەموو ئەو خەڵکەی گەڕاوەتەوە شەنگال دووبارە دەگەڕێنەوە هەرێمی کوردستان» میرزا خەلەف وای وت. حەسو ئیبراهیم، جێگری ئەنجومەنی خۆسەری دیموکرات لەشەنگال بەهاوڵاتی وت: « لەکۆبوونەوەو گفتۆگۆی ئێمەو سوپای عێراق باسمان لەدوو داواکاری سەرەکی کردووە، کەئەوانیش نابێت هیچ هێزێکی بیانی لەچیای شەنگال جێگیربیت، لە 3ی ئابی 2014 نەمانهێشت چیایەکە بکەویتە دەست داعش و بەخوێن بەرگریمان کرد، خەڵکێکی زۆر چاندنیان کردووە و مایەی خێرو بەرەکەتە بۆ خەڵکەکە، دووەم نابێت ئاسایشی ئێزدیخان لەناوەندی شەنگال دەربکرێت». «سوپای عێراق دەیان جار بەئێمەی وتووە کێشەکان چارەسەردەکەین، بەڵام بەداخەوە بەڵێنەکانی خۆیان جێبەجێ ناکەن، لەئێستادا شتێکی نوێیان بۆ ئێمە زیادکردووە، ئەویش دەرکردنی هێزەکانی ئاسایشی ئێزدیخان و جێبەجێکردنی رێککەوتنی بەغداو هەولێر، کەئەوەش بەلای ئێمەوە مایەی قبوڵکردن نییە.» «بەرپرسانی عێراق لەبەرامبەر داواکارییەکانمان دوو روون، کاتێک کۆبوونەوەیان لەگەڵ دەکەین دەڵێن ئێوە شایەنی هەموو شتێکن و هەموو داواکارییەکانی ئێوە جێبەجێ دەکەین، بەڵام کاتێک کۆبوونەوە لەگەڵ لایەنێکی تر دەکەن هەڕەشە لەئێمە دەکەن، ئەگەر ئەوان بە زۆر رێککەوتنەکەی بەغداو هەولێر لەسەر خەڵکی شەنگال جێبەجێ بکەن، ئاڵۆزی لەنێوان سوپاو خەڵک دروست دەبێت، چونکە رێککەوتنەکە خزمەت بەخەڵکی ناوچەکە ناکات، بەبڕوای من ئەو رێککەوتنە فەرمانێکی ترە بەسەر ئێزدییەکان و لەژێر سێبەری یاسا» حەسو ئیبراهیم وای وت. حەسو ئیبراهیم وتیشی: « شەڕخواز نین و شەڕ لەگەڵ هیچ لایەنێک ناکەین، بەڵام ئەگەر لایەنێک هێرش بکاتەسەرمان و بیەوێت ئیرادەی خەڵکی شەنگال بشکێنێت رووبەڕووی دەبینەوەو بەهەموو شێوەیەک بەرگریی لەخۆمان دەکەین، سوپای عێراق لەچەند رۆژی رابردوو و ئێستاش لەبازگەگان زۆر خەڵک بێزار دەکەن، پشکنینەکانی خۆیان زۆر توند کردووە، ئەمەش وەک وەڵامێکه بۆ ئێمە کەدەیانەوێت خۆیان سەرپەرشتی تەواوی مەلەفی ئەمنی بکەن». ناتق ئەحمەد، وتەبێژی پۆلیسی قەزای شەنگال بەهاوڵاتی وت: «سوپای عێراق 1ی نیسان وەک دوایین وادە دەستنیشان کردووە بۆ دەرکردنی هەموو هێزە ناشەرعییەکان لەناوەندی شەنگال، پێویسته هەموو هێزەکان پێداگیری بەبڕیارەکە بکەن، ئەوەش بۆ ئەوەیە کەتاوەکو چیتر رێککەوتنی بەغداو هەولێر دوانەکەوێت و تەواوی بەندەکانی وەک خۆی جێبەجێ بکرێن». ناتق ئەحمەد، وتیشی: «باوەڕناکەم شەڕ دروست بێت، گفتۆگۆو دانوستاندن لەنێوان سوپاو هەموو هێزەکانی ناو شەنگال بەردوامن تاوەکو بگەنە رێککەوتن و کێشەکان لەناو خۆیاندا چارەسەربکەن».  

شاناز حەسەن چەند رۆژێكە مریشكی زیندوو لەبازاڕەكانی هەرێم بەڕێژەیەكی بەرچاو بەرزبووەتەوەو  بەرپرسانی ئەو كەرتە هۆكارەكەی بۆ بێ‌ پلانی كۆمەڵەی كێڵگە پەلەوەرییەكان و دابەزینی بەهای دیناری عێراقی دەگەڕێننەوە. لەئێستادا نرخی كیلۆیەك مریشكی زیندوو لەبازاڕەكانی هەرێم و عێراقدا لەسێ هەزارو (500) دینارو تاچوار هەزار دینار دەفرۆشرێت. خدر مەولود، پیاوێكی تەمەن (63) ساڵانەو خاوەنی چوار منداڵە، باس لەوەدەكات لەگەڵ بەرزبوونەوەی نرخی مریشك دووبارە باری سەرشانیان لەدابینكردنی پێداویستیی رۆژانەی خێزانەكانیان قورستر بووەو وتی» رۆژ بەڕۆژ پێداویستییەكان یەكە بەیەكە گرانتر دەبن، كەئەمەش وادەكات ئەرك و ماندووبوونەكە بۆ سەرشانی بەخێوكەری ماڵ زیاتر بێت». ئەم پیاوە كاسبكارەو رۆژانە بە (30) هەزار دینار كاردەكات، وتی: « چەندین خێزان هەیە كەگۆشتی سوریان بۆ ناكڕدرێت و مریشك بەكاردەهێنن، بۆیە ناكرێت دەست بنێنە بینەقاقای خەڵك و بزانن چ شتێك زۆر بەكاردەهێنرێت، ئەوە گران بكەن». پێویستی هەرێمی كوردستان بۆ بەكارهێنانی مریشك ساڵانە بۆ هەر تاكێك (24) كیلۆ گۆشتی مریشكە. عەبدوڵڵا حسێن، خاوەنی یەكێك لەكێڵگە پەلەوەرییەكانە لەسنوری پارێزگای سلێمانی و ئاماژە بەوە دەدات بەچەندین دەفتەر دۆلار قەرزارەو زیانێكی زۆری بەركەوتووە. عەبدوڵڵا حسێن، خاوەنی كێڵگەی پەلەوەری هەرین لەسلێمانی، لەلێدوانێكدا بەهاوڵاتی وت: « ماوەی هەشت ساڵە كێڵگەی پەلەوەریم  هەیەو مریشك بەخێودەكەم، هیچ كات بەوێنەی ئەم سێ ساڵە زیانم بەرنەكەوتووە، كەئێستا زیاتر لەدوو دەفتەر دۆلار قەرزار بووم». وتەبێژی كۆمەڵەی كێڵگە پەلەوەرییەكان"ئەم گرانبوونە كاتییەو ماوەی (20) رۆژی دیكە دەخایەنێت، چونكە جوجەڵەی (20) بۆ (25) رۆژی هەیە لەناو پڕۆژەكاندا، كەئەوانە گەورە بوون مریشك لەبازاڕدا زۆر دەبێتەوەو نرخەكان وەك پێشووتری لێدێتەوە" لەئێستادا لەهەرێمی كوردستان زیاتر لەهەزارو (625) پرۆژەی بەخێوكردنی پەلەوەر بەڕێگەی یاسایی هەیەو زیاتر لەهەزار پرۆژەی نایاسایش بوونیان هەیەو لەو رێژەیە زیاتر لە (850) پرۆژەی لەسنوری پارێزگای سلێمانی و هەڵەبجەدان. وتەبێژی كۆمەڵەی كێڵگە پەلەوەرییەكان دەڵێت:» دابەزینی بەهای دینار بەرانبەر بەدۆلار زۆر زیانی لێمان داوەو لەهەر (100) دۆلاردا بەتێكڕا (25) هەزار دینار زیانمان بەردەكەوێت، بۆیە ئەوە كاردەكاتە سەر بەرزبوونەوەی نرخی هەموو پێداویستییەكان و لەكۆتاییدا نرخی مریشك بەرزدەبێتەوە». نازم عەبدوڵڵا، وتەبێژی كۆمەڵەی كێڵگە پەلەوەرییەكان لەلێدوانێكدا بەهاوڵاتی وت:»بۆ كیلۆیەك گۆشتی مریشك (450) دینار زیانی دارایی لەسەر خاوەن كێڵگە پەلەوەرییەكان دەكەوێت، بۆیە نرخەكان لەهەموو عێراق بەرزبووەتەوەو خاوەن كێڵگەكان تووشی ئیفلاسی  هاتوون و هۆڵەكانیان داخستووە». وتەبێژی كۆمەڵەی كێڵگە پەلەوەرییەكان پێشیوابوو ئەم گرانبوونە كاتییەو ماوەی (20) رۆژی دیكە دەخایەنێت، چونكە جوجەڵەی (20) بۆ (25) رۆژی هەیە لەناو پڕۆژەكاندا، كەئەوانە گەورە بوون مریشك لەبازاڕدا زۆر دەبێتەوەو نرخەكان وەك پێشووتری لێدێتەوە. بەڕێوەبەری چاودێریی بازرگانی سلێمانی، ئاماژە بەوە دەدات بەرزبوونەوەی نرخی مریشك لەبازاڕدا بەهۆی دابەزینی بەهای دیناری عێراقییەوەیە بەرانبەر دۆلاری ئەمریكی. سۆران عەبدولڕەحمان، بەڕێوەبەری چاودێریی بازرگانی سلێمانی، لەلێدوانێكدا بەهاوڵاتی وت: «دابەزینی بەهای دیناری عێراقی بەرانبەر دۆلاری ئەمریكی كاریگەری زۆری هەبووە و هەموو بەرهەم و پێداویستییەكانی ئەو كەرتەی بەرزكردووەتەوە، بۆیە نرخی مریشك دووبارە بەرزبووەتەوە». ناوبراو ئاماژەی بەوەشكرد نرخی هەر كیلۆیەك مریشكی بەستوو (500) بۆ (750) دینار بەرزبووەتەوە، چونكە هەموو شتێك بەدۆلار دێتە هەرێمی كوردستانەوەو مامەڵەكان بەدۆلارن» بەرهەمی مریشك رۆژانە لەشارەكانی هەرێمەوە بەڕێژەیەكی زۆر بەرەو ناوەڕاست و خوارووی عێراق هەناردە دەكرێت، بەڵام هەركات لەناوخۆی هەرێمدا نرخی مریشك گەیشتە سێ هەزار و (500) دینار، واتە لەبازاڕەكاندا كەمبووەوە، هەناردەناكرێت و رادەگیرێت».

هاوڵاتی  بەرپرسانی یەکێتی ئەوروپا هەڕەشەی راگرتنی یەکجاریی پێدانی ڤیزا بە چەند وڵاتێک دەکەن یەكێك لەو وڵاتانە عێراقە.  رۆژنامەی دی وێڵت ئاشکرایکردووە، کۆمیسیۆنی ئەوروپا رەشنووسی لیستێکی ئامادەکردووە تاوەکو پێدانی ڤیزا بە چەند وڵاتێک لە رۆژهەڵاتی ناوەڕاست و ئەفریقا قەدەغە بکات. ئەگەرچی کۆمیسیۆن ناوی وڵاتەکانی هێشتا رانەگەیاندووە، بەڵام رۆژنامەکە لای خۆیەوە لە رێگای چەند سەرچاوەیەکەوە، ناوی 13 وڵاتی بڵاوکردووەتەوە، ئەوانیش: عێراق، ئێران، سووریا، لیبیا، سەنیگال، سۆماڵ، مالی، کامیرۆن، میسر، ئیسۆپیا، کۆنگۆ، ئێریتریا و گینیا بیاسو. شوباتی ئەمساڵ، یلڤا جۆناسۆن، کۆمیسیۆنەری کاروباری ناوخۆی ئەوروپا بڵاویکردەوە، لەگەڵ 39 وڵات هەماهەنگییان کردووە تاوەکو رێکاری نوێ بەرامبەر بە ئەو پەنابەرانە بگرنە بەر کە داوای پەنابەرێتییان رەتکراوەتەوە. یەکێکیش لە ئەگەرەکان، راگرتنی پێدانی ڤیزایە بەو وڵاتانەی هەماهەنگی لەگەڵ یەکێتی ئەوروپا ناکەن. ئەگەر بڕیارەکە ببێتە فەرمی، هەڵگرانی پاسپۆرتی عێراقی، ناتوانن داوا بۆ وەرگرتنی ڤیزای شنگن پێشکەش بکەن و بچنە ئەوروپا.

هاوڵاتی نێچیرڤان بارزانى، سه‌رۆكى هه‌رێمى كوردستان  به‌ بانگهێشتى ئیمانوێل ماكرۆن سه‌رۆکكۆمارى فه‌ره‌نسا، سه‌ردانى ئەو وڵاتە ده‌كات و سبه‌ى سێشه‌ممه‌ 30ی ئاداری2021 ، له‌ كۆشكى ئێلیزێ له‌ پاریس له‌گه‌ڵ ماکرۆن كۆده‌بێته‌وه‌. سەرۆکایەتی هەرێمی کوردستان بڵاویکردۆتەوە، "لە کۆبوونەوەی هەردوو سەرۆک بره‌ودان به‌ په‌یوه‌ندییه‌كانى هه‌رێمى كوردستان و عێراق له‌گه‌ڵ فه‌ره‌نسا، دۆخى عێراق، هه‌رێمى كوردستان و ناوچه‌كه‌ به‌گشتى، په‌تاى كۆڤید_19 و لێكه‌وته‌كانى گفتوگۆیان لەسەر دەکرێت. هەر بەپێی بڵاوکراوەکەی سەرۆکایەتی هەرێمی کوردستان لە کۆبوونەوەکەدا، "مه‌ترسییه‌كانى تیرۆر و ئه‌ركى هاوپه‌یمانیى نێوده‌وڵه‌تى، گرنگیى هاوكارى و هاوبه‌شیى هه‌مه‌لایه‌نه‌ بۆ به‌ره‌نگاربوونه‌وه‌ى داعش و چه‌ند پرسێكى دیكه‌ى جێى بایه‌خى هاوبه‌ش تاوتوێ ده‌كرێن". دواجار ئێوارەی رۆژی چوارشەممە 10-7-2019 بوو کە نێچیرڤان بارزانی، سەرۆکی هەرێمی کوردستان گەیشتە کۆشکی ئیلیزێ و، لەلایەن ئیمانوێل ماکرۆن پێشوازی لێکرا و بۆ ماوەی نزیکەی کاژێرێک کۆبوونەوە.

لاڤین مەحمود پارێزگاری سلێمانی ئاماژە بەوەدەدات كە دەسەڵاتیان داوەتە فەرمانگەكان بەهۆی بوونی كۆرۆناو دۆخی مووچەوە ئەو فەرمانبەرانەی هەیە بەسەر رۆژەكانی هەفتەدا دابەش بكرێن، بەڵام»نابێت ئیشی هیچ هاووڵاتییەك لەبەر ئامادەنەبوونی فەرمانبەر دوابكەوێت». كابینەی نۆیەمی حكومەتی هەرێم ماوەی شەش مانگە مووچە بەلێبڕینی لەسەدا 21% دابەش دەكات بەسەر مووچەخۆرانداو ئەوەش نیگەرانی لای فەرمانبەران دروستكردووەو ئامادەنین هەموو رۆژێك دەوام بكەن. بۆ چارەسەركردنی نەبوونی مووچەی تەواو حكومەتی هەرێم پەنای بردووەتە بەر (تەناوب) كە بەشێوەی نۆرە فەورمانبەران لەهەفتەیەكدا دوو رۆژ دەوام دەكەن لەجیاتی پێنج رۆژ. پارێزگاری سلێمانی: نابێت ئیشی هیچ هاووڵاتییەك دوابكەوێت هەڤاڵ ئەبوبەكر، پارێزگاریسلێمانی لەلێدوانێكیدا بەهاوڵاتی وت:» لەهەفتەیەكدا دووڕۆژ دەوامناكرێت، بڕیاری ئێمە لەڕۆژی یەكشەممە تا پێنجشەممە لەهەموو فەرمانگەكان دەوامی فەرمییە». ناوبراو وتیشی: «دەسەڵاتمان داوە بەبەڕێوەبەری ئەو فەرمانگانە لەو باردۆخەی پێشوودا كەمووچە لەكاتی خۆیدا دابەشنەكراو باردۆخی كۆرۆنا زۆر سەختبوو خەڵك نەیدەتوانی لەماڵ بێتە دەرەوە بەپێی ئەو میلاكاتەی كەهەیەتی كارمەندەكانی دابەشدەكات بەسەر ئەو رۆژانەدا بەمەرجێك نابێت ئیشی هیچ هاووڵاتییەك لەبەر دەوامنەكردن یان لەبەر ئامادەنەبوونی فەرمانبەر دوابكەوێت». بۆ خۆپارێزی لەڤایرۆسی كۆرۆنا حكومەتی هەرێم لەبەرواری یەكی ئازاری  2020 بڕیاریدا بەكەمكردنەوەی دەوامی فەرمانبەران و گشت فەرمانگەكان سەرپشك دەكرێن بەكەمكردنەوەی پابەندبوونی فەرمانبەران، بەدەوامی فەرمی جگە لەو ستافانەی كەپێویستە بۆ راپەڕاندنی كاری فەرمانگەكان. ئەندامێكی ئەنجومەنی پارێزگای سلێمانی: حكومەت هیچ پلانێكی نییە ئەندامێكی ئەنجومەنی پارێزگای سلێمانی دەڵێت:»دەوام بكرێت یان نەكرێت مادام حكومەت خزمەتگوزاری ناگەیەنێت بەهاووڵاتیان هیچ لەمەسەلەكە ناگۆڕێت، چونكە حكومەتێكی فاشیلە». ئەنوەر تاهیر، ئەندامی ئەنجومەنی پارێزگای سلێمانی، لەلێدوانێكدا بەهاوڵاتی وت: «ئەوەی هەیە لەفەرمانگاكان بەشێوەیەكی لێكراوە رۆژانە دەوام هەیە، بەڵام بەڕەچاوی كۆرۆناو قەیرانی دارایی حكومەت كەمووچەی نەداوە جۆرێك لەجۆرەكان ئاسانكاری بۆ فەرمانبەران كراوە». ناوبراو باسی لەوەشكرد هەموو رۆژەكانی هەفتە دەوام ئاسایی دەچێت بەڕێوە، بەڵام بەداخەوە حكومەتی هەرێم هیچ پلانێكی بۆ گەیاندنی خزمەتگوزاری بۆ هاووڵاتیان نیە. ئەو ئەندامەی ئەنجومەنی پارێزگای سلێمانی پێشیوابوو دەوام بكرێت یان نەكرێت مادام حكومەت خزمەتگوزاری ناگەیەنێت بەهاوڵاتیان هیچ لەمەسەلەكە ناگۆڕێت. وتیشی:»حكومەتی ئێمە حكومەتێكی فاشیلە، هیچ بیانویەكیان نیە چونكە ئەمانە ناتوانن خزمەتگوزاریی بۆ هاووڵاتیانیان دابین بكەن». شارەوانی سلێمانی: تەناوب كێشەی بۆ هاووڵاتیان دروستكردووە زەردەشت رەفیق، بەڕێوەبەری راگەیاندنی شارەوانی سلێمانی لەلێدوانێكدا بۆ هاوڵاتی ئاماژەی بەوەكرد وەك سەرۆكایەتی شارەوانی سلێمانی لەڕۆژی یەكشەممە دەوامیان هەیە تاڕۆژی پێنجشەمەو رۆژانی پێنجشەممان تایبەتە بەكۆبوونەوەی ئەنجومەنی شارەوانی سلێمانی. زەردەشت رەفیق وتیشی:»فەرمانبەر بەشێوەی (تەناوب) سەرە دەوام دەكات، فەرمانبەر هەیە بۆ ئەوەی نزیك نەبن لەیەكەوەو بەركەوتن نەبێت ئەگەر ژوورێك شەش كەس دەوامی تیابكات ئەو شەش كەسە بەسەرە دەوامی تێدا دەكەن». ناوبراو باسی لەوەشكرد بەدڵنیاییەوە»ئەم شێوازە كێشە بۆ مامەڵەی هاووڵاتیان دروستدەكات، بەڵام ئەم باری ئابووری هەم كۆرۆنا واپێویست دەكرێت بەم شێوەیە دەوامبكرێت». بەپێچەوانەی فەرمانگەی شارەوانی وەزارەتی كارەبا پێیوایە هیچ كێشەیەك بۆ مامەڵەی هاوڵاتیانیان دروست نەبووە. كارەبای سلێمانی: تەناوب كێشەی بۆ هاووڵاتیان دروست نەكردووە سیروان محەمەد، وتەبێژی وەزارەتی كارەبای سلێمانی لەلێدوانێكیدا بە هاوڵاتی وت: « حكومەتی هەرێم خۆی بڕیاریداوە دەوامكردن ‏٣٠% فەرمانبەرانە، ئەمە بەدەست فەرمانگاكان نیە لەپێناو تەندورستی كارمەندان و كەمكردنەوەی تێكەڵاوییە، ئێستا دەوام ئەكرێت بەڵام لە هۆبەیەكدا چوار كەسی تیادایە دەوامەكانیان دابەشكراوە هەفتەی دوو رۆژ دوو كەسیان دەوام ئەكات هەفتەكەی تر دووانی تر». هەروەها پێشیوابوو بڕوا ناكەم هیچ هاووڵاتییەك كێشەی هەبێت لەدەوامی تەناوبدا، چونكە دەبێت لەهەر بەشێك كارمەند هەبێت و نابێت چۆڵ بێت،»ئێمە هیچ كێشەیەكمان نیە، بەڵام هەندێك ئیش هەیە خۆی رۆتیناتی ئەوێت ئەگینا لەبەر دەوامكردن بڕواناكەم كێشە دروستبێت بۆ هاووڵاتیان رەنگە بەشێوەیەك لەشێوەكان هەیبووبێت بەڵام ئیتر ئەوە بڕیاری حكومەتە». بەڕێوەبەری گشتی باجەكان: دەوام ئاساییە كەمال تەیب، بەڕێوەبەری گشتیی باجەكان و خانووبەرەی میری لەوەزارەتی دارایی حكومەتی هەرێمی كوردستان لە لێدوانێكیدا بە هاوڵاتی وت» دەوام ئاساییە، بەڵام هەندێك فەرمانبەر (تناوب)سەرەیان پێدەكرێت، هەندێك فەرمانبەر تەندروستی باش نیە یاخود باری ئابووری باش نیە، هاوكاری دەكرێت». ناوبراو ئەوەشی روونكردەوە كەسروشتی سلێمانی هەروایە بەئاسانی قەناعەت بەخەڵكی سلێمانی ناكرێت، «بەڕێوەبەرایەتییەكانی سلێمانی فەرمانبەریان زیاترە، ئەگەر بەشێك لەفەرمانبەرەكانیش دەوام نەكەن  كێشەمان بۆ دروست نابێت».